Xionyoui kampa nesi tein kipia

Xionyoui kampa nesi tein kipia

Kualtakayot: kualneskayot tein tiknextiaj ika tein tikijtouaj uan tikchiuaj

Kualtakayot: kualneskayot tein tiknextiaj ika tein tikijtouaj uan tikchiuaj

TINOCHIN tiktasojkamatij maj oksekin toka motekipachokan uan maj techtakachiuakan. Yejua ika, ¿keniuj tejuan no uelis ijkon tiyeskij iniuan oksekin?

Se akin kualtakat yekmelauj motekipachoua ininka oksekin uan kinextia ika tein kijtoua uan tein kichiua. Amo sayoj kinextia ke tepoujkaita, ta kualtakat porin tetasojta uan kiajsikamati keniuj momachiliaj oksekin. Uan tein okachi moneki, kualtakayot poui itech takilot tein kitemaka iyektikatsin espíritu Dios, tein tiitatojtokakauan Cristo moneki tikpiaskej (Gál. 5:22, 23). Yejua ika, maj tikitakan keniuj Jiova uan Jesús kinextianij nejin kualneskayot uan keniuj uelis tikchiuaskej kemej yejuan.

JIOVA KUALTAKAT INIUAN NOCHIN

Jiova kualtakat iniuan nochin, hasta iniuan “nekes ten amo yolchipauke uan ten amo motasojkamatij iuantsin” (Luc. 6:35). Kemej neskayot, “kichiua ma pankisa in tonaltsin para kinpaleuis nochi naken yolkualime uan naken amo yolkualime. Uan Yejuatsin no kualtitani in kioutsin para kinpaleuis naken yolchipauke uan naken amo yolchipauke” (Mat. 5:45). Hasta akin amo kineltokaj ke Jiova kichijchiuak nochi uan kitemaka nemilis kiseliaj ikualtakayo uan uelis tikijtoskej ke no yolpakij.

Se kuali neskayot kampa Jiova kinextij ikualtakayo yejua tein kichiuak iuan Adán uan Eva. Tepitsin satepan ke tajtakojkej, yejuan “kiijtsonkej imaxiujyo higoskouit uan mochijchiuilijkej tein ika mopanpikiskej”. Sayoj ke Dios kimatia ke monekiskia motakentiskej keman amo nemiskiajok itech xochital tein moajsia Edén, porin tel uitstaj katka. Yejua ika kinchijchiuilij “ika ininpaneuayo tapialmej ueueyak inintaken” (Gén. 3:7, 17, 18, 21).

Maski Jiova kualtakat iniuan “naken yolkualime uan naken amo yolkualime”, okachi kualtakat iniuan itekitikauan akin nochipa kitakamatij. Kemej neskayot, itech itonaluan tanauatijkej Zacarías, se ángel motekipachojtoya porin israelitas amo kisentokatoyajok kiyekchijchiujtoyaj templo ompa Jerusalén. Dios kikakik uan kinankilij “ika kuali tajtolmej uan tein teyolseuiaj” (Zac. 1:12, 13). No kichiuak se taman kemej nejon iuan tanauatijkej Elías. Se tonal, tel tayokoxtoya uan iselti momachiliaya, yejua ika kitajtanij Jiova maj kikauani maj momikiliani. Yejuatsin kinextij ke kitekipachouaya kemej momachiliaya Elías, yejua ika kititanik se ángel maj kiyolchikauati. Uan no, kiyekmatiltij ke amo yetoya iselti. Nejon tajtolmej uan nepaleuil tein kiselij kichiujkej maj Elías kisentokani kichiuani itekiuj (1 Rey. 19:1-18). Sayoj ke ¿katiyejua itekitikauj Dios okachi kuali kinextij kualtakayot kemej yejuatsin?

JESÚS SEMI KUALTAKAT KATKA

Keman Jesús nemia nikan taltikpak, miakej uelik kiitakej ke semi kualtakat katka.  Amo keman kichikaujkauij aksa maj kichiua tein yejua kinekia. Kemej semi teajsikamatia, kijtoj: “Xiualakan nouan, nochi namejuan naken nanmotekitiltijtokke uan nantamamatokke [...], uan Nejuatsin namechmakas ne yolseuilis” (Mat. 11:28-30). Yejua ika, taltikpakneminij kitojtokayaj kampa yeski yaya. Kemej kinikneliaya, kintamakak, kinpajtij uan “peuak kinmachtia ika miak tataman tamachtilisme” kemej tamati iTajtsin (Mar. 6:34; Mat. 14:14; 15:32-38).

