Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Biblia ¿tlen techiluia?

 TLAMACHTIL 17

Jesús tetlapouia itech iTekiuajkayo toTajtsin Dios

Jesús tetlapouia itech iTekiuajkayo toTajtsin Dios

Jesús kinmachtia imachtijkauan itech miak tlamantli, maski ijkon, okachi kitematiltia itech iTekiuajkayo toTajtsin Dios

¿TLEKA ouala Jesús ipan Tlaltikpak? Ye ineuia okijto: “Noijki moneki niktematiltis itech oksekimej pueblojtin in kuale tlajtole [...] de kenik in Dios tlanauatia, porque por yonik oniualaj” (Lucas 4:43). Ma tikitakan naui tlamantli tlen Jesús otemachti itech nin Tekiuajkayotl, tlen okachi itech otetlapoui.

1. Jesús yetoskia ueyi Tekiua. Ye ineuia omotematilti ken Mesías (Juan 4:25, 26). Noijki, okijto ke ye yetoskia ueyi Tekiua tlen teotlajtojke Daniel okitak itech ikochtemikilis. Jesús okinmilui itlatitlaniluan ke se tonal motlaliskia itech “isilla tlen kipia ueyi mauisotlanex” uan sekimej kinpejpenaskia pampa inauak tlanauatiskiaj (Mateo 19:28). Nin nechikol okitokayoti ‘mach miakej ichkamejʼ. Noijki otlajto itech “oksekimej ichkamej” tlen amo pouiskiaj itech okse nechikol (Lucas 12:32; Juan 10:16).

2. ITekiuajkayo toTajtsin Dios tlanauatiskia ika melajkayotl. Jesús okijto ke Tekiuajkayotl kiyektlalis in tlamantli tlen okachi ueyititok: tlen okichi Satanás itech itoka toTajtsin Dios. ¿Ken kichiuaskia? Kichipauaskia itoka Jehová itech tlen kijtlakoa tlen omopeualti ijkuak amo tetlakamatkej itech Edén (Mateo 6:9, 10). Noijki, Cristo okiteititi ika tlen okichi ke itech Tekiuajkayotl amo akaj kichikoitaskej, pampa okinmachti tlakamej uan siuamej, tominyojkej uan tlen tlasojtij, amo san okinpejpenki. Uan maski okititlanke pampa kintlapouiskia israelitas, omochijchika pampa okinpaleui samaritanos uan oksekimej tlaltikpaktlakamej. Ye amo okatka ken teopixkamej tlen okatkaj itech non tonalmej, tlen san sekimej kinchiuiliayaj tlen kuali, san tlen yejuan kinekiaj.

3. ITekiuajkayo toTajtsin Dios amo pouiskia itech nin Tlaltikpak tlen kiyekantok Satanás. Jesús nemia ijkuak onkaya miakej ouijkayomej itech judíos, pampa okse altepetl otlanauatiaya. Maski ijkon, amo keman okitekauili ma kikajkalakikan iuan tekiuajkej (Juan 6:14, 15). Keman omotlapouijtoka iuan se tekiua, okijto: “Nej mach nitlanauatia nian ixko yin tlaltikpak” (Juan 18:36). Uan imachtijkauan okinmilui: ‘Namejuan mach anpouij iuan tlaltikpaktlakajʼ (Juan 15:19). Noijki, amo okinkauili ma moteuikan ika tepostli nion pampa kipaleuiskiaj ye (Mateo 26:51, 52).

“Jesús onemia itech miekej [...] pueblojtin, okitematiltijtinemia iuan otetlapouijtinemia de yen kuale tlajtole katlej temakixtia de kenik Dios tlanauatia.” (Lucas 8:1)

4. Cristo tlanauatiskia ika tlasojtlalistli. Jesús okijto ke kinyolseuiskia itech tlen kintekipachoayaj tlaltikpaktlakamej (Mateo 11:28-30). Uan ijkon okichi. Okinmakak kuali tlanojnotsalis itech tlen kintekipachoayaj, itech tlamantli tlen amo kipia ipati ken tomin, ken uelis mouikaskia innauak oksekimej uan ken kajsiskiaj pakilistli (Mateo, tlakotonaltin 5-7). Otetlasojtlaya uan nochtin ueli inauak motlapouiayaj. Maski akin okachi tlasojtiaya, kinekia yas kitati pampa kimatia kuali kiseliskia ika pakilis uan tlakaitalis. ¿Akin amo kinekiskia kipias se tekiua ijkon ken ye?

Okse tlamantli tlen okichi Jesús pampa kiteititi tlen kichiuaskia iTekiuajkayo toTajtsin Dios, okichi miakej milagros. ¿Tleka okichi? Ma tikitakan.

(Okisak itech amochtin Mateo, Marcos, Lucas uan itech Juan.)