Xionyoui kampa nesi tein kipia

Xionyoui kampa nesi tein kipia

 TAMACHTILIS 10

“¿Xe amo uelis ma xinechaui tech nijin at?”

“¿Xe amo uelis ma xinechaui tech nijin at?”

“Temotiyajke hasta atenteno [...] Felipe iuan in tayekanke. Uan de ompa in Felipe kiauij ne tayekanke.” (HECH. 8:38)

NEKUIKATIL 52 Timotemaktiaj iuan Dios

TEIN MOITAS *

1. ¿Toni kiualkuini tein Adán uan Eva kiixpejpenkej?

¿AKONI tiknemilia ke moneki kiixtalis tein kuali uan tein amo? Keman Adán uan Eva kikuajkej koujtakilot, kinextijkej ke amo takuaujtamatiaj iuan Jiova nion no itech itanauatiluan. Yejuan kiixpejpenkej tein kuali uan tein amo (Gén. 3:22). ¿Toni kiualkuik nejon? Amo kuali mouikakejok iuan Jiova uan amo nemiskiajok nochipaya. Uan no, kinpanoltilijkej ininkoneuan tajtakol uan mikilis (Rom. 5:12). Tein kiixpejpenkej kiualkuini miak tajyouilis.

Satepan ke ueyichiujkej etíope kiselij Jesús, niman kinekik moauis (Xikita párrafo 2 uan 3)

2, 3. 1) ¿Toni kichiuak ueyichiujkej etíope keman Felipe kinojnotsak? 2) ¿Katiyejua tatiochiualismej tikseliaj keman timoauiaj? 3) ¿Katiyejua netajtanilmej tiknankilitij?

2 Keman Felipe kinojnotsak ueyichiujkej etíope, yejua amo kichiuak tein Adán uan Eva kichiujkej. Yejua niman moauij porin semi kitasojkamatia tein Jiova uan Jesús ika kichiujkej (Hech. 8:34-38). No ijkon, keman timotemaktiaj iuan Dios uan timoauiaj kemej kichiuak etíope, tiknextiaj ke tiktasojkamatij nochi tein Jiova uan Jesús toka kichiuanij. Uan no tiknextiaj ke titakuaujtamatij iuan Jiova uan ke tikmatij ke sayoj yejuatsin kinamiki kiixtalis tein kuali uan tein amo.

3 Xitanemili itech tein kuali tein tikseliaj porin tiktekitiliaj Jiova. Yejuatsin uelis techmakas nochi tein Adán uan Eva kipolojkej, kemej tinemiskej nochipaya. Uan kemej titakuaujtamatij itech Jesucristo, Dios techtapojpoluia uan ueli tikpiaj totanemilil chipauak (Mat. 20: 28; Hech. 10:43). Uan no, tipouij iniuan itekitikauan Jiova akin kemej yeskiaj tochankauan akin yejuatsin kinselia uan kichiaj se kualtsin nemilis satepan (Juan 10:14-16; Rom. 8:20, 21). Maski miakej kiitstokejya nejin tatiochiualismej uan kiixmatijya Jiova, omeyolouaj moauiskej uan amo kichiuaj kemej etíope. ¿Toni kintsakuilia? Uan ¿toni uelis kinpaleuis?

TEIN SEKIN KINTSAKUILIA MAJ MOAUIKAN

Tein sekin moneki kiixnamikiskej achto ke moauiskej

Omeyolouaj (Xikita párrafos 4 uan 5) *

4, 5. ¿Toni ouijkayomej kipiayaj Avery uan Hannah?

4 Omeyolouaj. Itatuan se telpoch akin itokay Avery kitekitiliaj Jiova. Ipopaj kuali kinixyekana ikoneuan uan se kuali tayekankej. Maski ijkon, Avery amo kiixtaliaya moauis. Yejua kijtoua: “Niknemiliaya ke amo ueliskia niyeski kemej nopopaj”. Uan no, Avery kinemiliaya ke amo ueliskia kichiuas tekimej tein xa satepan kimakaskiaj itech nechikol. Kijtoua: “Nechtekipachouaya maj nechiluianij maj nikchiua netataujtil senteixtenoj, maj nitemaka se tanojnots oso maj nikixyekana nechikol keman se tanojnotsati”.

5 Hannah akin kipia 18 xiujmej, kinemiliaya ke amo ueliskia kichiuas tein kuali uan tein Jiova tanauatia maski ikalyetouanij itaixpantijkauan Jiova. Kemansa, kemej tel amo kuali momachiliaya, iselti mokojkokouaya uan nejon kichiuaya maj okachi amo kuali momachili. Yejua kijtoua: “Amo akin niktapouij tein nimochiuiliaya nion notatuan. Niknemiliaya ke Jiova amo keman nechseliskia kemej itasojikniuj porin nimokojkokouaya”.

