Xionyoui kampa nesi tein kipia

¿Keyej itaixpantijkauan Jiova amo kichiuaj Navidad?

¿Keyej itaixpantijkauan Jiova amo kichiuaj Navidad?

Tein kijtouaj uan tein melauak

Tein kijtouaj: Itaixpantijkauan Jiova amo kichiuaj Navidad porin amo kineltokaj Jesús.

Tein melauak: Tejuan kemaj itech titaneltokaj uan tikyekmatij ke sayoj itechkopa Cristo uelis timomakixtiskej (Hechos 4:12).

Tein kijtouaj: Kinxexelouaj kalyetouanij keman tamachtiaj ke amo moneki kichiuaskej Navidad.

Tein melauak: Tikitaj ke motelneki maj kalyetouanij senyetokan tikitaj ke motelneki; tein melauj, tikteixmatiltiaj tein Biblia tamachtia tein kinpaleuis maj kuali mouikakan.

Tein kijtouaj: Amo yolpakij keman mochiua “Navidad”, ijkuak momajmakaj netetayokolilmej, yolseuilis uan yekyetolis tein moita itech nejon tonalmej.

Tein melauak: Mojmostaj tiktemouaj kuali timouikaskej iniuan oksekin uan tiktemakaskej mojmostaj tein tikpiaj (Proverbios 11:25; Romanos 12:18). Kemej neskayot, amo titajtanij tomin itech tonechikoluan nion techtaxtauiaj keman titanojnotsaj, porin tiktakamatij tanauatil tein Jesús kitemakak: “Ijkon keme Dios namechtayokolij ya [...], no ijkon xiktekitiltikan uan amo teyi xikintopaluikan” (Mateo 10:8). Uan no, tikteixmatiltiaj ke sayoj iTekiuajyo Dios kiualkuis yolseuilis (Mateo 10:7).

¿Keyej amo kichiuaj Navidad itaixpantijkauan Jiova?

  • Jesús kijtoj maj moelnamiki keman momikilij, amo keman yolik (Lucas 22:19, 20).

  • Nion itatitaniluan Jesús nion yekinika itatojtokakauan kichiuayaj Navidad. Kemej kijtoua Diccionario del cristianismo, nejin iluit “kiixtalijkej ompa Roma itech xiuit 330” itech totonaluan, panouaya 200 xiujmej satepan ke momikilij semej itatitaniluan Jesús akin mokauayaok.

  • Uan nion teyi kinextia ke Jesús yolik itech tonal 25 metsti diciembre; tein melauj, Biblia amo kijtoua keman yolik Jesús.

  • Tikajsikamatij ke Dios amo kipaktia Navidad, porin ualeujtok itech tachiualis tein momattoyaj kichiuaskej uan itech taueyichiualis tein amo melauak (2 Corintios 6:17).

¿Keyej amo kichiuaj tein nochin kichiuaj?

Maski kimatij ke Navidad amo mouika ika tein Biblia tamachtia uan ke ualeujtok itech taneltokalis tein amo melauak, miakej iluichiuaj porin kinemiliaj ke amo semi moneki kani ualeua uan ijkon amo kiixnamikij tein nochin kichiuaj.

Biblia techyoleua maj tiktekitiltikan totaajsikamatilis uan ijkon tejuan tikixejekoskej tein tikchiuaskej (Romanos 12:1, 2). No techmachtia maj tikitakan ke motelneki tein Biblia kijtoua (Juan 4:23, 24). Nejin amo kijtosneki ke amo moneki tein oksekin toka kinemiliaj, sayoj ke amo tiktapanauiliskej tein tamachtia Biblia porin tikchiuaskej tein nochin kichiuaj.

Tein melauj tejuan amo tikchiuaj Navidad, sayoj ke nochin ueli kiixpejpenaj ox kichiuaskej oso amo. Yejua ika, amo akin tikchikaujkauiaj maj amo kichiua.