Xionyoui kampa nesi tein kipia

Xionyoui kampa nesi tein kipia

“Yek melau ma titetasojtakan ika nochi ten tikchiutinemij”

“Yek melau ma titetasojtakan ika nochi ten tikchiutinemij”

“Ma amo titetasojtakan sayo ika totajtoluan san nion sayo ika ten tikijtoaj ika tonenepil. Ta, de yek melau ma titetasojtakan ika nochi ten tikchiutinemij.” (1 JUAN 3:18)

NEKUIKATILMEJ: 3, 50

1. ¿Katiyejua netasojtalis tein okachi moneki se kinextis, uan keyej? (Xikonita taixkopimej ipeujyan tamachtilis.)

ITECH Jiova ualeua netasojtalis (1 Juan 4:7). Nejin netasojtalis moyekana ika tein kuali, uan itech Biblia mokui tajtol griego agápe keman ika motajtoua. Nejin netasojtalis amo sayoj tein se kimachilia, ta no se kinextia ika tein se kichiua tein ika se kinpaleuia oksekin uan amo se kichia taxtauil. Nejon techyolpaktia uan kichiua maj kuali timomachilikan.

2, 3. ¿Keniuj kinextiani Jiova ke yekmelauj kintasojta taltikpakneminij?

2 Jiova kinnextilij netasojtalis taltikpakneminij achto ke kinchijchiuaskia Adán uan Eva. Kemej neskayot, kichijchiuak taltikpak kemej uelis nikan tinemiskej nochipaya uan kitalij nochi tein moneki, amo sayoj tein ika tiyoltoskej, ta no tein kichiuas maj tiyolpakikan. Uan amo kichijchiuak tein sayoj yejuatsin kiyolpaktis, ta tein tejuan techyolpaktis. Uan no, taltikpakneminij ueliskiaj nemiskej nochipaya itech Xochital.

3 Satepan ke Adán uan Eva kiixnamikkej Jiova, yejuatsin kinextij inetasojtalis kemej amo keman ijkon kichiujtoya. Kemej kiyekmatia ke seki ininkoneuan kitasojtaskiaj, kichiuak nochi  tein monekia tein ika kinmakixtiskia (Gén. 3:15; 1 Juan 4:10). Keman Jiova motenkauak ke kititaniskia se Temakixtijkej, yejuatsin kiitak kemej yeskia kitemakakaya iKonetsin. Kemej naui mil xiuit satepan, Jiova kitemakak iKonetsin maj ininka momikili taltikpakneminij (Juan 3:16). ¡Semi tiktasojkamatij maj kichiuani nejon!

4. ¿Keniuj tikmatij ke maski titajtakouanij uelis yekmelauj titetasojtaskej?

4 Kemej tichijchiujtokej kemej Dios tamati, ueli tiknextiaj yekmelauj netasojtalis. Melauak ke kemansa ouij techkisa, porin titajtakouanij, sayoj ke uelis yekmelauj titetasojtaskej. Kemej neskayot, Abel kinextij ke kitasojtaya Dios keman kimaktilij tein okachi kuali tein kipiaya (Gén. 4:3, 4). Noé kinextij ke kintasojtaya oksekin keman miak xiujmej kinnejmachtij maski amo kikakkej (2 Ped. 2:5). Uan Abrahán kinextij ke okachi kitasojtaya Dios ke tein yeski tein kimachiliaya keman yaya kitemaktiti ikonetsin, Isaac (Sant. 2:21). Ijkon kemej nejin takamej akin amo keman kikaujkej Jiova, tejuan tiknekij tiknextiskej netasojtalis hasta keman ouij techkisas.

KEMAN YEKMELAUJ SE TETASOJTA UAN KEMAN AMO

5. ¿Keniuj uelis tiknextiskej ke yekmelauj titetasojtaj?

5 Biblia kijtoua ke yekmelauj netasojtalis amo tiknextiaj “ika totajtoluan san nion sayo ika ten tikijtoaj ika tonenepil”, ta “ika nochi ten tikchiutinemij” (1 Juan 3:18). Nejin amo kijtosneki ke amo uelis tikijtoskej ke titetasojtaj (1 Tes. 4:18). Kijtosneki ke amo sayoj moneki tikiluiskej aksa ke tiktasojtaj, ta kemansa moneki tiknextiskej ika tein tikchiuaj. Kemej neskayot, komo se tokniuj amo kipia miak takual oso tilmaj, amo sayoj moneki tikiluiskej teisa tein kiyolchikauas (Sant. 2:15, 16). No ijkon, kemej tiktasojtaj Dios uan taltikpakneminij, amo sayoj tiktajtaniaj yejuatsin maj kichiua maj moajsikan okachi tanojnotsanij, ta no timochikauaj titanojnotsaskej (Mat. 9:38).

