Xionyoui kampa nesi tein kipia

Xionyoui kampa nesi tein kipia

 KAMPA TECHTAPOUIAJ ININNEMILIS

Jiova semi nechtatiochiuiani porin kuali nitaixpejpenak

Jiova semi nechtatiochiuiani porin kuali nitaixpejpenak

Katka xiuit 1939. Timeujkej keman tayouayanok katka uan tiyajkej itech carro panoua se hora hasta Joplin, se xolalkonet tein poui Misuri (Estados Unidos). Ompa peujkej tiyouij kajkalpan uan itampa puerta ichtaka tiktalijtiyayaj tratados. Niman keman timatankej, keman ipa tanestiyaya, timokepkej itech carro hasta kampa timokaujkaj timoajsiskej iniuan okseki tokniuan. ¿Keyej titanojnotsatoj achto ke tanesiskia uan niman tiyajkej keman timatankej? Namechmelauilis satepan.

NIYOLIK itech xiuit 1934. Notatuan, Fred uan Edna Molohan, panouayaya veinte xiujmej katkaj Momachtianij ika Biblia (itaixpantijkauan Jiova). Semi niktasojkamati maj nechmachtianij maj niktasojta Dios. Tinemiaj Parsons, se xolal tein poui Kansas. Itech tonechikol miakej tokniuan katkaj taixpejpenalmej. Tiyayaj nochi nechikolmej uan nochipa titanojnotsayaj. Miakpa, sábado tiotak titanojnotsayaj kampa miakej panouaj. Kemansa tisiouiaj, sayoj ke satepan nopopaj techuikaya maj tikuatij helado.

Itech nechikol kampa tipouiaj, tein amo ueyi katka, titanojnotsayaj itech miak xolalkonemej uan itech miak talmej kampa tatokayaj uan kinyekpiayaj tapialmej. Akin ompa nemiaj techpatiliayaj amaixmej ika kilmej, piotemej uan hasta piomej. Kemej amo semi tikpiayaj tomin uan nopopaj kiixtaujkaya amaixmej, tikuayaj nejon tein techmakayaj.

TANOJNOTSALIS

Notatuan kitemojkej se gramófono tein ika tanojnotsaskiaj. Nejua amo uelia niktekitiltiaya porin semi ninojnelok nikatka, sayoj ke semi nikuelitaya nikinpaleuis maj kitalikan tanojnotsmej tein kitemakaya tokniuj Rutherford keman oksepa kinkalpanouayaj taltikpakneminij oso tamachtiayaj.

Iniuan notatuan inakastan tocarro tein kipiaya se ueyi bocina

Nopopaj kitalij se ueyi bocina ikuapan tocarro, tein katka se Ford tein kisak itech xiuit 1936. Nejin carro semi techpaleuij itech tanojnotsalis. Miakpa, yekinika tiktaliayaj tatsotson porin tiknekiaj maj taltikpakneminij kikakinij uan satepan tiktaliayaj se tanojnots. Keman tamia, tikinmakayaj amaixmej akin kinekiaj kimatiskej okachi.

Itech xolal Cherryvale tein poui Kansas, policías kiluijkej nopopaj maj amo kitaliani tanojnotsmej itech parque, kampa miakej yayaj moseuitij itech tonal domingo. Sayoj ke kiluijkej ke ueliskia kitalis ojtenoj. Yejua ika, nopopaj kiuikak carro uan kiketsak ojtenoj. Oksepa kitalij tanojnots uan ijkon taltikpakneminij ueliskiaj kisentokaskiaj kikakiskej. Nejua semi nechyolpaktiaya nikpanos nochi nejon iuan nopopaj uan nokniuj Jerry, akin tayekanaya.

 Achto ke peuaskia xiuit 1940, titapaleuijkej itech “ijsiujkatanojnotsalis” tein mochiuaya kampa taltikpakneminij semi techixnamikiaj. Kemej nikijtoj achto kampa ika nitajtoj Joplin (Misuri), timeuayaj achto ke tanesiskia uan ichtaka tipanouayaj kajkalpan tikaujtiyayaj tratados oso folletos itampa puerta. Satepan, timosentiliayaj kalampa itech xolal uan tikitayaj ox policías kikitskijkaj semej tokniuan.

