Xionyoui kampa nesi tein kipia

Xionyoui kampa nesi tein kipia

Tetatmej, ¿nankinpaleuijtokej nanmokoneuan maj kiixtalikan moauiskej?

Tetatmej, ¿nankinpaleuijtokej nanmokoneuan maj kiixtalikan moauiskej?

“Ma amo tikchia ok. Ta, ximoketsa uan ma mitsauikan.” (HECH. 22:16)

NEKUIKATILMEJ: 7, 11

1. ¿Toni kinekij kiyekmatiskej tokniuan tetatmej achto ke ininkoneuan moauiskej?

“MIAK metsti nikinteliluiaya notatuan ke niknekia nimoauis, uan yejuan miakpa nouan ika tajtojkej nejon. Kinekiaj kiitaskej ke nikajsikamatia ke nejon amo auil. Ejkok tonal keman nikchiuaskia nejon tein motelneki: tonal 31 metsti diciembre xiuit 1934.” Tokniuj siuat Blossom Brandt ijkon kitetapouia tein panok keman kiixtalij moauis. Axkan, tetatmej no kinekij kinpaleuiskej ininkoneuan maj kuali taixpejpenakan. Komo se konet mochia maski uelisya moauis, uelis moijtakos ikuali uikalis iuan Jiova (Sant. 4:17). Achto ke ininkoneuan moauiskej, tetatmej kinekij kiyekmatiskej ke ininkoneuan uelisya mochiuaskej itatojtokakauan Cristo.

2. 1) ¿Toni kiitanij seki tokniuan takalpanouanij? 2) ¿Toni tikitaskej itech nejin tamachtilis?

2 Seki tokniuan takalpanouanij kiitanij ke miakej telpochmej akin kipiaj kemej 20 xiujmej ayamo moauiaj maski inintatuan  itaixpantijkauan Jiova. Miakej youij nechikolmej, tanojnotsaj uan moteixmatiltiaj kemej itaixpantijkauan Jiova. Sayoj ke, ayamo motemaktianij nion moauianij. ¿Keyej? Kemansa, xa porin inintatuan kiniluiaj maj ayamo moauikan. ¿Keyej seki tokniuan tetatmej kiniluiaj nejon? Itech nejin tamachtilis, tikitaskej naui taman tein uelis kintekipachos.

¿KIPIA NOKONETSIN XIUJMEJ TEIN MONEKI?

3. ¿Toni kintekipachouaya itatuan Blossom?

3 Itatuan Blossom kintekipachouaya maj ininsiuapil ayamo kipiani xiujmej tein monekia uan ijkon kiajsikamatiskia tein kijtosneki se moauis uan keyej motelneki. ¿Keniuj tetatmej uelis kimatiskej ox ininkoneuj uelisya motemaktis iuan Jiova?

4. ¿Keniuj tanauatil tein moajsi itech Mateo 28:19, 20 kinpaleuia tetatmej?

4 (Xikonixtajtolti Mateo 28:19, 20.) Itech Biblia amo moijtoua kanachi xiuit moneki kipias aksa keman moauis. Maski ijkon, tetatmej moneki kinemiliskej tein kijtosneki se kinpaleuis oksekin maj mochiuakan itatojtokakauan Cristo. Tajtolmej tein moajsij achto itech Mateo 28:19 kinextiaj ke se momachtijkej yejua se akin kimachtiaj uan kiajsikamati itamachtilisuan Jesús uan kiixtalia kitakamatis. Yejua ika, tokniuan tetatmej moneki kiixtaliskej kinmachtiskej ininkoneuan keman pilimejok uan ijkon keman moskaltiskej uelis moauiskej uan mochiuaskej itatojtokakauan Cristo. Pilimej amo ueli kichiuaj tein ika kinextiskej ke uelis moauiskej. Sayoj ke Biblia kijtoua ke hasta seki konemej akin nojnelmejok uelis kiajsikamatiskej uan kipatiuitaskej tein Biblia tamachtia.

5, 6. 1) ¿Keniuj techpaleuia Biblia maj tikmatikan kemanian xa moauij Timoteo? 2) ¿Keniuj tetatmej uelis okachi kuali kinpaleuiskej ininkoneuan?

