Xikita nochi

Pampa tikitas okse menú

ITlaixpantijkauan Jehová

náhuatl del centro

¿Mitspaktiskia tikmatis tlen melauak itech ninmej tlajtlanilmej?

¿Mitspaktiskia tikmatis tlen melauak itech ninmej tlajtlanilmej?

¿TLEN tlajtlanilmej? Sekimej tlajtlanilmej tlen kipia miak ipati tlen miakej motlajtlaniaj. Uelis tejuatsin noijki timotlajtlania:

  • ¿Motekipachoa totech toTajtsin Dios?

  • ¿Tlamis se tonal guerras uan tlajyouilistli?

  • ¿Tlen techpanoa ijkuak timikij?

  • ¿Uelis oksepa tikinmitaskej tlen yomikej?

  • ¿Ken moneki ma timotlatlaujtikan pampa ma techkaki toTajtsin Dios?

  • ¿Ken uelis tikpiaskej yolpakilistli?

¿Kanin tiktemos intlanankilis ninmej tlajtlanilmej? Onkatej miakej amochtin tlen kijtoaj tlanankiliaj. Satepa ayakmo kitaj inpatij tlanankilismej uan oksekan kitemoaj.

Onka se amochtli tlen tlanankilia tlen melauak uan uelis se kineltokas. Jesucristo okijto ijkuak omotlatlaujti inauak toTajtsin Dios: “Motlajtol yen yon melauak” (Juan 17:17). Axkan moixmati non Tlajtoli ken Biblia. Ika tepitsin tlajtolmej nikan ijkuilijtok sekimej tlanankilismej itech tlajtlanilmej tlen achto yotikinmitakej, tlanankilismej melauakej tlen kitemaka Biblia uan tlen uelis se kineltokas.

 ¿Motekipachoa totech toTajtsin Dios?

¿TLEKA IJKON MOTLAJTLANIAJ? Onka miak tlajyouilistli uan amo onka melajkayotl. Miakej tlaneltokilismej temachtiaj ken titlajyouiaj pampa toTajtsin Dios ijkon kimonekiltia.

BIBLIA TLAMACHTIA. ToTajtsin Dios amo keman kichiua tlen amo kuali. Job 34:10 kijtoa: “¡Akin melauak toTajtsin Dios amo uelis kichiuas tlen amo kuali, akin Ueyititok amo kichiua tlen amo kuali!”. Ken toTajtsin Dios techtlasojtla, kichiuas itlaj kuakualtsin pampa tlaltikpaktlakamej, ik non, Jesús otechmachti ma tiktlajtlanikan itech tlatlaujtilistli: “ToPapan Dios katlej tejuatsin tikaj iluikak [...]. Ma ajsiki tonali ijkuak tikinnauatis nochtin in tlakaj. Ma mochiua tlan tikmonekiltia ixko yin tlaltikpak, ijkon ken tlan tikmonekiltia ma mochiua ompa iluikak” (Mateo 6:9, 10). ToTajtsin Dios melauak totech motekipachoa. Ik non, okichij itlaj tlen miak okiyolkokoj pampa ma mochiua tlen kimonekiltia (Juan 3:16).

Noijki xikintlajtolti Génesis 1:26-28; Santiago 1:13, uan 1 Pedro 5:6, 7.

¿Tlamis se tonal guerras uan tlajyouilistli?

¿TLEKA IJKON MOTLAJTLANIAJ? Itech guerras miakej miktokej. Uan tinochtin itlaj techtlajyouiltia.

