Xionyoui kampa nesi tein kipia

Xionyoui kampa nesi tein kipia

 TIKELNAMIKIJ TEIN ACHTO MOCHIUAK

Keniuj peuak moteixmatiltia iTekiuajyo Dios ompa Portugal

Keniuj peuak moteixmatiltia iTekiuajyo Dios ompa Portugal

AT ITECH ueyiat Atlántico kiuiuiteki barco tein youi Europa. Semej akin ompa youi yejua George Young, akin kielnamiki ika yolpakilis tein uelik kichiuak itech tanojnotsalis ompa Brasil. * Sayoj ke, ijkon kemej barco kisentoka youi, peua itech tanemilia kampa axkan tanojnotsati: España uan Portugal, kampa amo semi moteixmatiltiani kuali tanauatilmej. Keman ajsis, kichia kiixtalis kani kitemakas tanojnotsmej tokniuj Joseph F. Rutherford uan kimoyauas 300,000 tratados.

George Young kinpanauij ueyiamej keman miakkan tanojnotstinemik

Tokniuj Young ajsik Lisboa (Portugal) itech xiuit 1925. Ijkuak, mochiujtoya tein amo kuali itech altepet. Taixnamikilis tein mochiuak itech xiuit 1910 kichiujka maj amo kisentokani taixyekanani se tekiuaj uan maj Iglesia Católica amo kisentokani kipiani miak tanauatil. Akin nemiaj ompa ueliaj kichiuayaj okachi miak taman, sayoj ke sekin kisentokayaj takuejmolchiuayaj.

Keman George Young kiixtalijkaya nochi tein monekia uan ijkon tokniuj Rutherford kitemakaskia se tanojnots, policías kiselijkej tanauatil tein kinkauaya maj kinteltatsakuiltikan taltikpakneminij porin seki taixnamikinij kinekiaj moaxkatiliskej tekiuajyot. Akin tajkuilouaya itech Sociedad Bíblica Británica y Extranjera kiluij tokniuj Young ke xa kitelixnamikiskiaj. Maski ijkon, tajtanik maj kikauanij maj kikui gimnasio tein moajsia itech Escuela Secundaria Camões, uan kikaujkej.

Itech tonal 13 metsti mayo, keman motemakaskia tanojnots, miakej motajtaniayaj toni panoskia. Uejueyi amamej tein kitalijkaj itech kalmej uan periódicos kitematiltiayaj ke motemakaskia tanojnots “Keniuj uelis tinemiskej itech taltikpak nochipaya”. Taneltokanij akin taixnamikiaj niman tanejmachtijkej itech ininperiódico ke ajsikaj seki takajkayauanij. Ikalakyan gimnasio no kixejxelojkej tel miak folletos kampa kijkuilojkej tein kiixnamikia tamachtilis tein kitemakaskia tokniuj Rutherford.

Maski ijkon, mosentilijkej kemej ome mil taltikpakneminij uan kemej ome mil amo uelikok kalakkej. Kemej sekin kitelnekiaj kimatiskej tein mochiuaskia, tejkokej itech escaleras tein chijchiujtoyaj ika mekat tein yetoyaj tajtanakastan uan oksekin motalijkej itech teposmej tein ika kichiuayaj ejercicio.

Sayoj ke mochiuak seki ouijkayomej. Taixnamikinij tsajtsikej uan kinuejuelojkej ikpalmej. Sayoj ke, tokniuj Rutherford kisentokak yolseujtoya uan tejkok itech se mesa uan ijkon nochin ueliskiaj kikakiskej. Keman tatamik, ajsitoyaya tajkoyouan, panoua mil doscientos taltikpakneminij kitemakakej inintokay uan kijtojkej kani nemiaj porin kinekiaj maj kintitanilianij amaixmej. Mostika, itech periódico O Século ika motajtoj tanojnots.

Itech metsti septiembre xiuit 1925, ompa Portugal peuak mokixtia itech tajtol portugués amaix La Torre del Vigía, tein axkan moixmati kemej Tanejmachtijkej (ijkuak mokixtiayaya nejin amaix itech tajtol  portugués ompa Brasil). Itech nejon tonalmej, Virgílio Ferguson, se Momachtijkej ika Biblia akin nemia Brasil peuak kinemilia mokaltalitiuj Portugal uan tapaleuis itech tanojnotsalis. Yejua uan George Young sentekitikajya itech sucursal tein amo ueyi tein kikuiaj Momachtianij ika Biblia ompa Brasil. Virgílio uan inamik, Lizzie, yajkej itech barco hasta Portugal kampa oksepa moajsiskiaj iuan tokniuj Young. Tel tapaleuij maj ajsinij, porin tokniuj Young amo uejkaua yaskia tanojnotsatiuj itech okseki altepemej, kemej itech Unión Soviética.