5 Timoteo katka se itatojtokakauj Jesús akin kiixtalij kitekitilis Jiova keman telpochok katka. Tatitanil Pablo kijtoj ke Timoteo peuak kiixmati tein tamachtia iTajtol Dios ‘kuak piliok katka’. Ipopaj amo kitekitiliaya Jiova, sayoj ke imomaj uan iueyinan kipaleuijkej maj kipatiuita iTajtol Dios. Yejua ika, kipiak chikauak itakuaujtamatilis (2 Tim. 1:5; 3:14, 15). Keman kipiaya kemej 20 xiujmej, uelik kiselij seki tekimej tein motelnekiaj itech nechikol (Hech. 16:1-3).

6 Nochin konemej tatamamej. Amo nochin niman kiajsikamatij tein moneki. Sekin nojnelmejok keman kiajsikamatij tein melauak, kuali taixpejpenaj uan kinekij moauiskej. Oksekin xa uelis moauiskej hasta keman okachi ueyiaskej. Tetatmej akin kiajsikamatij nejin amo kinchikaujkauiaj ininkoneuan maj moauikan, ta kinpaleuiaj maj kichikauakan inintakuaujtamatilis ijkon kemej kinnamiki. Tetatmej yolpakij keman ininkoneuan kichiuaj tein kijtoua Proverbios 27:11 (xikonixtajtolti). Sayoj ke, moneki amo keman kielkauaskej ke moneki kinpaleuiskej maj mochiuakan itatojtokakauan Cristo. Yejua ika, moneki motajtaniskej: “¿Kipiaya nokonetsin taixmatilis tein moneki tein kipaleuis maj motemakti iuan Dios uan maj moaui?”.

¿KIPIA NOKONETSIN TAIXMATILIS TEIN MONEKI?

7. ¿Motelneki maj aksa kiixmati nochi tein Biblia tamachtia achto ke moauis? Xikonmelaua.

7 Tetatmej kinmachtiaj ininkoneuan tein melauak porin kinekij maj kuali  kiixmatikan. Nejon taixmatilis kinpaleuis maj kinekikan motemaktiskej iuan Jiova. ¿Kijtosneki nejin ke moneki senkis kiixmatiskej nochi tein Biblia tamachtia achto ke motemaktiskej uan moauiskej? Amo. Sejse itatojtokakauj Cristo moneki kisentokas momachtis maski moauijya (xikonixtajtolti Colosenses 1:9, 10). Komo ijkon, ¿kanachi taixmatilis moneki se kipias achto ke se moauis?

8, 9. ¿Toni kipanok se tajpixkej ompa Filipos, uan toni techmachtia tein kipanok?

8 Tein kinpanok seki kalyetouanij akin nenkej itech yekinika siglo techpaleuis maj tiknankilikan nejin netajtanil (Hech. 16:25-33). Kemej itech xiuit 50, Pablo takalpanoj itech xolal Filipos keman ika ojpa tanojnotstinemik. Keman ompa yetoya, yejua uan Silas kintapantijkej, kinkitskijkej uan kintsakkej. Nejon youak chikauak talolinik uan tatapouik kampa tsaktoyaj. Kemej akin ompa tajpixtoya kinemilij ke akin tsaktoyaj cholojkaj, yaya momiktiti. Sayoj ke Pablo amo kikauak. Yejua uan Silas kimachtijkej tajpixkej uan ichankauan. Yejuan semi kipatiuitakej tein momachtijkej ika Jesús uan niman moauijkej. ¿Toni techmachtia nejin?

9 Tajpixkej xa achto katka se tateuijkej romano, uan amo kiixmatia iTajtol Dios. Yejua ika, komo kinekia mochiuas itatojtokakauj Cristo, monekia kiixmatis tamachtilis tein tayekantok itech iTajtol Dios, kiajsikamatis tein moneki kichiuas se itekitikauj Jiova uan kiixtalis kitakamatis itamachtilisuan Jesús. Tein momachtij itech amo miak tonalmej kiolinij maj kinekini moauis. Sayoj ke monekik kisentokas momachtis satepan ke moauij. Yejua ika, ¿toni uelis kichiuaskej tetatmej komo ininkonetsin kiniluia ke kineki moauis porin kitasojta Jiova uan kineki kitakamatis? Uelis kiluiskej maj iniuan tajto tayekananij uan ijkon yejuan uelis kiitaskej ox uelisya moauis. * Ijkon kemej okseki itatojtokakauan Cristo akin moauijkejya, konetsin kisentokas momachtis itanejnekilis Dios nochipaya (Rom. 11:33, 34).

