Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Biblia ¿tlen techiluia?

 TLAMACHTIL 21

Moyolitia Jesús

Moyolitia Jesús

Jesús kinmonextilia itlatitlaniluan pampa kinyolchikauas uan kinmakas oksekimej tlanauatilmej

IPAN eyi tonal satepan omiki Cristo, sekimej siuamej imachtijkauan oyajkej itech mikakoyoktli uan okajsitoj otlapotoka. Akaj okitlapo in mikakoyoktli, uan ayakmo itlaj kipiaya.

Ijkuakon, omonextijkej ome ángeles. Uan se okinmilui: “Namejuan ankitemoaj in Jesús [...] de Nazaret. ¡Yej yomoyolkuik!” (Marcos 16:6). San niman, siuamej okinmiluitoj itlatitlaniluan Jesús tlen opanok. Itech ojtli okinamikej Jesús uan okinmilui: “Amo ximomaujtikan. Xiuian xikinmiluitij nokniuan ma uian para Galilea, iuan ompa nechitajsij” (Mateo 28:10).

Satepan, ijkuak ome imachtijkauan Jesús okiskej itech Jerusalén uan oyayaj Emaús, se tlakatl tlen amo kixmatiaj okintlajtlani itech tlen motlapouiayaj. Ye okatka Jesús, yejuan amo okixmatkej pampa omoitaya ken okse tlakatl. Ika yolkokolis yejuan okinankilijkej ke omotlapouiayaj itech in Tlamachtijke, uan tlakatl okinyektlapoui nochi tlen okijtojka Escrituras itech Mesías. Melauak, Jesús okichi nochi tlen omoijto itech Mesías. * Ijkuak okimatkej ke omotlapouijtoka iuan Cristo, tlen axkan ye okatka se espíritu, Jesús san niman opoliuik.

Nin ome imachtijkauan Jesús omokuepkej Jerusalén uan okinmitatoj tlatitlaniltin, kanin omonechikojtoyaj otlatsaktoka. Ijkuak okintlapouijtoka tlen otlapanok, nochtin tlen ompa katkaj omotlajtlachialtijkej pampa Jesús omonexti oksepa. Okintlajtlani “¿Tlanik anmoijtitlapouiaj ipan namoyolo?”. Uan noijki okinmilui: “Ijkon kajki ijkuilitok, Nej niCristo onikpiaya por nimikini, iuan ipan eyi tonale nimoyolkuini oksemi” (Lucas 24:38, 46).

Ipan 40 tonalmej, miekpa okitakej Jesús. Itech se tonal, okitakej kanaj 500 tlaltikpaktlakamej. Uelis oyek itech non tonal ijkuak okinmilui imachtijkauan ma kichiuakan se tekitl tlen kipia miak ipati: “Xiuian iuan xikinmachtikan nochtin in tlakaj de ixko yin tlaltikpak para ma yekan nomomachtijkauan [...] iuan xikinmachtikan ma kichiuakan nochi tlan nej yonamechnauatij. Iuan xikelnamiktokan nik in Nej anmouan nietos nochi tonale asta ijkuak tlamis in tlaltikpak [tlamantli tlen onka itech]” (Mateo 28:19, 20).

Ijkuak Jesús saiktlami omonechiko iuan 11 itlatitlaniluan yolmelajkej, okinmilui: “Iuan nijkuak in espíritu santo uits [...], namejuan ankiresibiroskej ipoder iuan ankisaskej antetlapouitiuej de Nej [...] asta kan katej okachi uejka de ixko yin tlaltikpak” (Hechos 1:8). San niman, opejki tlejko iluikak, uan opoliuito ipan mixtli imixpan nochtin.

(Okisak itech Mateo tlakotonal 28, Marcos tlakotonal 16, Lucas tlakotonal 24, Juan tlakotonaltin 20 uan 21 uan itech 1 Corintios 15:5, 6.)

^ párr. 4 Tikinmajsis oksekimej neskayomej itech tlajtolmej mesíanicas tlen omochijkej itech Jesús itech tlamachtil 14, tlamachtil 15 uan tlamachtil 16 itech nin amatlajkuilol, uan noijki itech okseki tlamachtilmej “Mesías tlen omoijto ualaskia” itech amochtli ¿Tlen melauak tlamachtia Biblia?