Xionyoui kampa nesi tein kipia

Xionyoui kampa nesi tein kipia

 TAMACHTILIS 45

Keniuj techpaleuia yektikatsin espíritu

Keniuj techpaleuia yektikatsin espíritu

“Ne chikaukauelilis [tein] ualeutok imako Dios uan amo ualeua tech tejuan san.” (2 COR. 4:7)

NEKUIKATIL 104 Iespíritu Dios se netetayokolil

TEIN MOITAS *

1, 2. 1) ¿Toni techpaleuis maj mojmostaj titaxikokan? Xikonmelaua. 2) ¿Toni tikitatij itech nejin tamachtilis?

SATEPAN ke tikpanokej se ouijkayot, timiakej tikijtouanij ke toselti amo ueliskia tikixnamikiskej. Xa ijkon tikijtouanij satepan ke tiknemiliaj keniuj tikxikojkej se ueyi kokolis oso keman momikilij se akin tiktasojtaj. Tikitaj ke titaxikojkej sayoj porin toTajtsin Dios techmakak “chikaukauelilis [tein] ualeutok imako” (2 Cor. 4:7-9).

2 No moneki maj yektikatsin espíritu techpaleui maj amo timonejnemiltikan kemej akin Satanás kinixyekantok (1 Juan 5:19). Uan no, moneki tikinixnamikiskej “amokuali chikaukaejekame” (Efes. 6:12). Kemej moneki tikixnamikiskej nochi nejon ouijkayomej, tikitatij keniuj yektikatsin espíritu techpaleuia itech ome taman. Satepan, tikitaskej tein uelis tikchiuaskej uan ijkon okachi tikseliskej inepaleuil.

YETIKATSIN ESPÍRITU TECHMAKA CHIKAUALIS

3. ¿Katiyejua se taman kemej yektikatsin espíritu techpaleuia maj tikixnamikikan ouijkayomej?

3 Iespíritu Jehová techmaka chikaualis tein ika ueli tikchiuaj tein moneki tikchiuaskej, maski tikpanotoskej ouijkayomej. Tatitanil Pablo kinemiliaya ke sayoj ika “ichikaualis de Cristo” uelia kisentokaya kitekitiliaya Jiova maski kiixnamikia ouijkayomej (2 Cor. 12:9). Keman ika ojpa yajki tanojnotsato, amo sayoj mochikauak tanojnotsas, ta no tekitis uan ijkon ueliskia moixpanoltis. Ompa Corinto, mokauak ichan Áquila uan Priscila, akin kichijchiuayaj takenkalmej. Kemej Pablo no kichijchiuaya nejon, tekitia iniuan seki tonalmej itech semana (Hech. 18:1-4). Yektikatsin espíritu kimakak chikaualis tein ika uelik kichiuak nejon tekit uan no tanojnotsas.

4. Kemej kijtoua 2 Corintios 12:7b-9, ¿toni kiixnamiktoya Pablo?

 4 (Xikonixtajtolti 2 Corintios 12:7b-9TNM). ¿Toni kijtosnekik Pablo keman kijtoj ke kipiaya se uitsti itech inakayo? Komo timouitsuiskiaj semi techkokoskia. Pablo kijtosnekik ke kiixnamiktoya se ouijkayot tein kichiuaya maj semi tajyoui. Satanás uan iamokuali ejekauan xa amo kichiujtoyaj maj tajyoui. Sayoj ke keman kiitakej ke Pablo kemej yeskia kipiaya se uitsti itech inakayo, xa okachi ika kitemojkej kitajyouiltiskej. ¿Toni kichiuak Pablo?

5. ¿Keniuj Jiova kinankilij inetataujtiluan Pablo?

5 Pablo kitemoj amo tajyouis. Yejua ika kijtoj: “Expa ya nimotatatautilij ya iixpantsinko Totekotsin [Jiova] ma nechajchiuili ne toneukayot”. Maski semi motataujtij, kisentokak tajyoui. ¿Kijtosneki nejon ke Jiova amo kinankilij inetataujtiluan? Amo. Yejuatsin kemaj kinankilij, maski amo kiajchiuilij nejon ouijkayot, kipaleuij maj kixiko. Uan kiluij: “Moueyinextia nochikaualis kuak in tagat kiyolmachilia yolkuetauilis” (2 Cor. 12:8, 9). Ika inepaleuil Jiova, Pablo uelik yolseuik uan yolpakik (Filip. 4:4-7).

6. 1) ¿Keniuj uelis kinankilis Jiova tonetataujtiluan? 2) ¿Katiyejua textos tein moajsij itech párrafo techyolchikauaj?

