1. ¿Keyej Jiova okachi kuali Sokikonchiujkej?

ITECH METSTI NOVIEMBRE XIUIT 2010, aksa kiixtauaya ajsitoyaya 70 millones dólares se komit tein uejkauj kayot tein kichijchiujkej China uan kinamakatoyaj Inglaterra. Se kimoujkaita keniuj se sokikonchiujkej ueli kikui teisa tein onkak kampa yeski uan amo patiyoj kemej sokit uan ika kichijchiua se taman tein tel kualtsin uan tein patiyoj. Jiova tamati kemej se sokikonchiujkej. Sayoj ke yejuatsin okachi kuali Sokikonchiujkej, kimati okachi miak taman ke se sokikonchiujkej nikan taltikpak. Biblia kijtoua ke Jiova kichijchiuak ika “talnex”, oso sokit, se takat akin amo kipiaya tajtakol, uan kitokaytij Adán (Gén. 2:7). Nejon takat “katka ikoneu de Dios” uan yejuatsin kichijchiuak kemej ueliskia kinextis ikualneskayouan (Luc. 3:38).

2, 3. ¿Keniuj uelis tikchiuaskej kemej israelitas akin moyolnonotskej?

² Keman Adán amo kitakamatik iTachijchiujkauj, yejuatsin amo kiitakok kemej ikonetsin. Sayoj ke miakej akin itech ualeujkej kiixtalijkej kikauaskej maj Jiova kinixyekana (Heb. 12:1). Yejuan ika yolyemanilis kitakamatkej Akin kinchijchiuak.  Ijkon kiixtopeujkej Satanás uan kinextijkej ke kinekiaj maj Jiova mochiuani ininTajtsin uan Sokikonchiujkej akin kinpaleuia (Juan 8:44). Nejon tein kichiujkej techelnamiktia tein israelitas akin moyolnonotskej kijtojkej se tonal: “Jiova, tejua titoTajtsin. Tejuan tisokimej uan tejua tiSokikonchiujkej; tinochin titechchijchiua ika momay” (Is. 64:8) (xikonita kampa kijtoua “Tein okachi momelaua”).

³ Itech nejin tonalmej, akin yekmelauj tiitekitikauan Dios timochikauaj no ijkon tikchiuaskej uan tiktakamatiskej ika yolyemanilis Akin techchijchiuak. Tejuan tikitaj ke se ueyi tatiochiualis tikijtoskej ke Jiova toTajtsin. Tiknekij maj yejuatsin mochiua Sokikonchiujkej akin techpaleuia. Yejua ika moneki timotajtaniskej: “¿Nimochiua kemej sokit tein amo ouij se kitekitiltia tein Dios uelis ika kichijchiuas se komit tein tel patiyoj? ¿Nikinita nokniuan kemej yeskia sokit tein Jiova kitekitiltijtokok?”. Itech nejin tamachtilis tikitaskej eyi taman tein techpaleuis maj tikpiakan se kuali tanemilil. Yekinika, keniuj Jiova kinixpejpena akin kinpaleuis maj mopatakan. Ojpatika, keyej kinpaleuia maj mopatakan. Uan expatika, keniuj kinpaleuia maj motapakan.

4. ¿Keniuj kinixpejpena Jiova akin kineki maj kiixmatikan? Xikonijto se neskayot.

