Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Biblia ¿tlen techiluia?

 TLAMACHTIL 18

Jesús kichiua milagros

Jesús kichiua milagros

Jesús kiteititia ika imilagros ken kitekitiltis ichikaualis keman yeskia ueyi Tekiua

TOTAJTSIN Dios okimakak iKone chikaualis tlen amo okse tlakatl kipia tlen okikauili ma kichiua miak milagros, miakej itech yejuan okichi imixpan miakej tlaltikpaktlakamej. Ijkon, Jesús okiteititi ke uelis kitlajtlamis tlen nochipa kintlajyouiltia tlaltikpaktlakamej. Nikan nesi sekimej neskayomej.

Apistli. Ika achto milagro tlen okichi Jesús —atl okikuepki vino— okiteititi ke ueli kitemaka miak tlakual uan tlen se konis. Itech ojpa okimiaktili tlakual san ika sekimej panes uan michimej uan ijkon okintlamakak sapanoa miakej tlaltikpaktlakamej. Satepan otlakuajkej, ok omoka miak tlakual.

Kokolistli. Cristo okinpajti tlaltikpaktlakamej tlen tlajyouiayaj “itech nochi kokolistle iuan de nochi kualolistle” (Mateo 4:23). Okinpajti tlen amo tlachiayaj, tlen amo tlakakiaj, koxomej, tlen opalania innakayo uan tlen mimikiaj. Amo onkaya nion se kokolistli tlen amo ueli kipajtiaya.

Tlaxixinilmej tlen onka itech Tlaltikpak. Ipan se youak, ijkuak Jesús uan imachtijkauan okatkaj itech ueyi atl Galilea, opejki se ejekakiauitl chikauak. Imachtijkauan melauak omomojtijkej, uan Jesús oajkopantlachixki iluikak uan okilui ejekakiauitl: “¡Ximoketsa! ¡San xieto!”. San niman, ayakmo oejekakiauik (Marcos 4:37-39). Itech okse tonal onejnenki ipan atl ijkuak temomojti oejekakiaujtoka (Mateo 14:24-33).

Amo kualmej ejekamej. Nin espíritus, moixmatij ken demonios, okachi kipiaj chikaualis ke tejuan. Uan yokintlajyouiltijkej miakej tlaltikpaktlakamej, uan miakej amo ueli momakixtiaj itech yejuan. Maski ijkon, Jesús amo kinmakasia. Ixpan ye ouiuiyokayaj uan san niman kitlakamatiaj ijkuak kinnauatiayaj ayakmo ma kintlajyouiltikan tlaltikpaktlakamej.

Mikilistli. Ajsi tonal ijkuak tinochtin techajsi mikilistli tlen Biblia kitokayotia “saiktlami tokualankaita” (1 Corintios 15:26, NM). Maski ijkon, mikilistli amo okiketsalti Cristo, pampa okiyoliti ikone se iknosiuatl uan noijki se ichpochtli. Uan tlen okachi moixmati, oyek ijkuak okiyoliti iyolikni Lázaro, akin yokipiaya naui tonal omiktoka ijkuak Jesús okiyoliti imixpan miakej tlaltikpaktlakamej. Nochtin akinmej okitlauelitayaj okimatkej ke kipiaya miak chikaualis (Juan 11:38-48; 12:9-11).

Opanok kauitl uan tlaltikpaktlakamej tlen Jesús okinpaleui omokokojkej uan omikej. Ijkuakon, ¿tleka okichi Jesús non milagros? Otlapaleuijkej miak, pampa okiteititijkej ke tlajtolmej tlen okijtojkej teotlajtojkej itech Tekiuajkayotl mesiánico kema melauak. Ueyi Tekiua tlen okitlali toTajtsin Dios melauak kitlajtlamis apistli, kokolismej, tlaxixinilis tlen onka itech Tlaltikpak, demonios uan noijki mikilistli. Ken tikitaj, Jehová yokimakak miak chikaualis pampa ijkon kichiuas.

(Okisak itech amochtin Mateo, Marcos, Lucas uan itech Juan.)