Xionyoui kampa nesi tein kipia

Xionyoui kampa nesi tein kipia

Maj tikmachtikan totanemilil ika itanauatiluan uan itamachtilisuan Dios

Maj tikmachtikan totanemilil ika itanauatiluan uan itamachtilisuan Dios

“Semi itech nitanemilia motanauatiluan.” (SAL. 119:99)

NEKUIKATILMEJ: 29, 11

1. ¿Toni techmakak Dios tein amo kinmakak tapialmej?

JIOVA techmakak se taman tein kitelpia ipatiuj: totanemilil. Nejin se taman tein amo kinmakak tapialmej. Adán uan Eva kipiayaj inintanemilil. ¿Keniuj tikmatij? Porin satepan ke amo kitakamatkej Dios, motatijkej. Nejin kinextia ke inintanemilil kinkuejmolouaya.

2. ¿Keniuj totanemilil tamati kemej tein ika kinejnemiltiaj se barco? (Xikonita taixkopin ipeujyan tamachtilis.)

2 Totanemilil se taman tein totech moajsi tein techmatiltia toni kuali uan toni amo kuali uan techpaleuia maj tikmatikan toni tikchiuaskej. Uelis tikijtoskej ke tamati kemej tein ika kinejnemiltiaj se barco. Komo amo kualtia, ejekat uan at uelis kiuikaskej barco oksekopa. Sayoj ke komo kuali tekiti kipaleuis akin kinejnemiltia maj kiuika kampa ika moneki. No ijkon, komo kuali tikmachtiaj totanemilil uelis kuali techyekanas.

3. ¿Toni uelis panos komo amo kuali tikmachtiaj totanemilil?

3 Komo amo kuali tikmachtiaj totanemilil amo techmatiltis ke teisa amo kuali yetok uan ke moneki amo tikchiuaskej (1 Tim. 4:1, 2). Hasta uelis kichiuas maj tiknemilikan ke kuali  yetok tein amo kuali (Is. 5:20). Jesús kiniluij imomachtijkauan: “Ejkos in tonal kuak [...] nekes ten namechmiktiske, yejuan nojonkes kiyolnemiliske ke xa kachi kiyolpaktiaj in Totajtsin Dios” (Juan 16:2). Yejua nejon tein kinemilijkej akin kimiktijkej Esteban (Hech. 6:8, 12; 7:54-60). Itech xiujmej tein panouanij, miakej akin tel taneltokaj kichiuanij tein tel amo kuali, kemej temiktiskej, uan kijtouanij ke ijkon kiyolpaktiaj Dios. Sayoj ke tein melauj, kitapanauilijtoyaj itanauatiluan (Éx. 20:13). Senkis nesi ke inintanemilil kinkajkayaujtoya.

4. ¿Toni uelis techpaleuis maj totanemilil amo techkajkayaua?

4 ¿Toni uelis techpaleuis maj totanemilil amo techkajkayaua? Tanauatilmej uan tamachtilismej tein moajsij itech iTajtol Dios tapaleuiaj “para ika se tamachtijtinemis uan no para ika se kintaneltoktijtinemis in tagayot ma kikautiyakan nintajtakoluan. Uan [...] para ika kinyolmelautiyas uan para ika se kinmachtijtiyas in taneltokani de keniu chipaukanemiske” (2 Tim. 3:16). Yejua ika, moneki nochipa tikixtajtoltiskej Biblia, itech titanemiliskej ika nejmachkayot uan tikchiuaskej tein timomachtiaj. Ijkon, okachi uelis titanemiliskej kemej Jiova uan kuali techyekanas totanemilil. Yejua ika, maj tikitakan keniuj itanauatiluan uan itamachtilisuan Dios techpaleuiaj maj tikmachtikan totanemilil.

MAJ TIKMACHTIKAN TOTANEMILIL IKA ITANAUATILUAN DIOS

5, 6. ¿Keniuj techpaleuia tiktakamatiskej itanauatiluan Dios?

5 Komo tiknekij maj itanauatiluan Dios techpaleuikan, amo sayoj moneki tikinixtajtoltiskej oso tikinixmatiskej, ta moneki tikinpatiuitaskej uan tikintakamatiskej. ITajtol Dios kijtoua: “Xiktauelitakan tein amo kuali uan xiktasojtakan tein kuali” (Amós 5:15). Uelis tikchiuaskej nejon komo tikitaj teisa kemej Jiova kiita. Maj tiknemilikan ke miak tonalmejya amo tiyekkochinij. Tapajtijkej techiluia maj amo tikuakan seki taman, maj tikchiuakan ejercicio uan maj tikpatakan seki taman tein tikchiuaj. Komo tikitaj ke nejon techpaleuia, ¿melauj ke semi timotasojkamatiskej iuan uan tikpatiuitaskej tein techyolmajxitia?

