Xionyoui kampa nesi tein kipia

Xionyoui kampa nesi tein kipia

Yolkualtakayot: keniuj uelis tiknextiskej

Yolkualtakayot: keniuj uelis tiknextiskej

TINOCHIN tiknejnekij maj techitakan ke tiyolkualmej. Sayoj ke axkan semi ouij se kinextis nejon porin miakej “kitauelitstinemij nochi ten kuali” (2 Tim. 3:3). Yejuan kiixtaliaj toni kuali uan toni amo uan ika moixyekanaj uan “kijtouaj ke tein kuali, amo kuali, uan tein amo kuali kiitaj ke kuali” (Is. 5:20). No uelis techouijmakas tiknextiskej yolkualtakayot porin xa tikpanouanij tein amo kuali uan porin titajtakouanij. Xa timomachiliaj kemej se tokniuj siuat akin miak xiujmejya kitekitiliani Jiova, akin kijtoua: “Semi nechouijmaka nikneltokas ke niyolkuali”.

Sayoj ke, tinochin uelis tiknextiskej yolkualtakayot. Nejin kualneskayot poui itech takilot tein kitemaka yektikatsin espíritu tein okachi chikauak, uan uelis techpaleuis maj tikixnamikikan nochi tein techtsakuilis maj tiyolkualmej. Maj tikitakan toni yolkualtakayot uan keniuj uelis tiknextiskej.

TONI YOLKUALTAKAYOT

Yolkualtakayot yejua tein kinextia aksa akin yolkuali, akin nochipa melaujkanemi uan mochikaua kichiuas tein kuali. Nochipa kitemoua kinpaleuis oksekin.

Xa tikinitanij akin kitemouaj kinchiuiliskej tein kuali ininkalyetouanij uan inintasojikniuan. Sayoj ke akin yolkuali iixpan Dios amo sayoj kichiua nejon. Tein melauj, amo akin senkis ueli kinextia nejin kualneskayot porin Biblia kijtoua ke “amo onkak nion se takat yolmelauak nikan taltikpak akin nochipa kichiua tein kuali uan amo keman tajtakoua” (Ecl. 7:20). Uan tatitanil Pablo kijtoj: “Nikmati ke itech noyolijtik, kijtosneki tech notalnamikilis, amo teyi ongak [...] ten kuali” (Rom. 7:18). Yejua ika, komo tiknekij tiknextiskej nejin kualneskayot moneki timomachtiskej ineskayo Jiova, akin senkis kinextia yolkualtakayot.

“JIOVA YOLKUALI”

Yejua Jiova akin kiixtalia toni tein kuali. Akin kijkuiloj se salmo kijtoj: “Tejua tiyolkuali uan tikchiua tein kuali. Xinechmachti motanauatiluan” (Sal. 119:68). Maj tikitakan ome taman itech nejin versículo kemej Jiova kinextia yolkualtakayot.

Jiova yolkuali. Yejuatsin semi kinextia yolkualtakayot. Maj tikitakan tein panok keman kiluij Moisés: “Nejua nikchiuas maj nochi nokualtakayo pano moixpan”. Ijkon kemej panotiyaya iueyiyo Dios uan no iyolkualtakayo, Moisés kikakik nejin tajtolmej: “Jiova, Jiova, se Dios teiknelijkej uan teyoliknelijkej, amo niman kualani uan kitelpia ueyi netasojtalis tein amo tami uan nochipa kijtoua tein melauak, akin kinpialia tel miakej ueyi netasojtalis tein amo tami, akin kitapojpoluia akin mopoloua uan akin kitapanauilia tanauatil uan akin tajtakoua, sayoj ke amo kikauas maj amo kiseli tatsakuiltilis” (Éx. 33:19; 34:6, 7). Kemej tikitaj, Jiova kinextia yolkualtakayot itech nochi. Keman Jesús nemik nikan taltikpak, no semi kinextij nejon. Maski ijkon, kijtoj: “Amo aka okse ok yolkuali. Ta, sayo [...] Totajtsin Dios” (Luc. 18:19).

