Xionyoui kampa nesi tein kipia

Xionyoui kampa nesi tein kipia

 TAMACHTILIS 3

Jiova toDios semi techpatiuita

Jiova toDios semi techpatiuita

“Yejuatsin techelnamikik keman tiyolkuetaujtoyaj.” (SAL. 136:23)

NEKUIKATIL 33 Xikauili Jiova motamamal

TEIN MOITAS *

1, 2. ¿Katiyejua ouijkayomej kiixnamikij miakej itekitikauan Jiova uan keniuj momachiliaj?

MAJ titanemilikan itech nejin eyi neskayomej. Se tokniuj telpoch kiajxiliaj se kokolis tein kichiuas maj amo kipiaok chikaualis. Okse tokniuj akin kipia panoua cincuenta xiujmej amo kimakajok tekit uan maski kitemoua okse amo kiajsi. Okse tokniuj siuat akin xiuejya amo semi ueliok kitekitilia Jiova kemej achto.

2 Komo tikpanotokej se taman kemej nejon, xa tikmachiliskej ke amo teyi ika titapaleuiajok. Nejon uelis kichiuas maj amo tiyolpakikan, maj amo kuali timomachilikan uan maj amo timouikakan iniuan oksekin.

3. Ijkon kemej Satanás, ¿keniuj kiitaj nemilis taltikpakneminij?

3 Taltikpakneminij tanemiliaj kemej Satanás porin yejua kinextia ke amo techpatiuita. Satanás amo kiiknelij Eva porin maski kimatia ke mikiskia komo amo kitakamatia Dios, kichiuak maj amo tatakamati. Satanás nochipa kiixyekanani tanamakalis, política uan taneltokalismej. Yejua ika, tikitaj ke tanamakanij, akin taixyekanaj itech política uan akin taixyekanaj itech taneltokalismej amo kipatiuitaj nemilis nion kemej momachiliaj taltikpakneminij.

4. ¿Toni tikitatij itech nejin tamachtilis?

 4 Sayoj ke Jiova amo kemej Satanás. Yejuatsin kineki maj tikneltokakan ke techpatiuita uan ke techpaleuis keman tikpanoskej tein kichiuas maj tikmachilikan ke amo teyi ika titapaleuiajok (Sal. 136:23; Rom. 12:3). Itech nejin tamachtilis tikitatij keniuj Jiova techpaleuia: keman timokokouaj, keman amo techajsi tomin uan keman tixiuejkejya uan tikmachiliaj ke amo tiktekitiliajok Jiova kemej achto. Yekinika, maj tikitakan keniuj uelis tikneltokaskej ke Jiova semi techpatiuita tisejsemej.

JIOVA TECHPATIUITA

5. ¿Toni kinextia ke Jiova semi techpatiuita?

5 Maski tichijchiujtokej ika talnex, Jiova semi techpatiuita (Gén. 2:7). Maj tikitakan seki taman tein kinextia ke Jiova semi techpatiuita. Kemej neskayot, techchijchiuak kemej uelis tiknextiskej ikualneskayouan (Gén. 1:27). Ijkon, okachi techuejkapantalij ke okseki taman tein kichijchiuak uan techkauak maj tikixyekanakan tein onkak nikan taltikpak (Sal. 8:4-8).

6. ¿Toni okse taman kinextia ke Jiova kinpatiuita taltikpakneminij?

6 Maski Adán tajtakoj, Jiova kisentokak kinpatiuita taltikpakneminij. Yejuatsin semi techpatiuita, yejua ika kitemakak iKonetsin, Jesús maj techmakixti (1 Juan 4:9, 10). Ika inemilis Jesús tein kitemakak, Jiova oksepa kinajokuis akin momikilijkejya, “amo sayo in yolkualime. Ta, no nekes ten amo yolkualime” (Hech. 24:15). Biblia kinextia ke Dios techpatiuita, maski timokokouaj, amo techajsi tomin oso tixiuejkejya (Hech. 10:34, 35).

