Xionyoui kampa nesi tein kipia

Xionyoui kampa nesi tein kipia

 TAMACHTILIS 46

Maj tikyekpiakan tepos youaltik tein kiixnextia takuaujtamatilis

Maj tikyekpiakan tepos youaltik tein kiixnextia takuaujtamatilis

“Ma timokemiloltikan ne ueyi takuautamatilis [...] [tein] keme yeskia se tepos youaltik ten monotsa escudo.” (EFES. 6:16)

NEKUIKATIL 119 Moneki senkis titakuaujtamatiskej

TEIN MOITAS *

1, 2. 1) Kemej kijtoua Efesios 6:16, ¿keyej moneki tikpiaskej totakuaujtamatilis kemej se ueyi “tepos youaltik”? 2) ¿Katiyejua netajtanilmej tikitatij?

¿TIKPIAJ se ueyi “tepos youaltik” tein kiixnextia totakuaujtamatilis? (Xikonixtajtolti Efesios 6:16). Kemaj. Ijkon kemej se tepos youaltik techmatampauia, takuaujtamatilis no techmatampauia maj amo techijtako tein amo kuali tein mochiujtok nikan taltikpak, kemej auilnemilis, neteuilis oso tein yeski taman tein amo mouika iuan itanauatiluan Dios.

2 Kemej tinemij itech itamian tonalmej totakuaujtamatilis moyejyekos ika miak taman (2 Tim. 3:1). Yejua ika, ¿keniuj uelis tikmatiskej ox totakuaujtamatilis moajsi chikauak? Uan ¿toni techpaleuis maj moajsi chikauak? Maj tikitakan itanankililuan nejin netajtanilmej.

MAJ TIKITAKAN MAJ KUALI MOAJSI TEPOS YOUALTIK

Seki tateuianij kiyekchijchiuaj tepos youaltik satepan ke moteuitoj (xikonita párrafo 3)

3. ¿Keniuj tateuianij kiyekpiayaj inintepos youaltik uan keyej?

3 Ne uejkauaj tepos youaltik kinpikiaj ika kuetax. Tateuianij kitaliliayaj tein chiauak uan ijkon amo uejueliuiskia kuetax uan tepos amo ijtakauiskia. Komo se tateuijkej kiitaya ke itepos uejueliujtoya, monekia kiyektalis, ijkon ueliskia ika tateuis. ¿Keniuj mouika nejon ika totakuaujtamatilis?

4. 1) ¿Keyej moneki tikitaskej maj kuali moajsi tepos youaltik tein kiixnextia totakuaujtamatilis? 2) ¿Keniuj moneki tikchiuaskej?

4 Kemej kichiuayaj tateuianij ne uejkauj, tejuan no moneki miakpa tikitaskej maj kuali yeto tepos youaltik tein kiixnextia totakuaujtamatilis. Amo akin uelis toka kichiuas. Ijkon uelis tikixnamikiskej tein yeski porin akin tikchiuaj  kemej Cristo moneki tikinixnamikiskej amokuali ejekamej (Efes. 6:10-12). ¿Toni techpaleuis maj totakuaujtamatilis moajsi chikauak keman tikixnamikiskej tayejyekolismej? Yekinika, maj tiktajtanilikan inepaleuil Dios. Ojpatika, maj tikixtajtoltikan iTajtol Dios uan ijkon timoitaskej kemej yejuatsin techita (Heb. 4:12). Biblia kijtoua: “Xitakuaujtamati iuan Jiova ika nochi moyolo, uan amo xitakuaujtamati itech motaajsikamatilis” (Prov. 3:5, 6). Ika tein kijtoua nejon texto, maj titanemilikan itech se taman tein yankuixtok tikixejekojkej. Kemej neskayot, ¿komo amo techajsini tomin? ¿Tikelnamikkej tein Jiova motenkaua itech Hebreos 13:5? Ompa kijtoua: “Amo keman nimitssekokauas uan nion no nimitssenkauas”. ¿Techpaleuij nejon texto maj titakuaujtamatikan ke Jiova techpaleuiskia? Komo ijkon, tepos youaltik tein kiixnextia totakuaujtamatilis kuali moajsi.

5. ¿Toni uelis tikajsiskej keman tikitaskej keniuj moajsi totakuaujtamatilis?

5 Keman tikitaskej keniuj moajsi totakuaujtamatilis xa tikmoujkaitaskej tein tikajsiskej. Xa amo tikmatiaj ke techouijmaka timotsakuiliskej itech seki taman. Kemej neskayot, xa tikitaj ke kijtakouani totakuaujtamatilis semi timotekipachoskej, takajkayaualis tein kimoyauaj akin techtauelitaj oso tiknekiskej timosenkauaskej. Komo ijkon, ¿toni uelis tikchiuaskej tein techpaleuis maj amo kisentoka moijtako?

