Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Biblia ¿tlen techiluia?

 TLAMACHTIL 1

Akin oTlachijchi tetliokolia se xochitlal pampa tlaltikpaktlakamej

Akin oTlachijchi tetliokolia se xochitlal pampa tlaltikpaktlakamej

ToTajtsin Dios kichijchiua nochi tlen onka itech iluikak uan kitlalia nemilis ipan Tlaltikpak; kichijchiua se tlakatl uan se siuatl tlen amo kipiaj tlajtlakol, kintlalia ipan se xochitlal uan kinmaka tlanauatilmej

“ACHTO toTajtsin Dios okichijchi iluikak uan tlaltikpak.” (Génesis 1:1.) Ika nin tlajtolmej tlen okachi moixmati ijkon mopeualtia Biblia. Ika amo miak tlajtolmej uan tlen kualtsin mokaki, in Biblia technextilia: Jehová, in toTajtsin Dios akin kipia nochi chikaualis, akin oKichijchi nochi tlen onka itech Tlaltikpak. Niman techyekiluia, itech miak kauitl, tlen kitokanotsa tonalmej, Dios okiyektlali Tlaltikpak uan okichijchi nochi tlen kuakualtsin onka.

Itech nochi tlen okichijchi Jehová tlen okachi kipia ipati ye tlaltikpaktlakamej. In achto tlakatl okichijchi ika tlali. Okichijchi ken Ye tlachixtok, noso kijtosneki, uelis kipias itlasojtlalis, iixtlamatilis uan oksekimej iyelismej. Okitokayoti Adán uan okitlali itech se xochitlal, tlen okitokayoti Edén. Se xochitlal tlen okitlalij toTajtsin Dios uan tlen okipiaya miak kuajmej kualtsitsintin tlen okitemakayaj kuali tlakilotl.

Se tonal, toTajtsin Dios omokuayejyeko kimakas nin tlakatl se siuatl tlen kipaleuiskia. Ijkon, okitekitilti se iomisekuil Adán uan okichijchi Eva —in achto siuatl— uan okimakak ken isiua. Adán omoyolpakti miak uan okiyektlali se xochitlajtol tlen okijtoaya: “Axkan nin ye omitl itech noomiouan uan nakatl tlen nonakayo”. Biblia techyekiluia: “Ik non in tlakatl kikajteuas itata uan inana, pampa mosetilis iuan isiua uan yetoskej ken san se” (Génesis 2:22-24; 3:20).

Adán uan Eva monekia kitlakamatiskej ome itlanauatiluan toTajtsin Dios. Achto, kimaluiskiaj Tlaltikpak, kitekipanoskiaj tlali uan kipiaskiaj miakej ikoneuan. Uan okse, okatka se kuauitl tlen amo uelis kikuaskiaj itlakilol —san se kuauitl itech nochi xochitlal—: “kuauitl itech ixtlamatilis ipan tlen kuali uan tlen amo kuali” (Génesis 2:17). ¿Tlen opanoskia tla amo otetlakamatiskiaj? Mikiskiaj. Ipan melajka, ijkon ueliskia kiteititiskiaj kiseliayaj itlanauatiluan, kitlasojtlayaj uan melajka kitlasojkamatiayaj. Nochi kuali okatka pampa kuali kitlakamatiskiaj toTajtsin Dios. Amo kipiayaj tlajtlakoli, Biblia kijtoa: “Okitak toTajtsin Dios nochi tlen okichi uan, ¡xikita!, nochi kuali okatka” (Génesis 1:31).

(Okisak itech Génesis tlakotonaltin 1 uan 2.)