7. ¿Toni okseki taman kinextia ke Jiova techpatiuita?

7 Moajsi okseki taman tein no kinextia ke Jiova techpatiuita. Kiitak ke tiknekiaj iuan timotokiskej, yejua ika kichiuak maj tikixmatikan (Juan 6:44). Keman peuak iuan timotokiaj, yejuatsin no motokij touan (Sant. 4:8). Jiova no kinextia ke semi techpatiuita porin kisentoka techmachtia. Yejuatsin kimati keniuj timopatanij uan toni uelisok tikchiuaskej. Uan techmelaua porin techtasojta (Prov. 3:11, 12). ¡Nejon kinextia ke Jiova semi techpatiuita!

8. ¿Keniuj Salmo 18:27-29 techpaleuia maj tikmatikan keniuj tikixnamikiskej ouijkayomej?

8 Maski sekin amo kipatiuitayaj tekiuaj David, yejua kimatia ke Jiova kitasojtaya uan kipaleuiaya. Nejon kipaleuij maj taxikouani keman sekin kiuijuikaltijkej (2 Sam. 16:5-7). Keman timotekipachojtoskej uan tikpanotoskej ouijkayomej, Jiova uelis techpaleuis maj tikmatikan keniuj tikixnamikiskej ouijkayot uan maj titaxikokan (xikonixtajtolti Salmo 18:27-29). Keman tikpiaj inepaleuil Jiova amo teyi kichiuas maj amo tiktekitilikan ika yolpakilis (Rom. 8:31). Axkan, maj tikitakan eyi taman tein uelis tikpanoskej uan monekis tikelnamikiskej ke Jiova techtasojta uan techpatiuita.

KEMAN TIMOKOKOUAJ

Komo tikixtajtoltiaj Biblia, Jiova techpaleuis maj amo semi timotekipachojtokan porin timokokouaj (xikonita párrafos 9 hasta 12)

9. ¿Keniuj uelis timomachiliskej komo timokokouaj?

9 Keman timokokouaj uelis timotayokoltiskej uan tikmachiliskej ke amo teyi ika titapaleuiajok. Xa timopinaujmatiskej porin moneki maj oksekin techpaleuikan itech seki taman porin tejuan amo tiuelijok. Hasta keman  oksekin amo kimatij ox timokokouaj, uelis timopinaujmatiskej porin amo ueli tikchiuajok seki taman tein achto tikchiuayaj. Keman tikpanouaj nejon ouijkayomej Jiova techyolchikaua. ¿Keniuj?

10. Kemej kijtoua Proverbios 12:25, ¿toni uelis techpaleuis keman timokokouaj?

10 Keman timokokouaj, “se kuali tajtol” uelis techyolchikauas (xikonixtajtolti Proverbios 12:25). Itech Biblia, Jiova techiluia ke techpatiuita hasta keman timokokouaj (Sal. 31:19; 41:3). Komo miakpa tikixtajtoltiaj iTajtol Dios, yejuatsin techpaleuis maj amo semi timotekipachojtokan porin timokokouaj.

11. ¿Keniuj kiitak se tokniuj ke Jiova kipaleuij?

11 Maj tikitakan tein kipanok Jorge. Keman katka telpoch, kikuik se kokolis tein kichiuak maj amo kipianiok chikaualis uan maj kimachili ke amo teyi ika tapaleuiayaok. Yejua kijtoua: “Amo nikmatia toni nikchiuas porin nimopinaujmatia keman oksekin nechsenitayaj. Ijkon kemej okachi nimokokouaya, niknemiliaya keniuj mopataskia kemej ninemia. Semi nitayokoyaya uan niktataujtij Jiova maj nechpaleui”. ¿Keniuj kipaleuij yejuatsin? Jorge kijtoua: “Kemej nitajtalkauaya, nechiluijkej maj sayoj nikixtajtoltiani seki versículos tein kipia Salmos kampa kinextia ke Jiova motekipachoua ininka itekitikauan. Mojmostaj miakpa nikixtajtoltiaya nejon versículos uan semi nechyolseuijkej. Satepan, oksekin tokniuan kiitakej ke okachi niyolpakia. Hasta kijtojkej ke nejon kinyolchikauaya. Ijkuak nikitak ke Jiova kinankilijtoya nonetataujtiluan porin nikajsikamatik ke Jiova nechpatiuitaya. Peuak okachi ika nitanemilia keniuj iTajtol  Dios kinextia ke Jiova nechpatiuita maski nimokokoua”.