Itech nejon xiujmej, okse taman tanojnotsalis tein semi techyolpaktiaya katka keman tinejnemiaj itech ojmej ika uejueyi amamej. Timopilouiliayaj uejueyi amamej uan timotojtokatiyayaj. Nikelnamiki ke se tonal tokniuan ualajkej itech toxolal uan ojtokakej itech ojmej ika se ueyi amat tein kijtouaya “Taneltokalis se tamekauilis uan se takajkayaualis”. Kiskej tochan, ojtokakej panoua se kilómetro uan tajko uan satepan mokepkej. Semi kuali tein kipanokej porin amo akin kinixnamikik, sayoj ke miakej semi kinyolnotsaya kiitaskej tein panotoya.

YEKINIKA UEJUEYI NECHIKOLMEJ KAMPA NIYAJKI

Miakpa, nochankauan yayaj uejueyi nechikolmej tein mochiuayaj Texas. Nopopaj tekitia itech trenes, yejua ika uelia tiyayaj tikinkalpanotij tochankauan uan uejueyi nechikolmej uan amo monekia titaxtauaskej. Iikniuj nomomaj akin tayekanaya, Fred Wismar, uan inamik, Eulalie, nemiaj Temple (Texas). Notío Fred momachtijka tein melauak keman katka telpoch, tepitsin satepan ke panok xiuit 1900. Moauijka uan kintapouijka iikniuan siuamej tein momachtijtoya, semej yejua nomomaj. Seki tokniuan akin nemiaj Texas kuali kiixmatiaj porin ompa takalpanojka itech nechikolmej. Yejua katka kualtakat, yolpakia uan kiteluelitaya kiteixmatiltis tein melauak uan nechkauilij se tel kuali neskayot.

Itech xiuit 1941, tiyajkej itech tren hasta San Luis (Misuri) kampa mochiuaskia se ueyi nechikol. Nochin konemej uan telpochmej techyoleujkej maj timosentalianij taixpan uan ijkon ueliskia tikakiskej itanojnots tokniuj Rutherford tein motokaytiaya “Ikoneuan Tekiuaj”. Tikatkaj panoua quince mil uan semi tikmoujkaitakej tein panok keman tamik tanojnots. Tokniuj Rutherford uan itapaleuijkauan techtayokolijkej tisejsemej se yankuik amatajkuilol tein motokaytiaya Hijos.

Itech metsti abril xiuit 1943, itech xolal Coffeyville (Kansas) tikpiakej se ueyi nechikol kampa amo miakej mosentilijkej tein motokaytij “Llamada a la Acción”. Ompa motematiltij ke itech nochi nechikolmej peuaskia mochiuaskia Escuela tein Techmachtia iTekiyo Dios. No tikselijkej se folleto tein kipiaya 52 tamachtilismej tein tiktekitiltiskiaj. Satepan itech nejon xiuit, niktemakak noyekinika tanojnots itech nejon nechikol. Itech nejon ueyi nechikol nimoauij iniuan okseki tokniuan kampa kisentiliayaj at tein tel sesek katka tein moajsia kampa kinyekpiayaj tapialmej. Nejon tonal semi kipia ipatiuj.

 NIKNEKIA NITEKITIS BETEL

Keman nikisak secundaria, itech xiuit 1951, monekik nikixpejpenas toni nikchiuaskia satepan. Niktelnekia niyas Betel, kampa tapaleuijka nokniuj Jerry. Yejua ika niman niktitanik Brooklyn amat tein ika nitajtania nitekitis Betel. Tepitsin satepan nechyoleujkej uan peuak nitekiti ompa itech tonal 10 metsti marzo xiuit 1952. Semi kuali tein nikixpejpenak porin nechpaleuij maj senkis niktekitili Dios.

