Xionyoui kampa nesi tein kipia

Xionyoui kampa nesi tein kipia

Maj tikpoujkaitakan “ten Dios kinsentilij”

Maj tikpoujkaitakan “ten Dios kinsentilij”

“Tagat uan siuat ten Dios kinsentilij namikuani ya, yejuan nojonkes ma amo se tagat kinxelos.” (MAR. 10:9)

NEKUIKATILMEJ: 131, 132

1, 2. ¿Toni moneki techolinis maj tikchiuakan tein kijtoua Hebreos 13:4?

TINOCHIN tiknekij tikpoujkaitaskej Jiova. Yejuatsin kinamiki maj ijkon tikchiuakan, uan motenkaua ke no techpoujkaitas (1 Sam. 2:30; Prov. 3:9; Apoc. 4:11). Yejuatsin no kineki maj tikinpoujkaitakan okseki taltikpakneminij, kemej tekiuanij (Rom. 12:10; 13:7). Sayoj ke moajsi se taman tein moneki okachiok tikpoujkaitaskej: nemilis kemej namikuanij.

2 Tatitanil Pablo kijkuiloj: “Xikmouiskapouakan ne nemilis ne ten senyetinemij in namikuani. Uan xikchipaukaitakan ne nemilis de namikuani den senkochtinemij” (Heb. 13:4). Ika nejin tajtolmej, Pablo amo sayoj kijtojtoya toni moneki kichiuaskej namikuanij, ta kinnauatijtoya tokniuan maj kipatiuitakan nemilis kemej namikuanij. ¿Ijkon tikitaj nemilis kemej namikuanij, okachiok komo tikpiaj tonamik?

3. ¿Toni tayolmajxitilis tein motelneki kitemakak Jesús ika nemilis kemej namikuanij? (Xikonita taixkopin ipeujyan tamachtilis.)

3 Komo tikpatiuitaj nemilis kemej namikuanij uan tikpoujkaitaj, tikchiujtokej kemej Jesús. Keman fariseos kitajtanijkej keniuj kiitaya maj se takat kikauani inamik, Jesús kijtoj tein Jiova kijtojka ika yekinika namikuanij: “Ika ya nojon se tagat kinkauas nitajtsin  uan inanajtsin uan mosentilis iuan isiuau. Uan in ome mokauaj sanse”. Uan no kijtoj: “Tagat uan siuat ten Dios kinsentilij namikuani ya, yejuan nojonkes ma amo se tagat kinxelos” (xikonixtajtolti Marcos 10:2-12; Gén. 2:24).

4. ¿Keniuj kinekia Jiova maj yetonij namikuanij?

4 Kemej tikitaj, Jesús senkis kimatia ke Dios kiixtalij nemilis kemej namikuanij uan senkis kinextij ke moneki senyetoskej nochipaya. Jiova amo kiniluij Adán uan Eva ke ueliskiaj mokauaskej, ta yejuatsin kinekia maj senyetonij nochipaya.

TEIN KIPATA NEMILIS KEMEJ NAMIKUANIJ, SAYOJ KE AMO NOCHIPAYA

5. ¿Keniuj mikilis kijtakoua nemilis kemej namikuanij?

5 Tikmatij ke keman Adán tajtakoj miak taman mopatak. Semej yejua ke taltikpakneminij peuak momikiliaj, uan nejon kinijtakoskia namikuanij. Tatitanil Pablo kiniluij tokniuan ke mikilis kitamia nemilis kemej namikuanij uan ke takat oso siuat akin inamik momikilij uelis oksepa monamiktis (Rom. 7:1-3).

6. ¿Keniuj kinextia Tanauatil tein kiselij Moisés ke Dios kipatiuita nemilis kemej namikuanij?

6 Tanauatil tein Jiova kinmakak israelitas kijtouaya seki taman ika nemilis kemej namikuanij. Kemej neskayot, se takat ueliskia kipias amo sayoj se inamik, se taman tein ipa kichiuayajya. Sayoj ke, Tanauatil kinyekpiaya siuamej uan konemej uan ijkon amo ininka mauiltiskiaj. Kemej neskayot, komo se israelita monamiktiaya iuan se siuat akin takeual uan satepan monamiktiaya iuan okse, monekia kisentokas kimakas yekinika inamik tein kikuaskia, tein motaliliskia uan monekia kisentokas iuan motekas. Dios tanauatiaya maj kiyekpiani (Éx. 21:9, 10). Tejuan amo monekiok tiktakamatiskej Tanauatil tein kiselij Moisés. Sayoj ke techmachtia ke Dios kitelpatiuita nemilis kemej namikuanij uan techpaleuia maj no tikpatiuitakan.

7, 8. 1) Ika tein kijtoua Deuteronomio 24:1, ¿toni kijtouaya Tanauatil ke ueliskiaj kichiuaskej takamej? 2) ¿Keniuj kiita Jiova keman aksa kikaua inamik?