6 No ijkon, toTachijchiujkauj techmakak tanauatilmej tein techpaleuiaj maj amo tikijyouikan tein amo kuali tein kiualkui tajtakol uan maj okachi kuali tinemikan. Kemej neskayot, Biblia kijtoua ke moneki amo titakajkayauaskej, amo titachtekiskej, amo tiauilnemiskej, amo titateuiskej uan amo tiknekiskej tikmatiskej tein kichiuaj amokuali ejekamej (xikonixtajtolti Proverbios 6:16-19; Apoc. 21:8). Keman tikitaj keniuj semi techpaleuia tiktakamatiskej Jiova, okachi tiktasojtaj uan okachi tikpatiuitaj itanauatiluan.

7. ¿Keniuj techpaleuia tikixtajtoltiskej tein kinpanok sekin akin Biblia ininka tajtoua?

7 Amo moneki tikpanoskej tajyouilis tein kiualkui amo se kitakamatis Dios uan ijkon tikmatiskej toni kuali uan toni amo kuali. Uelis tikmatiskej komo tikixtajtoltiaj itech Biblia ininnepololuan oksekin uan komo itech titanemiliaj. Proverbios 1:5 kijtoua: “Tamatkej takaki uan kiselia okachi tamachtilis”. Nejin tamachtilis kitemaka Dios, uan yejua tein okachi kuali tein moajsi. Kemej neskayot, maj tiknemilikan keniuj David tel tajyouij keman amo kitakamatik Dios uan auilnemik iuan Bat-seba (2 Sam. 12:7-14). Keman tikixtajtoltiskej nejin tajkuilol, uelis timotajtaniskej: “¿Toni kipaleuiskia David maj amo tajyoui? Komo no  ijkon nechpanoskia, ¿toni nikchiuaskia? ¿Nicholoskia kemej kichiuak José, oso nitajtakoskia, kemej David?” (Gén. 39:11-15). Komo tiknemiliaj tein uelis panos komo titajtakouaj, okachi tiktauelitaskej tein amo kuali.

8, 9. 1) ¿Keniuj techpaleuia totanemilil? 2) ¿Keniuj itamachtilisuan Dios kipaleuiaj totanemilil?

8 Xa tinochin tikixtopeuaj tein Dios kitauelita. Sayoj ke, onkak seki taman tein moneki tikixpejpenaskej tein itech Biblia amo moajsi se tanauatil. Keman panoua nejon, ¿keniuj tikmatij tein Jiova kineki maj tikchiuakan? Komo kuali tikmachtiaj totanemilil ika tein kijtoua Biblia, kuali titaixpejpenaskej.

9 Kemej Jiova techtasojta, techmakak tamachtilismej tein kiyekanaj totanemilil. Yejuatsin kijtoua: “Nejua, Jiova, nimoDios, Akin mitsmachtia tein tejua mitspaleuis, Akin mitsixyekana itech ojti kampa moneki tinejnemis” (Is. 48:17, 18). Keman itech titanemiliaj tamachtilismej tein moajsij itech Biblia uan timokauaj maj techpaleui, tikyektaliaj totanemilil. Nejin techpaleuia maj kuali titaixpejpenakan.

MAJ TIKMACHTIKAN TOTANEMILIL IKA ITAMACHTILISUAN DIOS

10. 1) ¿Keniuj techpaleuiaj tamachtilismej tein moajsij itech Biblia? 2) ¿Keniuj kitekitiltij Jesús tamachtilismej?

10 Tamachtilismej tein moajsij itech Biblia techpaleuiaj maj kuali titaixpejpenakan. Komo tikinixmatij, techpaleuiskej maj tikajsikamatikan keniuj tanemilia Jiova uan keyej kiixtalij seki tanauatilmej. Jesús kitekitiltij tamachtilismej keman kinmachtij itatojtokakauan tein panoskia komo kinemiliayaj oso kichiuayaj seki taman. Kemej neskayot, kiniluij ke kualanyot kichiua maj se tateui uan ke amo kuali tanemililmej teuikaj maj se auilnemi (Mat. 5:21, 22, 27, 28). Komo timoyekanaj ika itamachtilisuan Dios, kuali tikmachtijtoskej totanemilil uan titaixpejpenaskej kemej tikueyitaliskej Dios (1 Cor. 10:31).

