Xionyoui kampa nesi tein kipia

Xionyoui kampa nesi tein kipia

 TAMACHTILIS 22

Maj okachi kuali timomachtikan

Maj okachi kuali timomachtikan

Maj tikyekitakan “toni okachi tayekantok.” (FILIP. 1:10TNM)

NEKUIKATIL 35 Maj tikyekitakan toni okachi tayekantok

TEIN MOITAS *

1. ¿Keyej seki tokniuan kinouijmaka momachtiskej?

AXKAN semi ouij se moixpanoltis. Miakej tokniuan moneki tekitiskej nochi tonal uan ijkon uelis kintekipanoskej ininkalyetouanij. Oksekin kinuikilia miak tiempo yaskej inintekipan uan mokepaskej ininchan. No moajsij akin kichiuaj tekit tein semi tesioujtij. Keman tami tonal, nejin tokniuan semi sioujtokej, yejua ika kinouijmaka momachtiskej.

2. ¿Kemanian tionmomachtia tejuatsin?

2 Tein melauj moneki tikxeloskej tiempo uan ijkon timomachtiskej iTajtol Dios uan amaixmej. Komo tiknekij kuali timouikaskej iuan Jiova uan tinemiskej nochipaya moneki kuali timomachtiskej (1 Tim. 4:15, 16). Seki tokniuan mojmostaj meuaj kualkan uan momachtiaj porin nejon hora amo teyi kinkuejsoua uan kemej yekin ijsaj okachi kuali tanemiliaj. Oksekin achto ke kochitiuij momachtiaj uan ika tanemiliaj.

3, 4. ¿Toni mopatani ika tataman tamachtilis tein mokixtiani uan keyej?

3 Tinochin tikmatij ke semi moneki maj tikxelokan tiempo uan ijkon timomachtiskej. Sayoj ke ¿toni moneki timomachtiskej? Xa tiknemiliaj ke kemej mokixtia miak tataman tamachtilis techouijmaka tikixtajtoltiskej nochi. Sekin kemaj kichiuaj, sayoj ke oksekin tokniuan kinouijmaka. Oloch Taojtokaltianij kimatij nejon, yejua ika yankuixtok kiixtalijkej maj amo mokixtiok miak tamachtilis itech amat uan itech tepos.

4 Kemej neskayot, amo mokixtiaok Anuario de los testigos de Jehová porin itech Internet kampa timoteixmatiltiaj jw.org® uan itech JW Broadcasting® tein kisa  mejmetstika, uelis tikajsiskej kampa tokniuan techtapouiaj ininnemilis tein semi techyolchikaua. Uan axkan, xijxiujtika sayoj mokixtiaj eyi amaixmej Tanejmachtijkej tein tiktemakaj itech tanojnotsalis uan eyi amaixmej ¡Taijxitilis! Nochi nejon tein mopatak techpaleuia maj ueli tikchiuakan tein “okachi tayekantok” (Filip. 1:10TNM). Axkan maj tikitakan toni moneki tiktayekanaltiskej uan keniuj uelis okachi techpaleuis tonemachtil ika Biblia.

TEIN MONEKI TIKTAYEKANALTISKEJ TIMOMACHTISKEJ

5, 6. ¿Toni moneki timomachtiskej ika nejmachkayot?

5 ¿Toni moneki tiktayekanaltiskej timomachtiskej? Moneki mojmostaj tikxeloskej tiempo uan timomachtiskej iTajtol Dios. Axkan, tein moixtajtoltia itech Biblia sejse semana itech nechikol okachi amo miak. Ijkon okachi tikpiaj tiempo titanemiliskej itech tein tikixtajtoltiaj uan tiktemoskej okachi tamachtilis. Amo sayoj moneki tikixtajtoltiskej capítulos tein ixyetok, ta tiktemoskej maj tamachtilis ajsi itech toyolo uan maj kichikaua tokuali uikalis iuan Jiova (Sal. 19:14).

6 ¿Toni no moneki timomachtiskej ika nejmachkayot? Tein tikitaskej itech nechikolmej, kemej amaix Tanejmachtijkej, Nemachtil ika Biblia itech nechikol uan tein moitas itech nechikol tein tikpiaj itajkotian semana. No moneki tikixtajtoltiskej nochi amaixmej Tanejmachtijkej uan ¡Taijxitilis!

