Xionyoui kampa nesi tein kipia

Xionyoui kampa nesi tein kipia

Amo uejkaua Dios kitamis tajyouilis

Amo uejkaua Dios kitamis tajyouilis

Habacuc, se takat akin katka yolkuali uan kipiaya itatiochiualis Dios, kijtoj: “¿Hasta kemanian, Jiova, moneki nitajtanis nepaleuil, sayoj ke amo tikaki? ¿Hasta kemanian moneki nitajtanis nepaleuil porin onkak tateuilis, uan amo teyi tikchiua?” (Habacuc 1:2, 3). ¿Kijtoj nejon porin amo takuaujtamatia iuan Dios? Amo. Tein melauj, Dios kiluij ke kiixtalijkaya se tonal keman kitamiskia tajyouilis (Habacuc 2:2, 3).

Keman titajyouiaj oso se akin tikontasojta tajyouia, niman uelis tikonnemilis ke Dios monekiskiaya tayektalis. Sayoj ke, Biblia techyekiluia: “Amo melau keme sekin kijtoaj ke Totekotsin uejkauak ya [...;] Yejuatsin amo kineki ma senme ixpoliuikan. Ta, Yejuatsin kimonekiltia ke tinochin ma timoyolnemilikan de totajtakoluan” (2 Pedro 3:9).

¿KEMANIAN DIOS KITAMIS TEIN AMO KUALI?

Amo uejkaua Dios kitamis tein amo kuali. Jesús kijtoj ke moitaskia seki taman tein kinextiskia ke timoajsij itamian nochi tein mochiujtok itech taltikpak uan no kijtoj ke kiitaskiaj se oloch taltikpakneminij akin sennemiskiaj seki tonalmej (Mateo 24:3-42). Axkan mochiujtok nejon uan kinextia ke Dios amo uejkaua kitamis nochi tein amo kuali. *

Sayoj ke ¿uelis Dios kitamis tajyouilis? Keman Jesús yetoya nikan taltikpak, kinextij ke Dios ueli kitamia tajyouilis. Maj tikitakan seki taman.

Tetsaujmej. Se tonal, keman Jesús uan imomachtijkauan yajtoyaj itech ueyiat ompa Galilea, peuak chikaujkaejeka uan moitaya ke barco pankalakiskia. Ijkuak, Jesús kinextij ke yejua uan iPopaj uelij kitsakuiliaj tetsaujmej (Colosenses 1:15, 16TNM). Jesús sayoj kijtoj: “Ximotamatili uan amo ximoolini ok. Uan ijkuakon motamatilij in ejekat uan in ueyiat” (Marcos 4:35-39).

Kokolismej. Miakej kimatiaj ke Jesús uelia kinpajtiaya akin amo tachiayaj uan koxojmej, uan no akin kipiayaj epilepsia, lepra uan oksekin akin mokokouayaj. Biblia kijtoua ke “kinpajtij nochi in kokoyani” (tejuan tiktalilijkej cursivas; Mateo 4:23, 24; 8:16; 11:2-5).

Mayan. Keman Jesús kichiuak itekiyo Dios nikan taltikpak, ojpa kikuik chikaualis tein iPopaj kimakaka uan ika kimiakiltij tepitsin takual tein kipiaya uan kintamakak tel miakej (Mateo 14:14-21; 15:32-38).

Mikilis. Keman Jesús yetoya nikan taltikpak, oksepa kinmakak nemilis eyin, semej kiuikayaya miket naui tonal. Nejon senkis kinextia ke Jiova ueli kinmaka nemilis akin momikilijkejya (Marcos 5:35-42; Lucas 7:11-16; Juan 11:3-44).

^ párr. 5 Komo tikonneki tikonmatis okachi tein kinextiskia ke timoajsij itamian tonalmej, xikonita capítulo 9 itech amaix ¿Toni yekmelauj tamachtia Biblia?, tein kichijchiujkej itaixpantijkauan Jiova. Uelis tikontemouis uan amo moneki tikonixtauas itech www.jw.org/ncj.