12. Komo timokokouaj, ¿toni uelis tikchiuaskej uan ijkon Jiova techpaleuis?

12 Komo tikpiaj se kokolis, uelis tikneltokaskej ke Jiova kimati tein tikpanotokej. Maj tiktataujtikan maj techpaleui maj tikitakan kemej moneki tein tikpanotokej. Maj tiktemokan itech Biblia versículos tein uelis techyolchikauaskej. Maj okachi timomachtikan versículos tein kinextiaj ke Jiova techpatiuita. Ijkon, tikitaskej ke Jiova semi yolkuali iniuan akin kitekitiliaj uan amo kikauaj (Sal. 84:11).

KEMAN AMO TECHAJSI TOMIN

Komo tikelnamikij ke Jiova motenkaua techmakas tein techpolos, techpaleuis keman amo tikajsiskej se tekit (xikonita párrafos 13 hasta 15)

13. ¿Keniuj ueliskia momachilis se tokniuj akin amo kimakajok tekit?

13 Tokniuan akin kinixyekanaj ininkalyetouanij mochikauaj kintekipanoskej. Sayoj ke maj tikijtokan ke se tokniuj amo kimakajok tekit uan maski kitemoua okse amo kiajsi. Yejua ika uelis kimachilis ke amo teyi ika kinpaleuiaok ikalyetouanij. ¿Keniuj uelis kipaleuis tanemilis itech tein Jiova motenkaujtok kichiuas?

14. ¿Keyej Jiova kichiua tein motenkaua?

14 Jiova nochipa kichiua tein motenkaua (Jos. 21:45; 23:14). Onkak miak taman keyej kichiua. Se porin motenkauani ke kinyekpias itekitikauan uan komo amo kichiuaskia amo kuali ika tajtoskiaj yejuatsin (Sal. 31:1-3). Okse taman, Jiova kimati ke timoyolkokoskiaj komo amo toka motekipachoskia porin kemej tiyeskiaj tiichankauan. Yejuatsin motenkaua techmakas tein techpolos uan tein techpaleuis maj tiktekitilikan uan ijkon kichiuas (Mat. 6:30-33; 24:45).

15. 1) ¿Toni ouijkayomej kipanokej tokniuan itech yekinika siglo? 2) ¿Toni senkis techmatiltia Salmo 37:18, 19?

 15 Keman tikelnamikij keyej Jiova kichiua tein motenkaua techpaleuia maj tikneltokakan ke amo keman techpolos tein ika timoixpanoltiskej. Maj tikitakan tein kinpanok tokniuan itech yekinika siglo. Keman peujkej kintajyouiltiaj ompa Jerusalén, “nochi in tokniuan taneltokani mochololtijke uan momoyauke” uan sayoj tatitanilmej mokaujkej (Hech. 8:1). Nejon tokniuan monekik kikauaskej ininchan uan tein ika tekitiaj, yejua ika amo kipiayajok tein ika moixpanoltiskej. Sayoj ke Jiova amo kinsenkauak uan kisentokakej kitekitilijkej ika yolpakilis (Hech. 8:4; Heb. 13:5, 6; Sant. 1:2, 3). Jiova kinpaleuij nejon tokniuan uan no techpaleuis tejuan (xikonixtajtolti Salmo 37:18, 19).

KEMAN TIXIUEJKEJYA

Komo okachi tikitaj tein ueli tikchiuaj, hasta keman tixiuejkejya, techpaleuis maj tikneltokakan ke Jiova techpatiuita uan no tein tikchiuaj itech itekiyo (xikonita párrafos 16 hasta 18)

16. ¿Toni ueliskia kichiuas maj tiknemilikan ke Jiova amo techpatiuitaok?