7. ¿Moneki timosenkauaskej komo amo tiuelij tikixtajtoltiaj nochi tein kisa itech Internet uan itech JW Broadcasting?

7 Sayoj ke aksa ueliskia kijtos: “¿Moneki maj nikita nochi tamachtilis tein kisa itech Internet uan itech JW Broadcasting? Porin tel miak tamachtilis...”. Maj titanemilikan itech nejin neskayot. Akin youij takuatij kampa kinamakaj miak tataman takual tein uelik, amo uelis nochi kikuaskej, yejua ika kiixpejpenaj sayoj seki. No ijkon, maj amo timosenkauakan komo amo tiuelij tikixtajtoltiaj nochi tein kisa itech jw.org. Maj tikitakan uan maj tikixtajtoltikan tein tiueliskej. Sayoj ke, ¿toni kijtosneki se momachtis uan keniuj uelis okachi techpaleuis tonemachtil ika Biblia?

MAJ TIMOCHIKAUAKAN KUALI TIMOMACHTISKEJ

8. 1) ¿Keniuj uelis timomachtiskej amaix Tanejmachtijkej? 2) ¿Keniuj techpaleuis komo ijkon tikchiuaj?

8 Se momachtis amo kijtosneki sayoj se taixtajtoltis uan se kitsojkuilos tanankililmej. Ta kijtosneki se taixtajtoltis ika nejmachkayot porin se kineki se momachtis se taman. Maj tikitakan keniuj uelis tikchiuaskej nejon keman timomachtiskej amaix Tanejmachtijkej. Yekinika, maj tikitakan kampa kijtoua tein moitas, tein ixnesi ipeujyan tamachtilis. Satepan maj tikitakan itokay tamachtilis uan kemej xexeliujtok, uan netajtanilmej tein ika moelnamiki tamachtilis. Ompa, maj tikixtajtoltikan tamachtilis ika nejmachkayot. Maj tikitakan tajtolmej tein tayekantokej tein miakpa, ixnesij ipeujyan sejse párrafo. Nejon tajtolmej kinextiaj toni ika tajtoua párrafo. Ijkon kemej tikixtajtoltiskej tamachtilis, maj tiknemilikan keniuj sejse párrafo mouika iuan subtítulo uan ika tein kijtoua nochi tamachtilis. Maj tikijkuilokan tajtolmej tein amo tikixmatij uan tanemililmej tein tiknekij okachi ika timomachtiskej.

9. 1) ¿Keyej moneki tikitaskej textos ika nejmachkayot keman timomachtiskej amaix Tanejmachtijkej uan keniuj tikchiuaskej? 2) Kemej kijtoua Josué 1:8, ¿toni no moneki tikchiuaskej keman tikixtajtoltiskej textos?

 9 Keman timomachtiaj amaix Tanejmachtijkej techpaleuia maj tikajsikamatikan Biblia. Yejua ika, maj tikitakan ika miak nejmachkayot textos, okachiok tein moixtajtoltiskej keman timomachtiskej itech nechikol. Maj tikitakan keniuj textos kipaleuiaj tanemilil tein momelaua itech párrafo. Uan no, maj tikxelokan tiempo titanemiliskej itech textos uan keniuj tikuiskej itech tonemilis (xikonixtajtolti Josué 1:8).

Tetatmej, xikinnextilikan nanmokoneuan keniuj momachtiskej (xikonita párrafo 10) *

10. Kemej kijtoua Hebreos 5:14, ¿keyej keman taueyichiuaskej kemej kalyetouanij tetatmej moneki kinnextiliskej ininkoneuan keniuj momachtiskej?

