Xionyoui kampa nesi tein kipia

Xionyoui kampa nesi tein kipia

¿Tikonmatia?

¿Tikonmatia?

¿Keniuj katka molino tein ika takuechouayaj kalyetouanij ne uejkauj?

Ne uejkauj kalyetouanij kitekitiltiayaj se molino kampa kikuechouayaj tatet tein ika kikixtiayaj harina. Siuamej oso takeualmej akin tekitiaj kalijtik mojmostaj takuechouayaj. Mojmostaj mokakia keniuj kikuechouayaj tatet (Éxodo 11:5; Jeremías 25:10).

Moajsinij taixkopimej tamachijchiujmej tein kinextia keniuj kitekitiltiayaj nejin molino itech altepet Egipto. Chijchiujtoya ika ome tet, se katka kemej se metat kampa kitaliayaj tatet uan okse okachi tsikitsin tein ika kikuechouayaj. Tekitikej motankuaketsaya iixpan ueyi tet uan ika ome imauan kikitskiaya tet tein tsikitsin. Satepan, chikauak kioliniaya tet tein tsikitsin taixpan uan taikampa ijkon kikuechouaya tatet. Se amaix kijtoua, tet tsikitsin etik katka kemej ome hasta naui kilo. Komo ika kimaayaj aksa, ueliskia momikilis (Jueces 9:50-54).

Semi monekia maj kalyetouanij kipianij kani takuechoskej porin ika moixpanoltiayaj. Yejua ika, Biblia kijtoua: “Amo akin uelis kitaneujtis teisa aksa uan kitajtanis imolino nion tet tein ika takuechoua, porin kemej yeskia kikuilijtok inemilis” (Deuteronomio 24:6).

¿Toni kijtosneki maj Jesucristo yeto iyolixko iPopaj?

Biblia kijtoua ke Jesucristo “yetok iyolixko” iPopaj (Juan 1:18TNM). Nejon tajtolmej kijtosneki ke Jesús tel kuali mouika iuan iPopaj. Nejin kinextia se taman tein kichiuayaj ne uejkauj keman takuayaj monakasikatekayaj iixpan mesa.

Itech itonaluan Jesús, keman takuayaj judíos monakasikatekayaj itech seki tapech tein kitaliayaj inajnakastan se mesa tein amo uejkapan. Akin takuayaj monakasikatekayaj iixpan mesa, uan itech se kuatapech tein yemanik ika ininopochmay momoliktaliayaj. Ijkon, ininyekmay uelia kitekitiltiayaj. Se amaix kimelaua: “Keman ijkon mochiuaya, itsontekon se takat mokauaya iyolixko akin moajsia iopochmakopa”. Yejua ika moijtouaya ke aksa yetoya “iyolixko” okse.

Kinextiayaj ke kitakachiuayaj aksa keman moajsia iyolixko akin kinixyekanaya ikalyetouanij oso akin kichiuaya se iluit. Yejua ika, keman Jesús takuaj iniuan itatojtokakauan uan amo oksepa kichiuaskiaok, akin yetoya iyolixko katka tatitanil Juan, akin Jesús “semi kiyoltasojtaya”. Biblia kijtoua ke Juan monakasikatekak iyolixko Jesús uan ijkon ueliskia kichiuilis se netajtanil (Juan 13:23-25; 21:20).