Xionyoui kampa nesi tein kipia

Xionyoui kampa nesi tein kipia

 TAMACHTILIS ITECH IPEUJYAN AMAIX | KENIUJ UELIS MITSONYOLPAKTIS TIKONIXTAJTOLTIS BIBLIA

¿Keniuj Biblia uelis nechpaleuis itech nonemilis?

¿Keniuj Biblia uelis nechpaleuis itech nonemilis?

Biblia amo kemej okseki amatajkuilolmej. Ompa tikajsij tein techyolmajxitia toTachijchiujkauj (2 Timoteo 3:16). Tein kijtoua uelis semi mitsonpaleuis. Tein melauj, Biblia kiyekijtoua: “In Tajtoltsin de Dios kipia uelilis uan kitemaka nemilis” (Hebreos 4:12). Nejin amatajkuilol uelis mitsonpaleuis itech ome taman: yekinika ika tayolmajxitilismej tein mitsonpaleuiskej mojmostaj uan ojpatika tikonixmatis Dios uan tein motenkaua (1 Timoteo 4:8; Santiago 4:8).

Temaka tayolmajxitilismej tein tapaleuiaj mojmostaj. Biblia tayolmajxitia itech seki taman tein senkis mouika iuan se inemilis uan itech okseki taman.

Ompa Asia, se telpoch uan se ichpoch akin yekin monamiktijkaj kiitakej keniuj tel tapaleuia tein Biblia tayolmajxitia. Ijkon kemej miakej akin yekin monamiktiaj, kinouijmakak momatiskej sennemiskej uan kuali monojnotsaskej. Sayoj ke peujkej kichiuaj tein kiixtajtoltiaj itech Biblia. ¿Keniuj kinpaleuij? Vicent, takat akin namikej, kimelaua: “Tein nikixtajtoltij itech Biblia nechpaleuij maj nikmelaua ika netasojtalis ouijkayomej tein se kipia kemej namikuanij. Tikchiuaskej tein tayolmajxitia Biblia kichiuani maj tiyolpakikan”. Inamik, Annalou, no ijkon kijtoua: “Tikixtajtoltiskej tein kichiujkej akin ininka tajtoua Biblia techtelpaleuij. Axkan niyolpaki uan no nechyolpaktia tein tikixtalijtokej tiksenchiuaskej”.

Tapaleuia maj se kiixmati Dios. Vicent kijtoua ke Biblia amo sayoj kipaleuiani itech inenamiktilis, ta no kijtoua: “Nikixtajtoltis Biblia, nechpaleuiani maj okachi nimotoki iuan Jiova kemej amo keman nikchiuani”. Tein kijtoj kinextia se taman tein motelneki: Biblia uelis mitsonpaleuis okachi xikonixmati Dios. Ijkon amo sayoj mitsonpaleuis tein tayolmajxitia, ta no kuali iuan tionmouikas. Uan tikonitas ke iTajtol kijtoua ke tikseliskej tein kuali satepan, kampa uelis senkis tiyolpakiskej nochipaya (1 Timoteo 6:19). Nejon se taman tein nion se amatajkuilol uelis kitemakas.

Komo tionpeua tikonixtajtoltia Biblia uan tikonchiua mojmostaj, tejuatsin no uelis okachi kuali tionnemis axkan uan okachi kuali tikonixmatis Dios. Sayoj ke, keman tikonixtajtoltis xa uelis tikonpias miak netajtanilmej. Keman ijkon mitsonpanos, xikonelnamiki tein kichiuak ueyichiujkej etíope akin nemik panoua ome mil xiuit achto. Nejin takat kipiaya miak netajtanilmej ika tein kiixtajtoltij itech tajkuilolmej. Felipe, se imomachtijkauj Jesús, kitajtanij ox kiajsikamatia tein kiixtajtoltijtoya uan yejua kinankilij: “¿Kenin uelis nikajsikamatis? Ta, amo aken nechyekmejmelauilia”. * Ompa kikauak maj kipaleuiani Felipe akin katka se kuali tamachtijkej (Hechos 8:30, 31, 34). No ijkon, komo tejuatsin tikonneki maj aksa mitsonpaleui okachi kuali xikonajsikamati Biblia, timitsonyoleuaj xiontajtani itech jw.org, Internet kampa timoteixmatiltiaj oso xiontajkuilo uan itech nejin amaix tikonajsis kani uelis tikontitanis kampa okachi amo uejka. No uelis tiontajtos iniuan itaixpantijkauan Jiova akin nemij ompakauin kampa tionnemi oso tionyas itech se Kali kampa tiMosentiliaj. Timitsonyoleuaj xikontemo se Biblia axkan uan xikonkaua maj mitsonpaleui itech monemilis.

Komo amo senkis tikonneltoka ke Biblia takuaujtamach, xikonita video ¿Keyej uelis tikneltokaskej ke melauak tein kijtoua Biblia? Uelis tikonajsis komo tikonkui código, oso tikontemoua itech jw.org kampa kijtoua “AMAIXMEJ> VIDEOS”.

^ párr. 8 Itech jw.org Internet kampa timoteixmatiltiaj, tikonajsis okseki taman tein kinextia ke tein tayolmajxitia semi tapaleuia. Xikontemo kampa kijtoua AMAIXMEJ.

^ párr. 11 No xikonita tamachtilis “¿Keyej moneki maj kuali se kiajsikamati Biblia?”, tein mokixtij itech nejin amaix.