Kemej tikitaj uan tein tikchiuaj keman aksa momikilia, mokixtia itech tein tamachtia Biblia. Maj tikitakan seki neskayomej:

  • Taixejekol maj se motayokolti keman momikilia se akin tiktasojtaj. Imomachtijkauan Jesús chokakej keman momikilijkej akin kintasojtayaj (Juan 11:33-​35, 38; Hechos 8:2; 9:​39). Yejua ika, keman aksa momikilia amo tikitaj kemej se iluit (Eclesiastés 3:​1, 4; 7:​1-4). Ta tikitaj kemej se tonal keman uelis tiyetoskej iniuan akin moyolkokouaj (Romanos 12:15).

  • Mikemej amo teyi kimachiliaj nion tajyouiaj. Maski seseko tikayomej uan tataman techiskaltijkej, tikixtopeuaj nochi tachiualismej tein kiteajsikamatiltiaj ke mikemej kisentokaj yoltokej uan ke uelis techijtakoskej, porin nejon amo yejua tein tamachtia Biblia (Eclesiastés 9:​5, 6, 10). Kemej neskayot, amo tikinmakaj netetayokolilmej mikemej, nion no titajtouaj iniuan oso tikintajtaniaj maj techpaleuikan, nion no tikchiuaj se taman tein ika kinelnamikij mikemej. Biblia kijtoua: “Xikisakan [...] uan amo ximokalakijtinemikan ok tech ninpitsotiknemilis”, uan tiktakamatij nejin tanauatil keman amo tikchiuaj tein Dios kiixtopeua (2 Corintios 6:​17).

  • Mikemej uelis oksepa nemiskej. Biblia tamachtia ke amo uejkaua mikemej uelis oksepa nemiskej uan ke ejkos tonal keman amo akin momikilisok (Hechos 24:15; Apocalipsis [Revelación] 21:4). Nejin tein tikchiaj maj mochiua techpaleuia, ijkon kemej kinpaleuij yekinika imomachtijkauan Jesús, maj amo senkis timotayokoltikan (1 Tesalonicenses 4:​13).

  • Biblia techiluia maj tiknextikan kuali taixejekolis. (Proverbios 11:2). Keman aksa momikilia amo tikitaj kemej se tonal ijkuak uelis timoueyichiuaskej nion no tiknextiskej ke tikpiaj miak tomin (1 Juan 2:​16). Yejua ika, keman aksa momikilia amo tikuij miak tomin tein ika tikinixpetaniskej oksekin uan nion no tikuij se mikekaxon tein tel patiyoj, uan amo timotakentiaj tein ika kuali techitaskej.

  • Amo tikinchikaujkauiaj oksekin maj kichiuakan kemej tejuan keman aksa momikilia. Ta, tiktojtokaj nejin tayolmajxitilis: “Cada tisenme de tejuan ya monekis ma tikmaktiliske Dios tocuentas” (Romanos 14:12). Sayoj ke, komo ueli, ika poujkaitalis tikinmelauiliaj oksekin tein tikneltokaj (1 Pedro 3:​15).

¿Toni kichiuaj itaixpantijkauan Jiova keman aksa momikilia?

Kani: Komo kalyetouanij kiixtaliaj maj mochiua teisa, yejuan kiitaskej kani mochiuas. Uelis yeski itech se Kali kampa tiMosentiliaj, ikalijtik aksa oso kampa kitokaskej.

Tein mochiua: Motemaka se tanojnots tein ika kinyolchikauaj ichankauan akin momikilij uan momelaua ika Biblia keyej timomikiliaj uan keniuj mikemej oksepa nemiskej (Juan 11:25; Romanos 5:​12; 2 Pedro 3:​13). No uelis moelnamikis tein kuali tein kichiuak akin momikilij uan keniuj kemej kitekitilij Dios techpaleuia tinochin (2 Samuel 1:​17-​27).

Uelis mokuikatiskej se nekuikatil tein mokixtia itech Biblia (Colosenses 3:​16). Uan tamis ika se netataujtil tein tayolchikauas (Filipenses 4:​6, 7).

Tomin: Amo moneki techtaxtauiskej ika tein tikchiuaj keman aksa momikilia. Itech tonechikoluan amo keman motajtani tomin (Mateo 10:8).

Akin yeski: Akin yeski uelis yas, ijkon kemej itech nochi tonechikoluan. Yejua ika, akin amo itaixpantijkauan Jiova no uelis yaskej.

¿Youij itaixpantijkauan Jiova keman aksa momikilia akin poui itech okse taneltokalis?

Nejin se taman tein sejse moneki kiixpejpenas ijkon kemej kiluis itanemilil tein moyekana ika Biblia (1 Timoteo 1:​19). Sayoj ke amo tikchiuaj nion se taman tein ompa kichiuaj tein amo mouika ika tein tamachtia Biblia (2 Corintios 6:​14-​17).