Niknekia nitekitis kampa kiamakixtiaj revistas uan okseki amatajkuilolmej. Sayoj ke amo keman nitekitik ompa porin nechixtalijkej maj nitekiti kampa takualtekaj uan satepan kampa takualchiuaj. Nikuelitaya tein nikchiuaya ompa uan nimomachtij miak taman. Uan no, kemej akin titakualchiuayaj timopapatatiyayaj, tonayan uelia nimomachtiaya itech ueyi biblioteca tein onkak Betel. Nejon nechpaleuij maj okachi kuali nimouika iuan Jiova, maj okachi nitakuaujtamati uan maj okachi niknekini nitekitis Betel nochi tonalmej tein niueliskia. Jerry kiska Betel itech xiuit 1949 uan monamiktijka iuan Patricia, sayoj ke mokaltalijkej ompakauin itech altepet Brooklyn. Itech yekinika xiujmej keman peuak nitekiti Betel, nochipa nechpaleuijkej uan nechyolchikaujkej.

Tepitsin satepan ke niajsik, tokniuan peuak kintemouaj akin ueliskiaj pouiskej iniuan akin kitemakayaj tanojnotsmej akin tekitiaj Betel. Nejin tokniuan kinixtaliayaj maj kinkalpanokan seki nechikolmej itech xiuit tein moajsiskiaj hasta kemej 322 kilómetros uejka iuan Brooklyn. Kitemakayaj se tanojnots uan tanojnotsayaj kajkalpan iniuan tokniuan. Nikpiak tatiochiualis maj nechixpejpenakan. Semi niyolmouia keman nipeuak. Miakpa niyaya itech tren. Nikelnamiki tein panok se domingo tiotak itech xiuit 1954 keman tel taseseyaya. Nimokepaya Nueva York itech tren, uan niknemiliaya niajsiskia Betel keman tapoyaujtoskia. Sayoj ke peuak tel tasekuetsi uan chikauak taejekaya uan nejon kichiuak maj tren uejueliuini. Tren ajsik hasta lunes kemej makuil hora kualkampa. Nitejkok itech metro tein yaya Brooklyn, uan niman nitekitito kampa titakualchiuayaj. Tajkajya niajsik uan semi nisioujtoya porin nochi youal amo nikochik. Sayoj ke nikinkalpanos uan nimosentilis iniuan tokniuan akin amo nikinixmatia okachi nechyolpaktiaya ke tein yeski ouijkayot tein nikpanoskia.

Timomachtijtokej achto ke tikpanoltiskej tamachtilis itech WBBR

Itech yekinika xiujmej tein nitekitik Betel, nechyoleujkej maj nitapaleui itech radio WBBR, tein itech nejon tonalmej moajsia ajko itech kali tein yetoya itech ojti Columbia Heights tapoual 124. Sejse semana panouaya itech radio se ixneskayot kampa seki taltikpakneminij mosenmachtiayaj Biblia. Nejua katka semej. Tokniuj Alexander H. Macmillan, akin ika netasojtalis tikiluiayaj tokniuj Mac, no tapaleuiaya itech tein mopanoltiaya itech WBBR. Miak xiujmej tekitik Betel, uan akin yankuixtok tiajsikaj ompa techkauilij se tel kuali neskayot porin kisentokaya kitekitiliaya Jiova maski kipanoka miak ouijkayomej.

Tikxelouayaj amamej tein kijtouayaj tein mopanoltiskia itech WBBR

Itech xiuit 1958, nechyoleujkej maj nitapaleui itech tekit tein mochiuaya itech tamachtilis Galaad. Monekia nikinpaleuis yankuik misioneros maj kikixtianij amat tein ika ueliskiaj kalakiskej itech okse ueyi altepet uan nikixtalis keniuj ajsiskiaj ompa. Itech nejon xiujmej, tel patiyoj katka se yas itech avión, yejua ika sayoj seki misioneros ueliaj itech yayaj. Miakej akin kintitankaj maj tapaleuitij África uan Asia yayaj itech barcos tein kiuikayaj tamamal. Keman amo tel patiyojok katka se yas itech avión, misioneros peujkej itech youij.

