Xionyoui kampa nesi tein kipia

Xionyoui kampa nesi tein kipia

 TAMACHTILIS 18

Netasojtalis uan melaujkayot itech nechikol

Netasojtalis uan melaujkayot itech nechikol

“Ximosepanpaleuijtiyakan [...] uan ijkon nankikajsikatakamatiyaske in tanauatil de Cristo.” (GÁL. 6:2)

NEKUIKATIL 12 Ueyi Dios, Jiova

TEIN MOITAS *

1. ¿Toni ome taman tikyekmatij?

JIOVA nochipa kintasojtani itekitikauan uan kisentokas kintasojtas. Uan no, kitasojta melaujkayot (Sal. 33:5). Yejua ika tikyekmatij ome taman. Yekinika, ke yejuatsin kiyolkokoua keman kinchiuiliaj tein amo kuali itekitikauan. Uan ojpatika, ke kitamis teikamauiltilis. Itech yekinika tamachtilis tein ika tajtoj nejin taman, * tikitakej ke Tanauatil tein Dios kimakak xolal Israel moixyekanaya ika netasojtalis uan tapaleuiaya maj nochin kinchiuilianij tein melauak, hasta akin amo ueliaj mopaleuiayaj (Deut. 10:18). Nejon Tanauatil kinextia ke Jiova semi motekipachoua ininka itekitikauan.

2. ¿Katiyejua netajtanilmej tiknankilitij?

2 Tanauatil tein Dios kimakak Moisés tamik itech xiuit 33, keman peuak nechikol kampa kichiuaj kemej Cristo. ¿Kijtosnekia nejon ke amo kipiaskiajok se tanauatil tein moixyekanaskia ika netasojtalis uan tapaleuiskia maj onka melaujkayot? Yejuan kipiayaj se yankuik tanauatil. Itech nejin tamachtilis, tikitaskej katiyejua nejon tanauatil uan satepan tiknankiliskej nejin netajtanilmej: ¿Keyej tikijtouaj ke nejin tanauatil moixyekana ika netasojtalis uan ke tapaleuia maj onka melaujkayot? Uan akin taixyekanaj, ¿keniuj nejin tanauatil kiniluia maj kinitakan oksekin?

 TONI “TANAUATIL DE CRISTO”

3. ¿Toni poui itech “tanauatil de Cristo” tein ika motajtoua itech Gálatas 6:2?

3 (Xikonixtajtolti Gálatas 6:2). Akin kichiuaj kemej Cristo moixyekanaj ika “tanauatil de Cristo”. Jesús amo kiamatalij tein imomachtijkauan monekiskia kichiuaskej, sayoj ke kinmakak tanauatilmej uan tayolmajxitilismej tein monekia kitojtokaskej. Itech “tanauatil de Cristo” poui nochi tein Jesús tamachtij. Okachi tikajsikamatiskej toni nejin tanauatil komo tiknankiliaj seki netajtanilmej.

4, 5. 1) ¿Keniuj tamachtij Jesús? 2) ¿Kemanian tamachtij?

4 ¿Keniuj Jesús kinmachtij taltikpakneminij? Yekinika, ika itajtoluan. Tein kijtoj kipiaya chikaualis porin tamachtiaya akoni yekmelauj Dios, keyej tinemij uan ke sayoj iTekiuajyo Dios kitamis tajyouilis (Luc. 24:19). Jesús no tamachtij ika ineskayo. Ika tein kichiuak kinnextilij imomachtijkauan keniuj monekia monejnemiltiskej (Juan 13:15).

5 ¿Kemanian tamachtij Jesús? Keman moajsia nikan taltikpak (Mat. 4:23). No kinmachtij itatojtokakauan satepan ke moajokuik. Kemej neskayot, monextij ininixpan xa panoua kemej quinientos itatojtokakauan uan kinnauatij maj kinchiuakan imomachtijkauan (Mat. 28:19, 20; 1 Cor. 15:6). Kemej yejua kiixyekana nechikol, kisentokak kinmachtij itatojtokakauan satepan ke mokepak iluikak. Kemej neskayot, itech xiuit 96, kinyolchikauak uan kinyolmajxitij tokniuan taixpejpenalmej itechkopa tatitanil Juan (Col. 1:18; Apoc. 1:1).