¿TONI NEMACHTIL OKACHI KIPALEUIS NOKONETSIN?

10, 11. 1) ¿Toni kinemiliaj seki tetatmej? 2) ¿Toni okachi kipaleuis konetsin?

10 Seki tetatmej kinemiliaj ke achto ke moauis ininkonetsin, okachi kuali maj kiseli se ueyi nemachtil uan maj kipia se kuali tekit. Xa kinekij maj kuali moajsi satepan. Sayoj ke ¿ijkon kinpaleuiaj ininkoneuan maj yekmelauj yolpakikan? ¿Yejua nejon tein tamachtia Biblia? ¿Toni kineki Jiova maj tikchiuakan itech tonemilis? (Xikonixtajtolti Eclesiastés 12:1.)

11 Motelneki tikelnamikiskej ke nejin taltikpak uan nochi tein nikan moajsi kiixnamiki tein Jiova kineki uan kemej tanemilia (Sant. 4:7, 8; 1 Juan 2:15-17; 5:19). ¿Toni okachi kipaleuis konetsin maj kiixnamiki Satanás, nochi tein kiixyekana uan kemej tanemiliaj akin kinixyekana? Komo kuali mouika iuan Dios. Komo tetatmej kitayekanaltiaj motomintiskej, ininkonetsin xa kinemilis  ke tein onkak itech nejin taltikpak okachi tayekantok ke ikuali uikalis iuan Jiova. Tein melauj, nion se tokniuj tetat kineki maj tein onkak itech nejin taltikpak kinextili ikonetsin tein uelis kiyolpaktis. Sayoj uelis yekmelauj tiyolpakiskej komo tiktayekanaltiaj Jiova (xikonixtajtolti Salmo 1:2, 3).

¿UAN KOMO NOKONETSIN TAJTAKOUA?

12. ¿Keyej seki tetatmej kiniluianij ininkoneuan maj ayamo moauikan?

12 Se tokniuj temomaj kiluij isiuapil maj ayamo moaui. ¿Keyej? Yejua kijtoua: “Nipinaua nikijtos ke nikiluij nejon porin se tonal nosiuapil ueliskia kikalankixtiskej itech nechikol”. Ijkon kemej yejua, seki tetatmej kinemiliaj ke okachi kuali maj ininkonetsin ayamo moaui hasta maj pano xiujmej keman ayamo kuali taixpejpena (Gén. 8:21; Prov. 22:15). Xa kinemiliaj ke ininkonetsin amo uelis kikalankixtiskej itech nechikol komo ayamo moauia. Sayoj ke tein melauj mokajkayaujtokej. ¿Keyej? (Sant. 1:22.)

13. Komo aksa ayamo moauia, ¿kijtosneki ke amo tanankilis iixpan Jiova? Xikonmelaua.

13 Moajsikamati maj tetatmej kinekikan maj ininkonetsin motemakti iuan Jiova uan maj moaui keman yekyolmajsitosya. Sayoj ke, amo kuali yeskia maj kinemilikan ke amo monekis tanankilis iixpan Jiova porin ayamo moauia. Tein melauj, konetsin moneki tanankilis iixpan Dios keman peua kimati tein yejuatsin kiita ke kuali uan tein amo kuali (xikonixtajtolti Santiago 4:17). Yejua ika, tetatmej akin kinextiaj tamatilis amo kiluiaj maj ayamo moaui, ta mochikauaj kikauiliskej se kuali neskayot. Mochikauaj kimachtiskej keman nojnelok maj kipatiuita tein Jiova kijtoua ke kuali uan maj kitauelita tein yejuatsin kiita ke amo kuali (Luc. 6:40). Yejua nejon tein okachi kimatampauis, porin kipaleuis maj kineki kichiuas tein Jiova kijtoua ke melauak (Is. 35:8).

OKSEKIN UELIS TAPALEUISKEJ

14. ¿Keniuj tayekananij uelis kinpaleuiskej tetatmej?