Nikyektalijtok amamej tein kiseliskej misioneros keman motamimachtiskej

UEJUEYI NECHIKOLMEJ

Itech xiuit 1960 okachi momiakilij tekit tein nikpiaya, porin monekia nikintemos aviones tein itech yaskiaj tokniuan itech uejueyi nechikolmej kampa mosentiliskiaj akin uejka kayomej tein mochiuaskiaj itech xiuit 1961. Nejin kisaskiaj Estados Unidos uan ajsiskiaj Europa. Nejua niyajki itech semej nejon aviones tein kisak Nueva York uan ajsik Hamburgo (Alemania). Satepan ke tamik ueyi nechikol tein ompa mochiuak,  tinauin akin titekitiaj Betel titaneujkej se carro uan tiyajkej Italia, kampa titakalpanotoj itech sucursal tein moajsi Roma. Ompa tiyajkej Francia, tikpanauijkej tepemej Pirineos uan tiajsikej España, kampa tekiuanij amo kinkauayaj tokniuan maj tanojnotsakan. Semi techyolpaktij tikinixmatiskej tokniuan kayomej Barcelona uan tikinmakaskej seki amaixmej tein tikinpanpikkaj kemej yeskiaj netetayokolilmej. Satepan tiyajkej Ámsterdam uan ompa tikuikej avión tein yaya Nueva York.

Itech xiuit 1962 nechixtalijkej maj niktemo keniuj 583 tokniuan yaskiaj uejueyi nechikolmej kampa mosentiliskiaj akin uejka kayomej tein mochiuaskiaj miakkan itech taltikpak. Katka ueyi nechikol “Buenas Nuevas Eternas”, tein mochiuak itech xiuit 1963. Mochiuaskiaj Europa, Asia uan Pacífico sur, uan tamiskiaj Honolulú (Hawái) uan Pasadena (California). Tokniuan no yaskiaj Líbano uan Jordania kampa kiixmatiskiaj talmej tein ika motajtouaj itech Biblia. Kampa nitekitia amo sayoj monekia tiktemoskej boletos tein ika yaskiaj itech avión uan tikxeloskej kampa mokauaskiaj, ta no monekia tikixtiskej amamej tein ika ueliskia kalakiskej itech nejon altepemej.

NIKAJSI AKIN NOUAN YAJTINEMIS

Itech xiuit 1963 no panok se taman tein niktelpatiuita. Itech tonal 29 metsti junio nimonamiktij iuan Lila Rogers, se tokniuj kayot Misuri, akin eyi xiuitya tekititoya Betel. Se semana satepan ke timonamiktijkej, iniuan timosentilijkej tokniuan akin yajtinemiaj itech tataman altepemej uan tiyajkej Grecia, Egipto uan Líbano. Avión tein kisak Beirut uan ajsik Jordania amo uejkauak. Itech nejon altepet tekiuanij amo semi kinkauayaj tokniuan maj taueyichiuakan uan techiluijkaj ke itaixpantijkauan Jiova amo kinmakayaj amat tein ika ueliskiaj kalakiskej ompa, yejua ika timotajtaniayaj toni panoskia keman tiajsiskiaj. Semi tikmoujkaitakej maj seki tokniuan moajsinij kampa ajsiaj aviones ika se ueyi amat tein kijtouaya “Techmaka pakilis xiualakan, itaixpantijkauan Jiova”. Semi techyolpaktij tikixmatiskej talmej tein ika motajtouaj itech Biblia uan tikitaskej kani nenkej Abrahán, Isaac uan Jacob, kani Jesús uan tatitanilmej tanojnotskej uan kampa itatojtokakauan Cristo peujkej momiakiliaj itech “nochi senmanauak” (Hech. 13:47).

Cincuenta y cinco xiujmejya Lila nochipa nechpaleuiani itech nochi tekimej tein tikpianij. Miakpa tisenyajkaj España uan Portugal keman tekiuanij amo kinkauayaj tokniuan maj taueyichiuakan. Tikinyolchikaujkej tokniuan uan tikinuikilijkej amaixmej uan okseki taman tein kinpolouaya. Hasta tikinitatoj seki tokniuan akin tsaktoyaj ompa Cádiz (España). Semi niyolpakik porin uelik nikinyolchikauak ika se tanojnots.

