Xionyoui kampa nesi tein kipia

Xionyoui kampa nesi tein kipia

 TAMACHTILIS 4

Maj se kichiua tein moneki

Maj se kichiua tein moneki

¿KENIUJ SE KINEXTIA?

Akin kichiua tein moneki okachi takuaujtamach, kichiua nochi tein kiluiaj uan kichiua keman moneki.

Maski konemej nojnelmejok, uelis momachtiskej kichiuaskej tein moneki. Itech se amatajkuilol moijtoua ke keman se konetsin kipia se xiuit uan eyi metsti, ueli kichiuaya seki tekimej, uan keman kipia se xiuit uan tajko, peua kinpaleuisnekia itatuan. Ompa no moijtoua ke itech miak xolalmej, miakej tetatmej peua kinmachtiaj ininkoneuan maj tapaleuikan kalijtik keman kipiaj makuil hasta chikome xiuit. Uan maski semi nojnelmejok, kuali kichiuaskej seki tekimej (Parenting Without Borders).

¿KEYEJ MOTELNEKI MAJ SE KICHIUA TEIN MONEKI?

Itech miak altepemej, miakej telpochmej youij nemitij okseko. Sayoj ke, keman kipanouaj ouijkayomej oksepa mokepaj iniuan inintatuan. Kemansa, ijkon kichiuaj porin inintatuan amo keman kinnextilijkej maj kuali kitekitiltikan tomin, maj tapaleuikan kalijtik oso maj kichiuakan tein moneki.

Yejua ika, okachi kuali xikonmachti mokoneuj maj kichiua tein moneki keman nojnelok uan ijkon kimatis tein moneki kichiuas keman ueyias. Itech se amatajkuilol moijtoua ke tejuatsin xa amo tikonneki maj mokoneuj amo kimati keniuj moixyekanas satepan ke kiajxitis 18 xiujmej porin achto nochipa tikonpaleuiaya (How to Raise an Adult).

¿KENIUJ TIKONMACHTIS MOKONEUAN MAJ KICHIUAKAN TEIN MONEKI?

Xikonmaka seki tekimej kalijtik.

BIBLIA KIJTOUA: “Itech nochi taman tekit chikauak onkak tein kuali” (Proverbios 14:23).

Akin nojnelmejok nochipa kinekij kinpaleuiskej inintatuan. Yejua ika, xikonkauili seki tekimej kalijtik tein uelis kichiuaskej.

Seki tetatmej amo kiniluiaj ininkoneuan maj tapaleuikan kalijtik porin kinemiliaj ke kinkauiliaj miak tekit kaltamachtiloyan.

Sayoj ke, konemej akin tapaleuiaj kalijtik okachi kuali momachtiaj kaltamachtiloyan, porin momatij kichiuaskej tein kinnauatiaj inintatuan. Uan no, itech se amatajkuilol tein achto ika titajtojkej, moijtoua: “Komo amo tikinkauaj tokoneuan keman nojnelmejok maj techpaleuikan keman kinekij kichiuaskej, kinemiliskej ke amo moneki kinpaleuiskej oksekin [...]. No momatiskej maj oksekin kichiuakan tein yejuan kinekiskej” (Parenting Without Borders).

 Itech nejon amatajkuilol no moijtoua ke keman konemej tapaleuiaj kalijtik, momachtiaj kinpaleuiskej oksekin uan amo kichiuaskej sayoj tein yejuan kinekij. No kinpaleuia maj kiajsikamatikan ke semi tapaleuia tein kichiuaj kalijtik uan ke moneki kichiuaskej.

Xikonpaleui mokoneuan maj kiyektalikan tein amo kuali kichiuaj.

BIBLIA KIJTOUA: “Xikaki tayolmajxitilis uan xikseli tamejmelaualis, uan ijkon timochiuas titamatkej satepan” (Proverbios 19:20).

Komo mokoneuj kichiua tein amo kuali, kemej ijkuak kiuejueloua teisa tein amo iaxka, amo xikonijto ke amo yejua kichiuak. Maski konemej nojnelmejok uelisya kijtoskej keman amo kuali kichiujkej teisa. Yejua ika, mokoneuj uelis tajtanis maj kitapojpoluikan uan xa hasta kiyektalis tein kijtakoj.

Komo mokoneuan kiajsikamatij tein amo kuali tein kichiujkej, kinpaleuis:

  • maj kijtokan tein kichiujkej

  • maj amo kinpantikan oksekin

  • maj amo motenpaleuikan

  • maj tajtanikan maj kintapojpoluikan keman monekis