Xionyoui kampa nesi tein kipia

Xionyoui kampa nesi tein kipia

Nitanojnotstok iuan nonamik, Tabitha

 ITAJTOL DIOS KIPATAK ININNEMILIS

Amo nikneltokaya Dios

Amo nikneltokaya Dios
  • XIUIT KEMAN YOLIK: 1974

  • ALTEPET: REPÚBLICA DEMOCRÁTICA ALEMANA

  • OKSEKI TAMAN: AMO KINELTOKAYA DIOS

TEIN ACHTO NIKPANOK

Niyolik itech se xolal tein poui ompa Sajonia, tein achto katka República Democrática Alemana (RDA). Itech nokalijtik tinochin timonextiliayaj netasojtalis uan notatuan nechmachtijkej maj kuali nimonejnemilti. Kemej RDA katka se altepet tein kitemouaya maj nochin kipianij tein moneki, miakej ompa Sajonia amo kiitayaj ke taneltokalis monekia. Nejua amo nikneltokaya Dios. Moajsik ome taman tanemililmej tein nechixyekankej ijkuak katka ninojnel hasta keman nikpiak 18 xiujmej: amo nikneltokas Dios uan comunismo.

¿Keyej nechyolnotsaya comunismo? Porin nikuelitaya maj nochin kipiakan tein moneki. Hasta nikneltokaya ke amo akin kipoloskia tein moneki komo akin tominpiayaj kinxelouiliayaj akin kipanotoyaj tatasojtilis. Yejua ika peuak nitekiti iniuan telpochmej akin kipaleuiayaj comunismo. Keman nikpiaya 14 xiujmej, peuak nikita maj mosentili amat tein amo kualtiaok uan maj mochijchiua kemej oksepa uelis mokuis. Tekiuanij akin kiixyekanayaj xolal Aue semi nechtasojkamatilijkej uan nechmakakej se netetayokolil. Maski semi katka nitelpochok, nikinixmatik sekin akin pouiaj itech política tein semi moixmatiaj itech altepet. Nikmachiliaya ke kuali tein nikchiujtoya uan ke nikpiaskia tein kuali satepan.

Sayoj ke, amo ijkon panok. Itech xiuit 1989 kiuetsiltijkej tepamit Berlín, uan ijkon tamik comunismo ompa Europa del Este. Miak taman tein nikchiaya amo mochiuak. Niman nikitak ke mochiujka miak taman teikamauiltilis ika comunismo. Kemej nejin: akin amo kipaleuiayaj kinitayaj kemej akin amo teyi chiuanimej. Sayoj ke ¿keyej ijkon kichiuayaj? ¿Amo tamachtiaya comunismo maj nochin kipiakan tein moneki? ¿Oso sayoj katka se takajkayaualis? Nochi nejon kichiuak maj senkis nimotekipacho.

Mopatak tein niktayekanaltiaya, yejua ika, peuak nechyolnotsa tatsotson uan niktapaluis taixkopimej. Peuak nimomachtia tatsotson itech se kaltamachtiloyan porin niknekia niyas ueyi kaltamachtiloyan; senkis niknekia nitekitis kemej tatsotsonkej uan nikintapaluis taixkopimej. Amo nimonejnemiltijok kemej nechmachtijkaj keman katka ninojnel. Sayoj niktemouaya nimoyolpaktis; hasta peuak nimoixmati iniuan miakej ichpochmej. Sayoj ke nion tatsotson, nion taixkopimej tein nikintapaluiaya  nion kemej ninemia, nechpaleuijkej maj niyolseujto uan nejon niknextiaya hasta itech taixkopimej tein nikintapaluiaya. Nimotajtaniaya: ¿Toni panos satepan? ¿Keyej tinemij?

Keman nikajsik tanankililmej tein niktemojtoya, nikmoujkaitak. Se tiotak keman nimoajsia ompa kaltamachtiloyan, nimotalij iniuan seki momachtianij akin ika tajtojtoyaj tein panos satepan. Iniuan moajsia Mandy, * se itaixpantijkauj Jiova akin kuali nechyolmajxitij. Nechiluij: “Andreas, komo tikneki tikajsis itanankililuan netajtanilmej tein tikpia ika nemilis uan tein panos satepan, xiktemo tein kijtoua Biblia”.