7 ¿Toni kijtouaya Tanauatil keman aksa kinekia kikauas inamik? Maski Dios kisentokaya kipatiuitaya nemilis kemej namikuanij, kikauak maj takamej israelitas kikauanij ininnamik komo kiitayaj ke kichiujka “se taman tein tel tepinaujtij” (xikonixtajtolti Deuteronomio 24:1). Tanauatil amo kijtouaya toni katka, sayoj ke xa katka teisa tein tel amo kuali uan amo sayoj teisa tein amo motelnekia (Deut. 23:14). Sayoj ke, itech itonaluan Jesús, miakej judíos kikauayaj ininnamik ika tein yeski taman (Mat. 19:3). Tejuan amo tiknekij tiyeskij kemej yejuan.

8 Itech itonaluan tanauatijkej Malaquías, semi moitaya maj takamej kikauanij ininnamik, xa porin kinekiaj monamiktiskej iuan se akin ayamo xiuej uan amo kiueyichiuaya Jiova. Sayoj ke yejuatsin kiyeknextij keniuj kiitaya nejon keman kijtoj: “Niktauelita maj namikuanij mokauakan” (Mal. 2:14-16). Nejin mouikaya ika tein kijtoua iTajtol Dios ika yekinika namikuanij: ke takat “mosentilis iuan inamik, uan mochiuaskej sayoj se” (Gén. 2:24). Jesús kinextij ke no tanemiliaya kemej iTajtsin keman kijtoj: “Tagat uan in siuat ten Dios kinsentalis namikuani ya, yejuan nojonkes ma amo se tagat kinxexelos” (Mat. 19:6).

KEMAN UELIS KITSAYANASKEJ AMAT ININIXPAN TEKIUANIJ

9. ¿Keniuj moneki moajsikamatis itajtoluan Jesús tein moajsij itech Marcos 10:11, 12?

9 Xa aksa tajtanis: “¿Moajsi se taman tein uelis kichiuas maj se tokniuj kitsayana amat ininixpan tekiuanij uan maj oksepa monamikti?”. Jesús kijtoj: “Takan se tagat mosiuakauas [...] uan de ompa monamiktiti oksepa, ne tagat motajtakolmakas de suapapatalis ika ne achto siuat. Uan takan se tesiuau kikauas niyokich [...] uan de ompa monamiktiti  oksepa, ijkuakon ne tesiuat motajtakolmakas de tagapapatalis” (Mar. 10:11, 12; Luc. 16:18). Senkis nesi ke Jesús kipoujkaitaya nemilis kemej namikuanij, uan kinekia maj oksekin no ijkon kiitanij. Komo aksa kikauaya inamik akin amo auilnenka uan oksepa monamiktiaya, nejon katka auilnemilis. Ijkon moijtoua porin maski namikuanij kitsayanaskej amat ininixpan tekiuanij maski nion se auilnemik, Dios kisentoka kinita kemej namikuanij. Yejuatsin kisentoka kinita kemej “sayoj se”. Uan no, Jesús kijtoj ke komo takat kikauaya inamik akin amo auilnenka ueliskia kichiuas maj auilnemi. ¿Keyej? Porin siuat ueliskia kinemilis ke monekia oksepa monamiktis uan ijkon kipiaskia akoni kiixpanoltis. Uan komo oksepa monamiktiaya, yeskia auilnemilis.

10. ¿Kemanian se tokniuj uelis kitsayanas amat ininixpan tekiuanij uan oksepa monamiktis?

10 Jesús kinextij ke moajsi sayoj se taman tein uelis kichiuas maj aksa kitsayana amat ininixpan tekiuanij. Kijtoj: “Ne tagat motajtakolmakas kuak yejua kinemilis de ke kikauas isiuau maski yejua ne isiuau amo motajtakolmaka iuan okse tagat. Uan ne tagat ten kikauas nisiuau uan monamiktis iuan okse siuat, yejua ne motajtakolmakas” (Mat. 19:9). Kijtojka se taman kemej nejon keman tamachtij itech se tepet (Mat. 5:31, 32). Itech nejin tajkuilolmej, mokuik tajtol griego pornéia, tein kijtosneki auilnemilis. Nejin tajtol kisenkui tataman tajtakolmej tein kichiuaj akin amo namikuanij, kemej mosentekaskej maski kipiaj ininnamik, monamakaskej itech auilnemilis, auilnemiskej iniuan inintakaikniuan oso ininsiuaikniuan uan iniuan tapialmej. Maj tikijtokan ke se takat akin kipia inamik auilnemi. Inamik uelis kiixejekos ox kitsayanas amat ininixpan tekiuanij. Komo kichiua, iixpan Dios yejuan amo namikuanijok.