⁴ Jiova amo kinita taltikpakneminij kemej tejuan tikinitaj. Yejuatsin kiita iyolo sejse taltikpaknenkej uan kiita keniuj yekmelauj tamati (xikonixtajtolti 1 Samuel 16:7b). Se taman tein kinextia nejin yejua keman kipeualtij nechikol kampa kichiuaj kemej Cristo. Yejuatsin kichiuak maj tel miakej akin amo kinpoujkaitayaj kiixmatinij yejuatsin uan no iKonetsin (Juan 6:44). Semej nejin taltikpakneminij katka se fariseo akin motokaytiaya Saulo. Yejua semi moueyinekia uan tateuiaya, kintajyouiltiaya tokniuan uan kintakajkayauiliaya (1 Tim. 1:13). Sayoj ke Jiova kiitak iyolo uan kiitak ke Saulo amo katka kemej sokit tein amo kualtiaya (Prov. 17:3). Kiitak ke Saulo katka kemej sokit tein ika ueliskia kichijchiuas se kualtsin tapalkat “para yas kinnojnotstinemitiu [...] pueblojme ten amo pouij judíos [...,] uejueyi chiuanime uan no inixpan in pueblojuani de Israel” (Hech. 9:15). Jiova no kinixpejpenak okseki taltikpakneminij uan kinpaleuij maj mopatanij uan maj mochiuanij kemej yeskia se tapalkat tein “semi kualtsin tachijchiu uan takualnextil”. Sekin tachtekiaj, tauanayaj uan auilnemiaj (Rom. 9:21; 1 Cor. 6:9-11). Sayoj ke keman kiixmatkej Dios, kichikaujtiyajkej inintakuaujtamatilis uan mokaujkej maj yejuatsin kinpaleuiani maj mopatanij.

5, 6. Komo titakuaujtamatij ke Jiova yejua Sokikonchiujkej akin techpaleuia, ¿keniuj tikinitaskej 1) taltikpakneminij itech tanojnotsalis? 2) tokniuan itech nechikol?

⁵ Kemej titakuaujtamatij ke Jiova ueli kiita ininyolo taltikpakneminij uan kinpaleuia maj pouikan itech inechikol akin yejuatsin kinixpejpena, amo tiknemiliaj ke tokniuan uan akin tikinnojnotsaj amo keman mopataskej. Maj tikitakan tein panok iuan Michael.  Yejua kijtoua: “Keman itaixpantijkauan Jiova nechkalpanouayaj, nitatsakuaya uan nikchiuaya kemej yeskia amo akin tanotsaya. Tel amo nikintakachiuaya. Satepan nikinixmatik okseko seki kalyetouanij akin nikinpoujkaitak porin kuali monejnemiltiayaj. Se tonal nikmatik ke katkaj itaixpantijkauan Jiova. Amo nikmatik toni nikijtos. Kemej yejuan kuali monejnemiltiayaj kichiuak maj nimotajtani keyej amo nikinyekitaya. Niman nikajsikamatik ke ijkon nitanemiliaya porin amo nikinixmatia uan miak taman nitekakiliaya”. Michael kinekik okachi kinixmatis itaixpantijkauan Jiova, yejua ika kinekik maj kimachtikan ika Biblia. Satepan moauij uan peuak kichiua tekit kemej precursor.

⁶ Komo titakuaujtamatij ke Jiova yejua Sokikonchiujkej akin techpaleuia, okachi kuali tikinitaskej tokniuan itech nechikol. Tikinitaskej kemej yeskia sokit tein Jiova kitekitiltijtokok. Ijkon kinita Jiova. Yejuatsin kiita ininyolo uan kimati ke amo nochipa yeskij tajtakouanij. Uan no, kimati toni uelis kichiuaskej satepan (Sal. 130:3). ¿Keniuj uelis tikchiuaskej kemej Jiova? Komo tikinitaj tokniuan ika se kuali tanemilil. Hasta uelis titekitiskej iuan Dios uan tikinpaleuiskej tokniuan maj kisentokakan mopatakan (1 Tes. 5:14, 15). Tayekananij itech nechikol yejuan akin yekinika moneki kichiuaskej nejin (Efes. 4:8, 11-13).

7. ¿Keyej moneki tiktasojkamatiskej maj Jiova techmelaua?