Niomeyolouaya, sayoj ke niknekia nikmatis. Mandy nechnextilij amatajkuilol Daniel capítulo 2, uan nikmoujkaitak keman nikixtajtoltij. Nejin tein achto moijtojka ika tajtoua seki uejueyi taltikpaktekiuajyomej tein ajsi hasta itech totonaluan tein kichiujkej. Ompa, Mandy nechnextilij okseki taman tein kijtoua Biblia ke mochiuas satepan. Ijkuak nikajsik tanankililmej tein niktemojtoya. Sayoj ke ¿akoni kijkuiloj nochi nejon? ¿Akoni uelik senkis kijtoj tein mochiuaskia satepan? ¿Kinextiaya nejon ke nemi Dios?

ITAJTOL DIOS KIPATAK NONEMILIS

Itechkopa Mandy nikixmatik Horst uan inamik Angelika, akin itaixpantijkauan Jiova. Yejuan nechpaleuijkej maj okachi kuali nikajsikamati Biblia. Nikitak ke sayoj itaixpantijkauan Jiova nochipa kikuij itokay Dios uan kiteixmatiltiaj (Salmo 83:18; Mateo 6:9). Nikmatik ke Jiova kineki maj tinemikan nochipaya nikan taltikpak keman mochiuas se xochital. Salmo 37:9 kijtoua: “Akin mochiaj itech Jiova, yejuan ininaxkatis taltikpak”. Semi nechyolpaktij nikmatis ke nochin akin mochikauaj monejnemiltiskej kemej kijtoua itanauatiluan Dios uelis kiseliskej nejon tatiochiualis.

Nechouijmakak nimopatas uan ninemis ijkon kemej kijtoua Biblia. Semi nimoteixmatiltij keman nitatsotsonaya uan nikintapaluiaya taixkopimej, nejon kichiuak maj nimoueyineki, yejua ika monekik nimochikauas niknextis yolyemanilis. Uan no, nechouijmakak nikauas auilnemilis. Semi niktasojkamatilia Jiova maj amo yolijsiui, maj teajsikamati uan maj kinnextili netasojtalis akin mochikauaj kichiuaskej tein Biblia tamachtia.

Ijkuak katka ninojnel hasta keman nikpiak dieciocho xiujmej amo nikneltokak Dios uan nimoixyekanak ika comunismo, sayoj ke Biblia nechpaleuiani maj yolik nimopatatiuj. Tein nimomachtij nechpaleuij maj nikmati keyej ninemi uan maj amo ika nimotekipacho tein panos satepan. Itech xiuit 1993 nimoauij uan nimochiuak itaixpantijkauj Jiova uan itech xiuit 2000 nimonamiktij iuan Tabitha, se itaixpantijkauj Jiova akin yolpaki kitekilis yejuatsin. Tiomen semi timochikauaj nochipa tikinmachtiskej oksekin tein Biblia kijtoua. Ijkon kemej nejua, miakej akin nikinmachtia no kinixyekanani comunismo uan amo kineltokayaj Dios. Semi nechyolpaktia nikinpaleuis oksekin maj kiixmatikan Jiova.

TONI TEIN KUALI NIKSELIANI

Keman peuak nimouika iniuan itaixpantijkauan Jiova, notatuan momoujtijkej. Sayoj ke ijkon kemej panouanij xiujmej, kiitanij keniuj semi nechpaleuiani. Axkan niyolpaki porin momachtijtokej Biblia uan youij nechikolmej tein kipiaj itaixpantijkauan Jiova.

Tabitha uan nejua semi tiyolpakij ijkuak timochikauaj tiktakamatiskej tayolmajxitilismej tein Biblia kinmaka namikuanij kemej: amo se mokajkayauas iuan okse aksa. Nejon kisentoka kichikaua tonenamiktilis (Hebreos 13:4).

Axkan nikmatiya keyej ninemi uan amo nechtekipachouaok tein panos satepan. Nipoui iniuan itaixpantijkauan Jiova akin moajsij semanauak taltikpak tein kemej yeskiaj se kalyetouanij akin kipiaj yolseuilis uan kuali mouikaj. Itech nejin kalyetouanij, amo akin okachi ueyichiujkej, se taman tein nochipa itech nitaneltokak uan tein nochipa niktemoj.

^ párr. 12 Mopatak tokayit.