Xionyoui kampa nesi tein kipia

Itaixpantijkauan Jiova, ¿kinchikaujkauiaj oksekin maj kipatakan inintaneltokalis?

Itaixpantijkauan Jiova, ¿kinchikaujkauiaj oksekin maj kipatakan inintaneltokalis?

Amo, tejuan amo akin tikchikaujkauiaj maj kipata itaneltokalis. Tein melauj amaix Tanejmachtijkej tein okachi tikmoyauaj, kijtoj: “Se kinchikaujkauis taltikpakneminij maj kipatakan inintaneltokalis amo kuali yetok” *. Uan amo tikchiuaj porin:

  • Jesús amo keman kinchikaujkauij taltikpakneminij maj kiselikan tein tamachtiaya. Yejua kimatia ke amo miakej kikakiskiaj itamachtilis (Mateo 7:13, 14). Se tonal, keman seki imomachtijkauan kikaujkej porin amo kiselijkej se taman tein tamachtij, yejua kinkauak maj yakan, amo kinchikaujkauij maj mokauakan (Juan 6:60-62, 66-68).

  • Jesús kiniluij itatojtokakauan ke amo monekia maj kinchikaujkauikan taltikpakneminij maj kipatakan inintaneltokalis. Ta, monekia mochikauaskej kintemoskej akin kinekiskiaj kikakiskej kuali tanauatilmej (Mateo10:​7, 11-​14).

  • Se kipatas se itaneltokalis porin techikaujkauiaj amo tapaleuia nion tepitsin. Dios kineki maj taltikpakneminij kiueyichiuakan ika nochi ininyolo, amo porin aksa kinchikaujkauia (Deuteronomio 6:​4, 5; Mateo 22:37, 38).

¿Senkis kitemouaj itaixpantijkauan Jiova maj oksekin mochiuakan itatojtokakauan Cristo?

Tejuan tikteixmatiltiaj tein kijtoua iTajtol Dios “nonouiyampa de nochi senmanauak” uan tikchiuaj senteixtenoj uan kajkalpan, ijkon kemej kijtoua Biblia (Hechos 1:8; 10:42; 20:20). Ijkon kemej kinpanok yekinika itatojtokakauan Cristo, kemansa kijtouaj ke tikinchikaujkauiaj oksekin maj mochiuakan itaixpantijkauan Jiova (Hechos 18:12, 13). Sayoj ke, nejon amo melauak. Tikmatij ke sejse taltikpaknenkej kinamiki maj kiixpejpena toni kineki kineltokas. Tein sayoj tiktemouaj yejua maj taltikpakneminij kiixmatikan tein Biblia kijtoua uan ijkon ueliskej kiixpejpenaskej se taneltokalis.

Amo tikinchikaujkauiaj oksekin maj kiselikan tein tikneltokaj. Nion no tikuij tein tikneltokaj uan ika tikteixmatiltiaj política, nion tiktemakaj tomin oso okse taman tein ika tikchiuaj maj taltikpakneminij mochiuakan itaixpantijkauan Jiova. Amo timochiuaj kemej akin kijtouaj ke kitojtokaj Cristo, sayoj ke amo kichiuaj tein yejua tamachtij. *

¿Uelis aksa kipatas itaneltokalis?

Kemaj, Biblia kinextia ke miakej taltikpakneminij kiixpejpenkej kiueyichiuaskej Dios akin melauak uan amo kitojtokakej inintaneltokalis inintatuan. Yejua nejon tein kichiujkej Abrahán, Rut, sekin akin nemiaj Atenas uan tatitanil Pablo (Josué 24:2; Rut 1:​14-​16; Hechos 17:22, 30-​34; Gálatas 1:​14, 23). Uan no, Biblia kinextia ke sejse uelis kiixpejpenas ox kisentokas itech taneltokalis tein melauak oso kikauas (1 Juan 2:​19).