Tikitaj iyolkualtakayo Jiova itech itachijchiualis

Jiova kichiua tein kuali. Iyolkualtakayo Dios moita itech nochi tein kichiua. Biblia kijtoua: “Jiova yolkuali iniuan nochin, uan iteiknelilis  moajsi itech nochi itachiualis” (Sal. 145:9). Jiova kinextia yolkualtakayot porin amo techikotasojta uan kinmaka taltikpakneminij nemilis uan nochi tein kinpaleuia maj yoltokan (Hech. 14:17). No kinextia keman techtapojpoluia totajtakoluan. Akin kijkuiloj se salmo kijtoj: “Tejua Jiova tiyolkuali uan niman titetapojpoluia” (Sal. 86:5). Uelis senkis tikmatiskej ke “Jiova amo kintsakuiltilis nion teyi tein kuali akin melauak monejnemiltiaj” (Sal. 84:11).

“XIMOMACHTIKAN NANKICHIUASKEJ TEIN KUALI”

Jiova techchijchiuak kemej uelis tiknextiskej tein yejuatsin kinextia, yejua ika ueli tikchiuaj tein kuali (Gén. 1:27). Sayoj ke, Biblia techiluia akin tiktekitiliaj Dios: “Ximomachtikan nankichiuaskej tein kuali” (Is. 1:17). Maj tikitakan eyi taman tein uelis techpaleuis maj tiknextikan yolkualtakayot.

Yekinika, maj tiktajtanilikan Dios iyektikatsin espíritu, tein techpaleuis maj tikchiuakan tein kuali iixpan yejuatsin (Gál. 5:22). Iespíritu Dios techpaleuia maj tiktasojtakan tein kuali uan maj tikixtopeuakan tein amo kuali (Rom. 12:9). Uan no, Biblia kijtoua ke Jiova uelis techpaleuis maj ‘tikijtojtinemikan uan tikchiutinemikan nochi ten kuali’ (2 Tes. 2:16, 17).

Ojpatika, moneki tikixtajtoltiskej iTajtol Dios. Keman tikchiuaj, Jiova techmachtia “ojti tein kinextia tein kuali” uan techpaleuia maj tikchiuakan “miak tataman den kuali tekit” (Prov. 2:9; 2 Tim. 3:17). Keman tikixtajtoltiaj iTajtol uan itech titanemiliaj, okachi mochikaua totakuaujtamatilis iuan Dios uan okachi tiknejnekij tikchiuaskej itanejnekilis. Uan nejon semi techpaleuis keman monekis (Luc. 6:45; Efes. 5:9).

Expatika, moneki timochikauaskej tikchiuaskej kemej akin kichiuaj tein kuali (3 Juan 11). Itech Biblia tikajsij kuali neskayomej tein uelis tiktojtokaskej. Sayoj ke, okachi kuali neskayot techkauiliaj Jiova uan Jesús. Uan no tikajsij okseki neskayomej, kemej Tabita uan Bernabé (Hech. 9:36; 11:22-24). Uelis timomachtiskej itech Biblia keniuj kinpaleuijkej oksekin uan maj tiknemilikan keniuj tejuan uelis tikpaleuiskej se tochankauj oso se tokniuj itech nechikol. Maj tikitakan tatiochiualismej tein kiselijkej nejin ome tokniuan keman tapaleuijkej. Tejuan no uelis tikseliskej tatiochiualismej.

No uelis ininka titanemiliskej akin axkan kinpaleuiaj oksekin. Kemej neskayot, tayekananij itech nechikol semi tekitij uan kinpaktia kichiuaskej tein kuali. Uan no, semi  techpaleuia ininneskayo tokniuan siuamej akin ‘kitenextilijtinemijʼ tein kuali ika tein kijtouaj uan ika tein kichiuaj (Tito 1:8; 2:3). Se tokniuj siuat akin itokay Roslyn kijtoua: “Nikpia se notasojikniuj siuat akin nochipa kitemoua kinpaleuis uan kinyolchikauas tokniuan itech nechikol. Tanemilia itech tein kipanotokej uan kintayokolia se teisa oso kinpaleuia ika okseki taman. Nikita ke semi yolkuali”.

Jiova kiniluia itekitikauan: “Xiktemokan tein kuali” (Amós 5:14). Komo tikchiuaj, amo sayoj tiktasojtaskej itanauatiluan Dios, ta okachi tiknekiskej tikchiuaskej tein kuali.