10 Axkan maj ika titajtokan taueyichiualis kemej kalyetouanij. Tetatmej kinekij maj ininkoneuan kinyolpakti momachtiskej. Uan maski tetatmej moneki maj nochipa kimatikan toni momachtiskej keman taueyichiuaskej, amo moneki maj nochi semanas mochijchiuakan kemej ijkuak mopanoltia se drama. Kemansa uelis kiitaskej tein mopanoltia mejmetstika itech JW Broadcasting oso uelis kichijchiuaskej teisa, kemej se tsikitsin arca tein kiixnextis tein kichijchiuak Noé. Sayoj ke no moneki maj tetatmej kinnextilikan ininkoneuan keniuj momachtiskej. Konemej moneki kimatiskej keniuj momachtiskej tein moitas itech nechikolmej oso kitemoskej tamachtilis ika se taman tein kipanotokej itech kaltamachtiloyan (xikonixtajtolti Hebreos 5:14). Komo ininkalijtik momachtiaj se tamachtilis tein kipia Biblia, okachi amo kinouijmakas kuali takakiskej itech nechikolmej uan uejueyi nechikolmej, kampa amo nochipa mopanoltia se video. Tetatmej moneki kiitaskej xiujmej tein kipiaj ininkoneuan uan hasta kani taxikoskej, ijkon kiixtaliskej tiempo tein momachtiskej.

11. ¿Keyej moneki maj tikinnextilikan akin tikinmachtiaj ika Biblia keniuj momachtiskej ininselti?

11 Akin tikinmachtiaj ika Biblia no moneki kimatiskej momachtiskej. Keman peua tikmachtiaj aksa techyolpaktia tikitaskej ke kitsojkuiloua tanankilil itech amaix tein ika tikmachtiaj oso momachtia tein moitas itech nechikol. Sayoj ke no moneki maj tikinnextilikan keniuj uelis momachtiskej ininselti. Ijkon, keman kiixnamikiskej ouijkayomej, amo niman tajtaniskej nepaleuil, ta kimatiskej keniuj  kitemoskej itech toamaixuan tamachtilis tein kinpaleuis.

MAJ TIKIXTALIKAN TONI TIKTEMOUAJ KEMAN TIMOMACHTIAJ

12. ¿Toni moneki tiktemoskej keman timomachtiskej?

12 Komo amo tikuelitaj timomachtiskej, xa tiknemiliskej ke amo keman techyolpaktis. Sayoj ke kemaj uelis. Maj tipeuakan ika tepitsin uan yolik maj okachi timomachtijtiyakan. Keman timomachtiskej maj tiktemokan okachi kuali timouikaskej iuan Jiova. Sayoj ke no uelis tiktemoskej keniuj tiknankiliskej aksa akin techchiuilij se netajtanil oso tiktemoskej tamachtilis tein ika tajtoua se kuejmol tein tikpiaj.

13. 1) ¿Keniuj akin youi kaltamachtiloyan uelis kipaleuis tein kineltoka? 2) ¿Keniuj uelis tikchiuas tein kijtoua Colosenses 4:6?

13 Kemej neskayot, ¿tiyajtok kaltamachtiloyan? Xa akin iniuan timomachtia kineltokaj ke nemilis iselti peuak. Tikuelitaskia tikpaleuis tein Biblia tamachtia, sayoj ke tikmachilia ke amo tiueli. Yejua ika moneki okachi timomachtis. Nejon mitspaleuis itech ome taman. Se, okachi tikneltokas ke Dios kichijchiuak nochi. Uan ome, okachi kuali tikpaleuis tein Biblia tamachtia (Rom. 1:20; 1 Ped. 3:15). Yekinika moneki timotajtanis keyej akin iniuan timomachtia kijtouaj ke kineltokaj ke nemilis iselti peuak. Uan satepan, ika nejmachkayot tiktemos tein kijtouaj toamaixuan. Tikitas ke tikpaleuis tein tikneltoka amo semi ouij. Miakej kineltokaj ke nemilis iselti peuak porin aksa akin kipoujkaitaj kiniluiani ke nejon melauak. Sayoj ke, keman tikajsis seki tanemililmej tein kinextiskej ke amo ijkon, uelis tiknankilis akin mitstajtania porin kineki kimatis okachi (xikixtajtolti Colosenses 4:6).

