Xionyoui kampa nesi tein kipia

Xionyoui kampa nesi tein kipia

¡Tejuatsin uelisok tionyolpakis!

¡Tejuatsin uelisok tionyolpakis!

Faizal, kitekkej itech iyolo tapajtiloyan se xiuit satepan ke momikilij isiuauj. Yejua kijtoua: “Keman nikixtajtoltia amatajkuilol Job, nikajsikamati keyej Jiova kichiuak maj moijkuilo. Nechyolseuia nikixtajtoltis itech Biblia ke aksa no tajyouij kemej nejua”. Uan no kijtoua: “Uelisok tiyolpakiskej”.

Tarsha, momikilij imomaj keman yejua katka ichpochok. Yejua kijtoua: “Nikixmatis toTachijchiujkauj, nechyolpaktia uan nechpaleuia maj nikchia maj mochiua tein kuali satepan maski nikpias kuejmolmej. Jiova uelis techpaleuis mojmostaj”.

ITECH okseki tamachtilismej tikitakej tein uelis kichiuas maj tiknemilikan ke amo titaxikoskej. Xa axkan, tejuatsin tikonpanotok se ouijkayot uan tikonnemilia ke moneki tionmosenkauas oso ke amo akin moka motekipachoua. Sayoj ke, Dios kiyolkokoua kiitas ke tiontajyouia. ¡Yejuatsin semi mitsonpatiuita!

Akin kijkuiloj Salmo capítulo 86 kijtoj ke takuaujtamatia iuan Dios. Yejua kijtoj: “Nimitsnotsa itech tonal keman nitajyouia, porin tejuatsin tinechnankilis” (Salmo 86:7). Sayoj ke, xa tionmotajtania: “¿Keniuj technankilia Dios keman titajyouiaj?”.

Maski Dios xa amo niman kijkuanis tein mitsontajyouiltia, motenkaua mitsonpaleuis xionyolseujto uan xiontaxiko. Itech iTajtol, Biblia, techiluia: “Amo teyika ximoyolkuejmolokan. Ta, nachipa ximoteixpantikan iixpantsinko Totajtsin Dios ika namonetatatautilis uan [...] Dios namechtayokolijtiyas ne yolseuilis ten [...] kinyekantinemis namoyolojuan uan namotamachilisuan” (Filipenses 4:6, 7). Xikonita keniuj seki textos itech Biblia mitsonmatiltiaj ke Dios semi moka motekipachoua.

Dios moka motekipachoua

“Totajtsin Dios amo keman kinelkauas [...] tototsitsin. Uan kachi ok Totajtsin Dios [...] namechtasojta.” (Lucas 12:6, 7.)

XIKONNEMILI NEJIN: Dios semi kinpatiuita tototsitsin. Komo ijkon, tejuan okachi techpatiuita porin techchijchiuak kemej uelis tiknextiskej seki taman tein kuali kemej yejuatsin (Génesis 1:26, 27).

“Jiova, tejua senkis tinechitani uan tinechixmati. [...] Tikita notanemililuan [...]. Xinechita, uan xikixmati notanemililuan tein nechtekipachouaj.” (Salmo 139:1, 2, 23.)

XIKONNEMILI NEJIN: Dios tel kuali mitsonixmati. Kimati tein tikonnemilia uan tein mitsontekipachoua. Maski oksekin amo kiajsikamatiskej tein tikonpanotok, Dios moka motekipachoua uan kineki mitsonpaleuis. Yejua ika, uelisok tionyolpakis.

 Dios mitsonpaleuis

“Jiova, xikaki nonetataujtil; maj notsajtsilis ika nepaleuil mouan ajsi. [...] Xinechkaki; niman xinechnankili keman nimitsnotsa. [...] Yejuatsin kikakis ininnetataujtil akin amo teyi kipiaj.” (Salmo 102:1, 2, 17.)

XIKONNEMILI NEJIN: Jiova kinelnamiki nochin akin tajyouianij uan mochoktianij (Salmo 56:8). Tejuatsin no mitsonelnamiki. Kielnamiki ouijkayomej tein tikonpanouani uan nochi tein tionmochoktiani porin semi mitsonpatiuita.

“Amo ximotekipacho, porin nejua nimoDios. Nejua nimitschikauas, kemaj, nejua nimitspaleuis [...]. Porin nejua, Jiova moDios, nikitskijtok moyekmay, Akin mitsiluia: ‘Amo ximoui. Nejua nimitspaleuis.’” (Isaías 41:10, 13.)

XIKONNEMILI NEJIN: Dios kineki mitsonpaleuis. Keman monekis, yejuatsin mitsonpaleuis.

Satepan mochiuas tein kuali

“Totajtsin Dios semi kintasojtak in taltikpakuani. Ika ya nojon Yejuatsin kualtitanik Iyojtsin Ikonetsin de Dios para ma nochi ne ten iuantsin takuautamatiske, [...] ma amo ixpoliuikan. Ta, ma kipiakan ne yek nemilis nachipa.” (Juan 3:16.)

XIKONNEMILI NEJIN: Kemej Dios semi mitsontasojta, moka kitemakak iKonetsin, Jesús. Nejon uelis mitsonpaleuis xionyolpaki axkan uan nochipaya. *

Maski semi tiontayokoya uan tikonmachilia ke amo tiontaxikouaok, xionmomachti Biblia uan xikonneltoka ke Dios kichiuas tein motenkauak. Nejon mitsonpaleuis xikonita ke uelisok tionyolpakis

^ párr. 19 Komo tikonneki tikonmatis okachi keniuj mitsonpaleuia inemilis Jesús tein kitemakak, xikonita video Ijkuak tikelnamikij imikilis Jesús, itech www.jw.org/ncj. (Xikontemo itech AMAIXMEJ > VIDEOS > TONECHIKOLUAN UAN TOTANOJNOTSALIS).