Xionyoui kampa nesi tein kipia

Xionyoui kampa nesi tein kipia

Maj tiyolseujtokan maski mopatas tein tikpanouaj

Maj tiyolseujtokan maski mopatas tein tikpanouaj

“Nikyolseuiani uan niktamatiliani nonemilis.” (SAL. 131:2)

NEKUIKATILMEJ: 128, 129

1, 2. 1) ¿Keniuj uelis timomachiliskej keman teisa ijsiujka mopata itech tonemilis? (Xikonita taixkopin ipeujyan tamachtilis.) 2) Kemej kijtoua Salmo 131, ¿toni techpaleuis maj tiyolseujtokan?

LLOYD UAN ALEXANDRA panouayaya veinticinco xiujmej tapaleuijtoyaj Betel. Yejua ika, keman kinmakakej tekit kemej precursores, yekinika motayokoltijkej. Lloyd kijtoua: “Nikmachiliaya ke Betel uan tekit tein nikpiaya ompa katka tein nechixnextiayaj. Nikajsikamatia keyej mopataka, sayoj ke seki semana uan seki metsti satepan miakpa nikmachilij ke nechixtopeujkaj”. Kemansa Lloyd kuali momachiliaya uan tepitsin satepan motayokoltiaya.

2 Keman itech tonemilis teisa ijsiujka mopata, uelis timoteltekipachoskej (Prov. 12:25). Uan xa ouij techkisas tikajsikamatiskej keyej mopatak. ¿Toni techpaleuis maj tiyolseujtokan? (Xikonixtajtolti Salmo 131:1-3.) Maj tikitakan tein kichiujkej seki itekitikauan Dios ne uejkauj uan itech totonaluan tein kinpaleuij maj yolseujtonij maski mopatak seki taman itech ininnemilis.

 KENIUJ UELIS TECHPALEUIS “YOLSEUILIS” TEIN DIOS TEMAKA

3. ¿Toni kipanok José?

3 José katka ikoneuj Jacob, akin okachi kitasojtaya. Yejua ika, iikniuan kinexikoluijkej uan kinamakakej kemej takeual keman kipiaya kemej 17 xiujmej (Gén. 37:2-4, 23-28). Ompa Egipto, tajyouij kemej trece xiujmej, yekinika porin kiteltekitiltiayaj uan satepan porin kitsakkej. Uan ipopaj akin kiteltasojtaya tel uejka moajsia. Nejin ueliskia kichiuas maj kimachiliani ke amo keman moyektaliskia tein kipanotoya uan maj motauelneki, sayoj ke amo panok nejon. ¿Toni kipaleuij?

4. 1) ¿Itech toni okachi tanemilij José keman tsaktoya? 2) ¿Keniuj kinankilij Jiova inetataujtiluan?

4 Keman José tsaktoya, xa okachi itech tanemilij keniuj Jiova kiyekpiaya (Gén. 39:21; Sal. 105:17-19). Uan no, keman katka telpoch kikochitaka tein panoskia satepan uan nejon kichiuak maj okachi takuaujtamatini ke Jiova kipaleuiaya (Gén. 37:5-11). Uan xa miakpa kitataujtij Jiova uan kitapouij nochi tein kimachiliaya (Sal. 145:18). Jiova kinankilij inetataujtiluan keman kipaleuij maj senkis kimatini ke iuan yetoskia itech tein yeski ouijkayot (Hech. 7:9, 10). *

5. ¿Keniuj yolseuilis tein Dios temaka techolinis maj okachi tiktekitilikan?

5 Maski semi ouij tein tikpanotoskej, “yolseuilis” tein Dios temaka uelis kiyekpias totanemilil uan techpaleuis maj tiyolseujtokan (xikonixtajtolti Filipenses 4:6, 7). Yejua ika, maj tiktajtanikan Jiova maj techpaleui keman timoteltekipachojtoskej, uan yolseuilis tein yejuatsin temaka techolinis maj tiksentokakan tiktekitilikan uan techpaleuis maj amo timosenkauakan. Maj tikitakan keniuj seki tokniuan kichiuanij nejin.

MAJ TIKTAJTANIKAN JIOVA MAJ TECHPALEUI MAJ OKSEPA TIYOLSEUJTOKAN

6, 7. ¿Keniuj techpaleuia maj tiyolseujtokan komo senkis tikiluiaj Jiova tein tikmachiliaj? Xikonijto se neskayot.

