Xionyoui kampa nesi tein kipia

Xionyoui kampa nesi tein kipia

Maj tipetanikan uan ijkon tikueyitaliskej Jiova

Maj tipetanikan uan ijkon tikueyitaliskej Jiova

“Xikintanextilikan nijin taltikpakuani ika namochipaukanemilis [...], ijkuakon yejuan no kimouistiliske Namoueyitajtsin.” (MAT. 5:16)

NEKUIKATILMEJ: 47, 9

1. ¿Toni se taman semi techyolpaktia?

SEMI techyolpaktia tikmatiskej ke okachi momiakiliaj akin kiueyichiuaj Jiova. Nejon kinextia ke itekitikauan Dios petanij. Itech xiuit tein tiualpanokej, tikpiakej panoua diez millones nemachtilmej ika Biblia. Uan no, tel miakej touan monechikojkej keman tikelnamikkej imikilis Cristo uan kiitakej ueyi netasojtalis tein Dios kinextij keman kitemakak iKonetsin maj techmakixti (1 Juan 4:9).

2, 3. 1) ¿Toni amo techtsakuilia maj tipetanikan? 2) ¿Toni tikitaskej itech nejin tamachtilis?

2 Itech ixolal Jiova, titajtouaj miak tataman tajtolmej. Sayoj ke nejon amo techtsakuilia maj tinochin tikueyichiuakan kemej yeskia tikalyetouanij (Apoc. 7:9). Tein yeski tajtol titajtoskej oso kampa yeski tinemiskej, ueli tipetanij itech taltikpak (Filip. 2:15).

3 Totanojnotsalis, tokuali uikalis uan kemej tiksentokaj titachixtokej tapaleuia maj tikueyitalikan Jiova. Itech nejin tamachtilis, tikitaskej keniuj uelis tipetaniskej itech nejin  eyi taman (xikonixtajtolti Mateo 5:14-16).

MAJ TIKINYOLEUAKAN OKSEKIN MAJ KIUEYICHIUAKAN JIOVA

4, 5. 1) ¿Keniuj amo sayoj ika tanojnotsalis uelis tipetaniskej? 2) ¿Keniuj tapaleuia komo tikualtakamej? (Xikonita taixkopin ipeujyan tamachtilis.)

4 Itech amaix Tanejmachtijkej itech tajtol inglés, tapoual 1 metsti junio xiuit 1925, itech tamachtilis “Luz en la oscuridad” moijtoj ke itech itamian tonalmej, amo akin ueliskia yeski melauak iixpan toTeko “komo amo kikaua maj itanex petani”. Uan no moijtoj: “Moneki kichiuas nejin keman kiteixmatiltis kuali tanauatilmej itech xolalmej itech taltikpak uan monejnemiltis kemej moixtalia itech itanauatiluan Jiova”. Moyekita ke se kiteixmatiltis iTekiuajyo Dios uan se kinpaleuis oksekin maj no kiueyichiuakan yejuatsin yejua se taman tein ika tipetanij (Mat. 28:19, 20). No tikueyitaliaj Jiova kemej timonejnemiltiaj. Taltikpakneminij kiitaj nejon keman titanojnotsaj. Keman tikinixuetskiliaj uan kuali tikintajpalouaj kichiua maj kuali techitakan uan maj kuali ika tajtokan Dios akin tiktekitiliaj.

5 Jesús kiniluij imomachtijkauan: “Kuak nankalakiske tech se kali, ijkuakon xikintajpalokan” (Mat. 10:12). Itech xolalmej kampa yejuan tanojnotsayaj, taltikpakneminij kinkalakiayaj kalijtik akin yayaj kinkalpanotij maski amo kinixmatiaj. Sayoj ke nejin xa amo mochiua kampa tejuan tinemij. Tein melauj, miakej mouij oso hasta kualanij keman aksa akin amo kiixmatij tanotsa ininchan. Sayoj ke, komo tikualtakamej uan kuali tikinnojnotsaj, xa moyolseuiskej. Akin tanojnotsaj kampa miakej panouaj xa kiitanij ke miakej kuali tanankiliaj keman kinixuetskiliaj uan kuali kintajpalouaj. Sekin hasta motokiaj, kikuij se amaix uan hasta iniuan tajtouaj.

