Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Biblia ¿tlen techiluia?

 TLAMACHTIL 9

Israel kitlajtlani se ueyi tekiua

Israel kitlajtlani se ueyi tekiua

Achto ueyi tekiua, Saúl, amo kitlakamati Jehová. ToTajtsin Dios kichiua se tlajtolsenkaualis iuan akin kipatlaskia, David, uan kiluia ke itekiuajkayo amo keman tlamis

SATEPAN imikilis Sansón, okatka itech Israel se juez uan teotlajtojke tlen itoka katka Samuel. Israelitas kinekiaj yetoskej ken oksekimej altepemej, uan okiluijkej kinekiaj se ueyi tekiua. Maski Jehová okiyolkoko tlen okitlajtlanilijkej, okinauati Samuel ma kitlali Saúl ken ueyi tekiua. Ye okatka se tlakatl yolyamanki, maski ijkon, satepan omoueyineki uan ayakmo okitlakamatki toTajtsin Dios. Ik non, Jehová okixtopeuak Saúl uan okilui Samuel ma kitlali okse ueyi tekiua, se telpochtli tlen itoka katka David. Amo san niman tlanauatiskia, panoskia sekimej xiuitl.

Se tonal, ijkuak David okatka telpochtli okinmitato ikniuan, tlen okatkaj itech isoldados Saúl uan yejuan omoteuijtokaj. Ijkuak oajsito, yejuan soldados ouiuiyokatoyaj. ¿Tlen opanotoka? Se soldado filisteo uejkapantik tlen itoka katka Goliat okinpejpeualtijtoka uan moueyinekia ixpan soldados israelitas uan ixpan toTajtsin Dios. David okualanki uan okijto iuan moteuiskia maski mikiskia, maski okatka san se telpochtli. San okipiaya se matemekatl uan san sekimej temej, David omoixpanti iuan non soldado uejkapantik tlen okajxiliaya eyi metros. Goliat okiuejuetskili, uan David okinejmachti ke ye kitlaniskia, pampa moteuia ika itoka Jehová. San ika se tetl okimikti. Satepan okikixtili iespada uan okitekili itsontekon. Ijkuak oksekimej soldados filisteos okitakej tlen opanok, omomojtijkej uan ocholojkej.

Ueyi tekiua Saúl okipakti iyolchikaualis David uan okimakak se tekitl ken tlayekanke itech isoldados. Ken nochipa otlatlania nin telpochtli, ueyi tekiua opejki kikokolia. Pampa momakixtis, David ocholoj. Uan maski itech miak xiuitl ocholojtinemia, nochipa okatka yolmelajki inauak Saúl. ¿Tleka? Pampa okimatia ke Jehová okitlalijka ken ueyi tekiua. Opanok xiuitl, uan Saúl omiki itech se neteuilis. Ijkuakon, David omochi ueyi tekiua, ijkon ken Jehová okilui achto.

“Nikyektlalis itekiuajkayo tlen yetos nochipa.” (2 Samuel 7:13)

David kinekia kichijchiuas se teokali pampa Jehová. Maski ijkon, toTajtsin Dios okilui ke ye amo kichijchiuaskia. Akin kichiuaskia yetoskia se ikone: Salomón. Maski ijkon, Jehová okimakak David se ueyi tetliokolil: okimakak se tlajtolsenkaualis, uan okilui David ke itech ichanejkauan kisaskiaj ueyi tekiuajkej tlen amo yetoskiaj ken oksekimej. Uan noijki, itech kisaskia Temakixtiani tlen okijto toTajtsin Dios itech Edén. Ye oyeskia Mesías, kijtosneki, akin Jehová oKipejpenki, tlen kitlaliskia ken ueyi Tekiua itech iTekiuajkayo, se tekiuajkayotl tlen uejkauaskia nochipa.

Ika miak tlasojkamatilis, David okinechiko miak tlamantli tlen ika kichiuaskia teokali ken oro, plata uan oksekimej tlamantli. Noijki, ika iespíritu Jehová okijkuilo miakej salmos, noso tlakuikalmej tlen ika moueyichiua Jehová. Achto mikiskia, David okiueyichiuak Jehová ika nochi tlen okichi: “Iespíritu Jehová okitekitilti nokamak pampa ma nikijto itlajtol, okichi ma kisa itlajtol itech nokamak” (2 Samuel 23:2).

(Okisak itech 1 Samuel, 2 Samuel, 1 Crónicas, Isaías 9:7, Mateo 21:9, Lucas 1:32 uan itech Juan 7:42.)