Xionyoui kampa nesi tein kipia

Moteixmatiltia tein tamachtia Biblia itech tajtolmej tein motajtouaj ompa Irlanda uan Gran Bretaña

Moteixmatiltia tein tamachtia Biblia itech tajtolmej tein motajtouaj ompa Irlanda uan Gran Bretaña

Tiitaixpantijkauan Jiova timochikauaj tikinnojnotsaskej nochin akin tajtouaj tataman tajtolmej ompa Irlanda uan Gran Bretaña. Ompa, amo sayoj motajtoua inglés, ta no gaélico escocés, galés uan irlandés.

Itech metsti septiembre xiuit 2012, motalij se yankuik taman itech jw.org itech Internet kampa timoteixmatiltiaj itech miak tataman tajtolmej, kemej irlandés uan galés. Tajtol gaélico escocés motalij itech metsti agosto xiuit 2014. Uan no, mokixtiaj miak amaixmej itech nejon tajtolmej. ¿Keniuj tapaleuiani nejin tein mochiuak?

Se akin taixyekana itech se tiopan kiselij se tratado tein ika tajtoua Biblia itech tajtol gaélico escocés uan keman kiixtajtoltij peuak choka. ¿Keyej chokak? Kemej semi kimoujkaitak ke tel kuali kitajtolkepkaj, kijtoj: “¿Akoni kitajtolkepak nejin? ¡Semi kuali!”.

Itech yekinika metsti kemej 750 kitemojkej jw.org itech tajtol gaélico escocés.

Ompa Galway, se akin tamachtia itech Universidad Nacional de Irlanda, kiniluij seki itaixpantijkauan Jiova ke amo kinekia pouis itech nion se taneltokalis. Sayoj ke, keman kimatik ke ueliskia kipias folleto Biblia ¿Toni ika tajtoua? itech tajtol irlandés, tajtanik maj kimakanij se. Kijtoj ke nochin monekia kipiaskej amaixmej tein ika tajtouaj Biblia itech inintajtol uan kiniluij itaixpantijkauan Jiova ke semi kuali tein kichiuaj porin kikixtiaj amaixmej tein kiajsikamatij akin tajtouaj irlandés.

Se siuat xiuejya kitelyolpaktij maj itaixpantijkauan Jiova kimakanij se folleto itech tajtol galés. Yejua kijtoj: “Tein melauj, komo nechmakaskiaj itech tajtol inglés, amo nikseliskia. Sayoj ke semi nikuelita porin ijkuiliujtok itech notajtol”.

Itech metsti agosto xiuit 2014 itech jw.org motalijkej okachi amaixmej itech tajtol galés. Itech nejon metsti, okachi miakej kalakkej itech internet kampa timoteixmatiltiaj uan kiixtajtoltijkej amaixmej itech nejon tajtol.

“Titajtouaj sayoj se taman tajtol”

Se tonal, satepan ke Jesús uejkauak tajtoj iniuan ome imomachtijkauan ika iTajtol Dios, yejuan yolpakkej uan kijtojkej: “Semi tiyolpaktiualayaj tech in ojti [...] kuak in Jesús technojnotstiualaya uan techajsikamatiltijtiualaya den Tajtoltsin Dios” (Lucas 24:32). Keman taltikpakneminij kinmachtiaj tein kijtoua Biblia itech inintajtol, okachi kiajsikamatij tein kijtoua uan kipataj kemej monejnemiltiaj.

Emyr, se takat akin nemi Gales, akin inamik se itaixpantijkauj Jiova, amo keman kiyolnotsani itaneltokalis inamik. Sayoj ke keman peuak kuali mouika iuan Rusell, se itaixpantijkauj Jiova, kipatak itanemilil. ¿Keyej? Yejua kijtoj: “Niknemilij nimomachtis Biblia iuan Rusell keman nechmakak amatajkuilol ¿Toni yekmelauj tamachtia Biblia? uan nechiluij: ‘Nejin amatajkuilol ijkuiliujtok itech tajtol galés, uan axkan timosenmachtitij’”. * ¿Keyej Emyr kiyolnotsak momachtis? Yejua kimelauak: “Tiomen titajtouaj sayoj se taman tajtol, sayoj seko tikayomej uan timoajsikamatij”. Keman Emyr momachtiaya Biblia itech tajtol galés ajsia itech iyolo porin kuali kiajsikamatia.

Itaixpantijkauan Jiova kisentokaj kinpaleuiaj taltikpakneminij maj kiajsikamatikan tein tamachtia Biblia itech inintajtol, tajtol tein ajsi itech ininyolo.

^ párr. 11 Itech nejin tamachtilis tikuikej Gran Bretaña keman ika titajtojkej Escocia, Gales, uan Inglaterra.

Se amaix tein ika tamachtiaj Biblia itaixpantijkauan Jiova.