Xionyoui kampa nesi tein kipia

¿Keniuj mochiua nemachtil ika Biblia tein kitemakaj itaixpantijkauan Jiova?

¿Keniuj mochiua nemachtil ika Biblia tein kitemakaj itaixpantijkauan Jiova?

Ika nemachtil ika Biblia tein kitemakaj itaixpantijkauan Jiova monankilia netajtanilmej kemej nejin:

  • ¿Akoni Dios?

  • ¿Yekmelauj Dios kiita tein nechpanoua?

  • ¿Keniuj uelis okachi kuali nimouikas iuan nonamik?

  • ¿Keniuj uelis tiyolpakiskej?

Nikan moajsi seki itanankililuan netajtanilmej tein okachi mochiuaj ika nemachtil tein tiktemakaj.

¿Keniuj titamachtiaj? Tikitaj Biblia ika tataman tamachtilismej. Kemej neskayot, komo timomachtijtokej akoni Dios (oso keniuj moneki mouikaskej namikuanij), tikitaj sayoj tajkuilolmej tein kimelauaj nejon taman. Keman tikixtajtoltiaj tataman tajkuilolmej, ueli tikitaj tein kijtoua nochi Biblia ika se taman, uan komo amo tikajsikamatij se tajkuilol, iselti techajsikamatiltia tein kijtosneki.

Keman titamachtiaj tikuij amaix ¿Toni yekmelauj tamachtia Biblia?, porin tel tapaleuia. Kuali kimelaua tein Biblia kijtoua ika Dios, Jesús, tein mochiuas satepan uan okseki taman.

¿Moneki nikixtauas nemachtil? Amo, uan amo tiknamakaj amaixmej tein ika titamachtiaj.

¿Kanachi hora moneki nimomachtis? Miakej momachtiaj kemej se hora chijchikueyitika, sayoj ke amo nochipa ijkon. Tionmomachtis ijkon kemej tejuatsin tionuelis.

¿Toni panos komo nitajtani maj nechmachtikan ika Biblia? Se itaixpantijkauj Jiova mitsonkalpanos itech tonal uan kampa tejuatsin tionuelis uan ijkon mitsonnextilis keniuj mochiua nemachtil. Komo tikonuelita uan tikonneki tikonsentokas, nejon tokniuj ika miak pakilis oksepa mitsonkalpanos.

Komo nikselia se nemachtil ika Biblia, ¿moneki nimochiuas itaixpantijkauj Jiova? Amo. Tiitaixpantijkauan Jiova ika miak pakilis tikinmachtiaj ika Biblia oksekin, uan amo tikinchikaujkauiaj maj pouikan touan. Okachi kuali, ika nejmachkayot tikinmelauiliaj tein Biblia tamachtia, uan amo tikelkauaj ke yejuan kiixpejpenaj tein kineltokaskej (1 Pedro 3:15).