Amat tein ika kinkaujkej Lizzie uan Virgílio Ferguson maj nemikan itech altepet (1928)

Keman sekin kiixnamikkej tekiuajyot uan moixtalij se tanajnauatijkej, okachiok kinixnamikkej tokniuan. Sayoj ke tokniuj Ferguson amo kikauak Jiova. Kiixtalij keniuj kinyekpias Momachtianij ika Biblia akin amo miakej katkaj uan kisentokaskej kichiujtoskej itekiyo Dios. Tokniuj tajtanik maj kikauanij maj mochiuanij nechikolmej ichan. Itech metsti octubre xiuit 1927, tekiuanij kikaujkej.

Itech yekinika xiuit keman ijkon motaixyekantoya, kemej cuatrocientos cincuenta taltikpakneminij tajtankej maj kintitanilianij amaix La Torre del Vigía. Uan no, tratados uan folletos tel tapaleuijkej maj moteixmatiltiani tein melauak itech xolalmej tein pouij Portugal tein uejka moajsiaj: Angola, Azores, Cabo Verde, Goa (India), Madeira, Mozambique uan Timor Oriental.

Itech xiuit 1929, ajsik Lisboa Manuel da Silva Jordão, se takat kayot Portugal akin tekitia kampa kitokaj xochimej. Keman nemia Brasil, kikakik se tanojnots tein kitemakak tokniuj Young. Niman kiajsikamatik ke katka tein melauak, uan kitelnekik kipaleuis tokniuj Ferguson maj kinmatilti okachi taltikpakneminij tein kichiuas iTekiuajyo Dios. Yejua ika, Manuel mochiuak colportor, kemej ijkuak kintokaytiayaj precursores. Kemej kuali ixyetoya keniuj moamakixtis uan moxejxelos amaixmej, yankuik nechikol tein moajsia Lisboa moskaltij.

Tokniuan Ferguson monekik mokepaskej Brasil itech xiuit 1934. Sayoj ke tamachtilis tein melauak motematiltijkaya Portugal. Maski semi motakuejmolchiujtoya ompa Europa porin España mochiujtoya neteuilis uan no mochiujtoya Ojpatika Neteuilis itech Nochi Taltikpak, tokniuan portugueses taxikojkej uan amo kikaujkej Jiova. Itech seki tonalmej, nejin tokniuan tamatiaj kemej tepitsin tekol oso tekolxochit. Sayoj ke kemej yeskia oksepa xotakej itech xiuit 1947, keman ajsik John Cooke, yekinika misionero akin momachtijka Galaad. Ijkuak, peuak semi momiakiliaj tanojnotsanij. Uan kisentokakej momiakilijkej maski itech xiuit 1962 tekiuanij amo kinkaujkejok maj kisentokanij taueyichiuanij. Itech metsti diciembre xiuit 1974, keman tekit tein kichiuaj itaixpantijkauan Jiova moijkuiloj ininixpan tekiuanij, moajsiajya panoua trece mil tanojnotsanij.

Axkan, panoua cincuenta mil tanojnotsanij kiteixmatiltiaj iTekiuajyo Dios ompa Portugal uan itech miak talmej tein moajsij tatajko ueyiat kampa motajtoua portugués, kemej Azores uan Madeira. Iniuan pouij seki ininixuiuan akin kikakitoj tanojnots tein kitemakak tokniuj Rutherford itech xiuit 1925.

Tiktasojkamatiliaj Jiova uan nejon tokniuan tatakamatinij akin itech nejon xiujmej peuak kiteixmatiltiaj iTekiuajyo Dios ika yolchikaualis uan kemej kijtoj Pablo, katkaj itekitikauan Cristo Jesús itech xolalmej (Rom. 15:15, 16). (Tein moajsi itech sucursal tein poui Portugal).

^ párr. 3 Xikonita tamachtilis “Queda mucho por cosechar”, itech La Atalaya 15 de mayo de 2014, página 31 uan 32.