MAJ TIKIXTOPEUAKAN TEIN UELIS KIJTAKOS TOTAKUAUJTAMATILIS

6. ¿Itech toni kuali yetok maj ika timotekipachokan?

6 Kuali yetok maj techtekipacho tiknekiskej tikchiuaskej seki taman, kemej neskayot tikyolpaktiskej Jiova uan Jesús (1 Cor. 7:32). Komo tiueyitajtakojkej, semi tiktemouaj oksepa kuali timouikaskej iuan Jiova (Sal. 38:18). No kuali yetok maj akin namikuanij kinekikan kiyolpaktiskej ininnamik uan tinochin tiknekij maj kuali moajsikan tokalyetouanij uan tokniuan (1 Cor. 7:33; 2 Cor. 11:28).

7. 1) ¿Keniuj uelis kijtakos totakuaujtamatilis komo semi timotekipachouaj? 2) Kemej kijtoua Proverbios 29:25, ¿keyej amo moneki tikinmouiliskej taltikpakneminij?

7 Semi timotekipachoskej, uelis kijtakos totakuaujtamatilis. Kemej neskayot, xa semi tiknekij tikpiaskej okachi tilmaj uan tein tikuaskej (Mat. 6:31, 32). Nejon uelis kichiuas maj okachi tiktemokan tikpiaskej miak taman uan hasta tiknekiskej timotomintiskej. Nejon kichiuas maj kaxani totakuaujtamatilis uan moijtakos tokuali uikalis iuan Jiova (Mar. 4:19; 1 Tim. 6:10). No uelis semi tiktemoskej maj kuali techitakan oksekin. Nejon ueliskia kichiuas maj okachi timouikan maj techkejkelokan oso maj techtajyouiltikan ke tikchiuaskej teisa tein Jiova amo kiyolpaktis. ¿Toni uelis techpaleuis maj amo techpano nejon? Maj tiktataujtikan Jiova maj techmaka takuaujtamatilis uan maj techyolchikaua (xikonixtajtolti Proverbios 29:25; Luc. 17:5).

(Xikonita párrafo 8) *

8. ¿Toni moneki tikchiuaskej komo aksa kijtouilia tein amo melauak Jiova uan tokniuan?

8 Satanás akin “tetat den nochi nekes ten xolopijtijtinemij”, kintekitiltia akin kinixyekana uan inintechkopa kitakajkayauilia Jiova uan tokniuan (Juan 8:44). Kemej neskayot, akin kikaujkej uan kiixnamikij tamachtilis tein melauak, itech Internet, televisión uan kampa no moteixmatiltia miak taman kitakajkayauiliaj inechikol Jiova. Nejon yejua se taman tein ika  “Satanás kineki techyolxokolis” (Efes. 6:16). Komo aksa ika technojnotsa nejon takajkayaualis, maj tikixtopeuakan. ¿Keyej? Porin titakuaujtamatij iuan Jiova uan iniuan tokniuan. Tejuan amo keman titajtouaj iniuan akin kikaujkej uan kiixnamikij tamachtilis tein melauak. Amo keman iniuan timotajtolteuiaj nion porin tiknekiskej tikmatiskej tein yejuan kijtouaj.

9. ¿Toni uelis techpanos komo tiknekij timosenkauaskej?

9 Tiknekiskej timosenkauaskej uelis kikaxanis totakuaujtamatilis. Kemansa, kuejmolmej uelis kichiuas maj timosenkauakan. Moneki amo tikixpanauiskej tokuejmoluan, sayoj ke amo moneki tikauaskej maj semi techtekipacho. Porin nejon uelis kichiuas maj tikelkauakan tein Jiova motenkaua techmakas (Apoc. 21:3, 4). Semi timotekipachojtoskej uelis techsioujtis uan nejon kichiuas maj amo tiktekitilikanok Dios (Prov. 24:10). Sayoj ke amo moneki techpanos nejon.

10. ¿Toni techmachtia tein kijkuiloj se tokniuj siuat?

10 Maj tikitakan tein kichiua se tokniuj siuat akin kayot Estados Unidos tein kipaleuia maj chikauak itakuaujtamatilis. Yejua kiyekpia inamik akin semi mokokoua. Kijkuiloj se carta uan kititanik Betel ompa Estados Unidos, kijtouaya: “Kemansa tein tikpanouanij kichiuani maj semi timotekipachokan uan maj tiknekikan timosenkauaskej, sayoj ke tein tikchiaj tikseliskej semi techpaleuiani. Semi niktasojkamati tamachtilis tein tikseliaj porin techpaleuia maj mochikaua totakuaujtamatilis uan maj amo timosenkauakan. Yekmelauj techpaleuia nejon tamachtilis. Techpaleuia maj titaxikokan uan maj tikixnamikikan tayejyekolismej tein Satanás kitalia”. Tein kijtoj nejon tokniuj technextilia ke uelis amo timosenkauaskej. ¿Toni techpaleuis? Maj tikitakan tein techpanoua kemej se tayejyekolis tein Satanás techtalilia, maj titakuaujtamatikan ke Jiova techyolseuis uan maj tikpatiuitakan tamachtilis tein techmaka.