6 Keman Ryan uan Juliette kimatkej ke amo yeskiajok precursores especiales temporales, tel amo kuali momachilijkej. Ryan kijtoua ke niman peuak kitataujtiaj Jiova. No kijtoua: “Tikmattoyaj ke ika tein tikpanotoyaj ueliskia tiknextiskej ke titakuaujtamatiaj iuan Dios. Miakej tokniuan itech nechikol yankuikej katkaj, yejua ika tiktajtanijkej Jiova maj techpaleuiani maj tiknextianij takuaujtamatilis uan ijkon tikinkauiliskiaj se kuali neskayot”.

7 ¿Keniuj kinnankilij Jiova? Ryan kielnamiki: “Niman ke tikchiujkej netataujtil amo timotekipachojkejok uan kuali timomachiliayajya. Yolseuilis tein Dios temaka kiyekpiaya totanemilil uan toyolo. Tikajsikamatkej ke Jiova ueliskia kisentokas techmakas tekimej komo iuan titakuaujtamatiaj”.

8-10. 1) ¿Keniuj uelis techpaleuis iespíritu Dios keman timoteltekipachojtoskej? 2) ¿Keniuj uelis techpaleuis Jiova keman tiktayekanaltiaj tiktekitiliskej?

8 Iespíritu Dios uelis techpaleuis maj tiyolseujtokan, uan no maj tikajsikan tajkuilolmej itech Biblia tein techpaleuiskej maj tikajsikamatikan toni yekmelauj tayekantok (xikonixtajtolti Juan 14:26, 27). Maj tikitakan tein kinpanok Philip uan Mary, seki namikuanij akin tapaleuijkej Betel ajsitoyaya veinticinco xiujmej. Itech naui metsti momikilijkej ininmomaj nochin omen uan okse ichankauj Philip. Uan no, peuak kiyekpiaj  ipopaj Mary, akin kipia se kokolis tein kichiua maj tajtalkaua.

9 Philip kielnamiki: “Nikmachiliaya ke kuali tein nikchiujtoya, maski teisa poliuia. Se tonal, keman nikixtajtoltijtoya itech amaix Tanejmachtijkej se tamachtilis tein tikitaj itech nechikol, nikajsik Colosenses 1:11. Nikajsikamatik ke kemaj, nitaxikojtoya, sayoj ke amo kemej monekia. Tajkuilol nechpaleuij maj nikita ke moneki nitaxikos ika yolpakilis uan amo niyolijsiuis. Nejon nechelnamiktij ke tein nikpanotos amo kichiuas maj niyolpaki, ta kemej nikauas iespíritu Dios maj tekiti itech nonemilis”.

10 Philip uan Mary mochikaujkej kitayekanaltiskej kitekitiliskej Jiova uan yejuatsin kintatiochiuij ika miak taman. Kemej neskayot, tepitsin satepan ke kiskej Betel, kinajsikej taltikpakneminij akin kitelnekiaj momachtiskej Biblia uan peujkej kichiuaj tein momachtiayaj. Mary kijtoua: “Yejuan kichiujkej maj titelyolpakinij, uan ijkon Jiova techmatiltij ke nochi kuali yetoskia”.

MAJ TIKCHIUAKAN TEISA TEIN JIOVA UELIS KITIOCHIUAS

¿Keniuj uelis tikchiuaskej kemej José itech tein yeski ouijkayot? (Xikonita párrafos 11 hasta 13)

11, 12. 1) ¿Toni kichiuak José uan ijkon Jiova ueliskia kitatiochiuis? 2) ¿Keniuj Jiova kitatiochiuij José?

11 Keman teisa itech tonemilis ijsiujka mopata uelis timoteltekipachoskej uan sayoj titanemiliskej itech tokuejmoluan. Nejon ueliskia kipanos José. Sayoj ke mochikauak kichiuas tein uelia uan ijkon Jiova ueliskia kitatiochiuis. Yejua ika, maski tsaktoya, mochikauak kuali kichiuas tekit tein kimakaka akin taixyekanaya kampa tsaktoya, ijkon kemej kichiujka keman kitekitiliaya Potifar (Gén. 39:21-23).