6, 7. 1) ¿Keniuj se tetasojta “amo ika ne taixkajkayaualis”? 2) ¿Akonimej sayoj kinextijkej ke kemej yeskia tetasojtayaj?

6 Tatitanil Juan kijtoj ke moneki “yek melau ma titetasojtakan ika nochi ten tikchiutinemij”. Ika okseki tajtolmej moneki titetasojtaskej “amo ika ne taixkajkayaualis”, ta “ika nochi toyolo” (Rom. 12:9; 2 Cor. 6:6). Nejin kijtosneki ke amo uelis kemej yeskia sayoj tiknextiskej ke titetasojtaj. Komo sayoj tiktemouaj maj oksekin kiitakan ke titetasojtaj, titakajkayaujtoskej, uan nejon netasojtalis amo kipia ipatiuj.

7 Maj tikitakan ininneskayo sekin akin kichiujkej maj moita ke tetasojtayaj. Keman Satanás tajtoj iuan Eva itech xochital tein moajsia Edén, kinextij ke kemej yeskia kinekia kipaleuis. Sayoj ke tein melauj kikajkayaujtoya (Gén. 3:4, 5). Okse yejua Ahitofel. Yejua kinextij ke kemej yeskia katka itasojikniuj tekiuaj David, sayoj ke kinekepilij keman kiitak ke okachi kuali nemiskia (2 Sam. 15:31). Axkan, akin kikaujkej uan kiixnamikij tamachtilis tein melauak uan oksekin akin kitemouaj kinxexeloskej tokniuan “kinxochinojnotsaj” uan kinueyitaliaj tokniuan uan ika kichiuaj maj kinemilikan ke kintasojtaj. Sayoj ke tein melauj sayoj kitayekanaltiaj inintajnejnekilis (Rom. 16:17, 18).

8. ¿Toni moneki timotajtaniskej?

8 Semi tepinaujtij komo se kinextia ke kemej yeskia se tetasojta. Xa uelis tikinkajkayauaskej oksekin, sayoj ke amo Jiova. Jesús kijtoj ke “kichikaukatatsakuiltis” akin takajkayaua (Mat. 24:51). Tiitekitikauan Jiova amo keman tiknekij titekajkayauaskej. Yejua ika moneki timotajtaniskej:  “¿Yekmelauj nitetasojta uan amo sayoj notech nitanemilia nion niktemoua nitekajkayauas?”. Axkan, maj tikitakan chiknaui taman kemej uelis tiknextiskej ke titetasojtaj “amo ika ne taixkajkayaualis”.

KENIUJ TIKNEXTISKEJ KE YEKMELAUJ TITETASOJTAJ

9. ¿Toni tikchiuaskej komo yekmelauj tikintasojtaj tokniuan?

9 Maj titapaleuikan ika yolpakilis maski oksekin amo kiitaskej. Moneki tikinpaleuiskej tokniuan kemej oksekin amo kimatiskej (xikonixtajtolti Mateo 6:1-4). Ananías uan Safira amo ijkon kichiujkej. Yejuan kinekiaj maj oksekin kimatinij ke tapaleuijkaj ika tomin. Uan no, kemej takajkayaujkej keman kijtojkej kanachi tomin kitemakakaj, Dios kintatsakuiltij (Hech. 5:1-10). Komo yekmelauj tikintasojtaj tokniuan, ika yolpakilis tikinpaleuiskej uan amo tiktemoskej maj oksekin kimatikan tein tikchiujkej. Uelis techpaleuis ininneskayo tokniuan akin kinpaleuiaj Oloch Taojtokaltianij maj kichijchiuakan tamachtilis tein tikseliaj. Yejuan amo kitemouaj maj kintelixmatikan nion kijtouaj toni tekimej kichiuanij.

10. ¿Keniuj uelis tikinpoujkaitaskej oksekin?

10 Maj tikinpoujkaitakan oksekin (xikonixtajtolti Romanos 12:10). Jesús kikauak se kuali neskayot keman kinmetspajpakak itatitaniluan (Juan 13:3-5, 12-15). Hasta keman kiselijkej yektikatsin espíritu, uelik kuali kiajsikamatkej keyej Jesús kichiuak nejon (Juan 13:7). Tejuan moneki timochikauaskej tiyeskij tiyolyemankej kemej Jesús uan tikinpoujkaitaskej oksekin. ¿Keniuj? Moneki amo tiknemiliskej ke okachi tiueyichiuanimej porin tikpiaj okachi nemachtil, miak tomin oso porin techmakanij seki tekimej itech nechikol (Rom. 12:3). Uan amo tikinnexikoluiaj akin kiniluiaj ke kuali kichiujkej teisa, ta tiyolpakij maski tiknemiliskej ke no moneki nesis ke titapaleuijkej.