6, 7. 1) ¿Kani moajsi tein Jesús tamachtij? 2) ¿Toni moneki tikchiuaskej uan ijkon tiktakamatiskej itanauatil Cristo?

6 ¿Kani moajsi tein Jesús tamachtij? Itech naui Evangelios tikajsij miak taman tein kichiuak uan tein kijtoj keman moajsia nikan taltikpak. Okseki amatajkuilolmej tein pouij itech Escrituras Griegas Cristianas techpaleuiaj maj okachi kuali tikajsikamatikan kemej tanemilia Jesús porin akin kijkuilojkej kinixyekanak yektikatsin espíritu uan kipiayaj ‘in tamachilis ten Cristo kitemaka’ (1 Cor. 2:16).

 7 Tein techmachtia: Itamachtilis Jesús techpaleuia itech nochi tonemilis. Yejua ika, itanauatil Cristo techyekana itech tein tikchiuaj tokalijtik, totekipan oso kampa timomachtiaj uan itech nechikol. Okachi tikixmatij nejin tanauatil keman tikixtajtoltiaj Escrituras Griegas uan itech titanemiliaj uan tiktakamatij keman tikchiuaj tein ompa motayolmajxitia uan motanauatia. Keman tiktojtokaj itanauatil Cristo, tein melauj tiktakamatij Jiova, Dios akin tetasojta akin itech ualeua nochi tein Jesús tamachtij (Juan 8:28).

SE TANAUATIL TEIN MOIXYEKANA IKA NETASOJTALIS

8. ¿Toni kiixyekana itanauatil Cristo?

8 Akin nemij itech se kali tein kuali chijchiujtok uan kipia se kuali tatsineualoni kuali momachiliaj. No ijkon panoua iniuan akin kitakamatij itanauatil Cristo tein senkis kuali. Nejin tanauatil moixyekana ika netasojtalis. ¿Keyej tikijtouaj nejon?

Keman tikintasojtaj oksekin, tiktakamatij itanauatil Cristo (xikonita párrafos 9 hasta 14) *

9, 10. 1) ¿Toni neskayomej kinextiaj ke Jesús kinpaleuij oksekin porin tetasojtaya? 2) ¿Keniuj no uelis ijkon tikchiuaskej?

9 Yekinika, Jesús kinpaleuij oksekin porin tetasojtaya. Yejua kinmachtij taltikpakneminij, kinpajtij akin mokokouayaj, kintamakak akin mayanayaj uan kinajokuik akin momikilijkaj porin teikneliaya, se taman kemej kinextij netasojtalis (Mat. 14:14; 15:32-38; Mar. 6:34; Luc. 7:11-15). Maski monekik kikuis itiempo uan ichikaualis keman kichiuak nejon, ika miak pakilis kitayekanaltij kinpaleuis oksekin. Uan okachiok kinextij netasojtalis keman kitemakak inemilis tein ika techmakixtij (Juan 15:13).

10 Tein techmachtia: Uelis tikchiuaskej kemej Jesús komo tiktayekanaltiaj tikinpaleuiskej oksekin. No, komo tikinikneliaj akin iniuan titajtouaj itech tanojnotsalis. Keman titanojnotsaj uan titamachtiaj porin titeikneliaj, tiktakamatij itanauatil Cristo.

11, 12. 1) ¿Keyej tikmatij ke Jiova semi toka motekipachoua? 2) ¿Keniuj uelis titetasojtaskej kemej Jiova?

11 Ojpatika, Jesús kiteixmatiltij inetasojtalis iPopaj. Keman tanojnotsak, kinextij ke Jiova semi ininka motekipachoua itekitikauan. Kemej neskayot, tamachtij ke toTajtsin techpatiuita tisejsemej (Mat. 10:31). Uan no, kinextij ke akin mouejkatilijtokej, Jiova kineki maj moyolnonotsakan uan maj mokepakan itech nechikol kampa kinseliskej ika miak pakilis (Luc. 15:7, 10). Uan kijtoj ke Dios kinextij ke techtasojta keman kitemakak iKonetsin uan ika techmakixtij (Juan 3:16).

