Xikita nochi

Pampa tikitas okse menú

Tlen kiualika

ITlaixpantijkauan Jehová

náhuatl del centro

Monankiliaj 10 tlajtlanilmej tlen telpokamej uan ichpokamej kinmochiuiliaj

 TLAJTLANILISTLI 9

¿Moneki nikneltokas tiuitsej itech se yolkatl?

¿Moneki nikneltokas tiuitsej itech se yolkatl?

MIAK IPATI

Tla melauak tiuitsej itech se yolkatl, tlaltikpaktlakamej san mokuayejyekoskej yoltoskej san seki xiuitl. Pero ¿otineskej san pampa tiyoltoskej seki xiuitl? ¿Ken uelis tiyolpakiskej? Tla ikaj otechchijchi, uelis tikinnankiliskej tlajtlanilmej.

¿TLEN TIKCHIUASKIA?

Ximokuayejyeko itech nin tlamantli: Alex ayakmo kimati tlen mokuayejyekos. Kuali kimati toTajtsin Dios okichijchi nochi tlen onka. Pero akin kimachtia kijtoa akinmej ixtlamatkej kuali yokitakej tiuitsej itech se yolkatl. Alex amo kineki mopinatis inmixpan oksekimej uan mokuayejyekoa: “Tla akinmej ixtlamatkej kuali yokitakej tiuitsej itech se yolkatl, ¿akin ne pampa nikijtos non amo melauak?”.

Tla mitspanoskia ken Alex, ¿tikneltokaskia tiuitsej itech se yolkatl san pampa ijkon ijkuilitok itech amochmej?

XIMOKUAYEJYEKO

Sekimej tlaltikpaktlakamej, kineltokaj tiuitsej itech se yolkatl noso ikaj otechchijchi, pero amo ueli kiyekijtoaj tleka ijkon kineltokaj.

  • Sekimej kineltoka ikaj otechchijchi san pampa ijkon okinmachtijkej itech teopan.

  • Oksekimej kineltokaj tiuitsej itech se yolkatl san pampa ijkon okinmachtijkej itech escuela.

 CHIKUASE TLAJTLANILMEJ TLEN MONEKI TIMOTLAJTLANIS

Hebreos 3:4 kijtoa: “Nochi kali non tikitah, onka se akin okichijchi, pero nochi tlan onka ilwikak iwa ipan tlaltíkpaktli, Dios okichijchi”. ¿Tikita melauak tlen techiluia Biblia?

Tikijtoskej amo ika otechchijchi yetoskia ken tikijtoskej se kali iselti omochi.

TLEN KIJTOAJ: Nochi tlen onka itech semanauak omochi pampa itlaj otoponki, nin moixmati ken Big Bang.

1. ¿Ken omochi noso akin okichi Big Bang?

2. ¿Timokuayejyekoskej nochi tlamantli omochijchi iselti, noso ikaj otlachijchi?

TLEN KIJTOAJ: Tlaltikpaktlakamej uitsej itech se yolkatl.

3. Tla tlaltikpaktlakamej uitsej itech se yolkatl —se neskayotl, kijtoaj itech monos—, ¿tleka tejuan okachi tiixtlamatkej?

4. ¿Tleka itlaj tlen yoltok hasta tlen “sapanoa tsikitsin” kualtsin chijchijtok uan oui moajsikamati?

TLEN KIJTOAJ: Melauak tiuitsej itech se yolkatl.

5. Akin ijkon kijtoa, ¿melauak kuali yotlatemo?

6. ¿Keski tlaltikpaktlakamej kineltokaj tiuitsej itech se yolkatl san pampa ijkon kineltokaj ixtlamatkej?

“Ximokuayejyeko tio itech kuajyo uan tikita se kualtsin kali tlen chijchijtok ika kuauitl. Timokuayejyekoskia: ‘Uelis nikan ouetskej seki kuajmej, ik non, omochi nin kali’. Non amo uelis panos. Ik non, ¿moneki tikneltokaskej semanauak iselti omochijchi?” (Julia).

“Tla ikaj mitsiluiskia itech se imprenta itlaj otoponki uan tinta nochi oxitinki uan omochi se diccionario, ¿tikneltokaskia?” (Gwen).

 ¿TLEN TLAMANTLI KICHIUA MA NITLANELTOKA ITECH TOTAJTSIN DIOS?

Biblia techiluia ma tikpiakan ixtlamatilistli (Romanos 12:1). Nin kijtosneki, motlaneltokilis itech toTajtsin Dios amo san ma yeto itech:

  • TLEN TIKMACHILIA: “Nikmachilia kajki se chikaualistli tlen ueyititok”.

  • TLEN KINELTOKAJ OKSEKIMEJ: “Akinmej nouan katej tlaneltokaj itech toTajtsin Dios”.

  • TLEN OKSEKIMEJ KINEKIJ XIKNELTOKA: “Itech nokalijtik nechiluiaj moneki nitlaneltokas itech toTajtsin Dios”.

Okachi kuali, moneki yetos itlaj tlen kuali mitsyekiluis tleka ijkon titlaneltoka.

“Ijkuak akin tlamachtia techyekiluia ken tekiti totlalnakayo, okachi nitlaneltoka melauak kajki toTajtsin Dios. Nochi tlen totlalnakayo kipia, maski amo ueyi, kichiua kuali ma tekiti. Amo keman tikitaj tlen panoa ijtik totlalnakayo. ¡Sapanoa tetlajtlachialtia!” (Teresa).

“Ijkuak nikita se kali sapanoa ueyi, se barco noso se carro, nimotlajtlania: ‘¿Akin okichijchi?’. Se neskayotl, moneki ikaj ixtlamatki kichijchiuas se carro pampa miak tlamantli kipia, uan nochi moneki kuali yetos uan kuali tekitis. Tla se carro moneki ikaj kichijchiuas, noijki tlaltikpaktlakamej” (Richard).

“Ijkuak okachi kuali onikajsikamatiaya ciencia, ayakmo okachi onikneltokaya tiuitsej itech se yolkatl. [...] Nimokuayejyekoa okachi amo oui tikneltokaskej ikaj oTechchijchi, pampa okachi oui tikneltokaskej tiuitsej itech se yolkatl” (Anthony).

XIMOKUAYEJYEKO ITECH NIN

Maski akinmej ixtlamatkej kipiaj miak xiuitl momachtijtokej, tlatlamantli mokuayejyekoaj itech ken uelis otiualajkej itech se yolkatl. Tla yejuan tlatlamantli mokuayejyekoaj itech non tlamantli —uan yejuan ixtlamatkej—, ¿amo uelis te timokuayejyekos kox melauak tiuitsej itech se yolkatl?