Xikita nochi

Pampa tikitas okse menú

ITlaixpantijkauan Jehová

náhuatl del centro

Carta tlen techmaka Cuerpo Gobernante 2017

Carta tlen techmaka Cuerpo Gobernante 2017

Tokniuan:

Yopanok kanaj 2600 xiuitl ijkuak teotlajtojki Ezequiel okinextilijkej itlaj tlen sapanoa tetlajtlachialti. Okitak se ueyi carro uan Jehová akin Ueyi Tekiua itech nochi semanauak okiyekanaya non carro. Pero okachi tetlajtlachialti ken omoliniaya carro. Sapanoa totoka omoliniaya ken se rayo uan ijkuak oyaya oksekan, amo omoketsaya nion omokuepaya (Ezeq. 1:4, 9, 12, 14, 16-27).

¿Tlen techilnamiktia tlen okitak Ezequiel? Itekipanojkauan Jehová tlen katej iluikak nochipa tekitij. ¿Uan itekipanojkauan tlen katej nikan Tlaltikpak? Tekitl tlen otikchijkej yisexiuitl kiteititia Jehová kichijtok totoka ma titekitikan.

Itech Estados Unidos, miakej tokniuan betelitas okatkaj Brooklyn pero ochantitoj Warwick (Nueva York), ompa kajki yankuik kali kanin kinyekanaj iTlaixpantijkauan Jehová uan sekimej betelitas ochantitoj itech okseki kalmej tlen pouij itech Betel. Oksekimej tokniuan oksekan okintitlankej ma tlapaleuitij. Itech okseki uejueyij altepemej, tokniuan betelitas chikauak tekitij para kinchijchiuaskej uan kinyektlaliskej kalmej kanin kinyekanaj iTlaixpantijkauan Jehová. Seki kalmej Betel okinsetilijkej uan sekimej tokniuan okintitlankej okseki altepemej. Maski miakej tokniuan amo yauij chantitiuij okseki altepemej, chikauak kitekichiuilijtokej Jehová.

Tokniuan tlen pouij itech Cuerpo Gobernante sapanoa yolpakij uan moyolchikauaj ijkuak kitaj tokniuan chikauak kitekichiuilijtokej Jehová itech nochi Tlaltikpak. Miakej tlapaleuiaj kanin okachi moneki ma motetlapoui. Oksekimej momachtijtokej okse tlajtoli para okachi tetlapouiskej noso tlatlamantli tetlapouiaj. Uan oksekimej okachi kitekichiuilijtokej Jehová. Noijki, nochtin tokniuan mochijchikauaj nemiskej ipan ojtli tlen kichiuas ma yoltokan nochipa, maski sekimej yikipiaj miak xiuitl noso mokokoaj. Chikauak kitekichiuiliaj Jehová uan ijkon kiteititiaj Satanás san tlakajkayaua (1 Cor. 9:24).

Jehová nochipa kita ken nankitekichiuiliaj uan amo keman kilkauas (Heb. 6:10). Nankichiuaj ken Abrahán uan Sara. Ijkuak Abrahán okipiaya kanaj 70 xiuitl, ye uan ikalchanejkauan okiskej itech altepetl Ur uan oyajkej Canaán. Ompa Abrahán miak xiuitl ochantik itech mantajkalmej hasta ijkuak omikik. ¡Ye uan isiua ika miak pakilistli okikajtejkej tlen okipiayaj! (Gén. 11:31; Hech. 7:2, 3).

Moneki ma timotlajtlanikan kox ijkon tikchijtokej. Itech ninmej tonalmej, nochtin akinmej  yolmelajkej kichijtokej tlen Jesús kineki ma tikchiuakan. Ye otechnauati: “Xiakan, uan ijkon, xikinchiuakan nomachtijkauan itech nochi altepemej, xikinapolaktikan itech itoka toTajtsin uan iKone uan espíritu santo” (Mat. 28:19TNM).

Jesús okijto: “Xiakan”, nin kijtosneki moneki titekitiskej. ¡Uan sapanoa tiyolpakij ijkuak tikitaj nochi tekitl tlen onankichijkej yisexiuitl! Non kiteititia Jehová kiteochijtok tetlapouilistli uan ye kichijtok ma mochiua nin tekitl (Mar. 13:10).

Miakej kiselijtokej tlen tlamachtia Biblia. Yisexiuitl 8,340,847 (ocho millones trescientos cuarenta mil ochocientos cuarenta y siete) tokniuan otetlapouijkej itech nochi Tlaltikpak uan 10,115,264 (diez millones ciento quince mil doscientos sesenta y cuatro) okinmachtijkej ika Biblia sejse metstli. Icarro Jehová amo moketsa, ¡nion namejuan! Xikchijtokan nin kuali tekitl porque ayakmo miak poliui uan Jehová kijtos akinmej momakixtiskej.

¡Melauak techpaleuia tlaxelol tlen motekitiltis nin xiuitl 2017! Ompa kijtoa: “Xitlaneltoka itech Jehová uan xikchiua tlen kuali” (Sal. 37:3). Tikteititiaj titlaneltokaj itech Jehová ijkuak tiktekichiuiliaj uan tikchiuaj tlen kuali. Ma tikilnamikikan amo toselti tikatej. Jesús okijto: “¡Xikitakan!, niyetok namouan nochi tonalmej hasta itlamian tonalmej” (Mat. 28:20TNM). ¡Ye nochipa kichiua tlen kijtoa!

Ma tikilnamikikan Jehová techteochijtos porque tiktekichiuilijtokej. Sekimej tokniuan amo ueli okachi kitekichiuiliaj pero ye kipatioita ijkuak timochijchikauaj tiktekichiuiliaj ika nochi inyolo. Tikyolpaktiaj Jehová ijkuak ijkon tikchiuaj (2 Cor. 9:6, 7). Ik non, nochipa ma timotlatlaujtikan, ma timomachtikan Biblia uan ma titetlapouikan ika miak pakilistli. Ijkon, okachi kuali timouikaskej iuan Jehová.

Satanás “kimatok mach ok wejkawitl nentinemis” uan kineki ma tikkauakan Jehová (Apoc. 12:12). Ye ok mochijchikauas para ma titlajtlakolchiuakan. Pero amo uelis kichiuas tla nochipa tikatej iuan Jehová (Sal. 16:8). Amo xikilkauakan timechtlasojtlaj ika nochi toyolo uan timechtlasojkamatiliaj nantechpaleuiaj ma tiktematiltikan iTekiuajkayo toTajtsin Dios itech itlamian ninmej tonalmej.

Namokniuan,

Cuerpo Gobernante tlen kipiaj iTlaixpantijkauan Jehová