Iuan Patricia uan Jerry Molohan keman tiyayaj ueyi nechikol “Paz en la Tierra” itech xiuit 1969

Itech xiuit 1963, peuak nitapaleuia maj moixtali keniuj tokniuan yaskiaj uejueyi nechikolmej kampa mosentiliaj akin uejka kayomej. Nejin mochiuanij África, América Central uan América del Sur, Australia, Europa, Hawái, Asia, Nueva  Zelanda uan Puerto Rico. Lila uan nejua tisenyetonij itech miak uejueyi nechikolmej tein amo tikinelkauaj, kemej tein mochiuak Varsovia (Polonia) itech xiuit 1989. Miakej tokniuan kayomej Rusia moajsiaj itech nejon ueyi nechikol. Nejin katka yekinika ueyi nechikol tein kipiayaj. Sekin akin tikinixmatkej miak xiujmej tsaktoyaj itech Unión Soviética porin amo kinekkej kikauaskej Jiova.

Nikinkalpanos uan nikinyolchikauas tokniuan akin tekitij Betel uan misioneros noyampa taltikpak yejua okse tekit tein semi nechyolpaktia. Yankuixtok titakalpanojkej Corea del Sur uan tikinixmatkej 50 tokniuan takamej akin tsaktokej itech xolal Suwon. Nochin kipiayaj se kuali tanemilil uan kinekiaj oksepa kitekitiliskej Jiova keman kisaskiaj uan maj nion se tanauatil kintsakuili. Semi techyolchikauak tikinixmatiskej (Rom. 1:11, 12).

NECHYOLPAKTIA MAJ MOMIAKILIKAN ITEKITIKAUAN DIOS

Ijkon kemej panouanij xiujmej, nikitani keniuj momiakilianij itekitikauan Jiova porin yejuatsin kintatiochiuia. Keman nimoauij, itech xiuit 1943, tikatkaj kemej cien mil tanojnotsanij. Axkan, panoua chikueyi millones tiktekitiliaj Jiova itech 240 uejueyi altepemej uan xolalmej. Tekit tein kichiuaj misioneros semi tapaleuiani. Semi nechyolpaktiani nitekitis iniuan miakej nejon misioneros uan nikinpaleuis maj ajsikan kampa tapaleuiskej.

Niyolpaki porin keman katka nitelpoch nikixpejpenak niktekitilis Jiova uan niktitanik amat tein ika nitajtanik nitekitis Betel. Jiova semi nechtatiochiuiani nochi nejin xiujmej. Lila uan nejua amo sayoj tiyolpakinij ika tein tikpanouanij Betel, ta no techyolpaktiani titanojnotsaskej panoua cincuenta xiujmej iniuan tokniuan akin pouij itech tataman nechikolmej ompa Brooklyn uan tikinpiaskej miakej totasojikniuan.

Niksentoka nitekiti Betel mojmostaj ika inepaleuil Lila. Nikpia panouaya 84 xiujmej, sayoj ke ueliok nikchiua tekit tein tapaleuia. Nitekiti kampa kiseliaj uan kititanij cartas.

Iuan Lila itech nejin tonalmej

Semi nechyolpaktia nipouis itech inechikol Jiova uan nikitas keniuj mochiuaj tajtolmej tein moajsij itech Malaquías 3:18: “Namejuan oksepa nankiitaskej keniuj tel taman se akin yolmelauak uan se akin amo yolkuali, se akin kitekitilia Dios uan se akin amo kitekitilia”. Mojmostaj tikitaj ke nikan kampa Satanás taixyekantok okachi mochiua tein amo kuali uan ke taltikpakneminij kinemiliaj ke amo motayektalis uan amo yolpakij. Sayoj ke akin tiktasojtaj uan tiktekitiliaj Jiova tiyolpakij, hasta itech nejin tonalmej tein semi ouijkej, porin tikchiaj tikseliskej tein kuali satepan. Se ueyi tatiochiualis maj ueli tikinmatiltikan oksekin tein kuali tein kichiuas iTekiuajyo Dios (Mat. 24:14). Amo uejkaua, nejin tekiuajyot kiixpolos tein amo kuali tein mochiujtok uan kichiuas se xochital. ¡Tiktelnekij maj ejko nejon tonal! Ijkuak, amo tikokolispeuaskejok, tiyolpakiskej uan tinemiskej nochipaya.