DON, se itaixpantijkauj Jiova kayot Canadá, mochikaua kinnojnotsas akin nemij itech ojti porin amo kipiaj ininchan. Yejua kijtoj tein kipanok iuan Peter, semej nejon taltikpakneminij: “Amo keman nikitstoya se takat akin nemi itech ojti maj tel amo mochipaua. Tauijuikaltiaya uan nochipa kimatia keniuj kichiuas maj oksekin amo iuan motokianij. Miakpa kinixtopeuak akin kinekiaj kipaleuiskej”. Maski ijkon, itech panoua catorce xiujmej, Don mochikauak yeski kualtakat iuan.

Se tonal, Peter kitajtanij Don: “¿Keyej noka tionmoteltekipachoua? Amo akin nechtemoua. ¿Keyej tejuatsin kemaj?”. Don kuali kinemilij keniuj kinankilis ika eyi tajkuilolmej itech Biblia tein kitelpaleuiskiaj. Yekinika, kitajtanij ox kimatia ke Dios kipia itokay uan kiluij maj kiixtajtoltiani itech Biblia Salmo 83:18. Satepan, kemej kinekia kinextilis keyej tel ika motekipachouaya, kiluij maj kiixtajtoltiani Romanos 10:13, 14, kampa momelaua ke nochin akin kijtouaj itokay Jiova makisaskej. Ompa, Don kiixtajtoltij Mateo 9:36, kampa kijtoua: “Kuak Jesús kinitak in uel miak tagayot, ijkuakon Yejuatsin semi kinyoliknelij porin in tagayot tajyouijtoyaj uan tayokoyayaj keme ichkame ten kuamoyautokke uan keme ne ichkame ten amo kipiaj in tapixke”. Satepan, kiluij Peter maj yejua kiixtajtoltiani. Keman kiixtajtoltij, Peter chokak uan kitajtanij: “¿Nejua semej nejon ichkamej?”.

Peter peuak mopata. Mopakak, motekilij ikantson uan motalilij tilmaj tein Don kimakaka. Satepan Peter nochipa kitemoj kuali moitas.

Peter mojmostaj kijkuilouaya tein kipanouaya. Tein achto kijkuilouaya katka sayoj tein amo kuali uan tein tetayokoltij, sayoj ke tein kijkuiloj satepan semi taman katka. Semej nejon amamej kijtouaya: “Axkan nikixmatik itokay Dios. Axkan, keman nimotataujtia, ueli niknojnotsa Jiova. Tel kualtsin se kiixmatis itokay. Don kijtoua ke Jiova  uelis yeski notasojikniuj, akin nochipa nechkakis, keman yeski oso tein yeski nikiluis”.

Tepitsin achto ke momikiliskia, kinijkuilouilij iikniuan:

“Axkan amo kuali nimomachilia. Niknemilia ke kemej nixiuejya amo nitaxikouaok. Sayoj ke, hasta komo sayoj nejin tonal ninemi, nikmati ke oksepa nikitas notasojikniuj [Don] itech Xochital. Komo nankiixtajtoltijtokej nejin amat, kijtosneki ke amo niyetokok namouan. Sayoj ke komo itech tonal keman nechpachoskej nankiitaj se takat akin amo nankiixmatij, iuan xitajtokan, uan ika kualtakayot, xikixtajtoltikan nejin amatajkuiloltsin azul. * Kijtoua ke oksepa nikitas notasojikniuj itech Xochital. Nikneltoka ika nochi noyolo. Nanmokniuj akin namechtasojta, Peter”.

Satepan ke kipachojkej, Ummi, se siuat akin iikniuj Peter, kijtoj: “Peter nouan tajtoj kemej ome xiuitya. Uejkaujya amo nikitstoya maj yolpaki. Uan hasta ixuetskaya”. Ummi kiluij Don: “Nikixtajtoltiti nejin amatajkuilol porin tein yeski taman tein kipaleuij nokniuj kitelpia ipatiuj”. No kinekik maj se tokniuj siuat kimachtiani ika amatajkuilol ¿Toni yekmelauj tamachtia Biblia?

Tejuan no moneki amo sayoj tikitaskej tein moita tapani, ta moneki tiknextiskej yekmelauj netasojtalis uan tiyeskij tiyolnejmachmej iniuan nochi tataman taltikpakneminij (1 Tim. 2:3, 4). Komo ijkon tikchiuaj, tamachtilis tein melauak xa ajsis itech ininyolo akin, ijkon kemej Peter, xa amo kualtsin moitaj, sayoj ke kinekij kiixmatiskej Jiova. Tikyekmatij ke Dios, akin “kiita se iyolo”, kichiuas maj tein melauak ajsi itech ininyolo akin kinekij iuan motokiskej (1 Sam. 16:7; Juan 6:44).