Jesús kiajsikamatik keniuj momachiliayaj taltikpakneminij uan kinnextilij kualtakayot. Nochipa kinseliaya ika pakilis, maski itech nejon hora kinekia moseuis (Luc. 9:10, 11). Se tonal, se siuatsin akin 12 xiujmejya esmeyaya kimatokak itilmaj porin kinekia pajtis. Yejua monekia amo kichiuas nejon, porin Tanauatil tein kiselij Moisés kinextiaya ke amo chipauak katka (Lev. 15:25-28). Sayoj ke Jesús amo kiajuak, ta kiiknelij uan kiluij nejon siuatsin akin moujtoya: “Siuat, ika por nojon motakuautamatilis ten tikpia, tejua tipajtik ya. Uan axkan xiyo ya xiyolseutiu, uan ximokaua pajtik ya de ne tajyouilis” (Mar. 5:25-34). ¡Jesús yekmelauj katka kualtakat!

AKIN KUALTAKAT KINPALEUIA OKSEKIN

Itech neskayomej tein ika titajtojkej, tikitaj ke komo tikualtakamej, tikinpaleuiskej oksekin. Jesús kiyeknextij ke motelneki nejin keman ika tajtoj samaritano akin yolkuali. Maski samaritanos uan judíos motauelitayaj, samaritano kiiknelij se judío akin kitachtekijkaj, kimaytenkaj uan kimiktijtoyajya uan kikaujkej ojtenoj. Kipajtij kampa kikokojkaj, kiuikak itech se kali kampa mokauaskia uan kitaxtauij takat maj kiyekpiani. Hasta kiluij ke kiixtauaskia okseki taman tein monekiskia (Luc. 10:29-37).

Melauak ke kualtakayot monextia ika tein se kichiua, sayoj ke no se kinextia ika tajtolmej tein teyolchikauaj uan teyolseuiaj. Biblia kijtoua: “Netekipacholis itech iyolo se takat kitayokoltia, sayoj ke se kuali tajtol kiyolchikaua” (Prov. 12:25). Kualtakayot uan yolkualtakayot techoliniskej maj tikinyolchikauakan oksekin ika tajtolmej tein kichiuaskej maj yolpakikan uan kinextiskej ke ininka timotekipachouaj. * Nejin kinmakas chikaualis tein kinpaleuis maj kiixnamikikan ouijkayomej (Prov. 16:24).

KENIUJ TIYESKIJ TIKUALTAKAMEJ

Kemej tichijchiujtokej “kemej Dios tamati”, tinochin ueli tiknextiaj kualtakayot (Gén. 1:27). Kemej neskayot, se takat akin pouia iniuan tateuianij romanos uan monotsaya Julio kiuikak Pablo hasta Roma. Nejin takat “kinextilij kualtakayot Pablo uan kikauak maj kinitati itasojikniuan” ompa Sidón (Hech. 27:3TNM). Satepan, keman barco tein itech yayaj Pablo uan oksekin pankalakik, akin nemiaj Malta ‘kinselijkej ika pakilis uan kinyoliknelijkej’. Kintaxotaltilijkej kampa ueliskiaj mototoniskej uan kinpaleuijkej nochi kemej uelkej (Hech. 28:1, 2). Yejuan kichiujkej se taman tein tel kuali. Sayoj ke, komo aksa kineki kiyolpaktis Jiova, moneki yeski kualtakat nochipa, amo sayoj kemansa.

Jiova kineki maj kualtakayot totech yeto uan maj ika timonejnemiltikan. Melauak ke kemansa uelis yeski ouij tikinpaleuiskej oksekin. ¿Keyej? Xa techixnamikij porin titanojnotsaj, tipinauaj oso amo tikyekmatij ox uelis titapaleuiskej oso porin xa timochikaujtokejok amo sayoj totech titanemiliskej. Sayoj ke nejin uelis amo techtsakuilis komo tiktataujtiaj Dios maj techpaleui  ika iyektikatsin espíritu uan tiktemouaj tikchiuaskej kemej yejuatsin (1 Cor. 2:12).