12 Se tonal, kinauatijkej maj kinita ome takamej akin tekitikaj ichan faraón. Kemej José kinnextilij kualtakayot, kinemilijkej ke ueliskiaj kitapouiskej tein kintekipachouaya uan tein kikochitakaj se youal achto uan amo kiajsikamatkaj (Gén. 40:5-8). José amo kimatia, sayoj ke nejon tein monojnotskej senkis kipataskia inemilis. Ome xiuit satepan kikixtijkej kampa tsaktoya uan itech nejon tonal mochiuak ojpatika taixyekankej akin okachi ueyichiujkej ompa Egipto. Sayoj faraón kipiaya okachi tanauatil ke José (Gén. 41:1, 14-16, 39-41).

13. ¿Keniuj uelis techtatiochiuis Jiova itech tein yeski taman tein tikpanotoskej?

13 Ijkon kemej José, xa tikpanotoskej se taman tein amo uelis tikyektaliskej. Sayoj ke, komo amo tiyolijsiuij uan timochikauaj tikchiuaskej tein tiueliskej, Jiova techtatiochiuis (Sal. 37:5). Kemansa xa amo tikmatiskej toni tikchiuaskej, sayoj ke amo keman tikmachiliskej ke amo moyektalis tein tikpanotokej (2 Cor. 4:8). Jiova yetos touan, okachiok komo tiktayekanaltiaj tiktekitiliskej.

 MAJ TIKTAYEKANALTIKAN TANOJNOTSALIS

14-16. ¿Toni kichiuak Felipe keman mopatak seki taman itech inemilis?

14 Felipe, akin kiteixmatiltiaya iTajtol Dios, kuali kinextij tein kijtosneki se kitayekanaltis tanojnotsalis maski mopatas seki taman. Felipe kipiaya se yankuik tekit itech nechikol ompa Jerusalén (Hech. 6:1-6). Sayoj ke nochi mopatak. Satepan ke kimiktijkej Esteban, peuak kinteltajyouiltiaj tokniuan. * Nejin kichiuak maj cholouanij. Sayoj ke Felipe kinekia kisentokas kitekitilijtos Jiova, yejua ika yajki Samaria, kampa taltikpakneminij monekiaok kikakiskej kuali tanauatilmej (Mat. 10:5; Hech. 8:1, 5).

15 Felipe nochipa yaya kampa iespíritu Dios kioliniaya maj youi. Yejua ika, Jiova kichiuak maj tanojnotsani kampa taltikpakneminij ayamo kikaktoyaj kuali tanauatilmej. Ijkuak, judíos amo kinyekitayaj samaritanos. Sayoj ke kemej Felipe amo kinchikoitak, yejuan kuali momachilijkej iuan. Uan taltikpakneminij kuali kikakkej tein kinmatiltij (Hech. 8:6-8).

16 Ompa, iespíritu Dios kiolinij Felipe maj youi Asdod uan Cesarea, kampa nemiaj miakej akin amo katkaj judíos (Hech. 8:39, 40). Kemej veinte xiujmej satepan ke peuak tanojnotsa Samaria, nesi ke inemilis oksepa mopatak. Kipiayaya ichankauan uan mokaltalijka kampa ika tanojnotsaya. Maski mopatak seki taman itech inemilis, kitayekanaltij tanojnotsalis, uan yejua ika Jiova kintatiochiuij yejua uan ichankauan (Hech. 21:8, 9).

17, 18. ¿Keniuj techpaleuia komo tiktayekanaltiaj tanojnotsalis keman mopata seki taman itech tonemilis?

17 Miakej akin kitekitiliaj Jiova miak tonalmej kijtouaj ke komo kitayekanaltiaj tanojnotsalis kinpaleuia maj yolpakikan uan maj kipiakan se kuali tanemilil keman mopata seki taman. Kemej neskayot, keman Osborne uan Polite, seki namikuanij kayomej Sudáfrica, kiskej Betel, kinemilijkej ke niman kiajsiskiaj se tekit kampa amo tekitiskiaj miak tonalmej uan no kani nemiskiaj. Sayoj ke Osborne kijtoua: “Amo niman tikajsikej tekit ijkon kemej tiknemiliayaj”. Uan Polite kijtoua: “Eyi metsti amo tikpiakej tekit, uan amo no tikpiayaj tomin. Semi ouij katka”.