Tokniuan akin yekyolmajsitokej amo kichiuaj maj oksekin kinkuejmolo inintanemilil (xikonita párrafo 11 uan 12)

11. ¿Keniuj tataman titanemiliaj?

11 ¿Kijtosneki ke tinochin tikixpejpenaskej sayoj se taman? Amo. Xa ome tokniuan akin kimachtianij inintanemilil ika Biblia tataman tein kiixpejpenaskej itech seki taman. Se neskayot yejua keman tikixejekouaj ox titayiskej tayil tein teuintij. Itech Biblia amo moijtoua ke amo kuali yetok maj se tayi tayil tein teuintij, sayoj ke kemaj kijtoua ke moneki amo titeltayiskej nion titauanaskej (Prov. 20:1; 1 Tim. 3:8). Sayoj ke, keman tikixejekoskej ox titayiskej, ¿sayoj moneki itech titanemiliskej amo titeltayiskej? Amo. Maski tejuan totanemilil amo techkuejmoloua, moneki tikitaskej maj oksekin amo kinkuejmolo inintanemilil.

12. ¿Keniuj moneki techpaleuis tein kijtoua Romanos 14:21?

12 Pablo tamachtij ke moneki amo tikchiuaskej maj oksekin kinkuejmolo inintanemilil. Yejua kijtoj: “Kachi kuali [...] ma amo tikuajtinemijkan nakat uan nion no ma titayitinemikan vino. Uan nion no ma tikchiutinemikan oksekin taman ok chiualis tenika uelis tikinuetsiltiaj tech in tajtakol in tokniuan” (Rom. 14:21). Komo se tokniuj amo tayi tayil tein teuintij porin kikuejmoloua itanemilil, amo titayiskej maski totanemilil amo techkuejmoloua porin amo tiknekij maj amo kuali momachili. Moajsij tokniuan akin achto ke mochiuaskiaj itaixpantijkauan Jiova tel tauanayaj, sayoj ke axkan senkis kiixtalijkej amo tayiskej nion tepitsin. Amo tiknekij tikchiuaskej maj oksepa peuakan tayikan uan maj tajyouikan (1 Cor. 6:9, 10). Yejua ika, komo tiknekij tikmakaskej se tokniuj  tayil tein teuintij uan kijtoua ke amo kineki, amo tiknextiliskiaj netasojtalis komo tikteliluiskiaj maj tayi.

13. ¿Toni kichiuak Timoteo tein ika kinpaleuij oksekin maj kikakinij kuali tanauatilmej?

13 Keman Timoteo kipiaya kemej 20 xiujmej, mokauak maj kineskayotianij itech inakayo maski semi kikokoskia porin amo kinekia kinyolxokolis judíos akin yaya kinnojnotsati. Yejua kimatia ke yejuan kiitayaj ke takamej motelnekia moneskayotiskej itech ininnakayo. Ijkon, kichiuak kemej tatitanil Pablo (Hech. 16:3; 1 Cor. 9:19-23). ¿Uan tejuan? ¿No timotemakaj tikauaskej seki taman porin tiknekij tikinpaleuiskej oksekin?

MAJ TIYEKYOLMAJSITOKAN

14, 15. 1) ¿Toni techpaleuis maj tiyekyolmajsitokan? 2) ¿Keniuj tokniuan akin yekyolmajsitokej kinitaj oksekin?

14 Tinochin moneki tiknekiskej tikauaskej “ne tamachtilis de keniu yekinika tikalakke tech in tamachtilis de Cristo. Uan [...] timochiuaske tiyekyolmajsini” (Heb. 6:1). Sayoj ke amo timochiuaj tiyekyolmajsitokej sayoj porin miak xiujmejya tiktekitilianij Jiova, ta moneki tiksentokaskej timochikauaskej. Moneki tikpiaskej okachi taixmatilis uan taajsikamatilis. Yejua ika moneki mojmostaj tikixtajtoltiskej Biblia (Sal. 1:1-3). Ijkon, okachi kuali tikajsikamatiskej itanauatiluan uan itamachtilisuan Dios.