¿Tikitaj maj kuali moajsi “tepos youaltik” tein kiixnextia totakuaujtamatilis? (xikonita párrafo 11) *

11. ¿Katiyejua netajtanilmej moneki timochiuiliskej tein techpaleuis maj tikitakan ox totakuaujtamatilis moajsi chikauak?

11 ¿Tikitaj ke moneki okachi tikchikauaskej  totakuaujtamatilis? Maj timotajtanikan: “Itech seki metsti tein panouani, ¿niktemouani amo semi nimotekipachos?, ¿nikixtopeuani tein kijtouaj akin kikaujkej uan kiixnamikij tamachtilis tein melauak uan amo iniuan nimotajtolteuani? Uan ¿nimochikauani amo nimosenkauas?”. Komo ijkon, totakuaujtamatilis moajsi chikauak. Sayoj ke moneki tiksentokaskej tikchikauaskej porin Satanás kitemos techyejyekos ika okseki taman. Maj tikitakan se.

MAJ AMO TIKTEMOKAN TIMOTOMINTISKEJ

12. ¿Toni uelis panos komo tiktemouaj timotomintiskej?

12 Tiktemoskej timotomintiskej uelis kichiuas maj kaxani totakuaujtamatilis. Tatitanil Pablo kijtoj: “In soldado amo mokalakitinemi tech miak tataman tekime. Ta, [...] kineki kichiutinemis sayo ne tekit ten kinajnauatia ne tayekankasoldado” (2 Tim. 2:4). Tateuianij romanos amo kinkauayaj maj kipiakan okse tekit. ¿Toni ueliskia panos komo se tateuijkej amo tatakamatia?

13. ¿Keyej tateuianij amo kipiayaj okse tekit?

13 Maj titanemilikan itech nejin taman. Kualkampa seki tateuianij momamachtiaj ika ininespada, sayoj ke se amo ijkon kichiua, porin kitalijtok itech xolal se tanamakaloyan kampa kinamakas takual. Nejon tiotak, tateuianij kiitaj ininteposuan uan kitentiaj ininespadas. Sayoj ke, akin kipia itanamakaloyan okachi kiita kichijchiuas takual tein kinamakas mostika. Sayoj ke amo kichiayaj maj mostika taixnamikinij kinteuikan. ¿Katiyejua tateuijkej kuali tateuis uan kichiuas tein kiyolpaktis itayekankauj? Uan ¿katiyejua tikuelitaskiaj maj techpaleui? ¿Semej akin momamachtijtoya keniuj tateuis oso akin kiitstoya itanamakaloyan?

14. ¿Toni okachi tikpatiuitaj tiitateuijkauan Cristo?

14 Ijkon kemej se kuali tateuijkej, tejuan amo no tikauaj maj nion teyi techtapololti tiktayekanaltiskej tein okachi moneki: tikchiuaskej tein kiyolpaktis totayekankauj Jiova uan Cristo. Nejon tikitaj ke okachi kipia ipatiuj ke tein yeski taman tein uelis tikpiaskej itech nejin taltikpak kampa taixyekantok Satanás. Yejua ika  tikuij totiempo uan tochikaualis uan ika tiktekitiliaj Jiova uan no tikitaj maj kuali moajsi tepos youaltik tein kinextia totakuaujtamatilis uan nochi okseki manamikmej tein Dios techmaka.

15. ¿Toni technejmachtia Pablo uan keyej?

15 Maj nochipa tiijsatokan. ¿Keyej? Tatitanil Pablo tanejmachtij ke “naken kinejnekij kachi ok morikojtiliske” yejuan ‘kipoloskej inintakuaujtamatilis’ (1 Tim. 6:9, 10). Tajtol ‘kipoloskej’ kinextia ke komo tiktemouaj tikpiaskej miak taman tein amo moneki uelis techtapololtis. Nejon tein tiknejnekiskej kinextia “mijmikiloyot san” uan ueliskia kijtakos totakuaujtamatilis. Yejua ika maj amo tikauakan maj nejon tanejnekilis techijtako. Moneki tikitaskej kemej tein ika Satanás kineki kijtakos totakuaujtamatilis.

