Xionyoui kampa nesi tein kipia

Xionyoui kampa nesi tein kipia

¿Keniuj uelis mitsonpaleuis inetasojtalis Dios?

¿Keniuj uelis mitsonpaleuis inetasojtalis Dios?

Dios kichijchiuak tonakayo kemej uelis iselti pajtis. Keman aksa moteki, mouasonia oso motsoponia, tonakayo niman kichiua tein moneki tein tapaleuia maj amo eskisaok, uan maj motsakua kampa takokol.

XIONTANEMILI ITECH NEJIN: Komo Dios kichijchiuak tonakayo kemej uelis iselti pajtis, ¿amo tikonnemilia ke no uelis kijkuanis nochi tein mitsontayokoltia? Semej akin kijkuiloj salmos senkis kimatia ke Dios ueli kinyolseuia akin tayokoxtokej (Salmo 147:3). Sayoj ke, komo tikonpanotok se ueyi tekokojkayot, ¿keniuj tikonmati ke Dios kemej yeskia ‘kitetsilos ika tilmaj kampa tiontakokol’ axkan uan satepan?

BIBLIA TAMACHTIA KE DIOS TECHTASOJTA

Dios techiluia: “Amo ximoui, porin nejua niyetok mouan. Amo ximotekipacho, porin nejua nimoDios. Nejua nimitschikauas, kemaj, nejua nimitspaleuis” (Isaías 41:10). Tikmatiskej ke Jiova techtasojta, techyolchikaua maj tikixnamikikan ouijkayomej uan techyolseuia. Isaías kijtoj: “Kimaka chikaualis akin sioujtok uan ajsitok chikaualis akin amo chikauak” (Isaías 40:28, 29). Pablo, se imomachtijkauj Jesús, no kijtoj: “Dios namechtayokolijtiyas ne yolseuilis ten kachi kuika uelilis” (Filipenses 4:4-7, 9).

Biblia techpaleuia maj titakuaujtamatikan itech tatiochiualismej tein Dios motenkauak kiualkuis. Apocalipsis 21:4, 5 kijtoua toni kichiuas Dios uan keyej uelis iuan titakuaujtamatiskej.

  • ‘Techelkaualtis tochokilisuan’. Jiova kitamis nochi tein techtajyouiltia uan tein techtekipachoua, maski oksekin kiitaskej ke amo uejueyi kuejmolmej.

  • “Tokotsyetika tech ne nitayekankatrono” ompa iluikak, akin kipia nochi chikaualis uan Tekiuaj akin kichijchiuak nochi, kikuis ichikaualis uan itanauatil uan kichiuas maj amo oksepaok titajyouikan uan techpaleuis keman monekis.

  • Jiova senkis techiluia ke tein motenkauak “melau”. Nejin kijtosneki ke, Jiova, Dios akin melauak, ika nochi tein kichiuani kinextia ke kichiuas nochi tein motenkauak.

“‘Kinelkaualtis de ninchokilisuan de nochi itaneltokakauan. Uan amo aken momikilis ok; uan amo aken mochoktis ok; uan amo aken motekipachos ok; uan amo aken yoltajyouis ok. Uan ijkon yeski porin nochi tajtamik ya de ne achtopa onkaya’. Uan Yejuatsin ten tokotsyetika tech ne nitayekankatrono kijtoaya ijkuin: ‘Xikitakan, Nejuatsin nikyankuikatalis nochi ten ongak’. Uan Yejuatsin nechilij ijkuin: ‘Xikijkuilo nochi ten nimitsilijtok porin notajtoluan nochi kuika ten melau’” (Apocalipsis 21:4, 5).

Biblia uan tachijchiualis techpaleuiaj maj tikixmatikan toTajtsin Dios. Tachijchiualis kemej yeskia techyoleujtok maj kuali timouikakan iuan Dios uan Biblia senkis techiluia: “Ximotokikan iuan Dios uan Yejuatsin no motokis namouan” (Santiago 4:8). Uan Hechos 17:27 no kijtoua: “Amo uejka yetika de cada senme de tejuan”.

Ijkon kemej okachi tikonixmatis Dios, okachi tikonmatis ke moka motekipachoua (1 Pedro 5:7). ¿Keniuj tapaleuia se takuaujtamatis iuan Jiova?

Xiontanemili itech tein kipanok Toru, se takat akin kayot Japón. Maski imomaj kimachtij maj monejnemilti kemej Cristo, peuak mouika iniuan yakuza, akin kichiuaj tein amo kuali. Yejua kijtoua: “Niknemiliaya ke Dios nechtauelitaya uan keman momikiliaya se akin nikixmatia nikitaya kemej yeskia nechtatsakuiltijtoya, okachiok keman momikiliaya se akin niktasojtaya”. Toru kijtoua ke kemej monejnemiltiaya kichiuak maj “semi amo teikneli”. Keman kielnamiki tein kinejnekia, kijtoua: “Niknekia nimikis keman nikatka nitelpochok uan maj nochin nechixmatinij porin nikmiktij se akin okachi chikauak ke nejua”.

Sayoj ke, ijkuak yejua uan inamik, Hannah, peujkej momachtiaj Biblia, Toru peuak kipata kemej monejnemiltiaya uan kemej mochijchiuaya. Hannah kijtoua: “Semi nikmoujkaitak nochi tein kipatak nonamik”. Axkan, Toru senkis kijtoua: “Nikmati ke Dios yekmelauj nemi uan  motekipachoua itech tisejsemej. Amo kineki maj nion akin momikili uan ika miak pakilis kintapojpoluia akin moyolnonotsaj. Uelis tiktapouiskej tein amo akin tiktapouiskiaj uan tein amo akin kiajsikamatiskia. Amo uejkaua, Jiova kitamis nochi ouijkayomej, tekokojkayot uan tajyouilis. Uan hasta axkan, semi techpaleuia. Semi toka motekipachoua uan techyekpia keman titayokoxtokej” (Salmo 136:23).

Kemej kinextia tein kipanok Toru, tikmatiskej ke Dios ueli kitamia nochi tein techtajyouiltia uan ke amo uejkaua kitamis, kichiua maj tikchiakan tein kuali uan no techpaleuia maj kuali tinemikan. Kemaj, maski tinemiskej kampa semi onkak tajyouilis, uelis mitsonpaleuis inetasojtalis Dios.