ONU kijtoua ke Declaración Universal de Derechos Humanos, yejua kampa “tsineujtok tanauatilmej tein kinpaleuia taltikpakneminij itech nochi xolalmej”, kinextia ke tinochin “uelis tikpataskej totaneltokalis oso tein tikneltokaj”. No kijtoua ke sejse taltikpaknenkej uelis kitemos, kiselis uan kiteixmatiltis tein kimati oso tein kinemilia. Nejin kijtosneki ke hasta tein kineltoka. * Sayoj ke, maj ueli tikchiuakan nejin kijtosneki ke no moneki tikajsikamatiskej ke oksekin no uelis kipaleuiskej tein kineltokaj oso kiixtopeuaskej tein tejuan tikneltokaj.

¿Amo kuali kinitaskejok nokalyetouanij komo nikpata notaneltokalis?

Nejon amo moneki panos. Biblia kijtoua ke moneki nochin tikinpoujkaitaskej, maski tataman taneltokalis kipiaskej (1 Pedro 2:17). Uan no, itaixpantijkauan Jiova kitakamatij tanauatil tein kijtoua ke moneki se kinpoujkaitas se itatuan, maski kipiaskej okse taman taneltokalis (Efesios 6:2, 3).

Sayoj ke, amo nochin kiseliaj tein kijtoua Biblia. Kemej neskayot, se siuat akin kayot Zambia kijtoua: “Akin kayomej noxolal, kinemiliayaj ke keman se kipata se itaneltokalis [...] se kiixtopeujtoya se ikalyetouanij uan se ixolal”. Maski ijkon, keman katka ichpoch peuak momachtia Biblia iniuan itaixpantijkauan Jiova uan kiixtalij kipatas itaneltokalis. Yejua kijtoua: “Notatuan miakpa nechiluijkej ke nouan tel kualantoyaj uan ke semi nikintayokoltijtoya. Nejon semi nechouijmakak porin niknekia maj kuali nechitakan. [...] Nikchiuas tein Jiova kineki uan amo tein momattokej kichiuaskej itech taneltokalismej amo kijtosneki ke amo nikintasojta nochankauan.” *

^ párr. 2 Xikonita La Atalaya 1 de enero de 2002, pág. 12, párr. 15.

^ párr. 8 Kemej neskayot, kemej itech xiuit 785, tekiuaj Carlomagno kiixtalij se tanauatil tein kijtouaya maj kinmiktikan nochin akin amo kinekiskiaj moauiskej kemej católicos ompa xolal Sajonia. Okse neskayot, ompa xolal Augsburgo itech xiuit 1555 kiixtalijkej Paz de Augsburgo nejon kijtosnekia ke amo moteuiskejok ome olochmej tein moajsiaj itech neteuilis tein peuak itech se oloch tein kipaleuiaya política tein moixmati kemej Sacro Imperio Romano. Itech nejon tein moixtalij moijtoj ke sejse akin kiixyekanaya xolalmej monekia kiixpejpenas semej nejin taman: yeski católico oso luterano. Uan akin kinixyekanaya no monekia mopataskej itech taneltokalis tein yejua kiixpejpenaskia. Komo amo kinekiaj, monekia kikauaskej xolal.

^ párr. 11 Tanauatilmej kemej nejin tein kinpaleuia taltikpakneminij, ixnesij itech Carta Africana de Derechos Humanos y de los Pueblos, Declaración Americana de los Derechos y Deberes del Hombre, Carta Árabe de Derechos Humanos de 2004, Declaración de Derechos Humanos de la Asociación de Naciones del Sudeste Asiático, Convenio Europeo de Derechos Humanos y el Pacto Internacional de Derechos Civiles y Políticos. Sayoj ke, amo nochi altepemej kichiuaj tein moixtalij itech nejon tanauatilmej.

^ párr. 14 Biblia kijtoua ke itokay Dios yejua Jiova.