12 Tein techmachtia: ¿Keniuj uelis titetasojtaskej kemej Jiova? (Efes. 5:1, 2). Tikchiuaj keman tikinpatiuitaj tokniuan uan tikinseliaj ika miak pakilis akin mokepaj iuan Jiova (Sal. 119:176). Tiknextiaj ke tikintasojtaj tokniuan keman tikinpaleuiaj itech se ouijkayot tein kipiaj (1 Juan 3:17). Keman tikinnextiliaj oksekin ke tikintasojtaj, tiktakamatij itanauatil Cristo.

13, 14. 1) ¿Katiyejua itanauatil Jesús moajsi itech Juan 13:34, 35, uan keyej yankuik? 2) ¿Keniuj tiktakamatij nejin yankuik tanauatil?

13 Expatika, Jesús kinnauatij itatojtokakauan maj tetasojtanij kemej yejua kintasojtak (xikonixtajtolti Juan 13:34, 35). Nejin tanauatil yankuik porin amo pouia itech Tanauatil tein Dios kimakak xolal Israel. Jesús kijtoj ke moneki tikintasojtaskej tokniuan kemej yejua techtasojtak. Moneki tikintasojtaskej okachi ke tein tejuan timotasojtaj, uan komo moneki hasta ininka tiktemakaskej tonemilis, ijkon kemej kichiuak Jesús. Tikchiuaskej  nejon sayoj komo titetasojtaj kemej yejua. *

14 Tein techmachtia: ¿Keniuj tiktakamatij nejin yankuik tanauatil? Keman timotemakaj tikinpaleuiskej tokniuan. Amo sayoj porin tiktemakaskej tonemilis ininka komo moneki, ta no porin tikchiuaj okseki taman tein amo ueyi, kemej timochikauaskej tikuikaskej nechikolmej se tokniuj akin xiuejya, tikauaskej se taman tein tikuelitaj uan ijkon tikyolpaktiskej se tokniuj oso titapaleuiskej kampa mochiuak se tetsauit itech tonalmej keman timoseuiaj. Keman tikchiuaj seki taman kemej nejon tiktakamatij itanauatil Cristo uan titapaleuiaj maj itech nechikol sejse kuali momachili.

SE TANAUATIL TEIN TAPALEUIA MAJ ONKA MELAUJKAYOT

15-17. 1) ¿Keniuj Jesús kinextij melaujkayot ika tein kichiuak? 2) ¿Keniuj uelis tikchiuaskej kemej Jesús?

15 Itech Biblia, melaujkayot kijtosneki nochipa se kichiuas tein Dios kijtoua ke kuali yetok iniuan nochin. ¿Keyej tikijtouaj ke itanauatil Cristo tapaleuia maj onka melaujkayot?

Jesús kinpoujkaitak siuamej uan kinnextilij kualtakayot, hasta siuamej akin kinixtopeuayaj (xikonita párrafo 16) *

16 Yekinika, maj tikitakan keniuj ika tein kichiuak Jesús kinextij melaujkayot. Itech nejon tonalmej, tayekananij judíos kintauelitayaj akin okseko kayomej, kinixtopeuayaj akin amo katkaj ueyichiuanimej uan amo kinpoujkaitayaj siuamej. Sayoj ke, Jesús amo akin kichikoitaya. Amo kinixtopeuak akin katkaj okseko kayomej akin itech takuaujtamatkej (Mat. 8:5-10, 13). Nochin kinixmatiltij kuali tanauatilmej, akin tominpiayaj uan akin amo (Mat. 11:5; Luc. 19:2, 9). Amo kinchikoitak siuamej nion kinajuak, ta kinpoujkaitak uan kinnextilij kualtakayot hasta siuamej akin kinixtopeuayaj (Luc. 7:37-39, 44-50).

17 Tein techmachtia: Uelis tikchiuaskej kemej Jesús komo amo titechikoitaj uan tikixmatiltiaj kuali tanauatilmej akin yeski, kipiaskej tomin oso amo, oso pouiskej itech okse taneltokalis. Tokniuan takamej kitojtokaj ineskayo Jesús keman kinpoujkaitaj siuamej. Keman ijkon tikchiuaj tiktakamatij itanauatil Cristo.

