Xionyoui kampa nesi tein kipia

Xionyoui kampa nesi tein kipia

Taltikpakneminij moneki kimatiskej ke amo uejkaua Dios kiualkuis tatsakuiltilis

Keman Dios tetatsakuiltia, ¿nochipa achto tanejmachtia?

Keman Dios tetatsakuiltia, ¿nochipa achto tanejmachtia?

AKIN tajtoua itech radio kitematiltia ke takistos oso kiouis. Kimati ke mochiuati se tetsaujkaejekat kampa nemij tel miakej. Kemej kineki maj mopaleuikan, miakpa kinnejmachtia achto ke tetsaujkaejekas.

No ijkon, Jiova tanejmachtijtok ke motokia se “tetsauit” tein okachi tamouilil ke se tetsaujkaejekat. ¿Keniuj kichiua? ¿Uan keniuj tikmatij ke kinnejmachtijtok taltikpakneminij uan ijkon uelis mopaleuiskej? Maj tikitakan keniuj Jiova tanejmachtij ne uejkauj, ijkon tiknankiliskej nejon netajtanilmej.

TEIN DIOS TANEJMACHTIJ NE UEJKAUJ

Ne uejkauj, Jiova miakpa tanejmachtij ke kintatsakuiltiskia akin kiixtaliayaj amo kitakamatiskej (Prov. 10:25; Jer. 30:23). Nochipa achto kinnejmachtij taltikpakneminij toni kinpanoskia uan no kiniluij toni monekia kipataskej uan ijkon kitakamatiskej (2 Rey. 17:12-15; Neh. 9:29, 30). Kemej kinekia kinpaleuis maj kichiuakan tein kuali, itechkopa itekitikauan kinnejmachtij tein yejuatsin yaya kichiuati uan kiniluij tein niman monekia kichiuaskej (Amós 3:7).

Semej nejon itekitikauan katka Noé. Miak xiujmej, ika yolchikaualis kinnejmachtij akin amo chipaujkanemiaj uan tateuiayaj, ke ualaskia se tetsaujkakiouit (Gén. 6:9-13, 17). No kiniluij tein monekia kichiuaskej tein kinpaleuiskia maj momakixtikan. Noé senkis mochikauak tanejmachtis, yejua ika moixmatik kemej akin “tanojnotstinemia ika ten melauak” (2 Ped. 2:5).

Maski Noé mochikauak tanejmachtis, akin kikakkej amo takuaujtamatkej uan amo tatakamatkej. Yejua ika, keman mochiuak “ne tetsaukakiouat [...] nochi kinuiyak uan moaelsimijke” (Mat. 24:39; Heb. 11:7). Amo akin uelik kijtoj ke Dios amo achto kinnejmachtijka.

Keman Jiova kintatsakuiltij oksekin, kinnejmachtij tepitsin achto ke kichiuaskia. Sayoj ke, mochiak maj kichiuakan tein ika mopaleuiskiaj. Ijkon kichiuak keman kintatsakuiltij egipcios ika majtakti chauismej. Maj tikitakan tein panok achto ke mochiuaskia chikometika chauis keman uetsik uejueyi tesiuit. Jiova kititanik Moisés uan Aarón maj kinejmachtitij faraón uan itekitikauan. Kemej tesiuit uetsiskia mostika, ¿ueliskiajok mopaleuiskej? Biblia kijtoua: “Itekitikauan Faraón akin kimoujkakakkej itajtoluan Jiova niman kinualkuikej inintakeualuan uan inintapialuan ininkalijtik. Sayoj ke nochin akin amo kikakkej itajtoluan Jiova kinkaujkej inintakeualuan uan inintapialuan ompa ixtauat” (Éx. 9:18-21). Kemej tikitaj Dios achto tanejmachtij. Nejon kinpaleuij maj momakixtikan akin kichiujkej tein Dios kinnauatijka.

Dios no kinejmachtij faraón uan itekitikauan tepitsin achto ke mochiuaskia majtakti chauis. Sayoj ke yejuan amo teyi kichiujkej (Éx. 4:22, 23). Yejua ika, kiitakej keniuj momikilijkej inintayekankakoneuan. ¡Semi tetayokoltij! (Éx. 11:4-10; 12:29). ¿Ueliskiaj mopaleuiskej? Kemaj. Ijkon tikijtouaj porin Moisés kinnejmachtij israelitas ke yaya mochiuati nejon uan kiniluij keniuj kinpaleuiskiaj ininchankauan (Éx. 12:21-28). ¿Uan kanachimej tatakamatkej?  Moixejekoua ke momakixtijkej uan kiskej Egipto panoua eyi millones israelitas uan “tataman taltikpakneminij” kampa no pouiaj egipcios (Éx. 12:38).

Kemej tikitaj, Jiova nochipa achto kinnejmachtij taltikpakneminij, ijkon ueliskiaj kichiuaskej tein ika mopaleuiskiaj (Deut. 32:4). ¿Keyej kichiua nejon? Tatitanil Pedro kimelaua ke porin “amo kineki ma senme ixpoliuikan”, ta maj nochin moyolnonotsakan (2 Ped. 3:9). Dios ininka motekipachoj taltikpakneminij. Kinekia maj moyolnonotsakan achto ke kiualkuiskia tatsakuiltilis (Is. 48:17, 18; Rom. 2:4).

MAJ TIKAKIKAN TEIN DIOS TECHNEJMACHTIA

Axkan nochin taltikpakneminij no moneki kikakiskej se taman tein motanejmachtijtok noyampa taltikpak. Keman Jesús yetoya nikan taltikpak, kinextij ke nochi tein amo kuali tamiskia itech “ueyi tajyouilis” (Mat. 24:21). Kijtoj tein itatojtokakauan kiitaskiaj uan kipanoskiaj ijkon kemej motokiaya nejon ueyi tajyouilis. Ika tajtoj seki taman tein noyampa panoskia tein axkan tikitstokejya (Mat. 24:3-12; Luc. 21:10-13).

Kemej axkan mochiujtokya tein Jesús kijtoj, Jiova kinyoleujtok nochin maj kitekitilikan uan maj kitakamatikan. Kineki maj nochin akin kitakamatij kuali nemikan axkan uan maj kiselikan tatiochiualismej itech yankuik taltikpak (2 Ped. 3:13). Ika “kuali tanauatilmej”, Jiova kinpaleuia taltikpakneminij maj takuaujtamatikan itech tein motenkaua kichiuas uan ika nejon uelis momakixtiskej. Jesús kijtoj ke motanojnotsaskia “semanauak taltikpak” (Mat. 24:14TNM). Dios kichiuani maj itekitikauan kiteixmatiltikan nejon kuali tanauatilmej itech 240 altepemej. Kineki maj nochin kikakikan tein tanejmachtijtok uan maj momakixtikan keman kiualkuis tatsakuiltilis (Sof. 1:14, 15; 2:2, 3).

Kemej tikitaj, tein okachi tayekantok amo ox Jiova kinmaka taltikpakneminij tiempo uan ijkon maj kichiuakan tein kinnauatia. Kemej tikitakejya nochipa ijkon kichiua. Ta tein okachi tayekantok yejua ox tatakamatiskej axkan ke ueliok. Uan tejuan akin Dios technauatiani maj titanejmachtikan, maj tiksentokakan tikinpaleuikan nochin akin uelis maj momakixtikan keman ejkos ixpoliuilis.