Xionyoui kampa nesi tein kipia

Xionyoui kampa nesi tein kipia

 KAMPA TECHTAPOUIAJ ININNEMILIS

Jiova nochi ueli kichiua

Jiova nochi ueli kichiua

“AMO onkasok mikilis, uan akin momikilijkejya oksepa nemiskej.” Nonamik, Mairambubu, kikakik nejin itech se autobús. Semi kiyolnotsak uan kinekik kimatis okachi. Yejua ika keman autobús moketsak uan nochin temokej, kiajsito siuat akin kijtojka nejon. Siuat monotsaya Apun Mambetsadykova uan katka itaixpantijkauj Jiova. Itech nejon tonalmej katka tamouilil se tajtos iniuan itaixpantijkauan Jiova, sayoj ke tein Apun satepan techmachtij kipatak tonemilis.

TITEKITIAJ KUALKAN HASTA YOUAK

Niyolik itech xiuit 1937 itech se koljós oso kampa miakej kalyetouanij nemiaj uan tetekitiliayaj ompakauin itech xolal Tokmak (Kirguistán). Nochankauan maseualmej kirguís, uan titajtouaj tajtol kirguís. Notatuan tatokayaj uan tekitiaj kualkan hasta youak itech koljós. Akin ompa tekitiaj kintamakayaj, sayoj ke kintaxtauiayaj sayoj sepa itech xiuit. Nomomaj ouij kikisak techyekpias nokniuj siuat akin okachi nojnel uan nejua. Sayoj niyajki makuil xiuit kaltamachtiloyan, porin satepan peuak nitekiti nochi tonal itech koljós.

Tepemej Teskey Ala-Too

Kampa tinemiaj semi tatasojtia, uan techajsia tomin sayoj komo titeltekitiaj uan nejon semi techsioujtiaya. Yejua ika, keman katka nitelpochok amo itech nitanemiliaya keyej tinemij nion tein panos satepan. Amo keman niknemilij ke kualtsitsin taman tein ika tajtouaj Jiova uan kemej kiixtalijtok maj nemikan taltikpakneminij senkis kipataskiaj nonemilis. Nikuelitaskia namechtapouis keniuj peuak moteixmatiltia tamachtilis tein melauak ompa Kirguistán uan keniuj momoyauak itech nochi ueyi altepet. Nochi peuak kampa ika norte, kampa nimoskaltij.

KISAJ KAMPA MOAJSIAJ TEMAKO UAN KIUALKUIJ TEIN MELAUAK ITECH ALTEPET

Tamachtilis tein melauak peuak moteixmatiltia ompa Kirguistán itech xiuit 1956. Sayoj ke moixnamikik ika se tanemilil tein tel miakej kipiayaj. Itech nejon xiujmej, Kirguistán pouia itech Unión Soviética, uan itaixpantijkauan Jiova kayomej itech altepemej tein ompa pouiaj  amo tapaleuijkej itech tekiuajyot (Juan 18:36). Yejua ika, kinitakej ke kinixnamikiaj comunistas uan kintajyouiltijkej. Sayoj ke nion se tanemilil uelis kitsakuilis maj iTajtol Dios kinpaleui akin kipiaj kuali ininyolo. Tein melauj, se taman tein nikajsikamatik tein kitelpia ipatiuj itech nochi nonemilis yejua ke Jiova “nochi uelis kichiuas” (Mar. 10:27).

Emil Yantzen

Tajyouilis tein kipanokej itaixpantijkauan Jiova tapaleuij maj okachi moteixmatiltiani tein melauak ompa Kirguistán. ¿Keniuj? Siberia pouia itech Unión Soviética, uan ompa kinuikayaj akin kiixnamikiaj tekiuajyot. Keman kinkixtiayaj, miakej ualayaj Kirguistán. Sekin techixmatiltijkej tamachtilis tein melauak, kemej Emil Yantzen, akin yolka ompa Kirguistán itech xiuit 1919 uan kiuikakaj kampa tetsakuayaj uan tetekitiltiayaj kampa kinixmatik tokniuan. Emil mochiuak itaixpantijkauj Jiova, mokepak Kirguistán itech xiuit 1956 uan mokaltalij ompakauin itech xolal Sokuluk, kampa nejua ninemia. Itech xiuit 1958 peuak yekinika nechikol ompa Kirguistán.