16 Ijkon kemej okachi tixiuejkejya, uelis peuas tikmachiliskej ke amo semi tiuelijok tiktekitiliaj Jiova. Xa no ijkon momachiliaya Tekiuaj David keman katka xiuejya (Sal. 71:9). ¿Keniuj techpaleuia Jiova?

17. ¿Toni techmachtia tein kipanok tokniuj Jheri?

17 Maj tikitakan tein kipanok Jheri, se tokniuj siuat. Kiyoleujkej maj momachtiti keniuj moneki moyekpias Kali Kampa tiMosentiliaj, sayoj ke amo kinekia yas. Yejua kijtoua: “Nixiuejya, amo nemiok notakauj uan nion teyi ueli ika nitapaleuia”. Se youak achto ke mochiuaskia nejon nemachtil yejua kitapouij Jiova keniuj momachiliaya. Mostika keman  ajsik kampa motamachtiskia, kisentokaya motajtaniaya ox monekia ompa yetos. Ompa, semej tokniuan akin tamachtijtoya kijtoj ke tein okachi moneki yejua maj timokauakan maj Jiova techmachti. Jheri kielnamiki: “¡Nejon kemaj ueli nikchiua! Peuak nichoka keman nikitak ke Jiova kinankilijtoya nonetataujtil. Kemej yeskia nechiluijtoya ke ueliskia nitapaleuisok uan ke yejua nechmachtiskia”. Keman Jheri kielnamiki nejon, kijtoua: “Keman niajsik kampa motamachtiskia, semi nimouia uan nikmachiliaya ke amo nechnamikia ompa niyetos. Sayoj ke keman tamik nemachtil, nikajsikamatik ke ueliskiaok niktekitilis Jiova uan ke yejuatsin nechpatiuitaya”.

18. ¿Keniuj kinextia Biblia ke Jiova kipatiuita tein tikchiuaj itech itekiyo maski tixiuejkejya?

18 Ijkon kemej okachi tixiuejkejya, uelis tikneltokaskej ke Jiova uelisok techtekitiltis (Sal. 92:12-15). Jesús kijtoj ke maski amo ueliok tikchiuaj miak taman, Jiova semi kipatiuita tein ueli tikchiuaj itech itekiyo (Luc. 21:2-4). Yejua ika maj tikchiuakan tein tiueliskej. Kemej neskayot, uelis tikteixmatiltiskej Jiova, timotataujtiskej ininka tokniuan uan tikinyolchikauaskej. Jiova techita kemej yeskia iuan titekitij, amo porin tikchiuaj miak taman itech itekiyo, ta porin tiktakamatij (1 Cor. 3:5-9).

19. ¿Toni techmatiltia Romanos 8:38, 39?

19 Semi tiktasojkamatij tikueyichiuaskej Jiova, akin yekmelauj kinpatiuita akin kitekitiliaj. Yejuatsin techchijchiuak kemej uelis tikchiuaskej itanejnekilis, uan tikueyichiuaskej kichiua maj semi tiyolpakikan (Apoc. 4:11). Maski oksekin techitaskej ke amo teyi ika titapaleuiajok, Jiova amo ijkon techita (Heb. 11:16, 38). Keman semi timotekipachojtoskej porin timokokouaj, porin amo techajsi tomin oso porin tixiuejkejya, maj tikelnamikikan ke Jiova nochipa techtasojtas (xikonixtajtolti Romanos 8:38, 39).

^ párr. 5 ¿Tikpanouanij seki taman tein kichiuani maj tikmachilikan ke amo teyi ika titapaleuiajok? Nejin tamachtilis techelnamiktis ke Jiova semi techpatiuita. No tikitaskej keniuj uelis kuali timomachiliskej maski tikpanoskej tein yeski ouijkayot.

NEKUIKATIL 30 Notasojikniuj, noTajtsin uan noDios