6. ¿Keniuj seki namikuanij kisentokaj tanojnotsaj?

6 Seki namikuanij akin xiuejkejya akin nemij Inglaterra amo semi uelij tanojnotsaj kajkalpan porin mokokouaj. Yejua ika, peuak tanojnotsaj ininkalixpan. Itech se mesa kitaliaj miak tataman amaixmej itech hora keman tetatmej kinkuitij ininkoneuan itech se tamachtiloyan tein ompakauin moajsi. Kemej kinekij kimatiskej okachi, miakej kiuikaj ome amatajkuilolmej Los jóvenes preguntan uan no seki folletos. Se precursora peuak iniuan tanojnotsa nejin namikuanij. Tetatmej kiitakej ke yejua katka kualtakat uan ke namikuanij yekmelauj kinekiaj kinpaleuiskej. Semej tetatmej hasta peuak momachtia Biblia.

7. ¿Keniuj uelis tikinpaleuiskej akin motepalotikij itech toaltepeuj?

7 Itech xiujmej tein tiualpanouanij, itech miak altepemej ajsinij tel miakej akin ompa motepalotitij porin kampa kayomej kinteltajyouiltiayaj. ¿Keniuj uelis tikinpaleuiskej maj kiixmatikan Jiova? Yekinika, uelis timomachtiskej keniuj tikintajpaloskej itech inintajtol. Uelis techpaleuis aplicación JW Language. No uelis timomachtiskej seki tajtolmej tein uelis kichiuas maj kinekikan touan tajtoskej. Ompa, uelis tikinnextiliskej videos uan amaixmej itech inintajtol tein moajsi itech jw.org (Deut. 10:19).

8, 9. 1) ¿Keniuj techpaleuia nechikol tein tikpiaj itajkotian semana? 2) ¿Keniuj tetatmej uelis kinpaleuiskej ininkoneuan maj tanankilikan itech nechikolmej?

8 Jiova kichiuak maj tikpiakan nechikol  Tonemilis uan toTanojnotsalis porin techpaleuia maj okachi kuali titanojnotsakan. Tein ompa timomachtiaj techpaleuia maj okachi kuali timomachilikan keman oksepa titakalpanouaj uan keman titamachtiaj.

9 Miakej akin peua youij tonechikoluan semi kimoujkaitaj keniuj tanankiliaj konemej. Yejua ika, semi kuali maj tetatmej kinmachtikan ininkoneuan maj tanankilikan tein yejuan kiajsikamatij uan ijkon konemej no uelis petaniskej. Tanankililmej tein amo ouijkej tein se konetsin kitemaka ika nochi iyolo kemansa kichiua maj taltikpakneminij no kinekikan kiueyichiuaskej Jiova (1 Cor. 14:25).

MAJ OKACHI KUALI TIMOUIKAKAN

10. ¿Keniuj tapaleuia taueyichiualis kemej kalyetouanij maj nochin okachi kuali mouikakan?

10 Okse taman tein ika tipetaniskej yejua komo okachi kuali timouikaj kemej kalyetouanij uan itech nechikol. Kemej neskayot, moneki maj tetatmej nochipa kichiuakan taueyichiualis kemej kalyetouanij. Miakej kiitaj tamachtilis tein kisa mejmetstika itech JW Broadcasting uan satepan ika tajtouaj keniuj uelis kichiuaskej tein kiitakej. Tepopaj akin kiixyekana taueyichiualis kemej kalyetouanij moneki kielnamikis ke konemej uan telpochmej tataman tein uelis kinpaleuis. Yejua ika moneki kitemos tein kinpaleuis nochin kalyetouanij (Sal. 148:12, 13).

Semi techpaleuis komo timochiuaj tiinintasojikniuan tokniuan akin xiuejkejya (xikonita párrafo 11)

11-13. ¿Keniuj uelis titapaleuiskej maj okachi kuali timouikakan itech nechikol?