Victor Vinter

Kemej se xiuit satepan, Victor Vinter mokaltalito Sukuluk. Nejin tokniuj akin amo keman kikauak Jiova kipanok miak ouijkayomej. Kemej amo tapaleuij itech tekiuajyot, ojpa kitsakkej eyi xiuit, uan satepan oksepa kitsakkej majtakti xiuit uan okseki makuil xiuit moajsik temako. Maski semi tetajyouiltiayaj, nion teyi uelik kitsakuilij maj moteixmatilti taneltokalis tein melauak.

TAMACHTILIS TEIN MELAUAK EJKO NOCHAN

Eduard Varter

Itech xiuit 1963 moajsiajya kemej 160 itaixpantijkauan Jiova ompa Kirguistán. Miakej katkaj kayomej Alemania, Ucrania uan Rusia. Semej katka Eduard Warter, akin moajsika temako uan moauijka ompa Alemania itech xiuit 1924. Satepan ke panok xiuit 1940, nazis kititankej kampa tetsakuayaj uan tetajyouiltiayaj, uan seki xiujmej satepan comunistas akin moajsiaj Unión Soviética kititankej temako. Nejin tokniuj akin amo keman kikauak Jiova mokaltalito itech xiuit 1961 itech xolalkonet Kant, tein amo uejka moajsia itech xolal kampa ninemia.

Elizabeth Fot; Aksamai Sultanalieva

Itech xolal Kant no nemia Elizabeth Fot, se tokniuj akin amo keman kikauak Jiova. Yejua tajtsomaya uan ika motekipanouaya. Kemej tel kuali tekitia, kintajtsomiaya miakej akin kipiayaj kuali nemachtil, kemej tapajtianij uan tamachtianij. Semej katka se siuat akin monotsaya Aksamai Sultanalieva, inamik se takat akin tekitia iniuan tamelauanij. Se tonal keman Aksamai kiitato Elizabeth, kichiuilij miak netajtanilmej tein mouika ika keyej tinemij uan keniuj moajsij mikemej. Elizabeth kinankilij ika Biblia. Satepan, Aksamai mochiuak se tel kuali tanojnotskej.

Nikolai Chimpoesh

Nikolai Chimpoesh, kayot Moldavia, kiixtalijkej maj takalpano itech nechikolmej itech nejon xiujmej. Uan ajsitoyaya treinta xiujmej kichiuak nejon tekit. Nikolai no kiixtaliaya keniuj mochijchiuas okachi amaixmej uan keniuj moxejxelos. Kemej tekiuanij kimatkej tein kichiuaya, Eduard Warter kiyolmajxitij: “Keman mitschiuiliskej netajtanilmej, sayoj xikinilui ke amaixmej techualtitaniliaj itech ueyi kali kampa techixyekanaj ompa Brooklyn. Xikixita policía akin poui itech KGB. Amo teyi xikmouili” (Mat. 10:19).

 Tepitsin satepan ke monojnotskej, kitatitauijkej Nikolai kampa kinixyekanayaj akin pouiaj itech KGB itech xolal Kant. Yejua kijtoua: “Policía nechtajtanij kani ualeuayaj amaixmej. Nikiluij ke techualtitaniliayaj ompa Brooklyn. Yejua amo kimatik toni kijtos. Nechkauak maj niyouj uan amo keman nechtatitauijok”. Nejon tokniuan akin semi yolchikaujkej katkaj ika kuali taixejekolis kisentokakej kiteixmatiltijkej iTekiuajyo Dios kampa ika nejua ninemia. Itech xiuit 1981 nochankauan uelik kikakkej tamachtilis tein melauak. Nonamik, Mairambubu, yejua akin yekinika kikakik.

NONAMIK NIMAN KISELIA TEIN MELAUAK

Mairambubu kayot Naryn, se xolal tein poui Kirguistán. Itech metsti agosto xiuit 1974 timoixmatkej ichan nokniuj siuat. Niman nikueuelitak, uan timonamiktijkej nejon tonal.

Apun Mambetsadykova

Itech metsti enero xiuit 1981, keman Mairambubu mokepaya itech autobús porin takouato, kikakik tein ika nitajtoj yekinika. Kemej kinekia kimatis okachi, kitajtanij nejon siuat keniuj monotsaya uan kani nemia. Siuat kiluij ke monotsaya Apun, sayoj ke, kemej itech nejon xiujmej tekiuanij ayamo kinkauayaj itaixpantijkauan Jiova maj tanojnotsanij uan monekia semi moyekpiaskej, amo kiluij kani nemia, ta kitajtanij nonamik kani tinemiaj. Nonamik semi yolpaktoya keman ajsik kalijtik.