MAJ TIKNEKIKAN OKACHI TIKMATISKEJ

14-16. 1) ¿Keniuj uelis okachi kuali tikixmatiskej se amatajkuilol itech Biblia tein amo semi timomachtianij? 2) ¿Keniuj techpaleuiaj textos maj okachi tikmatikan tein panouaya itech itonaluan Amós? (No xikonita recuadro “ Maj okachi kuali tikinixmatikan akin ininka tajtoua Biblia”.)

14 Maj tikijtokan ke itech nechikol tein tikpiaskej tikitatij semej amatajkuilolmej tein amo ueyi tein kipia Biblia, xa se tein amo semi timomachtianij. Yekinika monekiskia tiknekiskej okachi tikmatiskej tein kijkuiloj tanauatijkej. ¿Keniuj tikchiuaskej?

15 Achto maj timotajtanikan ox tikixmatij akin kijkuiloj amatajkuilol, kemej akoni katka, kani nemia uan itech toni taman tekitia. Nejon techpaleuis maj tikajsikamatikan keyej kikuik seki tajtolmej oso neskayomej. Keman tikixtajtoltijtoskej, maj tiktemokan tajtolmej tein kinextiskej toni kualneskayomej kipiaya tajkuilojkej.

16 Satepan, maj tiktemokan kemanian moijkuiloj amatajkuilol. Uelis techpaleuis “Tabla de los libros de la Biblia”, tein ixnesi itech ipeujyan Traducción del Nuevo Mundo de las Santas Escrituras (con referencias). No uelis tikitaskej Amaix tein ika timomachtiaj iTajtol Dios itech taxelol 3, kampa ika tajtoua tanauatianij uan tekiuanij itech xolal Judá uan Israel. Komo amatajkuilol tein timomachtijtokej kijkuiloj se tanauatijkej, uelis tiktemoskej keniuj nemiaj taltikpakneminij keman moijkuiloj. Uan no uelis tiktemoskej toni amo kuali tachiualismej kinekia kiyektalis tanauatijkej uan akonimej katkaj iuampoyuan. Uelis tikmatiskej okachi komo tikitaj tein kijtouaj okseki amatajkuilolmej itech Biblia. Kemej neskayot, okachi kuali tikajsikamatiskej tein panouaya itech itonaluan tanauatijkej Amós komo tikixtajtoltiaj referencias  marginales tein kipia Amós 1:1 kampa ixnesij amatajkuilolmej 2 Reyes uan 2 Crónicas. No uelis techpaleuis komo tikixtajtoltiaj tein kijkuiloj Oseas, akin nesi katka iuampoy Amós. Nochi nejon techpaleuis maj tikajsikamatikan keniuj nemiaj itech itonaluan Amós (2 Rey. 14:25-28; 2 Crón. 26:1-15; Os. 1:1-11; Amós 1:1).

 

MAJ TIKTEMOKAN TIKMATISKEJ OKSEKI TAMAN

17, 18. Xikonmelaua keniuj techpaleuia maj okachi techyolpakti tikixtajtoltiskej Biblia komo tiktemouaj seki taman tein amo tikmatij. Xikonkui neskayomej tein moajsij itech párrafos oso okseki.

17 Keman tikixtajtoltiskej Biblia, maj tiktemokan tikmatiskej okachi. Kemej neskayot, maj tiknemilikan ke tikixtajtoltijtokej amatajkuilol Zacarías itech capítulo 12, kampa ika tajtoj imikilis Mesías (Zac. 12:10). Keman tikixtajtoltiaj versículo 12, tikitaj ke “ikalyetouanij Natán” tayokolchokaskiaj keman Mesías momikiliskia. Maj amo tikixpanauikan nejon, ta maj timotajtanikan: “¿Keyej moijtoua nejon ika Mesías uan ikalyetouanij Natán? ¿Kani uelis nikajsis okachi tamachtilis?”. Maj tiktemokan tikmatiskej okachi. Itech referencia marginal tein kipia Zacarías 12:12 ixnesi 2 Samuel 5:14, kampa kijtoua ke Natán katka semej ikoneuan David. Ompa no ixnesi Lucas 3:31, tein kinextia ke Jesús ualeuaya itech ichankauan Natán itechkopa María *. ¡Nejin taman xa amo tikmatiaj! Tikmatiajya ke moijtojka ke Jesús ualaskia itechkopa ichankauan David (Mat. 22:42). Sayoj ke David kinpiaya panoua veinte ikoneuan. Keman timomachtiaj nejon, amo tikmoujkaitaj maj Zacarías kijto ke ikalyetouanij Natán chokaskiaj keman Jesús momikiliskia.