6 Ijkon kemej Pablo, ¿tiktataujtianij Jiova maj techajchiuili se ouijkayot? Komo tikchiuanij uan maski ijkon tokuejmol kisentokak oso okachi moskaltij, xa tiknemilijkej ke Jiova amo techtasojtayaok. Sayoj ke, maj tikelnamikikan ineskayo Pablo. Ijkon kemej Jiova kinankilij inetataujtiluan, tejuan no technankilis. Maski xa amo techajchiuilis tokuejmol, techpaleuis maj titaxikokan ika yektikatsin espíritu (Sal. 61:3, 4). Maski semi titajyouiskej, Jiova amo techkauas toselti (2 Cor. 4:8, 9; Filip. 4:13TNM).

YEKTIKATSIN ESPÍRITU TECHPALEUIA

7, 8. 1) ¿Keniuj yektikatsin espíritu kemej yeskia ejekat? 2) ¿Keniuj Pedro kimelauak ke tekiti yektikatsin espíritu?

7 ¿Keniuj no techpaleuia yektikatsin espíritu? Ijkon kemej se barco kiuika ejekat kampa moneki yas maski ueyi at semi moajkotatamota. No ijkon yektikatsin espíritu techpaleuia maj tiksentokakan tiktekitilikan Jiova maski tikpiaskej ouijkayomej uan ijkon uelis tiajsiskej itech yankuik taltikpak.

8 Kemej tatitanil Pedro katka amichkitskijkej, kuali kimatia keniuj kinnejnemiltiayaj barcos. Xa yejua ika kikuik se tajtol tein mouika ika barcos keman kimelauak keniuj tekiti yektikatsin espíritu. Yejua kijkuiloj: “Ne uejkau tanauatiani amo keman tanojnotstinenke ika yejuan nintanejnekilis san. Ta, [...] itenkopaka Totajtsin Dios porin in Yektikatsin Espíritu kintenyekantinemik” (2 Ped. 1:21).

9. ¿Itech toni kinekia Pedro maj tanemilikan taltikpakneminij keman kijtoj “kintenyekantinemik”?

9 ¿Itech toni kinekia Pedro maj tanemilikan taltikpakneminij keman kijtoj “kintenyekantinemik”? Lucas, akin kijkuiloj amatajkuilol Hechos, no kikuik se tajtol griego kemej nejon keman ika tajtoj se barco tein ejekat kiuika (Hech. 27:15). Yejua ika, keman Pedro kijtoj ke akin kijkuilojkej Biblia Dios “kintenyekantinemik”, se motelmachtijkej ika Biblia kijtoj ke Pedro kikuik se “neskayot tein ika kinpaleuiaya taltikpakneminij maj tanemilikan kemej kiuikaj se barco”. Pedro kijtosnekik ke ijkon kemej ejekat kiuika barco kampa moneki yas, yektikatsin espíritu kinyekanak tanauatianij uan akin  kijkuilojkej Biblia keman kichiujkej tein Dios kinnauatijka. Nejon momachtijkej no kijtoj ke “tanauatianij kemej yeskia kipataujkej velas”. * Ijkuak Jiova kinpaleuij keman kinmakak yektikatsin espíritu tein kemej yeskia “ejekat”. Uan akin kijkuilojkej Biblia mokaujkej maj kinyekana yektikatsin espíritu keman kichiujkej tein kinnauatijkaj.

YEKINIKA TAMAN: Maj nochipa tikchiujtokan itekiyo Dios

OJPATIKA TAMAN: Maj tikchiuakan nejin tekimej hasta kampa okachi tiueliskej (xikonita párrafo 11) *

10, 11. ¿Toni ome taman moneki tikchiuaskej uan ijkon tikmatiskej ox techixyekana yektikatsin espíritu? Xikonijto se neskayot.

10 Axkan Jiova amo kichiuaok maj iyektikatsin espíritu kinolini itekitikauan maj kijkuilokan Biblia. Sayoj ke kisentoka ika kinixyekana. Kemej tikitaj, Jiova kisentoka ika kinpaleuia. Sayoj ke yektikatsin espíritu techpaleuis, komo tejuan no tikchiuaj teisa. ¿Toni?

11 Maj titanemilikan itech nejin neskayot. Komo se akin kinejnemiltia barco kineki maj ejekat kipaleui, moneki kichiuas ome taman. Yekinika, moneki kiuikas barco kampa ika taejeka porin komo amo kichiua amo moolinis barco. Ojpatika, moneki kiajokuis velas uan kinpatauas hasta kampa okachi uelis, porin sayoj ijkon ejekat peuas kiuikas barco. No ijkon, sayoj uelis tiksentokaskej tiktekitiliskej Jiova komo yektikatsin espíritu techpaleuia. Yejua ika, moneki tikchiuaskej ome taman. Yekinika, tiyaskej kampa ika taejeka, tein kijtosneki, tikchiuaskej tekimej tein Dios technauatia porin sayoj ijkon techixyekanas ika iyektikatsin espíritu. Ojpatika, tikajokuiskej velas hasta kampa okachi uelis, tein kijtosneki, tiktekitiliskej Jiova hasta kampa okachi tiueliskej (Sal. 119:32). Komo tikchiuaj nejon ome taman, yektikatsin espíritu techpaleuis maj tiksentokakan tiktekitilikan Jiova maski techixnamikiskej oso tikpiaskej tayejyekolismej, hasta maj tiajsikan itech yankuik taltikpak.