Timochikauaj tiyeskij tiyolkualmej uan tikchiuaskej tein kuali

Sayoj ke, maj amo tiknemilikan ke tiknextiaj yolkualtakayot sayoj keman tikchiuaj uejueyi taman. Maj tikijtokan se neskayot, keman tiktokaj se xochit amo sayoj sepa tiktekiliaj miak at, ta miakpa tiktekiliaj tepitsin at. No ijkon, komo tikinpaleuiaj oksekin ika miak taman tein amo uejueyi, tiknextijtoskej yolkualtakayot.

Biblia kijtoua ke tinochin moneki tikpiaskej ‘yoltanejnekilis para tikchiutinemiske ten kuali’ (2 Tim. 2:21; Tito 3:1). Komo timotekipachouaj ika tein oksekin kipanouaj, niman tikajsiskej keniuj tikinyolchikauaskej (Rom. 15:2). Xa uelis tikinpaleuiskej ika se taman tein tikpiaj (Prov. 3:27). Xa uelis tikyoleuaskej aksa maj touan takua uan ijkon uelis tikpaleuiskej. ¿Tikixmatij aksa akin mokokoua? Komo ijkon, uelis tikijkuilouiliskej teisa oso tiktitaniliskej se mensaje, tikalpanotiuij oso tiknotsaskej ika teléfono. Kemej tikitaj, uelis tikchiuaskej miak taman ‘ten kuali para ijkon kachi ok tikinyolmajxitiske in takakini’ (Efes. 4:29).

Ijkon kemej Jiova, tiktemouaj tikinchiuiliskej nochin tein kuali. Yejua ika, amo titechikotasojtaj uan nochin tikinmatiltiaj kuali tanauatilmej ika iTekiuajyo Dios. Kemej Jesús tanauatij, tiktemouaj tikinchiuiliskej tein kuali hasta akin techtauelitaj (Luc. 6:27). Nochipa tikchiuaskej tein kuali komo tikinpaleuiaj oksekin, porin “amo teyi ongak tanauatil ten uelis techtakaualtia ke ma amo tikpiakan nijin takilot” (Gál. 5:22, 23). Komo tikchiuaj tein kuali maski techixnamikiskej oso tikpiaskej ouijkayomej, xa taltikpakneminij kinekiskej kiixmatiskej tamachtilis tein melauak uan tikueyitaliskej Dios (1 Ped. 3:16, 17).

¿KENIUJ TAPALEUIA SE KINEXTIS YOLKUALTAKAYOT?

Biblia kijtoua ke “takat yolkuali,” kiselia tatiochiualismej porin tapaleuia (Prov. 14:14). ¿Toni tikseliskej komo tiknextiaj yolkualtakayot? Xa taltikpakneminij no techchiuiliskej tein kuali (Prov. 14:22). Uan maski amo kichiuaskej, komo tiksentokaj tiknextiaj yolkualtakayot uelis kinyolseuis uan kinyolyemanis (Rom. 12:20).

Miakej kijtouaj ke semi kinpaleuiani kikauaskej tein amo kuali uan kichiuaskej tein kuali. Maj tikitakan tein kipanok Nancy. Yejua kijtoua: “Amo nikchiuaya tein monekia nikchiuas, niauilnemia uan amo nitepoujkaitaya. Sayoj ke, keman nimomachtij itanauatiluan Dios uan peuak nikintakamati, kichiuak maj okachi niyolpaki. Axkan kuali nimomachilia”.

Okachi moneki tiknextiskej yolkualtakayot porin nejon kiyolpaktia Jiova. Yejuatsin kiita tein tikchiuaj, maski miakej amo kiitaskej. Kiitstok tein kuali tein tiknemiliaj uan tein tikchiuaj (Efes. 6:7, 8). ¿Keniuj techtatiochiuia? “Jiova kiselia akin yolkuali” (Prov. 12:2). Yejua ika, maj tiksentokakan tiknextikan yolkualtakayot. Jiova motenkaua ke “kinueyipanchiuas uan kinueyimatis uan kinyolpoxauis [oso kinyolseuis] nochi nekes ten kichiutinemij sayo ika ten kuali” (Rom. 2:10).