 18 Maj tikitakan okse neskayot. Itech yekinika capítulo tein kipia Lucas, tikixtajtoltiaj ke ángel Gabriel kikalpanoj María uan kiluij ke konetsin tein yaya kipiati yeskia “ueyi chiuke uan in tagayot kipouaske [...] ikoneu de Totajtsin Dios in kachi ueyi chiuke. Uan [...] Yejuatsin kichiualtis ke in Jesús Temakixtijke ma kipia uelilis de rey, ijkon keme in tayekankatat David [...] Uan ne Jesús Temakixtijke, Yejuatsin ya ne kinyekantinemis in pueblojuani de Israel sen nachipa” (Luc. 1:32, 33). Xa okachi tikitaj kampa ángel kijtoj ke Jesús kitokaytiskiaj “ikoneu de Totajtsin Dios”. Sayoj ke Gabriel no kijtoj ke Jesús yeskia tekiuaj. Yejua ika ueliskia timotajtaniskej toni kiajsikamatik María keman kikakik tein kiluij Gabriel. ¿Kinemilij ke Jesús kiixpataskia Herodes oso semej akin tekiuajtiskia ompa Israel? ¿Kinemilij ke ijkon yejua yeskia siuatekiuaj uan ke ikalyetouanij nemiskiaj itech kaltekiuaj? Biblia amo kijtoua maj María ijkon kiluiani Gabriel. Amo no ixnesi maj tajtanini taixyekanas itech Tekiuajyot, kemej kichiujkej ome imomachtijkauan Jesús (Mat. 20:20-23). Nejon kinextia ke María nion tepitsin moueyinekia.

19, 20. Kemej kijtoua Santiago 1:22-25 uan 4:8, ¿toni moneki tiktemoskej keman timomachtiskej?

19 Maj tikelnamikikan ke tein okachi tiktemouaj keman timomachtiaj iTajtol Dios uan amaixmej yejua okachi kuali timouikaskej iuan Jiova. Sayoj ke no tiknekij okachi tikitaskej keniuj titamatij uan toni taman moneki tikpataskej itech tonemilis uan ijkon tikyolpaktiskej Dios (xikonixtajtolti Santiago 1:22-25; 4:8). Yejua ika, keman timomachtiskej, semi moneki maj tiktajtanikan Jiova maj techmaka iespíritu. No moneki maj tikiluikan maj tonemachtil ika Biblia okachi kichikaua totakuaujtamatilis uan maj tikitakan toni taman moneki tikpataskej itech tonemilis.

20 Maj tinochin tikchiuakan kemej itekitikauj Dios akin ika motajtoua itech Salmo 1:2, 3, kampa kijtoua: “Iyolpakilis yetok itech itanauatil Jiova, uan kiixtajtoltia Itanauatil ika tajtol amo chikauak youal uan tonal. Uan [...] nochi tein kichiuas kuali kisas”.

NEKUIKATIL 88 Xinechnextili moojuan

^ párr. 5 ToTajtsin Dios Jiova, akin kiuelita kitemakas teisa, techmaka miak taman tein uelis tikixtajtoltiskej, timomachtiskej uan tein tikitaskej. Nejin tamachtilis techpaleuis maj tikixpejpenakan toni timomachtiskej uan techiluis keniuj uelis okachi techpaleuis tonemachtil ika Biblia.

^ párr. 62 TEIN NESI ITECH TAIXKOPIN: Seki tetatmej kinnextiliaj ininkoneuan keniuj momachtiskej amaix Tanejmachtijkej tein moita itech nechikol.

^ párr. 64 TEIN NESI ITECH TAIXKOPIN: Se tokniuj takat kitemoua okachi tamachtilis tein ika tajtoua tanauatijkej Amós. Taixkopimej tein nesij taikampa kinextiaj tein tokniuj kinemilijtok keman kiixtajtoltijtok Biblia.