14 Tayekananij itech nechikol uelis kinpaleuiskej tetatmej keman kijtoskej tein kuali tein kiualkui se kiixtalis okachi se kitekitilis Jiova. Se tokniuj siuat kielnamiki ke, keman kipiaya chikuasen xiuit, tokniuj Russell iuan tajtoj kemej kaxtol minuto ika tein kiixtalijtoya kichiuas itech itekiyo Jiova. Nejin tokniuj tekitik kemej precursora panoua setenta xiujmej. Nejin kinextia ke kuali tajtolmej uan yolchikaualis uelis kipaleuiskej aksa nochi inemilis (Prov. 25:11). Tayekananij no uelis kiniluiskej tetatmej uan ininkoneuan maj tapaleuikan ika seki tekimej itech Kali kampa tiMosentiliaj. Uelis kiniluiskej konemej maj kichiuakan seki taman tein uelis kichiuaskej.

15. ¿Keniuj okseki tokniuan uelis kinyolchikauaskej telpochmej?

15 ¿Keniuj uelis tapaleuiskej okseki tokniuan? Uelis kinextiskej ke ininka motekipachouaj telpochmej. Kemej neskayot, uelis kiitaskej tein kinextia ke mochikaujtok inintakuaujtamatilis. ¿Kitemakak se telpoch se kuali tanankilil itech nechikol? ¿Kipanoltij se tamachtilis itech nechikol tein tikpiaj itajkotian semana? ¿Kichiuak tein kuali keman ueliskia kichiuas tein  amo kuali? ¿Tanojnotsak kaltamachtiloyan? Komo ijkon, maj niman tikiluikan ke kuali tein kichiuak. Maj tikixtalikan titajtoskej iniuan telpochmej uan ichpochmej achto oso satepan ke mochiuas nechikolmej. Keman tikchiuaj nejin, tikinpaleuiaj maj kimachilikan ke pouij itech “ueyi nechikol” (Sal. 35:18).

XIKONPALEUI MOKONETSIN MAJ MOAUI

16, 17. 1) ¿Keyej motelneki maj konemej moauikan? 2) ¿Toni uelis kimachiliskej tokniuan tetatmej? (Xikonita taixkopin ipeujyan tamachtilis.)

16 Kinpaleuiskej konemej maj kitasojtakan Jiova yejua semej tekimej tein okachi moneki tein tokniuan tetatmej moneki kichiuaskej (Sal. 127:3; Efes. 6:4). Itech xolal Israel, keman konemej yoliaj pouiajya itech se xolal kampa ixyetoyaya kitekitiliskej Dios. Sayoj ke axkan amo ijkon panoua. Maski tetatmej kitasojtaskej Jiova uan tein melauak, amo kijtosneki ke konemej no ijkon kichiuaskej. Keman yoli ininkonetsin, tetatmej moneki kiixtaliskej kipaleuiskej maj mochiua itatojtokakauj Cristo, maj motemakti iuan Dios uan maj moaui. Yejua nejon tein okachi moneki. ¿Keyej? Porin komo motemaktia, moauia uan nochipa kitekitilia Dios kipaleuis maj makisa keman mochiuas okachi ueyi tajyouilis (Mat. 24:13).

Tetatmej moneki kiixtaliskej kinpaleuiskej ininkoneuan maj mochiuakan itatojtokakauan Cristo (xikonita párrafo 16 uan 17)

17 Keman tokniuj Blossom Brandt kiniluij itatuan ke kinekia moauis, yejuan kinekkej kiitaskej ke yekmelauj ueliaya kichiuas nejon. Keman kiitakej ke ueliaya, kipaleuijkej maj kichiua tein kiixtalijka. Yejua kijtoua tein ipopaj kichiuak se youak achto ke moauiskia: “Kichiuak maj tinochin timotankuaketsanij uan kichiuak se netataujtil. Kiluij Jiova ke semi yolpakia porin isiuapiltsin kiixtalijka kimaktilis inemilis”. Panoua sesenta xiujmej satepan, yejua kijtoua: “Amo keman nikelkauas nejon youak”. Tiknekij maj nochin tetatmej kimachilikan yolpakilis keman ininkoneuan motemaktiskej iuan Jiova uan moauiskej.

^ párr. 9 Tetatmej uelis kiitaskej iniuan ininkonetsin tamachtilis tein moajsi itech amatajkuilol Lo que los jóvenes preguntan. Respuestas prácticas (volumen 2), páginas 304 hasta 310. No uelis kiitaskej kampa kijtoua “Kampa monankilia netajtanilmej” itech amaix ITekiyo Dios tein Tikchiuaj, abril 2011, página 2.