BIBLIA TLAMACHTIA. ToTajtsin yokijto kitlalis yolseuilistli ipan tlaltikpak. Ijkuak tlanauatis toTajtsin Dios nikan ipan tlaltikpak, tlaltikpaktlakamej ayakmo “momachtiskej guerra”, uan noijki “kikuepaskej inespadas tlen ika tlameuaskej” (Isaías 2:4). Noijki, toTajtsin Dios kitlajtlamis nochi tlajyouilistli uan tlen amo melajtik. Biblia kijtoa tlen mochiuas pampa tlaltikpaktlakamej: “Dios kinmixayouajuatsas, iuan mach [noso amo] ok yetos mikilistle, nion chokilistle, nion neyolkokole, iuan nion tekokojkayotl, porke nochi tlan achtoj oyeka [ken tlajyouilistli uan tlen amo melajtik], yopanok” (Apocalipsis 21:3, 4).

Noijki xikintlajtolti Salmo 37:10, 11; 46:9, uan Miqueas 4:1-4.

¿Tlen techpanoa ijkuak timikij?

¿TLEKA IJKON MOTLAJTLANIAJ? Miakej tlaneltokilismej tlamachtiaj ken itlaj ok yoltok ijkuak tlaltikpaktlakamej mikij. Sekimej kijtoaj mikamej uelis itlaj amo kuali kintoktiskej tlen yoltokej, noso noijki kineltokaj ken toTajtsin Dios kintlajyouiltia tlen amo yolkualmej ma tlatlatokan ijtik tlitl.

BIBLIA TLAMACHTIA. Ijkuak timikij amo mokaua itlaj tlen yoltok. Eclesiastés 9:5 kijtoa “mikamej [...] ayakmo itlaj kimatij”. Mikamej ayakmo itlaj ueli kimatij, nion itlaj kimachiliaj, nion itlaj ueli kichiuaj, nion itlaj amo kuali kintoktiaj tlen yoltokej, nion ueli kinpaleuiaj (Salmo 146:3, 4).

Noijki xikintlajtolti Génesis 3:19 uan Eclesiastés 9:6, 10.

 ¿Uelis oksepa tikinmitaskej tlen yomikej?

¿TLEKA IJKON MOTLAJTLANIAJ? Tinochtin tiknekij tiyetoskej ika yolpakilistli innauak akinmej tikintlasojtlaj. Ik non, tiknekij tikinmitaskej oksepa tokalchanejkauan uan toyolikniuan tlen yomikej.

BIBLIA TLAMACHTIA. Miakej tlen yomikej oksepa moyolitiskej. Uan Jesús okijto: “Katlej toktokej kikakiskej notlajtol, uan kisaskej de ijtik inmikkakuyok” (Juan 5:28, 29). Tlen moyolitiskej nikan ipan tlaltikpak uelis nikan chantiskej uan kitaskej ken mochiuas xochitlali, ijkon ken kimonekiltijtok toTajtsin Dios. Kema, itech non kuakualtsin xochitlali, akinmej kitlakamatij toTajtsin Dios nochipa nemiskej uan ayakmo mokokoskej. Biblia kijtoa: “Yolmelauakej yetoskej itech Tlaltikpak, uan itech nemiskej nochipa” (Salmo 37:29).

Noijki xikintlajtolti Job 14:14, 15; Lucas 7:11-17, uan Hechos 24:15.

¿Ken moneki ma timotlatlaujtikan pampa ma techkaki toTajtsin Dios?

¿TLEKA IJKON MOTLAJTLANIAJ? Itech miakej tlaneltokilismej, tlaltikpaktlakamej motlatlaujtiaj. Maski miakej kineltokaj toTajtsin Dios amo kinnakilia.

BIBLIA TLAMACHTIA. Jesús okijto amo ma tikueptokan tlajtoli ijkuak timotlatlaujtiaj. Okijto ijkin: “Nijkuak anmotiotsajtsiliskej amo san ompa xikkueptokan in tlajtole” (Mateo 6:7). Tla tiknekij ma techkaki toTajtsin Dios, moneki ma timotlatlaujtikan ken ye kineki. Ik non, moneki ma timomachtikan tlen kimonekiltia uan ijkon timotlatlaujtiskej ken ye kineki. “Tla tiktlajtlaniliskej in Dios ken yen kimonekiltia, kuale tikmatij nik in ye techkakis”, techiluia 1 Juan 5:14.

