Xionyoui kampa nesi tein kipia

Xionyoui kampa nesi tein kipia

¿Keyej tiueuentsintiaj uan timomikiliaj?

¿Keyej tiueuentsintiaj uan timomikiliaj?

DIOS amo kinekia maj timomikiIikan. Yejuatsin kinchijchiuak yektikej yekinika totatuan, Adán uan Eva. Nejon kijtosneki ke amo kipiayaj tein amo kuali itech ininnakayo nion itech inintanemilil. Tein melauj, hasta axkan kisentokaskiaj yoltoskiaj. Tikmatij nejon porin Jiova kiluij Adán maj amo kikuani se takilot tein moajsia ompa Edén, kampa takualtsinkan katka.

Dios kiluij Adán: “Itech tonal keman tikuas, yekmelauj timomikilis” (Génesis 2:17). Komo Dios kichijchiuaskia Adán kemej ueuentsintiaskia uan momikiliskia, amo taixejekol yeskia maj kiluiani nejon. Adán kimatia ke komo amo kikuaya nejon takilot, amo momikiliskia.

DIOS AMO KINEKIA MAJ TIMOMIKILIKAN

Ompa Edén moajsiaj tel miak koujtakilomej tein Adán uan Eva ika ueliskia motamakaskej, uan amo monekiskiaok kikuaskej takilot tein Dios kinnauatijka maj amo kikuanij (Génesis 2:9). Komo amo kikuaskiaj, kinextiskiaj ke kitakamatiaj Dios, akin kinmakak ininnemilis uan no kinextiskiaj ke kiitayaj ke yejuatsin kinamikia kinixyekanas.

¿KEYEJ MOMIKILIJKEJ ADÁN UAN EVA?

Komo tikitaj tein panok ne uejkauj, tikajsikamatiskej keyej Adán uan Eva momikilijkej, porin techijtakoua hasta axkan. Satanás, se ángel akin amo yolkuali, kichiuak maj se kouat tajtouani uan maj takajkayauani. Biblia kijtoua: “Axkan, kouat katka okachi tamatkej ke nochin koujtaj tapialmej tein Jiova Dios kichijchiujka. Yejua ika kiluij siuat: ‘¿Yekmelauj Dios kijtoj ke moneki amo nankikuaskej itakilo nochi koujmej tein moajsij itech xochital?’” (Génesis 3:1.)

Eva kinankilij kouat: “Itakilo koujmej tein moajsij itech xochital uelis tikuaskej. Sayoj ke itakilo kouit tein moajsi tatajko itech xochital, Dios kijtoj: ‘Moneki amo nankikuaskej, amo, moneki amo nankimatokaskej uan ijkon amo nanmikiskej’”. Satepan, kouat kijtoj: “Amo nanmikiskej. Porin Dios kimati ke itech tonal keman nankikuaskej koujtakilot, nanixtajtapouiskej uan nanmochiuaskej kemej Dios, uan nankiixmatiskej tein kuali uan tein amo kuali”. Ijkon, Satanás kiajsikamatiltij Eva ke Jiova kikajkayaujtoya uan ke amo kinmakatoya Adán uan yejua okseki taman tein kuali (Génesis 3:2-5).

Eva kineltokak tein kouat kiluij. Ompa, peuak kiita koujtakilot uan kiitak ke xa tel uelik yeskia uan kitelnekik kikuas. Yejua ika, motokij, kikuik takilot uan peuak kikua. Biblia no kijtoua: “Satepan no kimakak nejin [takilot] itakauj keman yejua yetoya iuan, uan takat peuak kikua” (Génesis 3:6).

Dios kiluij Adán: “Tonal keman tikuas, [...] timomikilis” (GÉNESIS 2:17)

¡Dios xa semi tayokoyak keman kiitak ke ikoneuan amo kitakamatkej! Yejua ika, ¿toni kichiuak? Jiova kiluij Adán: “Ika moneton itech moixko tikajsis tein tikuas hasta keman timokepas itech tal, porin ika tichijchiujtok. Porin titalnex uan talnex timokepas” (Génesis 3:17-19). Uan ijkon mochiuak, “nochi tonalmej tein Adán nemik ajsik  novecientos treinta xiujmej uan momikilij” (Génesis 5:5). Keman Adán momikilij, amo yajki iluikak oso okseko. Achto ke Jiova kichijchiuaskia ika talnex, Adán amo yetoya okseko. Yejua ika, keman momikilij oksepa mokepak talnex. Nejon kijtosneki ke ixpoliuik. ¡Semi amo kuali tein kipanok!

¿KEYEJ TIKPIAJ TAJTAKOL?

Kemej Adán uan Eva amo kitakamatkej Dios, peuak kipiaj tajtakol uan nejon kichiuak maj amo neminijok nochipaya. Ijkon, mochiujkej tajtakolejkej uan peuak moijtakoua ininnakayo. Yejua ika, tinochin tiininkoneuan tiyolij ika tajtakol. Romanos 5:12 kijtoua: “Itechkakopaka ne achtopa tagat Adán ten motajtakolmakak in tajtakol momauak ya tech nochi senmanauak. Uan no tikmatij ke ongak mikilis nochi senmanauak ika por ne tajtakol de Adán. Uan no ne mikilis mosouako uan takitskijtinemiko inpan nochi in taltikpakuani porin nochi in taltikpakuani motajtakolmakakke”.

Biblia kijtoua ke mikilis kemej yeskia se ueyi taken tein techpiki tinochin (Isaías 25:7). Nejon kijtosneki ke tinochin techijtakoua tajtakol uan mikilis. Yejua ika, tinochin “timomikiliske porin ne tagat Adán” (1 Corintios 15:22). Xa no timotajtaniaj kemej Pablo, akin katka se imomachtijkauj Jesús. Yejua motajtaniaya ox moajsia aksa akin ueliskia kipaleuis maj amo momikiliani. Yejua ika, ¿aksa uelis techpaleuis? (Romanos 7:24.)