Tasojiknimej (Xikita párrafo 6) *

6. ¿Keyej amo moauiaya Vanessa?

6 Tasojiknimej. Vanessa, akin kipia 22 xiujmej, kijtoua: “Tel kuali nimouikaya iuan se notasojikniuj akin nikixmatia kemej majtakti xiujmejya”. Sayoj ke nejin itasojikniuj amo kineltokaya Jiova uan amo kipaleuiaya maj kiixtali moauis uan nejon kiyolkokouaya Vanessa. Yejua kijtoua: “Ouij nechkisaya nikinpias notasojikniuan uan nimouia maj amo nikajsini okse kemej yejua”.

Mouij ueyi tajtakoskej (Xikita párrafo 7) *

7. ¿Toni kimouiliaya Makayla maj kipano uan keyej?

7 Mouij ueyi tajtakoskej. Makayla kipiaya makuil xiuit keman iikniuj takat kikalankixtijkej itech nechikol. Kiitaya keniuj itatuan tajyouiayaj ika nochi tein iikniuj kichiuaya. Kijtoua: “Nimouia nimoauis, satepan nikchiuas se ueyi tajtakol uan maj nechkalankixtianij  uan maj okachi nikintajyouiltiani notatuan”.

Mouij maj kinixnamikikan (Xikita párrafo 8) *

8. ¿Keyej mouia Miles?

8 Mouij maj kinixnamikikan. Maj tikitakan tein kipanok se telpoch akin itokay Miles. Ipopaj uan itakpanan kitekitiliaj Jiova, sayoj ke imomaj amo. Miles kijtoua: “Ninemik iuan nomomaj dieciocho xiujmej. Amo uelia nikiluiaya ke niknekia nimoauis porin nikelnamikia keniuj kualanik keman nopopaj mochiuak itaixpantijkauj Jiova uan nimouia maj no nechtajyouiltiani”.

KENIUJ UELIS TIKIXNAMIKIS TEIN MITSTSAKUILIA

9. ¿Toni uelis panos keman timomachtis ke Jiova semi tetasojta uan amo yolijsiui?

9 Adán uan Eva kiixpejpenkej amo kitekitiliskej Jiova porin amo senkis kitasojtakej. Maski ijkon, yejuatsin kinkauak maj nemikan, maj kinpianij konemej uan maj kiixpejpenanij keniuj kiniskaltiskej. Adán uan Eva semi tajyouijkej porin amo kikaujkej maj Jiova kinixyekana uan nejon kinextij ke amo kuali taixpejpenkej. Ininkoneuj akin tayekanaya kimiktij iikniuj uan satepan, okachi momiakilij tateuilis uan taltikpakneminij kitayekanaltiayaj inintanejnekilis (Gén. 4:8; 6:11-13). Sayoj ke, Jiova kiixtalijtoya se taman tein ika kinmakixtiskia ininkoneuan akin kinekiskiaj kitekitiliskej (Juan 6:38-40, 57, 58). Nejin technextilia ke Jiova semi tetasojta uan amo yolijsiui. Ijkon kemej okachi tikixmattiyas, okachi tiktasojtatiyas. Amo tiknekis tikchiuas kemej Adán uan Eva, ta tiknekis iuan timotemaktis.

Keniuj uelis tikixnamikis tein mitstsakuilia

(Xikita párrafo 9 uan 10) *

10. ¿Keyej titanemilis itech Salmo 19:7 uelis mitspaleuis xiktekitili Jiova?

10 Xiksentoka xikixmati Jiova. Ijkon kemej okachi tikixmatis, okachi amo tiomeyolouas ke uelis tiktekitilis. Avery kijtoua ke semi kiyolchikauak momachtis uan itech tanemilis tein kijtoua Salmo 19:7 (xikixtajtolti). Keman kiitak keniuj kipaleuiayaj nejon  tajtolmej, okachi peuak kitasojta Jiova. Tiktasojtaskej Jiova amo sayoj techpaleuia maj iuan titakuaujtamatikan, ta no maj tiktayekanaltikan itanejnekilis. Hannah kijtoua: “Nikixtajtoltis uan nimomachtis Biblia nechpaleuij maj nikajsikamati ke keman nimokojkokoua no nikxokolia Jiova” (1 Ped. 5:7). Yejua mochikauak kichiuas tein kijtoua iTajtol Dios (Sant. 1:22). ¿Toni panok satepan? Yejua kijtoua: “Keman nikitak keniuj nechpaleuiaya niktakamatis Jiova, okachi peuak niktasojta. Axkan nikmati ke yejuatsin nochipa nechpaleuis keman monekis”. Hannah amo mokojkokouaok, motemaktijya iuan Jiova uan moauijya.

