Xionyoui kampa nesi tein kipia

Xionyoui kampa nesi tein kipia

“Dios kachi namechueyichiuas” (MATEO 10:31)

¿Kiita Dios tein tikonpanoua?

¿Kiita Dios tein tikonpanoua?

TONI TECHMACHTIA TEIN DIOS KICHIJCHIUAK

Yekinika sesenta minutos satepan ke yoli se konetsin semi monekij. ¿Keyej? Porin netasojtalis tein temomaj kinextilis ikonetsin, semi kipaleuis keman moskaltijtos. *

¿Keyej se temomaj kiyekpia ika netasojtalis ikonetsin keman yoli? Tamachtijkej Jeannette Crenshaw kimelaua ke satepan ke yoli se konetsin, momiakilia hormona tein itokay oxitocina uan “kichiua maj temomaj kitasojta ikonetsin keman kiita, kinapaloua uan kichichitia” (The Journal of Perinatal Education). Ijkuak, itech temomaj no momiakilia okse hormona tein “kipaleuia maj kuali mouika iuan ikonetsin” uan maj okachi motasojtakan. ¿Keyej motelneki nejin taman?

Totachijchiujkauj akin tetasojta, Jiova, * kiixtalij maj se temomaj iuan ikonetsin motasojtakan. Tekiuaj David kitasojkamatilij Dios porin kichiuak maj yoli uan maj kuali momachili keman kinapalouaya imomaj. Kijtoj ke Jiova peuak kiyekpia ijkuak yolik. Itech se netataujtil kiluij: “Ijkuak niyetoya iijtik nomomaj uan hasta axkan, tejua tinoDios” (Salmo 22:9, 10).

XIONTANEMILI ITECH NEJIN: Komo Dios kichijchiuak temomaj kemej uelis kiyekpias ikonetsin ika netasojtalis, taixejekol maj tiknemilikan ke no toka motekipachoua itech tisejsemej porin tiikoneuan (Hechos 17:29).

BIBLIA TAMACHTIA KE DIOS KUALI TECHYEKPIA

Jesucristo, akin kuali kiixmati toTachijchiujkauj, kijtoj: “Ome tototsitsin, ¿kanachika uelis tikinnamakaske? Pues sayo ika se quinto. Uan Totajtsin Dios kinyekpixtok nijin tototsitsin uan amo kinkauas ma uetsikan komo amo kimonekiltia. Porin [...] Totajtsin Dios kinpoua namotsonuan uan Yejuatsin kuali kimati kanachi ongak. Ika ya nojon amo ximomoutikan [...]. Porin Dios kachi namechueyichiuas namejuan uan ke ne tototsitsin” (Mateo 10:29-31).

Miakej amo kinitaj keniuj tamatij tototsitsin uan okachi amo kinitaj tein uetsij talpan. Sayoj ke, toTajtsin Dios kinita sejsemej. Uan maski tel miakej totomej onkakej, yejuatsin amo okachi kinpatiuita ke tejuan. Yejua ika, senkis tikmatij nejin: Dios kiita tein mitsonpanoua. Uan no, semi moka motekipachoua.

Dios kineki maj kuali tinemikan uan techyekpia ika netasojtalis

 Biblia techyekiluia:

  • “Iixtololouan Jiova tachixtinemij itech nochi taltikpak uan ijkon kinextis ichikaualis uan ika kinpaleuis akin kipiaj ininyolo ajsitok iuan yejuatsin” (2 CRÓNICAS 16:9).

  • “Iixtololouan Jiova yetokej iniuan akin yolmelaujkej, uan kinkaki keman kitataujtiaj maj kinpaleui” (SALMO 34:15).

  • “Semi niyolpakis itech monetasojtalis tein amo tekaua, porin tikitani notajyouilis; tikajsikamati tein semi nechtekipachoua” (SALMO 31:7).

“NIKNEMILIJ KE JIOVA AMO NECHTASOJTAYA”

¿Techpaleuia tikmatiskej ke Dios semi toka motekipachoua uan techyekpia ika netasojtalis? Kemaj. Hannah * akin kayot Inglaterra, kijtoua:

“Miakpa niknemilij ke Jiova amo nechtasojtaya uan ke amo kinankiliaya nonetataujtiluan porin amo semi nitakuaujtamatia. Niknemiliaya ke nechtatsakuiltijtoya oso ke amo nechkakia porin amo teyi nichiujkej katka. Nikmachiliaya ke amo noka motekipachouaya”.

Sayoj ke, axkan Hannah senkis kineltoka ke Jiova kitasojta uan ika motekipachoua. ¿Toni kipaleuij maj kipata itanemilil? Yejua kijtoua: “Yolik nimopatak. Miak xiujmej achto nikakik se tamachtilis ika Biblia kampa ika motajtouaya ke Jesucristo toka momikilij, nejon ajsik itech noyolo uan nechpaleuij maj nikajsikamati ke Jiova nechtasojta. No nikitaya ke nechtasojtaya keman kinankiliaya nonetataujtiluan uan yejua ika, miakpa, nichokaya. Uan no, nimomachtis Biblia uan niyas nechikolmej kampa kichiuaj kemej Cristo nechpaleuiani maj okachi kuali nikixmati Jiova uan maj nikmati tein toka kimachilia. Axkan nikmati ke Jiova techtasojta, techpaleuia uan ke kineki techyekpias”.

¡Semi techyolchikauaj nejin tajtolmej! Sayoj ke ¿keniuj uelis tikonmatis ox Dios kitekipachoua tein tikonmachilia uan ox mitsonajsikamati? Tikonajsis tanankilil itech okse tamachtilis.

^ párr. 3 Kokolis tein moixmati kemej depresión posparto uelis kichiuas maj temomaj kiouijmaka kinextilis ikonetsin ke kitasojta. Sayoj ke amo moneki motajtakoltis. Tapajtianij akin kiitaj keniuj tekiti se itanemilil ompa Estados Unidos, kijtouaj ke nejin kokolis amo mochiua porin temomaj kichiuak teisa. Komo tikonneki tikonmatis okachi, xikonita tamachtilis “¿Qué es la depresión posparto?”, tein mokixtij itech ¡Despertad! 8 de junio de 2003.

^ párr. 5 Biblia tamachtia ke itokay Dios yejua Jiova (Salmo 83:18).

^ párr. 15 Itech nejin tamachtilismej mopatakej seki tokaymej.