16. Satepan ke tikixtajtoltiskej Marcos 10:17-22, ¿itech katiyejua netajtanilmej moneki titanemiliskej?

16 Maj tikijtokan ke tikpiaj tomin tein ika ueliskia tikouaskej miak taman. ¿Tikchiujtokej tein amo kuali komo tikouaj tein tiknekij sayoj ke amo techpoloua? Xa amo. Maj titanemilikan itech nejin netajtanilmej: Maski ueliskia tikouaskej teisa, ¿tikpiaj tiempo uan chikaualis tein ika tiktekitiltiskej uan tikyekpiaskej? Uan no, ¿ueliskia semi timomatiskej ika nochi  tein tikpiaj? ¿Ueliskia nejon kichiuas maj tikchiuakan kemej telpoch akin keman Jesús kiyoleuak maj okachi kitekitili Dios, yejua kiixtopeuak? (Xikonixtajtolti Marcos 10:17-22). Okachi kuali maj amo tikpiakan miak taman uan maj tikuikan totiempo uan tochikaualis itech itekiyo Dios.

MAJ CHIKAUAK TIKITSKIKAN TEPOS YOUALTIK

17. ¿Toni amo keman moneki tikelkauaskej?

17 Maj amo keman tikelkauakan ke kemej yeskia timoteuijtokej uan ke moneki mojmostaj tikchiuaskej tein techpaleuis maj titatanikan (Apoc. 12:17). Tokniuan amo uelis techuikiliskej tepos youaltik tein kiixnextia takuaujtamatilis. Tejuan moneki chikauak tikitskiskej.

18. ¿Keyej tateuianij ne uejkauj kikitskiayaj ika chikaualis tepos youaltik?

18 Ne uejkauj, se tateuijkej akin kinextiaya yolchikaualis itech tateuilis kitakachiuayaj. Sayoj ke mopinaujtiaya komo keman mokepaya amo kiualkuia tepos youaltik. Tajkuilojkej romano Tácito kijkuiloj: “Komo se tateuijkej kikauaya tepos youaltik semi mopinaujtiaya”. Yejua ika tateuianij monekia chikauak kikitskiskej nejon tepos.

Se tokniuj siuat kiixtajtoltia Biblia, nochipa youi nechikolmej uan tanojnotsa nochipa keman ueli, ijkon kikitskia chikauak tepos youaltik tein kiixnextia takuaujtamatilis (xikonita párrafo 19)

19. ¿Toni moneki tikchiuaskej tein techpaleuis maj chikauak totakuaujtamatilis?

19 Moneki nochipa tiyaskej nechikolmej, tiktematiltiskej itokay Jiova uan iTekiuajyo porin sayoj ijkon chikauak tikitskiskej tepos youaltik tein kiixnextia totakuaujtamatilis (Heb. 10:23-25). Uan no, moneki mojmostaj tikixtajtoltiskej Biblia uan tiktataujtiskej Jiova maj techpaleui maj tikchiuakan nochi tein techyolmajxitia (2 Tim. 3:16, 17). Ijkon, nion se taman tein ika Satanás techixnamiki uelis kichiuas maj tikauakan Jiova (Is. 54:17). “Tepos youaltik” tein kiixnextia totakuaujtamatilis techmatampauis. Titekitiskej ika yolchikaualis iniuan tokniuan. Uan amo sayoj tiktaniliskej nochi tein mojmostaj ueliskia kichiuas maj kaxani totakuaujtamatilis, ta no uelis tikitaskej keman Jesús kiixpolos Satanás uan akin kipaleuiaj (Apoc. 17:14; 20:10).

NEKUIKATIL 118 Xikchikaua notakuaujtamatilis

^ párr. 5 Tepos youaltik oso escudo kinmatampauiaya tateuianij itech se neteuilis, yejua ika komo uejueliuia kiyektaliayaj. Totakuaujtamatilis kemej yeskia se tepos youaltik uan moneki tikyekpiaskej. Itech nejin tamachtilis tikitatij toni uelis tikchiuaskej uan ijkon “tepos youaltik” tein kiixnextia totakuaujtamatilis kuali yetos.

^ párr. 58 TEIN NESI ITECH TAIXKOPIMEJ: Seki kalyetouanij niman kiseuiaj televisión keman peuaj ika tajtouaj akin kikaujkej uan kiixnamikij tamachtilis tein melauak, akin kintakajkayauiliaj itaixpantijkauan Jiova.

^ párr. 60 TEIN NESI ITECH TAIXKOPIMEJ: Satepan, keman taueyichiuaj kemej kalyetouanij, tepopaj kikui se neskayot tein mokixtia itech Biblia uan ika kinyolchikaua ikalyetouanij.