Xionyoui kampa nesi tein kipia

Xionyoui kampa nesi tein kipia

Uelis tikonpias se kualtsin nemilis

Uelis tikonpias se kualtsin nemilis

DIOS amo kinekia maj tinemikan kemej axkan tinemij. Yejuatsin kinekia maj tinochin timokauanij maj techixyekana, maj techpaleuiani itanauatiluan uan maj tiknextianij seki taman tein kuali kemej yejuatsin. No kinekia maj tineminij ika yolseuilis, maj tiyolpakinij iniuan tochankauan, maj tikixmatinij miak taman uan maj takualtsinkan tikchiuanij nochi taltikpak.

DIOS MOTENKAUA KICHIUAS MAJ TINEMIKAN KEMEJ YEKINIKA KIIXTALIJTOYA

  • “Yejua kitamia neteuilismej noyampa taltikpak.” (Salmo 46:9.)

  • “Ejkok in tonal kuak Tejuatsin tikintajtamis nekes ten taijtakojtinenke nikan taltikpak.” (Apocalipsis 11:18.)

  • “Nion se taltikpaknenkej kijtos: ‘Nimokokoua.’” (Isaías 33:24.)

  • “Tekit tein kichiuaskej ika ininmauan notaixpejpenaluan senkis kinyolpaktis.” (Isaías 65:22.)

¿Keniuj mochiuas nejin tein Biblia kijtoua? Ompa iluikak, Dios kiixtalij maj iKonetsin, Jesús, taixyekana nikan taltikpak. Biblia kijtoua ke nejon taixyekanalis motokaytia iTekiuajyo Dios (Daniel 2:44). Biblia no kijtoua tein Jesús kichiuas: “Totajtsin Dios ten Totekotsin, Yejuatsin kichiualtis ke in Jesús Temakixtijke ma kipia uelilis de rey [...] sen nachipa” (Lucas 1:32, 33).

Keman Jesús nemia nikan taltikpak kichiuak miak taman tein ika kinextij ke keman taixyekanas tinochin kuali tinemiskej.

JESÚS KINEXTIJ KENIUJ KINPALEUIS AKIN TATAKAMATISKEJ

  • Kemej kinpajtij akin mokokouayaj, kinextij ke senkis kitamis kokolismej (Mateo 9:35).

  • Keman kitsakuilij kiouaejekat, kinextij ke kichiuas maj amo mochiuakanok tetsaujmej (Marcos 4:36-39).

  • Keman kintamakak tel miakej, kinextij ke uelis techmakas nochi tein techpoloua (Marcos 6:41-44).

  • Keman kichiuak maj at mokepani vino itech se nenamiktilis, kinextij ke kichiuas maj tiyolpakikan (Juan 2:7-11).

¿Toni moneki tikonchiuas uan ijkon tikonselis nemilis tein Dios kiixtalijtok kinmakas akin kitasojtaj? Moneki tikonchiuas se taman. Biblia kijtoua ke moneki tikonajsis “ne ojti” tein teuika “tech ne yek nemilis”, tein amo miakej kiajsij (Mateo 7:14).

SE OJTI TEIN TEUIKA ITECH SE KUALTSIN NEMILIS

¿Toni kijtosneki ojti tein teuika nemilis nochipaya? Nejon ojti kijtosneki tanauatilmej tein Dios techmaka. Yejuatsin techiluia: “Nejua, Jiova, nimoDios, Akin mitsmachtia tein tejua mitspaleuis, Akin mitsixyekana itech ojti kampa moneki tinejnemis” (Isaías 48:17). Komo tikonchiua nejin, okachi tionyolpakis.

Jesús kijtoj: “Nejua niojti uan tein melauak uan nemilis” (Juan 14:6TNM). Komo tikchiuaj kemej  Jesús kichiuak uan tamachtij, okachi timotokiskej iuan Dios uan okachi tiyolpakiskej.

¿Keniuj uelis tikonajsis nejon ojti? Maski onkakej miak taneltokalismej, Jesús kijtoj: “Totajtsin Dios de eluiyaktsinko amo kinyolyekanas ika iueyichikaualis nochi ne ten nechnotsaske sayo ika nintenxipal san ke Nejuatsin ni Nintekotsin. Ta, sayo Dios kinyolyekana ika iueyichikaualis nekes ten kichiuaj keme Notajtsin Dios ipakilis ne eluiyaktsinko” (Mateo 7:21). Yejua no kijtoj: “Kuali nankinyekixmatiske nijin tanauatiani ika ne tachiualis ten yejuan kichiutinemij” (Mateo 7:16). Tein Biblia kijtoua mitsonpaleuis xikonmati katiyejua taneltokalis tein melauak (Juan 17:17).

¿Toni moneki tikonchiuas tein mitsonpaleuis xionmoajsi itech nejon ojti? Moneki tikonixmatis akoni techmakak tonemilis, katiyejua itokay, keniuj tamati, toni kichiujtok uan toni kineki maj tikchiuakan. *

Dios amo kineki maj sayoj titekitikan, titakuakan, timoixpetanikan uan maj tikinpiakan tochankauan. Yejuatsin kineki maj tikixmatikan uan maj iuan timotokikan. Keman tiktakamatij, tiknextiaj ke tiktasojtaj. Jesús kijtoj: “Ne nachipa nemilis kijtosneki yejua nijin: Ke in taltikpakuani ma mitsonixmatikan Tejuatsin ke tion Dios tion Yolmelauaktsin” (Juan 17:3).

DIOS TECHMACHTIA IKA BIBLIA PORIN KINEKI MAJ KUALI TINEMIKAN (ISAÍAS 48:17)

XIKONCHIUAYA TEIN MONEKI

Komo tiknekij tikyolpaktiskej Dios, xa monekis tikpataskej seki taman kemej timonejnemiltiaj. Maski tikitaskej ke ouij techkisas, okachi kuali tinemiskej komo peua tiktojtokaj ojti tein teuika nemilis nochipaya. Komo okachi tikonneki tikonmatis keniuj tamati Dios, xiontajtani se nemachtil ika Biblia itech página itech Internet kampa timoteixmatiltiaj, www.jw.org/ncj. Se itaixpantijkauj Jiova ika miak pakilis mitsonkalpanos keman okachi tionuelis.