¿Keniuj uelis tikmatiskej toni techpoloua uan ijkon tiyeskij okachi tikualtakamej? Maj timotajtanikan: “¿Nikinkaki oksekin ika nejmachkayot uan niktemoua nikajsikamatis keniuj momachiliaj? ¿Niktemoua nikitas keman oksekin kinekij nepaleuil? ¿Kemanianya nikpaleuij aksa akin amo nochankauj oso notasojikniuj?”. Uan no, uelis tikixtaliskej tikchiuaskej seki taman, kemej okachi kuali tikinixmatiskej oksekin, okachiok tokniuan itech tonechikol. Ijkon uelis tikmatiskej toni ouijkayomej kipiaj uan tein kinpoloua. Ompa, maj tikchiuakan iniuan oksekin tein tikuelitaskiaj maj yejuan kichiuakan touan (Mat. 7:12). Uan satepan, maj tiktajtanikan Jiova maj techpaleui, uan yejuatsin techtatiochiuis komo timochikauaj (Luc. 11:13).

SE KUALNESKAYOT TEIN KINYOLPAKTIA OKSEKIN

Keman tatitanil Pablo kijtoj toni kichiuaya maj yeskia se kuali itekitikauj Dios, ika tajtoj kualtakayot (2 Cor. 6:3-6). Taltikpakneminij kuali momachiliayaj iuan porin ininka motekipachouaya taltikpakneminij uan kinextiaya ika tein kiniluiaya uan tein kichiuaya (Hech. 28:30, 31). No ijkon, komo tikualtakamej, oksekin uelis kinekiskej kiixmatiskej Jiova. Keman tikualtakamej iniuan nochin, hasta iniuan akin techixnamikij, uelis tikchiuaskej maj moyolyemanikan uan maj kipatakan inintanemilil (Rom. 12:20). Satepan xa hasta kinekiskej okachi kiixmatiskej tein tamachtia Biblia.

Itech Xochital, tel miakej moajokuiskej uan kinyolpaktis maj kinnextilikan kualtakayot, uan xa ijkuak yekinika yeski. Nejin kinolinis maj no kinextikan kualtakayot. Akin kinextiskej netasojtalis uan kualtakayot, Jiova kinmakas nemilis nochipaya. Sayoj ke kinixpolos akin amo kinekiskej kinextiskej (Sal. 37:9-11). Ijkuak, onkas yekmelauj yeknemilis uan yolseuilis porin taixyekantos iTekiuajyo Dios. Sayoj ke, kemej ayamo ejko nejon tonal, ¿keniuj techpaleuia axkan tiknextiskej kualtakayot?

KENIUJ TECHPALEUIA TIKNEXTISKEJ KUALTAKAYOT

Biblia kijtoua ke akin kualtakamej uan tetakachiuaj kiseliaj tein kuali (Prov. 11:17). Taltikpakneminij kuali momachiliaj iniuan uan miakpa kichiuaj kemej yejuan. Jesús kijtoj: “Ne tamachiu de teiknelilis ten namejuan nankikuitinemij ya para nankintayokoliske oksekin, yejua ne Totajtsin Dios kikuis para namechtayokolijtiyas ten [namechpoloua]” (Luc. 6:38). Se akin kualtakat amo kiouijmaka kinajsis itasojikniuan.

Tatitanil Pablo kiniluij tokniuan akin nemiaj Éfeso: “Ximopaleuikan ika tetasojtalis se uan okse. Uan xikiniknelikan se uan okse. Uan no ximotapojpoluikan se uan okse” (Efes. 4:32). Keman nochin itech nechikol kualtakamej uan teikneliaj, okachi kuali mouikaj. Yejuan amo keman kinijijtouaj tokniuan nion kijtouaj teisa tein uelis kinyolxokolis, maski auiltajtojtoskej, ta mochikauaj kijtoskej tein kinyolchikauas oksekin (Prov. 12:18). Ijkon, nochin itech nechikol kitekitiliaj Jiova ika yolpakilis.

Kemej tikitakej, kualtakayot se kualneskayot tein monextia ika tein se kijtoua uan tein se kichiua. Keman tikualtakamej, tikchiuaj kemej Jiova, akin tetasojta uan kualtakat (Efes. 5:1). No titapaleuiskej maj kuali timouikakan itech nechikol uan maj oksekin kinekikan kitekitiliskej Jiova. Yejua ika, maj tikchiuakan nochi tein tiueliskej uan ijkon oksekin uelis kiitaskej ke tiitaixpantijkauan Jiova tikualtakamej.

^ párr. 13 Itech okse tamachtilis kampa momelauas se kualneskayot tein poui itech itakilo espíritu ika titajtoskej yolkualtakayot.