(Xikita párrafo 11) *

11. 1) ¿Keniuj Vanessa uelik kinpiak kuali tasojiknimej? 2) ¿Toni techmachtia tein kipanok?

11 Kuali xikinixpejpena motasojikniuan. Satepan, Vanessa kiitak ke itasojikniuj amo kipaleuijtoya maj kitekitili Jiova uan kiixtalij amo iuan mouikasok. No mochikauak kinpias yankuik itasojikniuan itech nechikol. Yejua kijtoua ke kipaleuij ineskayo Noé uan ikalyetouanij: “Kinyoualouayaj akin amo kitasojtayaj Jiova, yejua ika kitemouayaj mosenyolchikauaskej”. Satepan ke moauij mochiuak precursora. Axkan kijtoua: “Nejon nechpaleuiani maj nikinpia kuali tasojiknimej itech nechikol uan itech okseki nechikolmej”. Tejua no uelis tikinpias kuali tasojiknimej komo timochikaua tikchiuas tekit tein Jiova technauatiani maj tikchiuakan (Mat. 24:14).

(Xikita párrafos 12 hasta 15) *

12. ¿Keyej moijtoua ke Adán uan Eva amo kimoujkatokakej Dios uan toni kiualkuini nejon?

12 Xikixnamiki moujkayot uan xikmoujkatoka Dios. Kemansa kuali maj se kimouili seki taman. Kemej neskayot, kuali maj se moui se kichiuas teisa tein Jiova amo kiyolpaktia (Sal. 111:10). Komo Adán uan Eva kimoujkatokanij Jiova amo kiixnamikiskiaj. Sayoj ke keman kiixnamikkej “ixtajtapoujkej”, tein kijtosneki ke kiajsikamatkej  ke mochiujkaj tajtakouanij uan ke kinpanoltiliskiaj ininkoneuan tajtakol uan mikilis. Kemej amo kichiujkaj tein Dios kinnauatij, mopinaujmatkej porin moitakej xijxipetstikej uan motakentijkej (Gén. 3:7, 21).

13, 14. 1) Kemej kijtoua 1 Pedro 3:21, ¿keyej amo moneki tikmouiliskej mikilis? 2) ¿Toni kichiua maj tiktasojtakan Jiova?

13 Kuali maj timouikan tikchiuaskej tein amo kiyolpaktis Jiova. Tein amo moneki tikmouiliskej yejua mikilis. ¿Keyej? Porin Dios kichiuak tein techpaleuis maj tinemikan nochipaya. Komo titajtakolchiuaj sayoj ke timoyolnonotsaj uan titakuaujtamatij itech inemilis Jesús tein kitemakak, Jiova techtapojpoluis. Keman timotemaktiaj iuan Jiova uan timoauiaj tiknextiaj ke titakuaujtamatij iuan Jesús (xikonixtajtolti 1 Pedro 3:21).

14 Onkak miak taman tein kichiua maj tiktasojtakan Jiova. Mojmostaj techmaka miak taman tein kuali uan techmachtia keniuj yekmelauj tamati uan tein kiixtalijtok kichiuas (Juan 8:31, 32). Techyekana uan techpaleuia ika inechikol. Techpaleuia maj tikixnamikikan kuejmolmej uan motenkaua ke uelis tikpiaskej se kualtsin nemilis satepan (Sal. 68:19; Apoc. 21:3, 4). Keman titanemiliaj itech nochi tein Jiova kichiuani tein ika kinextia ke techtasojta, kichiua maj okachi tiktasojtakan uan maj amo tiknekikan tikyolkokoskej. Yejua nejon kijtosneki se kimoujkatokas.

15. ¿Toni kipaleuij Makayla maj amo kinemili ke tajtakolchiuaskia?

15 Keman Makayla kiajsikamatik ke Jiova tetapojpoluia amo mouikok. Kijtoua: “Nikajsikamatik ke tinochin titajtakouaj uan timopolouaj uan no, ke Jiova techtasojta uan techtapojpoluia itechkopa iKonetsin”. Kitasojtas Jiova kipaleuij maj iuan motemakti uan maj moaui.

(Xikita párrafo 16) *

16. ¿Toni kipaleuij Miles maj kiixnamiki moujkayot?