Noijki xikintlajtolti Salmo 65:2; Juan 14:6, 14, uan 1 Juan 3:22.

¿Ken uelis tikpiaskej yolpakilistli?

¿TLEKA IJKON MOTLAJTLANIAJ? Sekimej kineltokaj tla kipiaskej miak tomin, noso tla miakej kinmixmatiskej uan kuakualtsin motaskej kipiaskej yolpakilistli, miakej non kitemoaj. Maski ijkon, amo kajsij yolpakilistli.

BIBLIA TLAMACHTIA. Jesús okijto ken melauak se yolpakis: “Ma pakikan akinmej kikakij itlajtol in Dios iuan kichiuaj tlen kinmiluia” (Lucas 11:28). Melauak tipakiskej tla tikchiuaj tlen okachi moneki: ma tikmatikan tlen melauak itech toTajtsin Dios uan tlen totech kimonekiltia. Nin melauak ijkuilijtok itech Biblia, uan tla tikixmatij techpaleuis ma tikmatikan tlen okachi ueyi ipati uan tlen amo. Ijkuak tikmokauiliaj ma techyekana Biblia itech tlen tikchiuaj, okachi tiyolpakiskej.

Noijki xikintlajtolti Proverbios 3:5, 6, 13-18 uan 1 Timoteo 6:9, 10.

 Ika tepitsin tlajtolmej yotikitakej ken tlanankilia Biblia itech nin chikuasen tlajtlanilmej. ¿Tikneki tikmatis okachi? Tla tejuatsin tikaj itech akinmej “kikakij itlajtol in Dios iuan kichiuaj tlen kinmiluia”, uelis okachi tiknekis tikmatis. Uelis timotlajtlania tleka kitekauilia toTajtsin Dios ma yeto miak tlajyouilistli uan kox melauak totech motekipachoa. Noso uelis tikneki tikmatis ken uelis okachi tiyolpakis iuan mokalchanejkej. Biblia kuali kinankilia ninmej uan oksekimej tlajtlanilmej tlen techyolseuiaj.

Miakej amo kiuelitaj momachtiskej Biblia. Kitaj se amochtli ueyi uan oui kajsikamatiskej. ¿Tikneki akaj ma mitspaleui tikajsis tlanankilismej tlen kitemaka Biblia? Ik non, itlaixpantijkauan Jehová mitsmakaj ome tlapaleuiltin.

Achto in amochtli ¿Tlen melauak tlamachtia Biblia?, omochi ma kinpaleuij tlaltikpaktlakamej —okachi tlen amo majxiliaj— ma kixmatikan itlanankilis tlajtlanilmej tlen kipia miak ipati tlen kitemaka Biblia. Uan tlen okse, uelis mitsmachtiskej ika Biblia ompa mokalijtik uan amo tiktlaxtlauas. Se itlaixpantij Jehová ika miak pakilistli uelis mitsmachtiti mokalijtik, noso kani tejuatsin tiknekis, uan ijkon chikometika timomachtis Biblia. Sapanoa miakej ijkon momachtijtokej, uan sekimej yolpakij miak pampa kajsij tlen melauak.

Tejuatsin noijki uelis tikmatis tlen kijtoa Biblia melauak uan kipia miak ipati. Amo san techkixtia itech naualotl, tlen tetlapololtia uan tlen temomojtia tlen kitemaka sekimej tlaneltokilismej tlen amo melauakej. Noijki techmaka itech tonemilis itlaj kuali tlen tikchiaskej, techmaka yolpakilistli uan kichiua ma timomachilikan kuali. Ineuian Jesús okijto: “Ankixmatiskej tlan melauak, uan yon tlan melauak anmechmakixtis” (Juan 8:32).