Xionyoui kampa nesi tein kipia

Itaixpantijkauan Jiova, ¿kinxelouaj kalyetouanij oso kichiuaj maj okachi kuali mouikakan?

Itaixpantijkauan Jiova, ¿kinxelouaj kalyetouanij oso kichiuaj maj okachi kuali mouikakan?

Itaixpantijkauan Jiova timochikauaj kuali timouikaskej kemej kalyetouanij uan tikinpaleuiaj akin nemij ompakauin kampa tinemij maj no ijkon kichiuakan. Tikajsikamatij ke Dios kiixtalij nemilis kemej kalyetouanij, yejua ika tikpatiuitaj (Génesis 2:​21-​24; Efesios 3:​14, 15). Itech Biblia, Dios kitemaka tayolmajxitilis tein kinpaleuiani namikuanij noyampa taltikpak maj yolpakikan uan maj kuali mouikakan.

¿Toni kichiuaj itaixpantijkauan Jiova tein kinpaleuia maj kuali mouikakan kemej kalyetouanij?

Timochikauaj tiktojtokaskej tayolmajxitilismej tein kitemaka Biblia tein techpaleuiaj maj okachi kuali timouikakan kemej namikuanij uan iniuan tokoneuan (Proverbios 31:10-​31; Efesios 5:22–​6:4; 1 Timoteo 5:8). Uan Biblia no uelis kinyolchikauas kalyetouanij kampa amo nochin kineltokaj sayoj se taman (1 Pedro 3:​1, 2). Kemej neskayot, maj tikitakan tein kijtouanij sekin, satepan ke ininnamik mochiuak itaixpantijkauj Jiova:

  • “Itech yekinika chikuasen xiujmej keman timonamiktijkej sayoj timotajtolteuiayaj uan amo kuali timomachiliayaj porin amo mochiuak tein tikchiayaj. Sayoj ke ijkuak Ivete mochiuak itaixpantijkauj Jiova, okachi kinextiaya netasojtalis uan amo yolijsiuia. Nejon tein kichiuak tapaleuij maj amo timokauakan.” (Clauir, akin kayot Brazil)

  • “Keman nonamik, Chansa, peuak momachtia iniuan itaixpantijkauan Jiova, amo nikuelitak porin niknemiliaya ke yejuan kinxelouayaj kalyetouanij. Sayoj ke satepan nikitak ke Biblia yekmelauj techpaleuiani kemej namikuanij.” (Agness, akin kayot Zambia)

Uan no keman titamachtiaj ika Biblia, tikinpaleuiaj akin nemij ompakauin kampa tinemij maj kiitakan keniuj Biblia tapaleuia itech se inemilis. Kemej:

  • Keniuj kiixpejpenaskej akoni yeski se kuali ininnamik

  • Keniuj kiixnamikiskej ouijkayomej tein kipiaj itech yekinika xiuit kemej namikuanij

  • Keniuj kuali mouikaskej iniuan ininmontatuan

  • Keniuj kuali kitekitiltiskej tomin

  • Keniuj amo motajtolteuiskej

  • Keniuj momachtiskej motapojpoluiskej

  • Keniuj kinmelauaskej ininkoneuan

¿Kichiua maj onka kuejmolmej keman semej namikuanij kipata itaneltokalis?

Tein melauj, kemansa kemaj. Itech se amaix tein kikixtij empresa de investigación Sofres itech xiuit 1998 kinextij ke se itech veinte namikuanij, kipiakej uejueyi kuejmolmej keman semej mochiuak itaixpantijkauj Jiova.

Jesús achto kijtoj ke imomachtijkauan kemansa kiixnamikiskiaj ouijkayomej kemej kalyetouanij (Mateo 10:32-​36). Will Durant akin momachtia tein panok ne uejkauj kijtoj ke keman taixyekantoyaj romanos “akin kichiuayaj kemej Cristo kintajtakoltiayaj ke kinxelouayaj kalyetouanij”. * Kemansa itaixpantijkauan Jiova no ijkon techijtouiliaj. Sayoj ke ¿yekmelauj yejuan akin kichiuaj maj onka kuejmolmej?

Keman kinteluilijkej itaixpantijkauan Jiova ke kinxelouaj kalyetouanij, Tribunal Europeo de Derechos Humanos kijtoj ke miakpa akin kipeualtiaj kuejmolmej yejuan kalyetouanij akin amo itaixpantijkauan Jiova, porin amo “kiseliaj uan amo kipoujkaitaj keman ininchankauj kipata itaneltokalis uan tein ika taueyichiua”. Uan Tribunal no kijtoj: “Yejua nejin tein kipanouaj nochin akin kipataj inintaneltokalis; amo sayoj itaixpantijkauan Jiova”. * Sayoj ke maski amo kiseliaj totaneltokalis, itaixpantijkauan Jiova timochikauaj tiktojtokaskej nejin tein tayolmajxitia Biblia: “[Keman] aksame namechchiuiliaj tensa ten amo kuali, ijkuakon namejuan amo no ijkon xikinixnamikikan. [...] Ximofuerzajuijtiyakan se uan okse hasta kampa nanueliske de nannentinemiske ika yolseuilis [...] iuan nochi taltikpakuani” (Romanos 12:17, 18).

¿Keyej kineltokaj itaixpantijkauan Jiova ke sayoj uelis monamiktiskej iniuan akin no itaixpantijkauan Jiova?

Porin tiktojtokaj tanauatil tein kijtoua ke sayoj uelis timonamiktiskej iuan se “taneltokakke”; tein kijtosneki, akin no itaixpantijkauj Jiova (1 Corintios 7:​39). Tein melauj, nejin tanauatil tein Dios techmaka techpaleuia. Kemej neskayot, se tamachtilis itech amaix Journal of Marriage and Family itech xiuit 2010 kijtouaya ke “namikuanij akin kipiaj sayoj se taneltokalis” okachi kuali mouikaj. *

Sayoj ke, itaixpantijkauan Jiova amo kinyolchikauaj oksekin maj kikauakan ininnamik komo yejua amo itaixpantijkauj Jiova. Biblia kijtoua: “Komo se toknitsin taneltokakke kipia se siuat den amo taneltokakke uan ne siuat kineki nachipa iuan yetos, [...] ma kitasojta uan ma amo kisekokaua ne isiuatsin. Uan komo se siuat taneltokakke no kipia se tagat den amo taneltokakke, uan in tagat kineki nachipa iuan yetos, pues no ijkon in siuat ma kitasojta iyokich [oso inamik] uan ma amo kisekokaua” (1 Corintios 7:​12, 13). Tejuan no tiktakamatij nejin tanauatil.

^ párr. 17 Xikonita amaix César y Cristo, tomo II, página 405.

^ párr. 18 Xikonita tein panok itech: Testigos de Jehová de Moscú contra Rusia, página 26 uan 27, párrafo 111.

^ párr. 20 Xikonita tamachtilis itech amaix Journal of Marriage and Family, volumen 72, tapoual 4, (agosto del 2010), página 963.