11 Tinochin, hasta telpochmej, uelis titapaleuiskej maj nochin itech nechikol kimachilikan ke kinpatiuitaj. Kemej neskayot, telpochmej uelis kiixtaliskej mochiuaskej inintasojikniuan tokniuan akin xiuejkejya. Uelis kiniluiskej maj kintapouikan tein kinpanouani itech nochi xiujmej tein kitekitilianij Jiova. Yejuan uan tokniuan akin xiuejkejya moyolchikauaskej. Uan no, tinochin uelis tikixtaliskej kuali tikinseliskej akin peuaj touan monechikouaj. Uelis tikinixuetskiliskej keman ajsiskej, tikinpaleuiskej maj kiajsikan kani motaliskej uan tikchiuaskej maj kinixmatikan okseki tokniuan. Ijkon okachi kuali momachiliskej.

12 Akin kiixyekanaj nechikolmej tein mochiuaj achto ke se tanojnotsatiuj  uelis tapaleuiskej maj tokniuan akin xiuejkejya kisentokakan petanikan. Yejua ika, moneki kiitaskej maj kipiakan kani uelis tanojnotsaskej kemej amo semi kinouijmakas. Kemansa, uelis kiluiskej aksa akin telpochok maj iniuan kisa uan maj kinpaleui. No moneki kinajsikamatiskej akin amo ueli semi tanojnotsaj porin mokokouaj oso kipanotokej okseki ouijkayomej. Komo kinajsikamatij, kinpaleuiskej nochin maj tanojnotsakan ika yolpakilis, yeskij telpochmej oso xiuejkejya, yankuikej oso uejkaujya tanojnotsaj (Lev. 19:32).

13 Akin kijkuiloj semej salmos, kijtoj: “¡Xikitakan! ¡Semi kuali uan semi teyolpaktij maj tokniuan kualtsin sennemikan!” (xikonixtajtolti Salmo 133:1, 2). Israelitas semi yolpakiaj kisenueyichiuaskej Jiova. Nejin tajkuilojkej kijtoj ke ininkuali uikalis tamatia kemej aceite tein kikuatekilijkej Aarón, tein ajuiyak katka uan teyolseuiaya. ¿Uelis tejuan tikixtaliskej titapaleuiskej itech nechikol uan okachi kuali timouikaskej iniuan tokniuan? Semi kuali komo tikchiujtokejya. Sayoj ke ¿uelis timochikauaskej okachi kuali tikinixmatiskej tokniuan? (2 Cor. 6:11-13.)

14. ¿Keniuj uelis tipetaniskej kampa tinemij?

14 ¿Uelis okachi timochikauaskej titapaleuiskej maj petani tein Biblia techmachtia kampa tinemij? Komo tikualtakamej iniuan akin ompakauin nemij, xa kinekiskej momachtiskej Biblia. Maj timotajtanikan: “¿Keniuj nechitaj akin nemij kampa ika ninemi? ¿Keniuj moajsi nochan uan nochi tein noaxka? ¿Kichiua maj kuali moita kampa ninemi? ¿Nikinpaleuia oksekin?”. Keman titajtoskej iniuan tokniuan, maj tikintajtanikan keniuj kemej monejnemiltiaj kinpaleuiani akin nemij kampa ika yejuan nemij, ininchankauan uan akin iniuan momachtiaj oso akin iniuan tekitij (Efes. 5:9).

MAJ TITACHIXTOKAN

15. ¿Keyej motelneki maj titachixtokan?

15 Komo tiknekij tiksentokaskej tipetaniskej, moneki amo tikelkauaskej itech katiyejua tonalmej tinemij. Jesús miakpa kiniluij imomachtijkauan: “Xitachixtokan” (Mat. 24:42; 25:13; 26:41). Sayoj ke, komo tiknemiliaj ke ayamo ejkos “kachi ueyi tajyouilis” uan ke amo tikitaskej keman mochiuas, amo tiktemoskej titanojnotsaskej nochipa keman uelis (Mat. 24:21). Tanex tein ika tipetanij amo chikauak yeskiok uan hasta uelis seuis.