18, 19. ¿Toni tamachtij Jesús ika melaujkayot uan toni timomachtiaj?

18 Ojpatika, maj tikitakan tein Jesús kijtoj keman ika tajtoj melaujkayot. Kinmachtij imomachtijkauan tayolmajxitilismej tein kinpaleuiskia maj amo techikoitakan. Kemej neskayot, kiniluij maj kinchiuilikan oksekin tein kinekiaj maj yejuan kinchiuilikan (Mat. 7:12). Kemej tinochin tiknekij maj techchiuilikan tein melauak, no ijkon moneki tikinchiuiliskej oksekin. Nejon xa tapaleuis maj yejuan no techchiuilikan tein melauak. ¿Uan komo techchiuilianij se taman tein amo kuali? Jesús no kinmachtij itatojtokakauan maj takuaujtamatikan ke Jiova kiitas maj kinchiuilikan tein melauak akin ‘motatatautiliaj youal itonal’ (Luc. 18:6, 7). Ika nejin tajtolmej Jiova motenkaua ke kemej kimati tein tikpanouaj itech nejin itamian tonalmej kiitas maj techchiuilikan tein melauak keman yejuatsin kiitas ke okachi kuali (2 Tes. 1:6).

19 Tein techmachtia: Komo tiktojtokaj itayolmajxitilis Jesús, tikinchiuiliskej oksekin tein melauak. Uan komo itech nejin taltikpak kampa taixyekana Satanás techchiuilianij tein amo kuali, techyolseuia tikmatiskej ke Jiova kiitas maj techchiuilikan tein melauak.

 KENIUJ AKIN KIPIAJ TANAUATIL MONEKI KINITASKEJ OKSEKIN

20, 21. 1) ¿Keniuj akin kipiaj tanauatil moneki kinitaskej oksekin? 2) ¿Keniuj kinextia ueyi netasojtalis takat akin namikej? 3) ¿Toni tetatmej amo moneki kinchiuiliskej ininkoneuan?

20 Kemej tikitakej, itanauatil Cristo moixyekana ika netasojtalis. Yejua ika, akin kipiaj tanauatil moneki kinpoujkaitaskej uan kintasojtaskej oksekin. Moneki kielnamikiskej ke Cristo kichia maj tiknextikan netasojtalis itech nochi tein tikchiuaskej.

21 Itech kalyetouanij. Takat akin namikej moneki kitasojtas inamik “ijkon keme Totekotsin Cristo kinyoltasojta itaneltokakauan” (Efes. 5:25, 28, 29). Kinextia ueyi netasojtalis kemej Jesús keman kitayekanaltia tein kipoloua uan tein kinejneki inamik. Seki takamej kinouijmaka kinextiskej nejon netasojtalis, xa porin keman moskaltijkej, ininkalijtik amo monextiliayaj netasojtalis uan amo kinchiuiliayaj oksekin tein melauak. Maski kinouijmakas, moneki mopataskej komo kinekij maj kinixyekana itanauatil Cristo. Keman takat kinextia ueyi netasojtalis, inamik kipoujkaita. Uan tetatmej akin yekmelauj tetasojtaj amo keman kinyolxokoliskej ininkoneuan ika tein kijtouaj nion ika tein kichiuaj (Efes. 4:31). Ta kinnextiliaj ke kintasojtaj uan kichiuaj maj kuali momachilikan. Ijkon, konemej kintasojtaj inintatuan uan takuaujtamatij iniuan.

22. Kemej kijtoua 1 Pedro 5:1-3, ¿akoni iaxkauan ichkamej uan toni moneki kinnextiliskej?

22 Itech nechikol. Tayekananij moneki kielnamikiskej ke akin pouij itech nechikol amo ininaxkauan (Juan 10:16; xikonixtajtolti 1 Pedro 5:1-3TNM). Tajtolmej “iichkauan Dios” uan “iaxkauan Dios” kinelnamiktia ke iaxkauan Jiova. Yejuatsin kineki maj kinnextilikan ke kintasojtaj (1 Tes. 2:7, 8). Tayekananij akin kinyekpiaj ichkamej  kiyolpaktiaj Jiova uan tokniuan kintasojtaj uan kinpoujkaitaj.

