Xionyoui kampa nesi tein kipia

¿Kineltokaj itaixpantijkauan Jiova Antiguo Testamento?

¿Kineltokaj itaixpantijkauan Jiova Antiguo Testamento?

Kemaj. Tiitaixpantijkauan Jiova tikitaj ke nochi Biblia “Dios kichiuak ika ichikaualisuan” uan “uelis se kuitinemis” (2 Timoteo 3:​16). Itech Biblia poui Antiguo uan Nuevo Testamento. Kemej amo tiknekij tikteajsikamatiltiskej ke Antiguo Testamento amo tapaleuiaok, itaixpantijkauan Jiova tiktokaytiaj Escrituras Hebreas. Uan Nuevo Testamento tiktokaytiaj Escrituras Griegas Cristianas.

Keyej akin kichiuaj kemej Cristo moneki kikuiskej Antiguo Testamento

Dios kichiuak maj itekitikauj Pablo kijkuilo: “Nochi tanextililis ten tikajsij tech in Tajkuilolamatsin de Dios, nochi nojon techijkuilouilijke para tejuan ika timomachtiske” (Romanos 15:4). Yejua ika, uelis senkis tikneltokaskej ke Escrituras Hebreas kipiaj tamachtilis tein motelneki. Ompa techtapouia tein panok ne uejkauj uan tikajsij tayolmajxitilismej tein techpaleuiaj itech tonemilis.

  • Tein panok ne uejkauj. Escrituras Hebreas kimelauaj keniuj Dios kichijchiuak taltikpak uan keyej tinochin titajtakouanij. Nejin techpaleuia maj tikajsikamatikan keniuj peuak nemilis uan keyej timomikiliaj (Génesis 2:7, 17). Uan no, Escrituras Hebreas techmatiltiaj keniuj Dios kinpaleuij akin nenkej ne uejkauj keman kipanokej ouijkayomej kemej tejuan (Santiago 5:​17).

  • Tayolmajxitilismej tein tapaleuiaj. Itech Escrituras Hebreas tikajsij amatajkuilolmej Proverbios uan Eclesiastés, tein kipiaj miak tayolmajxitilismej tein tapaleuiaj itech nejin tonalmej. Techiluiaj keniuj uelis tiyolpakiskej kemej kalyetouanij (Proverbios 15:17), keniuj tikitaskej tekit kemej moneki (Proverbios 10:4; Eclesiastés 4:6), uan keniuj okachi kuali tiktekitiltiskej tonemilis keman titelpochmej oso tiichpochmej (Eclesiastés 11:9–​12:1).

No tel tapaleuia se momachtis Tanauatil tein kiselij Moisés ijkon kemej moixnextia itech Torá, oso Pentateuco (yekinika makuil amaixmej tein kipia Biblia). Maski akin tikchiuaj kemej Cristo amo monekiok tiktakamatiskej, tayolmajxitilismej tein kipia Tanauatil uelis techpaleuiskej maj tiyolpakikan (Levítico 19:18; Deuteronomio 6:​5-7).