Xionyoui kampa nesi tein kipia

Xionyoui kampa nesi tein kipia

 TAMACHTILIS 6

Maj kuali se monejnemilti

Maj kuali se monejnemilti

¿KENIUJ SE KINEXTIA?

Akin kuali monejnemiltia kimati tein kuali yetok maj se kichiua uan tein amo. Yejua amo kichiua tein amo kuali keman kipanoua seki taman, ta nochipa kichiua tein kuali hasta keman amo akin kiita.

¿KEYEJ MOTELNEKI MAJ KUALI SE MONEJNEMILTI?

Axkan, konemej kimatij miak taman tein amo melauak ika tein kiniluiaj akin iniuan momachtiaj, keman kikakij tatsotson uan keman kiitaj películas oso televisión. Nejon tein kinmatiltiaj uelis kichiuas maj amo kimatikan toni kuali uan toni amo kuali yetok maj se kichiua.

Nejon okachi kinpanoua telpochmej uan ichpochmej. Itech se amatajkuilol moijtoua ke yejuan moneki kimatiskej ke ininuampoyuan uan oksekin, kinchikaujkauiskej maj kichiuakan seki taman tein miakej kiuelitaj. Ompa no moijtoua ke yejuan moneki momachtiskej kichiuaskej tein kimattokej ke kuali yetok maski akin iniuan mouikaj amo kiuelitaskej (Beyond the Big Talk). Yejua ika, tetatmej moneki kinmachtiskej ininkoneuan tein kuali achto ke mochiuaskej telpochmej oso ichpochmej.

¿KENIUJ TIKONMACHTIS MOKONEUAN MAJ KUALI MONEJNEMILTIKAN?

Xikonilui tein kuali uan tein amo kuali yetok.

BIBLIA KIJTOUA: “Ten yek yolmajsitokke [...] kuali ueli ya kixejekojtiyaske de toni kuali tamachilis uan de toni amokuali tamachilis” (Hebreos 5:14).

  • Xikonilui tein moneki kichiuaskej uan tein amo. Xikonilui mokoneuj tein kuali yetok maj kichiua uan tein amo. Uelis tikoniluis: “Nejin kuali yetok. Nejin amo kuali yetok”, “Nejin kinextia ke titakuaujtamach. Nejin kinextia ke amo titakuaujtamach”, “Nejin kinextia ke titapoujkaita. Nejin kinextia ke amo titapoujkaita”. Yolik, mokoneuj peuas kichiuas tein kuali yetok uan amo tein amo kuali yetok.

  • Xikonmelauili keyej seki taman kuali oso amo kuali yetok. Xikonpaleui mokoneuj maj kuali taixejeko. Uelis tikontajtanis: “¿Keyej kuali yetok maj se melaujkanemi?”, “¿Keyej komo aksa takajkayaua amo kinekiskejok iuan mouikaskej?”, oso “¿Keyej moneki amo se tachtekis?”.

  • Xikonilui keniuj tepaleuia maj kuali se monejnemilti. Uelis tikoniluis: “Komo timelaujkanemi, mitsitaskej ke titakuaujtamach”, oso “Komo titapoujkaita, mouan kinekiskej mouikaskej”.

 Xikonpaleui mochankauan maj kuali monejnemiltikan.

BIBLIA KIJTOUA: “Xiksentokakan ximoitakan keniuj nanmoajsij namejuan” (2 Corintios 13:5TNM).

  • Mochankauan moneki kimatiskej kichiuaskej tein kuali yetok uan amo tein amo kuali yetok. Ijkon, amo tionomeyolouas tikonijtos:

    • “Tejuan amo titakajkayauaj.”

    • “Tejuan amo titateuiaj nion tikintsajtsiliaj oksekin.”

    • “Tejuan amo titauijuikaltiaj.”

Nejon kipaleuis mokoneuj maj kiita ke moneki kuali monejnemiltis amo porin ijkon kinauatiaj, ta porin ichankauan kinixmatij ke kuali monejnemiltiaj.

  • Xikonilui mokoneuj ke kemej kalyetouanij nochipa nanmochikauaj kuali nanmonejnemiltiskej. Xikonilui ox kuali yetok tein kichiuaj akin iniuan momachtia oso tein kiita itech televisión. Xikontajtani: “¿Toni tikchiuaskia tejua?”, oso “¿Toni tikchiuaskiaj tejuan?”.

Xikonyolchikaua maj kichiuakan tein kuali yetok.

BIBLIA KIJTOUA: “Xichipaukanemikan [...] para ma amo mitsteluilis ika tajtakol de namotamachilis” (1 Pedro 3:16).

  • Xikonilui ke mitsonyolpaktia maj kuali monejnemiltikan. Keman mokoneuj kichiuas tein kuali, xikonilui ke kuali tein kichiuak uan no xikonilui keyej kuali yetok maj ijkon kichiuani. Uelis tikoniluis: “Semi kuali tein tikchiuak. Niyolpaki”. Komo mitsoniluia ke kichiuak tein amo kuali, achto ke tikonmelauas xikonilui ke kuali yetok maj mitsoniluiani.

  • Xikonmelaua keman kichiuaskej tein amo kuali. Xikonpaleui mokoneuj maj kimati ke moneki tanankilis ika tein kichiua. Konemej moneki kimatiskej toni amo kuali kichiujkej uan keyej ichankauan amo ijkon monejnemiltiaj. Seki tetatmej amo kintakakiltiaj ininkoneuan porin amo kinekij kinyolxokoliskej. Sayoj ke, keman kinmelauiliaj keyej amo kuali yetok tein kichiujkej kinpaleuis maj kuali taixejekokan uan maj amo kichiuakanok tein amo kuali.