18 ¿Toni kinpaleuij itech nejin ouijkayot? Osborne kijtoua: “Titanojnotsaskej iniuan tokniuan itech nechikol techpaleuij maj tiktayekanaltianij  tein moneki uan maj tikpianij se kuali tanemilil”. Yejuan amo sayoj motekipachojtoyaj, ta kiixtalijkej kisentokaskej tanojnotsaskej. ¡Nejin kinualkuilij miak yolpakilis! Osborne no kijtoua: “Noyampa tiktemojkej tekit hasta ke tikajsikej”.

MAJ SENKIS TITAKUAUJTAMATIKAN IUAN JIOVA

19-21. 1) ¿Toni techpaleuis maj nochipa tiyolseujtokan? 2) ¿Keniuj techpaleuis komo tikchiuaj tein tiuelij satepan ke mopata teisa itech tonemilis?

19 Kemej kinextiaj nejin neskayomej, komo tikchiuaj nochi tein tiuelij uan titakuaujtamatij iuan Jiova, nochipa tiyolseujtoskej (xikonixtajtolti Miqueas 7:7). Xa hasta tikitaskej ke komo tikchiuaj tein tiuelij keman mopata teisa, okachi mochikaua tokuali uikalis iuan Jiova. Polite kijtoua ke kiselis okse tekit kinextiliani tein yekmelauj kijtosneki se takuaujtamatis iuan Jiova hasta keman nesi ke nochi ouij. Uan no kijtoua: “Nokuali uikalis iuan Jiova okachi mochikauani”.

20 Mary, akin ika titajtojkej itech párrafo 8, kisentoka kiyekpia ipopaj uan kichiua tekit kemej precursora. Yejua kijtoua: “Nikitani ke keman nimotekipachojtok, moneki nimotsakuilis, nikchiuas netataujtil uan nimoyolseuis. Tein nikpanotok okachi nechmachtiani ke moneki nikauas nochi imako Jiova. Uan nejon okachi monekis satepan”.

21 Lloyd uan Alexandra, akin ininka titajtojkej ipeujyan tamachtilis, kijtouaj ke ika tein mopatak itech ininnemilis monekik kinextiskej kemej amo kinemiliayaj ox yekmelauj chikauak inintakuaujtamatilis. Yejuan kijtouaj: “Ouijkayomej kinextiaj keniuj moajsi totakuaujtamatilis uan ox techpaleuis uan techyolseuis keman tikpanotoskej kuejmolmej”. Yejuan kimachiliaj ke kinpaleuiani maj kinextikan okachi kualneskayomej.

Tein ijsiujka mopata itech tonemilis uelis techualkuilis tatiochiualismej tein amo tikchiayaj (xikonita párrafos 19 hasta 21)

22. ¿Toni uelis tikyekmatiskej ke panos komo tikchiuaj nochi tein tiuelij ika tein tikpanotokej?

22 Tonemilis uelis ijsiujka mopatas. Uelis mopatas tekit tein tikpiaj itech itekiyo Jiova, tikokolispeuaskej oso xa monekis okachi tikinyekpiaskej tochankauan. Sayoj ke maski tein yeski panos, uelis senkis titakuaujtamatiskej ke Jiova toka motekipachoua uan techpaleuis keman okachi monekis (Heb. 4:16; 1 Ped. 5:6, 7). Axkan maj timochikauakan tikchiuaskej nochi tein tiueliskej ika tein tikpanotokej. Maj okachi tiktataujtikan Jiova uan maj tikauakan maj yejuatsin techyekpia. Komo ijkon tikchiuaj, maski mopatas seki taman itech tonemilis uelis tiyolseujtoskej.

^ párr. 4 Seki xiujmej satepan ke kisak, yekinika ikoneuj José kitokaytij Manasés, porin kijtoj: “Dios nechelkaualtij nochi noouijkayouan”. Senkis moita ke kiajsikamatia ke ikonetsin katka se inetetayokolil Jiova tein ika kipaleuij maj kielkaua tein kijyouijka (Gén. 41:51, nota).

^ párr. 14 Xikonita tamachtilis “¿Tikonmatia?” itech nejin amaix.