23, 24. 1) ¿Toni kichiuaj tayekananij keman aksa ueyi tajtakoua itech nechikol? 2) Keman panoua nejon, ¿toni kiitaj tayekananij?

23 Itech Tanauatil tein Dios kimakak Israel, tamelauanij uan tayekananij kiitayaj maj xolal kipiani se kuali uikalis iuan Dios uan no kimelauayaj aksa akin kipiaya uejueyi kuejmolmej iuan okse uan keman aksa kitapanauiliaya tanauatilmej. Sayoj ke, tayekananij akin moixyekanaj ika itanauatil Cristo amo kichiuaj nejon. Keman aksa ueyi tajtakoua, yejuan sayoj kiitaj maj mochiua tein Biblia kijtoua ika nejon taman. Kiajsikamatij ke Dios kiixtaliani maj tekiuanij kimelauakan aksa akin kipia uejueyi kuejmolmej iuan okse uan keman aksa kitapanauilia tanauatilmej. Yejua ika, tekiuanij uelij kintaxtaualtiaj oso kintsakuaj akin kitapanauilianij tanauatil (Rom. 13:1-4).

24 ¿Uan toni kichiuaj tayekananij keman aksa ueyi tajtakoua? Moyekanaj ika Biblia keman kiitaj tein panok uan kiixejekouaj toni kichiuaskej. Kielnamikij ke itanauatil Cristo moixyekana ika netasojtalis. Nejin kualneskayot kinolinia maj kiitakan keniuj kipaleuiskej aksa akin poui itech nechikol akin kichiuilijkej tein amo kuali. Uan no kinolinia maj kiitakan ox akin tajtakolchiuak moyolnonotsa uan ox uelis kipaleuiskej maj oksepa kuali mouika iuan Dios.

25. ¿Toni tikitaskej itech okse tamachtilis?

25 Yekmelauj, semi timotasojkamatij maj techixyekana itanauatil Cristo. Keman tinochin timochikauaj tiktakamatiskej, titapaleuiaj maj itech nechikol sejse kimachili ke kitasojtaj, kipatiuitaj uan maj kuali momachili. Sayoj ke tinemij kampa miakej kichiuaj tein amo kuali uan okachi “kueyiltijtinemiske ika ne amokuali nintachiualisuan” (2 Tim. 3:13). Yejua ika moneki tiksentokaskej timoyekpiaskej. ¿Keniuj uelis monextis imelaujkayo Dios itech nechikol keman tayekananij moneki kimelauaskej aksa akin ininka mauiltia konemej? Okse tamachtilis kinankilis nejin netajtanil.

NEKUIKATIL 15 Maj tikueyitalikan iKonetsin Jiova

^ párr. 5 Nejin tamachtilis uan okseki omen tein tikitaskej, ika tajtos keyej uelis titakuaujtamatiskej ke Jiova se Dios akin tetasojta uan ke nochi kichiua ika melaujkayot. Yejuatsin kineki maj itekitikauan kinchiuilikan tein melauak uan kinyolseuia akin kipanouanij teikamauiltilis.

^ párr. 1 Xikonita tamachtilis “Netasojtalis uan melaujkayot itech itonaluan xolal Israel”, itech amaix Tanejmachtijkej metsti febrero xiuit 2019.

^ párr. 13 TEIN OKACHI MOMELAUA: Keman titetasojtaj kemej Jesús techolinia maj okachi tiktayekanaltikan tein kinpoloua uan tein kinejnekij oksekin. Timotemakaj tikauaskej seki taman uan ijkon tikinpaleuiskej.

^ párr. 61 TEIN NESI ITECH TAIXKOPIN: Jesús kiita ke momikilij iyoj konetsin se siuat akin amo nemiok inamik. Kemej kiiknelia, oksepa kimaka nemilis.

^ párr. 63 TEIN NESI ITECH TAIXKOPIN: Jesús takuajtok ichan se fariseo akin itokay Simón. Se siuat, akin xa auilnenkej, kimetspajpaka Jesús ika iixayo, kiuajuatsa ika itson uan kiojxilia aceite tein ajuiyak. Simón amo kiuelita tein siuat kichiua, sayoj ke Jesús kitajtouia.