16 Miles, akin mouia maj imomaj amo kikauani maj moaui, kiluij se tokniuj takalpanojkej maj kipaleui. Kijtoua: “Yejua no kipanoka tein nejua nikpanotoya porin imomaj amo no katka itaixpantijkauj Jiova. Nechpaleuij maj niknemili keniuj ueliskia nikiluis nomomaj ke nejua nikixtalijka nimoauis uan amo porin nopopaj nechchikaujkauijtoya”. Imomaj Miles semi kualanik. Satepan, monekik mokalpatas uan ijkon ueliskia moauis. No kijtoua: “Nechyololinij nikmatis tein Jiova noka kichiuani. Nitanemilis ke Jesús noka kitemakak inemilis, nechpaleuij maj nikita ke Jiova semi nechtasojta. Nejon kichiuak  maj iuan nimotemakti uan maj nimoaui”.

XIKCHIUA KEMEJ TIKIXTALIJ

Uelis tiknextiskej ke tiktasojkamatij tein Dios toka kichiuani (Xikita párrafo 17)

17. ¿Toni uelis tiknextiskej tinochin?

17 Keman Eva kikuaj koujtakilot tein moajsia Edén, kiixnamikik iPopaj. Uan keman Adán no kichiuak, kinextij ke senkis amo kitasojkamatiliaya Jiova nochi tein kimakaka. Tinochin uelis tiknextiskej ke amo techpaktia tein yejuan kiixpejpenkej kichiuaskej. Keman timoauiaj, tiknextiliaj Jiova ke tikneltokaj ke sayoj yejuatsin kinamiki kiixtalis tein kuali uan tein amo. No tiknextiliaj ke tiktasojtaj uan ke iuan titakuaujtamatij.

18. ¿Toni mitspaleuis xiktekitili Jiova?

18 Satepan ke timoauiaj, mojmostaj moneki timoixyekanaskej ika itanauatiluan Jiova uan amo ika tein tejuan tiknemiliaj. Xa ouij yeski, sayoj ke millones taltikpakneminij kichiuaj. Uan tejua no uelis tikchiuas komo timochikaua okachi tikajsikamatis Biblia, timouikas iniuan tokniuan uan tikteixmatiltis Jiova (Heb. 10:24, 25). Uan keman tikixpejpenas se taman, xikchiua kemej mitsyolmajxitia Jiova itechkopa iTajtol uan inechikol (Is. 30:21). Ijkon, tein tikchiuas kuali kisas (Prov. 16:3, 20).

19. ¿Toni moneki nochipa tikelnamikis uan keyej?

19 Komo nochipa tikelnamiki keniuj mitspaleuia maj Jiova mitsixyekana, okachi tiktasojtas yejuatsin uan itanauatiluan. Ijkon, maski Satanás mitstanejnektis ika miak taman, amo tikauas Jiova. Itech mil xiujmej keman titanemilis itech tonal keman timoauij, tikijtos: “Semi kuali tein nikixtalij nikchiuas”.

NEKUIKATIL 28 ¿Akoni uelis mouikas iuan Jiova?

^ párr. 5 Se taman tein moneki tikixpejpenas yejua ox timoauis oso amo. ¿Keyej motelneki? Nejin tamachtilis kimelauas keyej. Uan no, kinpaleuis akin kinemilijtokej moauiskej maj kiixnamikikan tein xa kintsakuilia maj moauikan.

^ párr. 56 TEIN NESI ITECH TAIXKOPIN: Omeyolouaj: Se telpoch moui tanankilis itech nechikol.

^ párr. 58 TEIN NESI ITECH TAIXKOPIN: Tasojiknimej: Se ichpoch youi iuan se amo kuali itasojikniuj uan pinaua keman kinita ome tokniuan siuamej.

^ párr. 60 TEIN NESI ITECH TAIXKOPIN: Tajtakoskej: Keman iikniuj se ichpoch kikalankixtiaj itech nechikol uan nemiti okseko, yejua moui kichiuas se ueyi tajtakol.

^ párr. 62 TEIN NESI ITECH TAIXKOPIN: Taixnamikilis: Ika moujkayot se telpoch motataujtia iixpan imomaj akin amo itaixpantijkauj Jiova.

^ párr. 65 TEIN NESI ITECH TAIXKOPIN: Omeyolouaj: Se telpoch mochikaua okachi momachtis.

^ párr. 67 TEIN NESI ITECH TAIXKOPIN: Tasojiknimej: Se ichpoch amo mopinaujmatiok moteixmatiltis kemej itaixpantijkauj Jiova.

^ párr. 69 TEIN NESI ITECH TAIXKOPIN: Tajtakoskej: Se ichpoch kitasojta tamachtilis tein melauak uan moauia.

^ párr. 71 TEIN NESI ITECH TAIXKOPIN: Taixnamikilis: Se telpoch ika yolchikaualis kimelauilia imomaj tein kineltoka.