16, 17. ¿Toni techpaleuis maj titachixtokan?

16 Ijkon kemej okachi onkas ouijkayomej, monekis okachiok titachixtoskej. Senkis tikmatij ke Dios kiixpolos nochi tein amo kuali itech tonal tein kiixtalijya (Mat. 24:42-44). Sayoj ke hasta maj ejko nejon tonal, moneki timochiaskej uan nochipa titachixtoskej. Maj mojmostaj tikixtajtoltikan Biblia uan maj nochipa tikchiuakan netataujtil (1 Ped. 4:7). Maj tikitakan ininkuali neskayo tokniuan akin tachixtokej uan petanij. Uelis tiktemoskej itech toamaixuan tein techtapouianij seki tokniuan.

17 Maj nochipa tikchiujtokan itekiyo Jiova, maj tikinpaleuikan oksekin uan maj tiktemokan iniuan tiyetoskej tokniuan. Ijkon okachi tiyolpakiskej uan amo tikmachiliskej ke tel yolik panouaj tonalmej (Efes. 5:16). Itech cien xiujmej tein tiualpanouanij, tokniuan kichiujkej miak tekit. Sayoj ke axkan, tein Jiova kiixtaliani techpaleuia maj tikchiuakan okachi miak tekit. Okachi tipetanij kemej amo keman tiknemiliskiaj.

Keman techyolchikauaj tayekananij ueli tikseliaj inepaleuil itamatilis Dios (xikonita párrafo 18 uan 19)

18, 19. ¿Keniuj tayekananij uelis techpaleuiskej maj titachixtokan uan maj tiksentokakan tiktekitilikan Jiova? Xikonijto se neskayot.

 18 Maski miakpa timopolouaj, Jiova techkaua maj tiksentokakan tiktekitilikan. Yejuatsin techpaleuia inintechkopa tayekananij itech nechikol (xikonixtajtolti Efesios 4:11, 12). Yejua ika, keman se tayekankej techkalpanos, maj tikakikan nochi kuali tayolmajxitilis tein techmakas.

19 Itech ueyi altepet Inglaterra, seki namikuanij akin kipiayaj seki kuejmolmej kiniluijkej ome tayekananij maj kinpaleuikan. Tokniuj siuat kiniluij ke inamik amo kinpaleuiaya maj kiueyichiuakan Jiova. Uan tokniuj takat kijtoj ke kimachiliaya ke amo kuali tamachtiaya uan kiniluij ke amo nochipa kichiuaya taueyichiualis kemej kalyetouanij. Tayekananij ika tajtojkej keniuj Jesús kinyekpiaya imomachtijkauan uan nochipa kiitaya tein kinpolouaya. Tokniuj takat kiyolmajxitijkej maj kichiua kemej Jesús uan tokniuj siuat kiyolmajxitijkej maj amo yolijsiui. No kinyolmajxitijkej keniuj ueliskiaj kichiuaskej inintaueyichiualis kemej kalyetouanij iniuan ininome koneuan (Efes. 5:21-29). Tokniuj takat mochikauak okachi kuali kinixyekanas ichankauan. Tayekananij kiyolchikaujkej maj amo mosenkauani uan maj takuaujtamatini ke yektikatsin espíritu kipaleuiskia. Ininnetasojtalis uan ininnepaleuil nejin tayekananij yekmelauj kinpaleuij nejin kalyetouanij.

20. ¿Toni tein kuali panos komo tipetanij?

20 Salmo 128:1 kijtoua: “Yolpaki nochi akin kimoujkaita Jiova, akin nemi itech iojuan”. Itech nejin tamachtilis tikitakej miak taman kemej uelis tipetaniskej: keman tikinyoleuaskej oksekin maj no kitekitilikan Dios, keman titapaleuiskej maj okachi kuali timouikakan uan keman titachixtoskej. Komo ijkon tikchiuaj, okachi tiyolpakiskej, oksekin kiitaskej tein kuali tein tikchiuaj uan miakej no kinekiskej kiueyichiuaskej toTajtsin, Jiova (Mat. 5:16).