12. ¿Toni tikitatij axkan?

 12 Tikitakejya keniuj yektikatsin espíritu techpaleuia itech ome taman. Techmakaj chikaualis uan techpaleuia maj amo tikauakan Jiova keman tikpiaj tayejyekolismej. No techpaleuia maj tiksentokakan tiktekitilikan Jiova uan nejon kichiuas maj tikselikan nemilis nochipaya. Axkan, tikitatij naui taman tein moneki tikchiuaskej uan ijkon okachi techpaleuis yektikatsin espíritu.

KENIUJ UELIS OKACHI TECHPLAEUIS YEKTIKATSIN ESPÍRITU

13. 1) Kemej kijtoua 2 Timoteo 3:16, 17, ¿keniuj uelis techpaleuis iTajtol Dios? 2) ¿Toni moneki tikchiuaskej tejuan?

13 Yekinika, maj timomachtikan iTajtol Dios (xikonixtajtolti 2 Timoteo 3:16, 17). Ika yektikatsin espíritu, Dios kichiuak maj tajkuilouanij kitalikan itech Biblia itanemililuan. Keman tikixtajtoltiaj iTajtol Dios uan itech titanemiliaj, itamachtilis Jiova ajsi itech totanemilil uan itech toyolo. Tein ijkuiliujtok itech Biblia techolinia maj timonejnemiltikan kemej Dios tanauatia (Heb. 4:12). Yektikatsin espíritu okachi techpaleuis sayoj komo tikxelouaj tiempo timomachtiskej Biblia uan itech titanemiliskej. Ijkon, iTajtol Dios techyekanas itech nochi tein tikijtoskej uan itech tein tikchiuaskej.

14. 1) ¿Keyej tikijtouaj ke itech tonechikoluan yetok iespíritu Dios? 2) ¿Toni moneki tikchiuaskej uan ijkon yektikatsin espíritu techpaleuis keman tiyaskej nechikol?

14 Ojpatika, maj tikueyichiuakan Dios iniuan tokniuan (Sal. 22:22). Itech tonechikoluan, yetok iespíritu Dios (Apoc. 2:29). ¿Keyej tikijtouaj nejon? Porin keman timosentiliaj iniuan tokniuan, titajtanij yektikatsin espíritu, timokuikatiaj nekuikatilmej tein mokixtiaj itech iTajtol Dios uan akin techmachtiaj sentaixpan ika Biblia, Dios kinixtaliani ika iyektikatsin espíritu. Uan nejon espíritu no kinpaleuia tokniuan siuamej maj achto kuali momachtikan tamachtilis tein kipanoltiskej sentaixpan. Sayoj ke, komo tiknekij maj yektikatsin espíritu okachi techpaleui, moneki timomachtiskej achto ke tiyaskej nechikolmej uan titanankiliskej. Ijkon, yektikatsin espíritu techpaleuis kemej ejekat kipaleuia barco keman “ivelas tapotokej”.

15. ¿Toni moneki tikchiuaskej uan ijkon yektikatsin espíritu techpaleuis itech tanojnotsalis?

15 Expatika, maj titanojnotsakan. Keman tikixtajtoltiaj Biblia itech tanojnotsalis uan keman titamachtiaj, tikauaj maj yektikatsin espíritu techpaleui itech nejon tekimej (Rom. 15:18, 19). Sayoj ke moneki miakpa titanojnotsatiuij uan tikuiskej Biblia nochipa keman uelis porin sayoj ijkon yektikatsin espíritu okachi techpaleuis. Se taman tein techpaleuis maj tikmatikan toni ika tikinnojnotsaskej taltikpakneminij yejua amaix Tein timomachtiaj itech nechikol Tonemilis uan toTanojnotsalis kampa kijtoua keniuj uelis tipeuaskej titajtoskej.

16. ¿Katiyejua okse taman kemej uelis tikseliskej yektikatsin espíritu?