⁷ Sekin kijtouaj ke keman se kipia se ikoneuan ijkuak yekmelauj se kitasojkamati maj se itatuan temelauanij. Keman tiuejueyiaj okachi tiktasojkamatij nejin porin tikajsikamatij ke totatuan techmelaujkej porin techtasojtaj (xikonixtajtolti Hebreos 12:5, 6, 11). Jiova techtasojta porin tiikoneuan. Yejua ika techmelaua uan ika nejmachkayot techpaleuia maj timopatakan. Kineki maj kuali titaixpejpenakan, maj tiyolpakikan uan maj tiktasojtakan kemej toTajtsin (Prov. 23:15). Amo kineki maj titajyouikan nion maj timomikilikan porin amo timoyolnonotskej (Efes. 2:2, 3).

8, 9. 1) ¿Keniuj techmachtia Jiova itech nejin tonalmej? 2) ¿Keniuj Jiova kisentokas techpaleuis maj timopatakan satepan?

⁸ Achto ke tikixmatiskiaj Jiova, xa tikchiuayaj miak taman tein amo kiyolpaktiaya. Sayoj ke yejuatsin techpaleuijtiyajki maj timopatakan, uan axkan tiknextiaj miak kualneskayomej (Is. 11:6-8; Col. 3:9, 10). Itech nejin tonalmej Jiova kiixtalijtok xochital kampa moajsi ixolal uan ompa techmachtia uan techpaleuia maj timopatakan. Itech nejin xochital kuali timomachiliaj maski tinemij kampa motelchiua tein amo kuali. Uan no, tokniuan akin ininchankauan amo kintasojtakej keman moskaltijkej, axkan kimachiliaj ke tokniuan yekmelauj kintasojtaj (Juan 13:35). Uan tinochin tikmatijya ke moneki tikinnextiliskej oksekin ke tikintasojtaj. Sayoj ke tein okachi moneki yejua ke axkan tikixmatij toTajtsin uan tikmachiliaj ke techtasojta (Sant. 4:8).

 ⁹ Itech yankuik taltikpak tikseliskej nochi tatiochiualismej tein onkak itech xochital kampa moajsi ixolal Dios. No tinemiskej ika yolpakilis itech se yekmelauj xochital kampa taixyekanas iTekiuajyo Dios. Itech nejon tonalmej, Jiova kisentokas techpaleuijtos maj timopatakan uan techmachtis kemej amo ueli tiknemiliaj (Is. 11:9). Dios no kichiuas maj totanemilil uan tonakayo amo kipiakanok tajtakol. Ijkuak, okachi amo ouij techkisas tikajsikamatiskej itamachtilis uan senkis tiktakamatiskej. Yejua ika, maj tiksentokakan tikauakan maj Jiova techpaleui maj timopatakan. Maj tiknextilikan ke tiktasojkamatiliaj maj ijkon kinexti ke techtasojta (Prov. 3:11, 12).

10. ¿Keniuj Jesús kinextij ke amo yolijsiuia uan uelia kichiuaya nochi ijkon kemej kichiua Ueyi Sokikonchiujkej?

¹⁰ Ijkon kemej se kuali sokikonchiujkej kuali kiixmati sokit tein kitekitiltia, Jiova no tel kuali techixmati. Kimati toni ika timopolouaj, tein amo ueli tikchiuaj uan toni kualneskayomej tiknextiajya. Keman techpaleuia maj timopatakan, kielnamiki nochi nejin (xikonixtajtolti Salmo 103:10-14). Okachi kuali tikajsikamatiskej keniuj techita Jiova komo tikitaj toni kichiuaya Jesús keman itatitaniluan mopolouayaj. Kemansa, yejuan motajtolteuiayaj porin kinekiaj kimatiskej akoni okachi ueyichiujkej katka. Komo ompa timoajsiskiaj, ¿keniuj tikinitaskiaj tatitanilmej? Xa tiknemiliskiaj ke katkaj kemej sokit tein ouij se kitekitiltia. Sayoj ke Jesús amo ijkon kinitak. Yejua kimatia ke ueliskia kinpaleuis maj mopatakan komo kinyolmajxitiaya ika nejmachkayot uan kualtakayot, uan komo kinnextiliaya ika tein kichiuaya ke monekia yeskij yolyemankej (Mar. 9:33-37; 10:37, 41-45; Luc. 22:24-27). Satepan ke Jesús moajokuik, tatitanilmej kiselijkej yektikatsin espíritu uan amo kemanok kintekipachoj kimatiskej akoni katka okachi ueyichiujkej, ta kitayekanaltijkej kichiuaskej tekit tein Jesús kinkauilij (Hech. 5:42).