Mairambubu nechiluij: “Nikakik se tel kualtsin taman. Se siuat nechiluij ke amo uejkaua taltikpakneminij amo momikiliskejok. Hasta koujtajtapialmej amo teyi techiuiliskejok”. Nochi nejon nikakik kemej se taman tein semi ouij se kineltokas, uan nikiluij: “Maj tikchiakan maj uiki uan maj okachi techmelauili”.

Apun techkalpanoj eyi metsti satepan. Ompa, techkalpanojkej seki siuamej akin mochiujkaj yekinika itaixpantijkauan Jiova kampa nemij maseualmej kirguís. Yejuan techmachtijkej kualtsitsin taman kemej tamati Jiova uan kemej kiixtalijtok maj nemikan taltikpakneminij. Techmachtijkej ika amatajkuilol De paraíso perdido a paraíso recobrado. * Kemej ompa Tokmak sayoj onkaya se amatajkuilol, monekik tikmaijkuiloskej se.

Se taman tein yekinika techmachtijkej yejua tein kijtoua Génesis 3:15, tein mochiuas itechkopa Tekiuaj akin Dios kiixtalij: Jesucristo. Nejin se taman tein melauak tein nochin moneki kikakiskej.  ¡Nejin techolinij maj tikixtalianij titanojnotsaskej! (Mat. 24:14.) Tein timomachtijkej itech Biblia niman peuak kipata tonemilis.

ICHTAKA TIMONECHIKOUAJ UAN TIMOAUIAJ

Keman se tokniuj kayot Tokmak techyoleuak se nenamiktilis, nonamik uan nejua niman tikitakej ke itaixpantijkauan Jiova semi tamamej katkaj. Amo akin eliuistik uan amo kitemakakej tayil tein teuintij. Amo katka kemej nenamiktilismej kampa achto tiyajkaj, kampa taltikpakneminij tauanayaj, kichiuayaj tein amo kuali uan kijtouayaj pitsotik tajtolmej.

No tiyajkej seki nechikolmej ompa Tokmak. Mochiuayaj koujtaj, komo takistoya. Tokniuan kimatiaj ke policías techpijpixtoyaj, yejua ika nochipa kitaliayaj aksa maj tajpia. Keman taseseyaya timonechikouayaj ichan se tokniuj, uan policías kemansa kiitatoj tein tikchiuayaj. Tonal keman timoauijkej, itech metsti julio xiuit 1982 itech ueyiat Chu, monekik semi timoyekpiaskej (Mat. 10:16). Amo timimiakej tiajsitiyajkej koujtaj, tikueyichiujkej Dios ika se nekuikatil uan tikakkej tanojnots achto ke timoauijkej.

TIMOCHIKAUAJ OKACHI TITANOJNOTSASKEJ

Itech xiuit 1987, se tokniuj nechiluij maj nikalpano aksa akin okachi kinekia momachtis uan nemia itech xolal Balykchy. Monekia tiyaskej itech tren naui hora. Satepan ke miakpa titanojnotsatoj ompa, tikitakej ke miakej kinekiaj kimatiskej okachi. Nejon techpaleuij maj okachi titanojnotsanij.

Mairambubu uan nejua titelyayaj Balykchy. Miakpa ompa timokauayaj itamian semana, titanojnotsayaj uan timonechikouayaj. Okachi monekiaj amaixmej uan tikuikayaj itech se mishok, se koxtal tein ika se kimama papas. Ome mishok tekit techajsia itech se metsti. Hasta keman tiyayaj uan timokepayaj itech tren uelia titanojnotsayaj.

Itech xiuit 1995 mopeualtij se nechikol ompa Balykchy, chikueyi xiuit satepan keman yekinika titakalpanojkej ompa. Techuikilij miak tomin titanojnotsatiuij ompa. ¿Uan keniuj tikchiuayaj, ta amo semi tikpiayaj tomin? Se tokniuj takat techmakaya tomin. Kemej Jiova kimatia ke tiknekiaj okachi titanojnotsaskej, techtatiochiuij (Mal. 3:10). Yekmelauj Jiova nochi ueli kichiua.

