Xionyoui kampa nesi tein kipia

Xionyoui kampa nesi tein kipia

“Moixtololouan nechitakej keman nikatka se embrión” (SALMO 139:16)

¿Kiajsikamati Dios tein tikonmachilia?

¿Kiajsikamati Dios tein tikonmachilia?

TONI TECHMACHTIA TEIN DIOS KICHIJCHIUAK

Xiontanemili keniuj semi mouikaj akin senyolij uan tel ixtamatij. Yejuan kinsentilia se taman tein oksekin amo kipiaj. Nancy Segal, akin taixyekana kampa kiitaj keniuj mouikaj akin senyolij uan kipia se iikniuj akin iuan yolik, kijtoua ke sekin “kuali moajsikamatij keman monojnotsaj”. Se siuat kijtoj keniuj mouika iuan iikniuj akin iuan yolik: “Senkis timoixmatij”.

¿Keyej tel kuali moajsikamatij? Seki taman tein moajsini kinextia ke maski tapaleuia kemej moskaltiskej uan kani moskaltiskej, ADN * tein yejuan kipiaj okachi kichiua maj tel kuali mouikakan.

XIONTANEMILI ITECH NEJIN: Kemej Dios kiixtalij keniuj tichijchiujtoskej, taixejekol maj tiknemilikan ke yejua akin okachi kuali techajsikamati. Yejua ika, David, se akin kijkuiloj salmo, kijtoj: “Tinechyekpiak itech iijtik nomomaj. Noomiyouan amo motatijkej moixpan keman nechichtakachijchiujkej [...]. Moixtololouan nechitakej keman nikatka se embrión, uan nochi tein kipia itech moamaix ijkuiliujtoya” (Salmo 139:13, 15, 16). Dios amo sayoj kimati uan kiajsikamati keniuj tichijchiujtokej, ta no keniuj titamatij porin tataman tein tikpanouanij itech tonemilis. Yejua ika uelis tikyekmatiskej ke sayoj yejuatsin senkis techajsikamati.

BIBLIA TAMACHTIA KE DIOS KUALI TECHAJSIKAMATI

Tekiuaj David motataujtij: “Jiova, senkis tinechitani uan tinechixmati. Tejua tikmati keman nimotalia uan keman nimeua. Tikita notanemililuan maski uejka timoajsi. Amo onkak nion se tajtol itech nonenepil, sayoj ke, ¡xikita! Jiova, nochi kuali tikmatiya” (Salmo 139:1, 2, 4). Uan no, Jiova kimati tein tikyolmachiliaj, hasta tein tiknejnekij (1 Crónicas 28:9; 1 Samuel 16:6, 7). ¿Toni techmachtia nejin kemej tamati Dios?

Techmachtia ke, maski keman timotataujtiskej amo nochipa tikmatiskej tikijtoskej tein tiknemiliaj uan tein tikmachiliaj, toTachijchiujkauj kimatiya. Yejuatsin kiita tein tikchiuaj, uan no kiajsikamati keyej tikchiuaj. Dios no ueli kimati tein tikchiuaskiaj komo taman tein tikpanoskiaj. Yejuatsin techchijchiuak kemej uelis titetasojtaskej uan yejua ika uelis senkis tikmatiskej ke kineki kiixmatis uan kiajsikamatis kuali tanemililmej tein tikpiaj uan tein techolinia maj tikchiuakan teisa (1 Juan 4:7-10).

Dios kiita nochi. Toka motekipachoua uan okachi kuali techajsikamati

 Biblia techyekiluia:

  • “Totekotsin techualitstok uan techyekpixtok porin tejuan tiyolchipauke [...]. Uan Totekotsin no kuali techkakilijtinemi tonetatatautilis” (1 PEDRO 3:12).

  • Dios motenkaua: “Nimitsmakas taajsikamatilis uan nimitsmachtis itech ojti kampa moneki tiyas. Nejua nimitsitstos uan ijkon nimitsyolmajxitis” (SALMO 32:8).

DIOS SEMI TEIKNELIA

¿Uelis techpaleuis maj tikixnamikikan ouijkayomej tikmatiskej ke Dios techajsikamati? Xiontanemili itech tein kipanok Anna akin kayot Nigeria. Yejua kijtoua: “Semi nimotekipachojtoya uan yejua ika nimotajtaniaya ox tapaleuiaya maj niksentoka niyolto. Keman nechajxilijkej cáncer de pecho, nonamik momikilijkaya uan nosiuapil yetoya kaltapajtiloyan porin kipiaya se kokolis tein moixmati kemej hidrocefalia (ijkuak mosentilia at itech se ikuatixyo). Semi ouij katka niyetos kaltapajtiloyan keman nosiuapil no ompa moajsia uan no porin nechtekkej, nechiuilijkej quimioterapia uan radioterapia”.

¿Toni kipaleuij Anna maj taxiko? Yejua kijtoua: “Nikuelitaya nitanemilis itech textos kemej Filipenses 4:6, 7, kampa kijtoua ke ‘Dios namechtayokolijtiyas ne yolseuilis ten kachi kuika uelilis hasta amo uelis se kajsikamatis ok de keniu [...], ma yejua kinyekantinemis namoyolojuan uan namotamachilisuanʼ. Nochipa keman nikelnamikia nejin tajtolmej nikmachiliaya ke okachi nimotokiaya iuan Jiova, nikmatia ke yejuatsin okachi kiajsikamatia ke nejua tein nikmachiliaya. No semi nechyolchikaujkej akin pouij itech notaneltokalis.

”Maski niksentoka nimokokoua, okachi kuali tiyetokej. Timochikauaj tiyolpakiskej maski tikpiaskej kuejmolmej porin Jiova nochipa techpaleuia. Santiago 5:11 kijtoua: ‘Tikinpouaj keme tatiochiualme de Dios nekes ten taxikoaj ika in tajyouilis. ¿Xe namejuan amo keman nankakinij kenin in Job taxikoj uan amo keman tasematik? Uan ijkon nankitakke ya de kenin kimonekiltij Dios para kipaleuij Job porin Yejuatsin semi teyoliknelia uan teyoltasojta’”. Jiova kuali kiajsikamatia ouijkayomej tein kipanotoya Job uan uelis senkis tikmatiskej ke no kiajsikamati tein tikpanouaj.

^ párr. 4 ADN kijtosneki ácido desoxirribonucleico; nejin kemej se amatajkuilol tein semi tsikitsin kampa moijtoua keniuj tamatis nochi tein yoltok.