15 ¿Katiyejua tanauatil tein okachi moneki tikchiuaskej tiitekitikauan Dios? Timotasojtaskej. Jesús kiniluij imomachtijkauan: “Komo namejuan nanmoyoltasojtatinemij, ijkuakon nochi in taltikpakuani kajsikamatiske ke melau nannomomachtijkauan” (Juan 13:35). Netasojtalis no moixmati kemej “melauak tanauatil” (Sant. 2:8). Uan Pablo kijtoj: “Kuak titetasojtatinemij, ijkuakon tejuan tikajsikatakamatinemiske ya nochi in tanauatil de Dios” (Rom. 13:10). Taixejekol maj itech Biblia moijto ke motelneki titetasojtaskej, “porin to Dios Yejuatsin tetasojtatinemi” (1 Juan 4:8). Jiova kiita ke netasojtalis amo sayoj se kimachilia, ta se kinextia ika tein se kichiua. Juan kijkuiloj: “Dios technextilij ya ne itetasojtalistsin ijkuin: Dios techualtitanilij ya ne iyojtsin Konetsin nikan taltikpak para maj tejuan tikpiakan ne nachipa nemilis ika ne chikaualis de Cristo” (1 Juan 4:9). Yejua ika, keman tiknextiaj ke tiktasojtaj Jiova uan iKonetsin, tokniuan uan okseki  taltikpakneminij, tiknextiaj ke tiyekyolmajsitokej (Mat. 22:37-39).

Okachi kuali techixyekanas totanemilil komo itech titanemiliaj itamachtilisuan Dios (xikonita párrafo 16)

16. ¿Keyej okachi tikpatiuitaj itamachtilisuan Dios keman timochiuaj okachi tiyekyolmajsitokej?

16 Miakpa, tanauatilmej ixyetokya kemanian se kitekitiltis, sayoj ke itamachtilisuan Dios tapaleuiaj itech tein yeski taman. Yejua ika, ijkon kemej timochiuaj okachi tiyekyolmajsitokej, okachi tikpatiuitaj itamachtilisuan Dios. Kemej neskayot, konemej amo kiajsikamatij ke kinpiaskej amo kuali tasojiknimej uelis kinualkuilis kuejmolmej, yejua ika inintatuan moneki kinmakaskej tanauatilmej tein ika kinyekpiaskej (1 Cor. 15:33). Sayoj ke, ijkon kemej mochiuaj okachi yekyolmajsitokej, yolik peuaj tanemiliaj itech itamachtilisuan Dios uan kinixpejpenaj kuali tasojiknimej (xikonixtajtolti 1 Corintios 13:11; 14:20). No ijkon, keman itech titanemiliaj itamachtilisuan Dios, okachi titanemiliaj kemej yejuatsin uan totanemilil uelis okachi kuali techixyekanas.

17. ¿Keyej ueli tikijtouaj ke tikpiaj tein moneki tein techpaleuia maj kuali titaixpejpenakan?

17 Tikpiaj nochi tein techpaleuis maj titaixpejpenakan kemej tikyolpaktiskej Jiova. Itech Biblia moajsij tanauatilmej uan tamachtilismej tein kipaleuia akin kichiua kemej Cristo maj “mochiuaki yek yolmajsitok uan no mochiuaki kuali kuatamatok, uan ijkon uelis kichiutiyas miak tataman den kuali tekit” (2 Tim. 3:16, 17). Sayoj ke, komo tiknekij tikajsikamatiskej katiyejua itanejnekilis Jiova, moneki timochikauaskej (Efes. 5:17TNM). Moneki kuali tiktekitiltiskej nepaleuilmej tein tikpiaj, kemej Nepaleuil tein ika momachtiaj itaixpantijkauan Jiova, Watchtower Library, BIBLIOTECA ITECH TEPOS Watchtower uan JW Library. Nochi nejin techpaleuis maj okachi kuali timomachtikan toselti uan iniuan tochankauan.

TIKMACHTISKEJ TOTANEMILIL IKA BIBLIA KIUALKUI NEPALEUILMEJ

18. ¿Keniuj techpaleuia komo tiktakamatij itanauatiluan uan itamachtilisuan Dios?

18 Semi techpaleuis komo tiktakamatij itanauatiluan uan itamachtilisuan Jiova. Salmo 119:97-100 kijtoua: “¡Nikteltasojta motanauatil! Nochi tonal nimomachtia. Motanauatil kichiua maj okachi nikpia tamatilis ke akin nechtauelitaj, porin nochipa yeski noaxka. Okachi nikpia taajsikamatilis ke nochin notamachtijkauan, porin semi itech nitanemilia motanauatiluan. Nimonejnemiltia ika okachi taajsikamatilis ke takamej akin xiuejkejya, porin niktakamati motanauatiluan”. Komo ika nejmachkayot titanemiliaj itech itanauatiluan uan itamachtilisuan Dios tikpiaskej okachi tamatilis uan taajsikamatilis. Uan komo timochikauaj ika tikmachtiskej totanemilil, uelis “timoyolyekmajxititij uan tikyekmatitiue ya in chipaukanemilis de Cristo” (Efes. 4:13).