11. ¿Keyej se tokniuj uelis kiixejekos amo kitsayanas amat ininixpan tekiuanij maski ueliskia kichiuas?

11 Maj tikitakan ke Jesús amo kijtoj ke komo semej auilnemik, inamik moneki kitsayanas amat ininixpan tekiuanij. Kemej neskayot, se siuat uelis kiixejekos kisentokas iuan inamik maski kikajkayauak. Xa kitasojtaok uan kineki  kitapojpoluis uan iuan mochikauas kiyektaliskej tein amo kuali tein kipanotokej. Tein melauj, komo kitsayana amat ininixpan tekiuanij uan amo oksepa monamiktia, kipias seki ouijkayomej. Kemej neskayot, amo kipiasok akoni kiixpanoltis, akoni iuan motekas, xa momachilis iselti, uan komo kinpiaj konemej, xa ouij kikisas kinpaleuis maj motokikan iuan Jiova (1 Cor. 7:14). Senkis nesi ke akin kikajkayaujkej uan kitsayana amat ininixpan tekiuanij kipanos ouijkayomej.

12, 13. 1) ¿Toni kipanok Oseas? 2) ¿Keyej Oseas oksepa kiuikak Gómer ichan? 3) ¿Toni techmachtia nochi nejon ika nemilis kemej namikuanij?

12 Tein kipanok tanauatijkej Oseas techmachtia miak taman kemej Dios kiita nemilis kemej namikuanij. Jiova kiluij maj monamiktiani iuan se siuat akin monotsaya Gómer. Yejua mochiuaskia “se siuat auilnenkej” uan kinpiaskia konemej keman auilnemiskia. Gómer uan Oseas kipiakej se okichpiltsin (Os. 1:2, 3). Satepan, Gómer kipiak se siuapiltsin uan okse okichpiltsin, xa iuan okse takat. Maski miakpa auilnemik, Oseas amo kikauak. Satepan, Gómer kikaujteuak uan mochiuak takeual. Sayoj ke Oseas kikouak (Os. 3:1, 2). Ika tein kipanok Oseas, Jiova kiixnextij keniuj miakpa kintapojpoluij israelitas satepan ke kikaujkaj uan kinueyichiujkej okseki tiotsitsin. ¿Toni techmachtia nejin?

13 Kemej tikitakejya, komo se tokniuj auilnemi, inamik moneki kiixpejpenas toni kichiuas. Jesús kijtoj ke akin kikajkayaujkej uelis kitsayanas amat ininixpan tekiuanij uan uelis oksepa monamiktis. Sayoj ke no uelis kitapojpoluis inamik, uan kuali yetok komo ijkon kichiua. Biblia kijtoua ke Oseas oksepa kiuikak Gómer ichan. Ijkuak, Gómer monekia amo auilnemisok. Oseas seki tonalmej amo iuan motekak (Os. 3:3, nota, Traducción del Nuevo Mundo itech tajtol inglés). Sayoj ke satepan, xa oksepa motekak iuan. Nejon kiixnextij keniuj Dios motemakak oksepa kinselis israelitas uan kisentokas kuali mouikas iniuan (Os. 1:11; 3:3-5). Nejin techmachtia ke komo akin kikajkayaujkej oksepa moteka iuan inamik, kinextia ke kitapojpoluijya (1 Cor. 7:3, 5). Ijkuak, amo uelisok kitsayanas amat ininixpan tekiuanij uan omen monekis mochikauaskej kiitaskej nemilis kemej namikuanij kemej Jiova kiita.

MONEKI POUJKAITALIS MASKI ONKAS KUEJMOLMEJ

14. Ika tein kijtoua 1 Corintios 7:10, 11, ¿toni uelis kinpanos seki namikuanij?

14 Tinochin akin tikchiuaj kemej Cristo moneki tikpoujkaitaskej nemilis kemej namikuanij, ijkon kemej Jiova uan Jesús. Sayoj ke kemansa sekin amo kipoujkaitaj, porin titajtakouanij (Rom. 7:18-23). Yejua ika, moneki amo tikmoujkaitaskej maj seki tokniuan namikuanij itech yekinika siglo kipianij kuejmolmej. Pablo kijkuiloj: “Tesiuau ma amo mosekokaua de iyokich”. Sayoj ke kemansa kemaj panok (xikonixtajtolti 1 Corintios 7:10, 11).

¿Toni kinpaleuis namikuanij akin kipiaj uejueyi kuejmolmej maj amo mokakauakan? (Xikonita párrafo 15)

15, 16. 1) ¿Toni moneki kitemoskej kichiuaskej namikuanij keman kipiaj kuejmolmej, uan keyej? 2) ¿Toni moneki kichiuaskej komo semej amo kitekitilia Dios?