11. 1) ¿Keniuj kinextij David ke katka kemej sokit tein yemanik? 2) ¿Keniuj uelis no ijkon tikchiuaskej?

¹¹ Axkan, Jiova techpaleuia maj timopatakan ika Biblia, iyektikatsin espíritu uan nechikol. Komo tiknekij maj Biblia techpaleui maj timopatakan, moneki tikixtajtoltiskej, tiknemiliskej tein tikixtajtoltiaj uan tiktajtaniskej Dios maj techpaleui maj tiktakamatikan. Tekiuaj David kiluij Jiova: “Motech nitanemilia keman niijsatok youak” (Sal. 63:6). Uan no kijkuiloj: “Nikueyichiuas Jiova, akin nechyolmajxitia. Hasta itech youak, notanemililuan tein moajsij okachi noyolijtik nechmelauaj” (Sal. 16:7). Kemej tikitaj, David katka kemej sokit tein yemanik. Yejua tanemiliaya itech tein Jiova kiyolmajxitiaya uan kikauaya maj kiyektali tein kinemiliaya uan tein kimachiliaya okachi iyolijtik, maski se tayolmajxitilis ouij kikisaya kitakamatis (2 Sam. 12:1-13). ¿Keniuj no uelis tiyeskij tiyolyemankej uan titatakamatiskej kemej yejua? Maj timotajtanikan: “Keman nikixtajtoltia Biblia, ¿nitanemilia uan nikaua maj itayolmajxitilisuan Jiova nechpaleuikan maj nikpata tein niknemilia uan tein nikmachilia? ¿Uelis okachi nikyekchiuas?” (Sal. 1:2, 3).

12, 13. ¿Keniuj Jiova techpaleuia maj timopatakan ika iyektikatsin espíritu uan inechikol?

¹² Yektikatsin espíritu no uelis techpaleuis maj timopatakan itech miak taman. Kemej neskayot, uelis techpaleuis maj titamatikan kemej Jesús uan maj tikpiakan kualneskayomej tein moajsij itech itakilo espíritu (Gál. 5: 22, 23). Semej nejon kualneskayomej yejua netasojtalis. Kemej tiktasojtaj Dios, tiknekij tiktakamatiskej uan timokauaskej maj techpaleui maj timopatakan porin tikmatij ke nochi tein technauatia semi techpaleuia. Uan no, yektikatsin espíritu uelis techmakas chikaualis tein techpaleuis maj amo titanemilikan kemej akin amo kiixmatij Dios (Efes. 2:2). Maj titanemilikan itech tatitanil Pablo. Keman katka telpoch, tanemiliaya kemej tayekananij judíos akin semi moueyinekiaj. Sayoj ke yektikatsin espíritu kipaleuij maj mopata. Yejua ika satepan kijkuiloj: “Itech nochi taman nikpia chikaualis itechkopa akin nechmaka chikaualis” (Filip. 4:13, TNM). Tejuan no moneki tiktajtaniskej Jiova ika nochi toyolo maj techmaka yektikatsin espíritu, uan yejuatsin technankilis (Sal. 10:17).

¹³ Jiova no techpaleuia maj timopatakan ika inechikol uan tayekananij. Kemej neskayot, keman tayekananij kiitaj ke se taman amo tikyekchiujtokej, kitemouaj techpaleuiskej. Sayoj ke amo techyolmajxitiaj ika tein yejuan kinemiliaj (Gál. 6:1). Yejuan ika yolyemanilis kitajtaniaj Jiova maj kinmaka tamatilis uan taajsikamatilis. Ompa kitemouaj tamachtilis itech Biblia uan itech toamaixuan tein kinpaleuis maj kuali techyolmajxitikan. Yejua ika, keman tayekananij techyolmajxitiskej ika netasojtalis ke moneki tikyektaliskej kemej timotakentiaj oso okse taman, maj tikelnamikikan ke nejon se taman tein kinextia ke Dios techtasojta. Komo tikchiuaj tein techyolmajxitiaj, tiyeskij kemej sokit yemanik tein Jiova ueli kitekitiltia. Uan nejon semi techpaleuis.