11. ¿Keyej moneki tikiniluiskej oksekin ika nochi toyolo ke kuali kichiujkej teisa?

11 Maj ika nochi toyolo tikiniluikan tokniuan ke kuali kichiujkej teisa. Nochipa moneki tiktemoskej tikiniluiskej oksekin ke kuali kichiujkej teisa, porin nejin kinyolchikaua (Efes. 4:29). Sayoj ke moneki tikitaskej maj yekmelauj kisa itech toyolo uan amo sayoj porin tiktemouaj tikinueyitaliskej. Moneki amo no tikijtoskej tein amo yekmelauj tikmachiliaj oso tiktemoskej amo tikyolmajxitiskej aksa maski moneki (Prov. 29:5). Titakajkayaujtoskiaj komo tikiluiskiaj aksa ke kuali kichiuak teisa sayoj ke satepan tikijijtouaj keman timoajsij iniuan oksekin. Tatitanil Pablo kuali kinextij keniuj yekmelauj se tetasojtas. Se tonal, kiniluij tokniuan akin nemiaj itech xolal Corinto ke kuali kichiujtoyaj seki taman (1 Cor. 11:2). Sayoj ke no kinyolmajxitij uan ika netasojtalis kinmelauilij tein amo kuali kichiujtoyaj (1 Cor. 11:20-22).

Tiknextiaj netasojtalis uan kualtakayot keman tikinpaleuiaj akin kinpoloua (xikonita párrafo 12)

12. ¿Keniuj uelis tiknextiskej ke yekmelauj titetasojtaj keman tikualtakamej?

12 Maj tikualtakamej. Jiova technauatia ke moneki tiyeskij tikualtakamej iniuan tokniuan (xikonixtajtolti 1 Juan 3:17). Sayoj ke moneki techolinis tein kuali. Maj timotajtanikan: “¿Nikinyoleua nochan sayoj notasojikniuan uan akin kipiaj se ueyi tekit itech nechikol? ¿Nikinyoleua sayoj akin niknemilia ke satepan nechpaleuiskej? ¿Oso nikualtakat iniuan tokniuan akin amo nikinyekixmati oso akin amo uelis nechpaleuiskej satepan?” (Luc. 14:12-14). Maj tiknemilikan ke se tokniuj moneki se kipaleuis porin amo kuali taixpejpenak oso ke aksa akin tikyoleuaj tochan amo keman techtasojkamatiliani. Jiova techiluia: “Xikinselikan tech namochan [...] aken  yeski” (1 Ped. 4:9). Ijkon tiyolpakiskej porin techolinia tein kuali maj tikchiuakan nejin (Hech. 20:35).

13. 1) ¿Kemanian moneki okachi titapaleuiskej ika nejmachkayot? 2) ¿Keniuj uelis tikinpaleuiskej akin amo chikauak inintakuaujtamatilis?

13 Maj tikinpaleuikan akin amo chikauak inintakuaujtamatilis. Biblia technauatia: “Xikinpaleuijtiyakan nekes ten amo kipiaj ueyi takuautamatilis. Uan no xikinijyouilijtiyakan nochi in ouijkayot ten ne tokniuan kichiuaj” (1 Tes. 5:14). Miakej tokniuan akin amo chikauak inintakuaujtamatilis satepan kichikauaj. Sayoj ke oksekin moneki maj tiksentokakan tikinpaleuijtokan ika nejmachkayot. ¿Keniuj? Uelis tikinyolchikauaskej ika Biblia, tikinyoleuaskej maj touan tanojnotsakan oso tikinkauaskej maj techtapouikan keniuj momachiliaj. Uan no, maj amo tiknemilikan katiyejua tokniuan kipiaj chikauak inintakuaujtamatilis oso katiyejuan amo, ta maj tikelnamikikan ke tinochin ueli kuali tikchiuaj teisa uan no timopolouaj. Hasta tatitanil Pablo kijtoj ke seki taman amo kiyekchiuaya (2 Cor. 12:9, 10). Tinochin moneki maj tokniuan techpaleuikan uan maj techyolchikauakan.

14. ¿Toni moneki tikchiuaskej komo tiknekij kuali timouikaskej iniuan tokniuan?