15 Pablo amo kijtoj keyej seki namikuanij mokakaujkaj. Sayoj ke, kuejmol amo katka ke takat auilnenka, porin komo ijkon inamik ueliskia senkis kikauas uan oksepa monamiktis. Pablo kijkuiloj ke siuat akin kikaujka inamik monekia amo oksepa monamiktis oso maj kiyektaliani kuejmol iuan inamik. Dios kisentokaya kinitaya kemej namikuanij. Tatitanil kinyolmajxitij ke komo nion semej auilnenka, maj kitemouanij kiyektaliskej tein yeski kuejmol tein kipiaskiaj. Yejuan ueliskia kintajtaniskej tayekananij maj kinpaleuianij. Tayekananij amo kiixtaliskiaj akoni katka itajtakol, ta kinyolmajxitiskiaj ika Biblia.

16 Sayoj ke, xa okachi ouij katka komo inamik tokniuj amo kitekitiliaya Dios. ¿Ueliskiaj mokakauaskej komo kipiayaj kuejmolmej?  Kemej tikitakejya, Biblia kijtoua ke namikuanij uelis kitsayanaskej amat ininixpan tekiuanij komo semej auilnemik, sayoj ke amo kijtoua kemanian uelis mokakauaskej. Pablo kijkuiloj: “Komo se siuat taneltokakke no kipia se tagat den amo taneltokakke, uan in tagat kineki nachipa iuan yetos, [...] ma amo kisekokaua” (1 Cor. 7:12, 13). Nejin no moneki tiktakamatiskej axkan.

17, 18. ¿Keyej seki tokniuan kisentokaj iuan ininnamik maski kipanouaj uejueyi ouijkayomej?

17 Sayoj ke, kemansa “tagat den amo taneltokakke” kinextia ke amo “kineki nachipa iuan yetos” inamik. Xa kitelteuia, uan inamik hasta kinemilia ke uelis kokolispeuas oso hasta momikilis. Xa amo kineki kiixpanoltis yejua nion ikoneuan oso kichiua maj ouij kikisa kitekitilis Dios. Yejua ika, seki tokniuan siuamej kiixejekouanij ke maski ininnamik kijtos okse taman, amo kinekiok maj senyetokan uan ke moneki kikauaskej. Sayoj ke okseki tokniuan siuamej amo kikauanij ininnamik. Taxikouanij uan mochikauanij maj nochi okachi kuali yeto. ¿Keyej?

18 Se taman yejua ke namikuanij akin mokakauaj kisentokaj kemej namikuanij uan kipanoskej ouijkayomej tein achto ika titajtojkej. Uan tatitanil Pablo kijtoj okse taman tein kinextia keyej moneki senyetoskej. Kijkuiloj: “Teyokich ten amo taneltokakke, yejua ne mokautok keme yeskia se tagat ten kiyolpaktijtinemi uan kitekitilijtok Dios, porin nachipa poutok iuan isiuau ten kipia takuautamatilis iuan Dios. Uan no ijkon in tesiuau ten amo taneltokakke, yejua ne mokautok keme se siuat ten kitekitilijtok Dios, porin nachipa poutok iuan iyokich ten kipia takuautamatilis iuan Dios. Uan [...] ne ninkoneuan Dios kinpouaskia keme tekoneuan de amo taneltokani. Uan komo melau Dios kipouas ne teyokich ke kitekitilijtok Yejuatsin, ijkuakon ne nikoneuan mopouakiue de ke yolchipauke iixpantsin Dios” (1 Cor. 7:14). Miakej tokniuan akin kisentokakej iuan ininnamik akin amo itaixpantijkauj Jiova maski kipanouayaj uejueyi ouijkayomej, ueli kijtouaj ke nejon amo nenkajtik porin ininnamik no peuak kitekitilia Jiova (xikonixtajtolti 1 Corintios 7:16; 1 Ped. 3:1, 2).

19. ¿Keyej itech nechikolmej moajsij miakej namikuanij akin yolpakij?

19 Jesús ika tajtoj keman namikuanij kitsayanaj amat ininixpan tekiuanij uan tatitanil Pablo kinyolmajxitij namikuanij akin mokakauaj. Yejuan kinekiaj maj itekitikauan Jiova kipoujkaitakan nemilis kemej namikuanij. Axkan, itech nechikolmej noyampa taltikpak moajsij namikuanij akin yolpakij. Xa itech tonechikol moajsij miakej, kampa takat amo kikajkayaua inamik uan kitasojta uan siuat kitasojta uan kipoujkaita inamik. Yejuan kinextiaj ke uelis se kipoujkaitas nemilis kemej namikuanij. Techyolpaktia ke tel miakej namikuanij kinextiaj ke melauak nejin itajtoluan Dios: “Tagat [...] kinkauas nitat uan ninan para ijkon mosentilis iuan isiuau uan ijkon yejuan in ome mochiuakij sanse” (Efes. 5:31, 33).