16 Naujpatika, maj tiktataujtikan Jiova (Mat. 7:7-11; Luc. 11:13). No uelis tikseliskej yektikatsin espíritu komo senkis tiktajtaniliaj Jiova keman tiktataujtiaj. Satanás amo uelis kichiuas maj Jiova amo kikaki tonetataujtiluan oso maj amo techmaka iyektikatsin espíritu hasta komo titsaktokej (Sant. 1:17). ¿Keniuj moneki timotataujtiskej uan ijkon yektikatsin espíritu okachi techpaleuis? Maj tikitakan se neskayot tein moajsi itech amatajkuilol Lucas tein ika tajtoua  netataujtil, ijkon tiknankiliskej nejon netajtanil. *

MAJ MIAKPA TIMOTATAUJIKAN

17. ¿Toni techmachtia neskayot tein Jesús ika tajtoj itech Lucas 11:5-9, 13 kemej moneki timotataujtiskej?

17 (Xikonixtajtolti Lucas 11:5-9, 13). Nejin neskayot tein Jesús ika tajtoj kinextia keniuj moneki titajtaniskej yektikatsin espíritu. Takat kimakakej tein kipolouaya porin miakpa tajtanik. Amo pinauak kitajtanis itasojikniuj maj kipaleui maski katka tajkoyouanya. * ¿Keniuj Jesús kinexti ke nejin neskayot mouika ika netataujtil? Yejua kijtoj: “[Xiksentokakan] xiktajtanilikan Dios uan Yejuatsin namechmaktilis. Xiktemokan [...] uan ijkon nanmoajxiliske”, no kijtoj: ‘Xinaltakakalatsakan hasta ke namechtatapouiliskejʼ. Nejin techmachtia ke komo tiknekij maj yektikatsin espíritu techpaleui, moneki maj miakpa tiktajtanilikan Dios.

18. ¿Keyej uelis tikneltokaskej ke Jiova techmakas yektikatsin espíritu?

18 Nejin neskayot no techpaleuia maj tikajsikamatikan keyej Jiova techmakas yektikatsin espíritu. Takat akin ika tajtoj Jesús kinekia kuali kiselis akin youakya kikalpanouaya. Kiitaya ke monekia kimakas tein kikuas, sayoj ke amo teyi kipiaya. Jesús kijtoj ke itasojikniuj akin ompakauin nemia kimakak pan porin miakpa kitajtanij. ¿Toni kinekia techmachtis? Ke komo aksa akin tajtakolej kipaleuia se akin nemi kampa ika yejua, toTajtsin Dios okachi kinekis kinmakas yektikatsin espíritu akin miakpa kitajtaniaj. Yejua ika, uelis tikneltokaskej ke Jiova techmakas iyektikatsin espíritu keman tiktajtaniskej (Sal. 10:17; 66:19).

19. ¿Keyej senkis tikmatij ke Satanás amo uelis kichiuas maj tikauakan Jiova?

19 Maski Satanás kitemos maj tikauakan Jiova, amo keman uelis kichiuas. ¿Keyej? Porin yektikatsin espíritu techpaleuia itech ome taman. Yekinika, techmaka chikaualis tein ika tikxikouaj tayejyekolismej. Uan ojpatika, yejua chikaualis tein techpaleuia maj tiksentokakan tiktekitilikan Jiova hasta ke tiajsiskej itech yankuik taltikpak. Yejua ika, maj senkis tikixtalikan okachi tikseliskej inepaleuil yektikatsin espíritu.

NEKUIKATIL 41 Jiova, xikaki nonetataujtil

^ párr. 5 Nejin tamachtilis kimelaua keniuj yektikatsin espíritu techpaleuia maj titaxikokan. No kimelaua tein uelis tikchiuaskej uan ijkon okachi tikseliskej inepaleuil.

^ párr. 9 Seki barcos kipiaj se ueyi tilmaj uan keman kipatauaj tapaleuia maj ejekat kiuika barco. Nejin ueyi tilmaj itech tajtol español kitokaytiaj velas.

^ párr. 16 Lucas akin kijkuiloj semej evangelios yejua akin okachi techpaleuia maj tikitakan ke Jesús semi kitayekanaltiaya motataujtis (Luc. 3:21; 5:16; 6:12; 9:18, 28, 29; 18:1; 22:41, 44).

^ párr. 17 Xikonita nota tein ika se momachtia “kachi ok mitskuejmolojto”, tein kisak itech amaix Tein timomachtiaj itech nechikol Tonemilis uan toTanojnotsalis, metsti julio xiuit 2018.

^ párr. 61 TEIN NESI ITECH TAIXKOPIMEJ: YEKINIKA TAMAN: Se namikuanij ajsi itech Kali kampa tiMosentiliaj. Keman ompa yetokejya, iespíritu Jiova kinixyekana itech tein kichiuaj. OJPATIKA TAMAN: Kemej achto kuali momachtijkej tanankiliaj itech nechikol. Nejin ome taman monekij itech okseki tekimej tein ika titajtojkej itech nejin tamachtilis: timomachtiskej iTajtol Dios, titanojnotsatiuij uan tiktataujtiskej Jiova.