TIKINYEKPIAJ TOKONEUAN UAN TIKSENTOKAJ TITANOJNOTSAJ

Itech xiuit 1992 nechixtalijkej kemej tayekankej itech nechikol. Nejua nimochiuak yekinika tayekankej kirguís itech altepet. Itech tonechikol ompa Tokmak okachi uelik tiktekitilijkej Jiova. Kemej neskayot, uelik tikinmachtijkej Biblia miakej telpochmej kirguís itech seki tamachtiloyamej. Axkan, semej poui iniuan taixyekananij itech Sucursal uan omen tekitij kemej precursores especiales. No timochikaujkej tikinpaleuiskej oksekin itech nechikolmej. Satepan ke panok xiuit 1990 sayoj tikpiayaj amatajkuilolmej itech tajtol ruso, uan nechikolmej mochiuayaj itech nejon tajtol. Sayoj ke okachi momiakiliayaj tokniuan akin tajtouayaj kirguís, yejua ika niktajtolkepaya tamachtilis. Nejon kinpaleuij maj okachi kiajsikamatinij tein melauak.

Iuan nonamik uan chikueyi tokoneuan itech xiuit 1989

Mairambubu uan nejua nochipa tikinyekpiayaj tokoneuan. Iniuan titanojnotsayaj uan tiyayaj nechikolmej.  Keman tosiuapil Gulsayra kipiaya 12 xiujmej, kiteluelitaya ika tajtos Biblia iniuan akin kinajsia itech ojti. Nochin tokoneuan kiuelitayaj kichiuaskej maj ininkuako mokaua seki tajkuilolmej itech Biblia. Tokoneuan, uan satepan toixuiuan, nochipa kitemouanij tapaleuiskej itech nechikol. Yoltokejok 9 tokoneuan uan 11 toixuiuan, sayoj ke 16 kitekitiliaj Jiova oso youij nechikolmej iniuan inintatuan.

UEJUEYI TAMAN TEIN MOPATA

Tokniuantsitsin akin peujkej tanojnotsaj kampa tikayomej itech xiuit 1956 kitelmoujkaitaskiaj nochi tein mopatani. Kemej neskayot, satepan ke panok xiuit 1990 ueli okachi titanojnotsaj uan okachi miakej timosentiliaj.

Nitanojnotstok iuan nonamik

Itech xiuit 1991, nonamik uan nejua tiyajkej Kazajistán, itech xolal Alma-Atá (axkan motokaytia Almaty), kampa yekinika tiyajkej se ueyi nechikol. Uan itech xiuit 1993 tikpiakej yekinika ueyi nechikol ompa Kirguistán itech Estadio Spartak itech xolal Biskek. Tokniuan se semana tachipaujtoyaj achto ke mochiuaskia ueyi nechikol. Akin ompa taixyekanaya semi kimoujkaitak nejon uan amo techtaxtaualtij.

Mochiuak okse taman tein amo ijkon mochiujtoya itech xiuit 1994 keman moamakixtij yekinika amaix itech tajtol kirguís. Axkan, itech sucursal tein moajsi Biskek motajtolkepaj amaixmej itech tajtol kirguís. Uan no, itech xiuit 1998, tekit tein kichiuaj itaixpantijkauan Jiova moijkuiloj ininixpan tekiuanij ompa Kirguistán. Axkan timoajsij panoua 5,000 tanojnotsanij, 83 nechikolmej uan 25 tein ayamo nechikolmej itech tajtolmej kemej chino, inglés, kirguís, ruso uan tajtol ika señas ruso, turco, uigur uan uzbeko. Tokniuan tataman kemej moskaltijkej, sayoj ke kisentekitiliaj Jiova. Tein melauj yejuatsin akin kichiuak maj mopata nochi nejin.

Jiova kipatak nonemilis. Nochankauan katkaj koujtajtekitinij uan semi amo kipiayaj tomin, uan sayoj niyajki makuil xiuit kaltamachtiloyan. Maski ijkon, Jiova nechkauani maj ueli nitekiti kemej tayekankej itech nechikol uan maj nikinmachti ika Biblia akin kipiakej okachi nemachtil. Kemaj, Jiova ueli kichiua hasta tein amo ueli tiknemilia. Nochi tein nikpanouani nechpaleuia maj niksentoka nikteixmatilti Jiova, se Dios akin “uelis nochi kichiuas” (Mat. 19:26).

^ párr. 21 Kichijchiujkej itaixpantijkauan Jiova. Amo mokixtiaok.