14. Maski Jiova ueli kichiua tein kineki ika sokit, ¿keniuj kinextia ke techkaua maj tejuan titaixpejpenakan?

¹⁴ Komo tikajsikamatij keniuj Jiova techpaleuia maj timopatakan, okachi kuali timouikaskej iniuan tokniuan. Uan no, okachi kuali tikinitaskej akin tikinajsij itech tanojnotsalis uan akin tikinmachtiaj ika Biblia. Achto ke se sokikonchiujkej kitekitiltis sokit,  yolik moneki kichipauas uan kikixtilis tetsitsin. Jiova kinpaleuia taltikpakneminij akin kinekij mopataskej. Sayoj ke nochipa kinkaua maj yejuan kiixpejpenakan tein kichiuaskej. Amo kinchikaujkauia maj mopatakan, ta yolik kinnextilia itanauatiluan uan kinkaua maj kiixpejpenakan ox mopataskej.

15, 16. ¿Keniuj kinextiaj akin tikinmachtiaj ika Biblia ke kinekij maj Jiova kinpaleui maj mopatakan? Xikonijto se neskayot.

¹⁵ Maj tikitakan tein panok iuan Tessie, se tokniuj akin nemi Australia. Keman peuak momachtia Biblia, amo ouij kikisak kiajsikamatis tein momachtijtoya. Sayoj ke amo mopataya nion yaya nechikolmej. Tokniuj siuat akin kimachtiaya kitataujtij Jiova uan kiixtalij amo kimachtisok. Sayoj ke mochiuak teisa tein kimoujkaitak. Keman momachtijtoyaj, Tessie kiluij tokniuj keyej amo mopatatoya. Kiluij ke kimachiliaya ke takajkayaujtoya porin kiteluelitaya mauiltis ika tomin. Sayoj ke no kiluij ke kiixtalijkaya amo kemanok mauiltis.

¹⁶ Tepitsin satepan, Tessie peuak youi nechikolmej uan peuak kinextia kualneskayomej kemej kinextij Cristo, maski akin achto katkaj itasojikniuan kikejkelouayaj. Satepan moauij, uan maski ikoneuan semi nojnelmejok katkaj, mochiuak precursora regular. Kemej tikitaj, keman aksa akin momachtia Biblia peua mopata, Jiova iuan motokia uan kipaleuia maj mochiua kemej se komit tein kitelpia ipatiuj.

17. 1) ¿Keyej mitsonyolpaktia tejuatsin maj Jiova mochiua Sokikonchiujkej akin mitsonpaleuia? 2) ¿Toni tikitaskej itech okse tamachtilis?

¹⁷ Miakkan, sokikonchiuanij kisentokaj kichijchiuaj ika ininmauan kualtsitsin konmej. No ijkon, Jiova techyolmajxitia ika nejmachkayot kemej techpaleuis maj timopatakan, uan ompa techita keniuj titanankiliaj (xikonixtajtolti Salmo 32:8). ¿Tikitaj ke Jiova yekmelauj kineki techpaleuis tisejsemej? ¿Tikitaj keniuj techpaleuijtiuj ika nejmachkayot? ¿Toni techpaleuis maj tiksentokakan timochiuakan kemej sokit tein Jiova ueli kitekitiltia? ¿Toni moneki amo tikchiuaskej komo amo tiknekij tiyeskij kemej sokit tein amo ueli se kitekitiltia? ¿Uan keniuj tetatmej uelis tekitiskej iuan Jiova uan kinpaleuiskej ininkoneuan maj mopatakan? Tikitaskej itech okse tamachtilis.