Xionyoui kampa nesi tein kipia

Xionyoui kampa nesi tein kipia

1 Techpaleuia maj amo tikpiakan seki kuejmolmej

1 Techpaleuia maj amo tikpiakan seki kuejmolmej

Biblia kijtoua ke tein tayolmajxitia ualeua itechkopa Jiova uan ika uelis se ‘tamachtijtinemis uan no para ika [se ] tayolmelautiyas uan para ika se tamachtijtiyas [...] de keniu chipaukanemiskeʼ (2 Timoteo 3:16). ¿Melauak nejon? Maj tikitakan keniuj itamatilis Biblia kinpaleuiani miakej maj kikauakan seki taman tein teualkuilia uejueyi kuejmolmej.

SE TEL TAYIS TEIN TEUINTIJ

Diana, akin ika titajtojkej itech okse tamachtilis, kiitak ke netekipacholis kichiujtoya maj okachi tayi tein teuintij. Biblia amo kijtoua ke amo uelis se tayis, sayoj ke kijtoua: “Amo ximoajsi iniuan akin tel tayij vino” (Proverbios 23:​20). Se tel tayis tein teuintij kichiua maj se ueyi kokolispeua, maj se mokualanti iniuan oksekin uan maj xijxiujtika millones momikilikan achto ke ueuentsintiaskej. Komo mochiuaskia tein Biblia tayolmajxitia, amo onkaskiaj nejon ouijkayomej.

Yejua nejon tein kichiuak Diana, akin axkan kijtoua: “Nikitak ke tayil amo nechyolseuiaya. Nikchiuak tein tayolmajxitia Filipenses 4:6, 7: “Amo teyika ximoyolkuejmolokan. Ta, nachipa ximoteixpantikan iixpantsinko Totajtsin Dios ika namonetatatautilis”. Mojmostaj youak, ijkuak semi nimotekipachouaya, niktataujtiaya Jiova uan ni­kil­uiaya keniuj nimomachiliaya: tein kichiuaya maj nikualani, maj nimoyolkoko, maj niyolkuejmoliui... uan nikiluiaya maj nechpaleui maj kuali nitanemili. Mostika, nimochikauaya nikixtopeuas nejon tein nikmachiliaya. Niktataujtis Jiova nechpaleuiaya maj okachi nikita tein nikpiaya uan amo tein amo nikpiaya. Nikixtalij amo kemanok nitayis tein teuintij porin nikpatiuitaya yolseuilis tein nikajsika uan amo niknekia nikpolos”.

 AUILNEMILIS

Auilnemilis kiualkui ueyi tekokojkayot uan tajyouilis. Sayoj ke, tein Biblia tayolmajxitia uelis techpaleuis maj amo tikpanokan nejon porin technejmachtia maj amo tikchiuakan seki taman, kemej se kinextis ke se kiueuelita aksa maski sayoj se mauiltijtok, oso se kiitas auilnemilis. Se telpoch akin itokay Samuel kijtoua: “Amo ouij katka niknextis ke nikueuelitaya aksa, maski sayoj nimauiltijtoya... Kemansa nion nechyolnotsaya, sayoj ke nikitaya ke yejua kemaj nechueuelitaya uan nejon nechyolpaktiaya”. Uan kemej semi kiluiayaj ke kichiuaya nejon, hasta keman amo kitemouaya kichiuas, Samuel kiixtalij okachi kichiuas, sayoj ke amo kuali momachiliaya. Axkan kijtoua: “Se kinextis ke se kiueuelita aksa maski sayoj se mauiltijtok teijtakoua, kichiua xiktemo sayoj tein tejua mitsyolpaktis”.

Samuel kiixtajtoltij itech jw.org, Internet kampa timoteixmatiltiaj, se tamachtilis tein kinchijchiuiliaj telpochmej uan ichpochmej. No tanemilij itech Proverbios 20:11, tein kijtoua: “Hasta se okichpil kiixmatij ika tein kichiua, komo monejnemiltia ika chipaujkayot uan melaujkayot”. ¿Keniuj kipaleuij nejin tayolmajxitilis? Samuel kiitak ke tein kichiuaya amo katka chipauak. Yejua kijtoua: “Nikitak ke akin ijkon kichiua amo yeski se kuali tetakauj. Uan niknemilij tein kimachiliskia siuat akin iuan nimonamiktiskia komo nechitaya ke nikueuelitstok okse siuat. Nikajsikamatik ke nejin taman teijtakoua. Maski amo ouij se kinextis ke se kiuelita aksa, amo kijtosneki ke kuali yetok”. Samuel amo kichiuaok uan nejon kipaleuij maj amo auilnemi.

Tein kichiuaya Antonio okachi tamouilil katka: kitelitaya auilnemilis. Maski semi kitasojtaya inamik, amo uelia kikauaya tein kichiuaya. Yejua kijtoua ke semi kipaleuij tein tayolmajxitia 1 Pedro 5:8: “Xikuatamatkanemikan uan ximoyektachilijtokan porin ne amokuali Satanás namechtauelitstinemi, [...] uan namechyeualojtinemi keme yeskia se kuoutajtekuani ten kitemotinemi akoni kixixikos”. Antonio kijtoua: “Kampa yeski ueli tikitaj taixkopimej kampa nesi auilnemilis uan uelis mokauaskej itech totanemilil. Nejon texto nechpaleuij maj nikita akoni kitalia nejon tayejyekolismej. Niktemoj nikelnamikis ke nejon pitsotik tamouisolmej ualeuayaj itech Satanás. Axkan nikmati ke sayoj Jiova uelis nechpaleuis maj niknexti tamatilis uan maj nikyekpia notanemilil, noyolo uan nonenamiktilis”. Antonio kiselij nepaleuil uan uelik kikauak nejon tein amo kuali. Uan nejon kipaleuij maj amo kipia uejueyi ouijkayomej.

Senkis tikitaj ke Biblia kipia tayolmajxitilismej tein techpaleuiaj maj amo tikpiakan uejueyi kuejmolmej. Sayoj ke, ¿komo okachi moskaltiaj kuejmolmej uan amo tikmatij keniuj tikyektaliskej? Maj tikitakan keniuj iTajtol Dios uelis techpaleuis.

Tein tayolmajxitia Biblia uelis techpaleuis maj amo timokuejmolkalakikan itech seki taman