14 Maj kuali timouikakan iniuan oksekin. Moneki timochikauaskej kuali timouikaskej iniuan tokniuan maski tikitaskej ke techchiuilijkej tein amo kuali oso ke taman moajsikamatik tein tikchiujkej oso tikijtojkej (xikonixtajtolti Romanos 12:17, 18). Komo tikyolxokoliaj aksa, moneki tikiluiskej maj techtapojpolui, sayoj ke moneki tikchiuaskej ika nochi toyolo. Kemej neskayot, maj amo tikiluikan: “Amo niknekia ximokuejmolo”, ta moneki tikijtoskej ke no tejuan totajtakol uan tikiluiskej: “Amo niknekia nimitsyolxokolis ika tein nikijtoj”. Namikuanij okachi moneki maj kuali mouikakan. Amo kuali yeskia maj kinextikan ke motasojtaj keman kinitstokej, sayoj ke kalijtik nion monotsaj, moiluiaj amo kuali tajtolmej oso hasta moteuiaj.

15. ¿Keniuj uelis tiknextiskej ke yekmelauj titetapojpoluiaj?

15 Maj titetapojpoluikan. Komo aksa techyolxokolia, maski amo kimatik, moneki tiktapojpoluiskej uan tikelkauaskej tein techchiuilij. Tiitekitikauan Dios tiktakamatij nejin tayolmajxitilis: “Ximoxikouilijtiyakan ne yolxokolilis ten namechiuiliaj oksekin. Uan ximofuerzajuikan de ke nachipa [...] xikpixtinemikan ne yolseuilis se uan okse” (Efes. 4:2, 3). Komo yekmelauj tiknekij titetapojpoluiskej, moneki amo itech titanemilijtinemiskej tein techchiuilijkej, porin akin tetasojta “[amo] kielnamiktinemi tetajtakoluan” (1 Cor. 13:4, 5). Komo tiksentokaj tikualantokej, tikijtakoskej tokuali uikalis iuan nejon tokniuj uan iuan Jiova (Mat. 6:14, 15). No tiknextiaj ke yekmelauj titetapojpoluiaj keman ininka timotataujtiaj  akin techyolxokolijkej (Luc. 6:27, 28).

16. ¿Keniuj moneki tikitaskej tekimej tein tikseliaj itech nechikol?

16 Maj tiktayekanaltikan tein kinpaleuis oksekin. Komo tikseliaj se tekit itech nechikol, uelis ika tiknextiskej ke yekmelauj titetasojtaj. ¿Keniuj? Keman amo tiktemoskej “tapaleuilis para tejuan san”, ta tein kinpaleuis oksekin (1 Cor. 10:24). Kemej neskayot, kemej tokniuan tayektalianij ajsij kampa mochiua ueyi nechikol achto ke oksekin, ueliskia kinemiliskej kixeloskej okachi kuali ikpalmej kampa motaliskej yejuan uan ininchankauan. Sayoj ke, miakej kikuij ikpalmej kampa kinixtalijkej maj tekitikan, maski amo ompa kinekiskiaj. Ijkon kinextiaj ke yekmelauj tetasojtaj uan amo sayoj kitayekanaltiaj inintanejnekilis. ¿Keniuj uelis tikchiuaskej kemej yejuan?

17. ¿Toni kiolinis maj kichiua akin yekmelauj tetasojta komo ueyi tajtakoua?

17 Maj amo tiktatikan tajtakolmej uan maj amo tikchiuakanok. Seki tokniuan akin kichiujkej se ueyi tajtakol kitemouaj maj amo momati uan ijkon amo mopinaujtiskej nion kichiuaskej maj oksekin amo kuali kinitakanok (Prov. 28:13). Sayoj ke nejon kinextia ke amo tetasojtaj, porin ininselti moijtakouaj uan no kinijtakouaj oksekin. Yektikatsin espíritu uelis amo semi tapaleuisok itech nechikol uan tokniuan uelis moxexeloskej (Efes. 4:30). Yekmelauj netasojtalis kiolinis tokniuj akin ueyi tajtakoj maj iniuan tajto tayekananij, uan yejuan kimakaskej nepaleuil tein monekis (Sant. 5:14, 15).

18. ¿Keyej motelneki tiknextiskej ke yekmelauj titetasojtaj?

18 Kualneskayot tein okachi tayekantok yejua netasojtalis (1 Cor. 13:13). Nejin kinpaleuia taltikpakneminij maj kiitakan akonimej yekmelauj kichiuaj kemej Cristo uan akonimej yekmelauj kichiuaj kemej Jiova, akin itech ualeua netasojtalis (Efes. 5:1, 2). Pablo kijkuiloj: “Komo amo nikpia tetasojtalis, ijkuakon nejua amo teyi nikualtia” (1 Cor. 13:2). Yejua ika, maj nochipa tiknextikan ke titetasojtaj, amo “sayo ika totajtoluan”, ta “ika nochi ten tikchiutinemij”.