Xionyoui kampa nesi tein kipia

Xionyoui kampa nesi tein kipia

 TAMACHTILIS 3

Maj amo se mosenkaua

Maj amo se mosenkaua

¿KENIUJ SE KINEXTIA?

Akin amo mosenkaua kisentoka yolpaki maski kipanoua se taman tein amo kuali. Momachtia amo mosenkauas ika tein kipanotiuj. Ijkon kemej se konetsin miakpa uetsi achto ke kuali nejnemis, no kipanos miak taman tein satepan kipaleuis maj okachi kuali kichiua teisa.

¿KEYEJ MOTELNEKI MAJ AMO SE MOSENKAUA?

Miakej konemej mosenkauaj keman amo kuali kichiuaj teisa, keman kipanouaj se ouijkayot oso keman kiniluiaj ke amo kuali tein kichiujkej. Oksekin senkis amo kinekij kichiuaskejok. Sayoj ke, moneki kiajsikamatiskej ke:

Komo mokoneuj momachtia amo mosenkauas, kipaleuis maj kimati keniuj kiixnamikis ouijkayomej keman ueyias.

¿KENIUJ TIKONMACHTIS MOKONEUAN MAJ AMO MOSENKAUAKAN?

Keman mokoneuan amo kuali kichiuaj teisa.

BIBLIA KIJTOUA: “Akin yolmelauak uelis uetsis hasta chikojpa, uan moajokuis” (Proverbios 24:16).

Xikonpaleui mokoneuj maj amo kinemili ke se taman tel ueyi kuejmol. Xikonnemili, ¿toni kichiuaskia komo amo kuali kichiuak se examen kampa momachtia? ¿Mosenkauaskia uan kijtoskia: “¡Nochipa nimopoloua!”?

Komo tikonpaleuia mokoneuj maj kinemili keniuj okachi kuali kichiuas teisa, tikonmachtis maj amo mosenkaua. Ijkon, amo moyolkokos uan kichiuas kemej moneki.

Sayoj ke, amo xikonyektali tein mokoneuj amo kuali kichiuak. Xikonpaleui maj yejua kiyektali. Uelis tikontajtanis: “¿Toni uelis mitspaleuis okachi xikajsikamati tein mitsmachtijtokej?”.

Keman panoua se ouijkayot.

BIBLIA KIJTOUA: “Amo nankimatij toni mochiuas mosta” (Santiago 4:14).

Amo tikmatij tein uelis techpanos satepan. Aksa akin kipia miak tomin, satepan xa amo kipiasok  oso aksa uelis kokolispeuas. Biblia kijtoua: “Akin tel tsikuinij amo tatanij itech tsikuinilis, nion akin tel chikaujkej tatanij itech neteuilis, [...] porin tonal uan tachiualis tein amo momattok nochin kinpanoua” (Eclesiastés 9:11).

Kemej tikontasojta mokoneuj, amo tikonkaua maj kipano teisa tein amo kuali. Sayoj ke, amo nochipa uelis tikonpaleuis maj amo kipano se ouijkayot.

Mokoneuj xa kipanos seki taman tein kitayokoltis, kemej ijkuak amo mouikasok iuan aksa oso keman momikilis se ichankauj. Yejua ika, xikonpaleui maj kiixnamiki nejon ouijkayomej. Nejon kipaleuis maj kimati toni kichiuas keman ueyias keman amo kipias tekit oso keman amo kipias tomin. *

Keman mokoneuan kiniluiaj keniuj okachi kuali kichiuaskej teisa.

BIBLIA KIJTOUA : “Xikaki tayolmajxitilis [...] uan ijkon timochiuas titamatkej satepan” (Proverbios 19:20).

Keman aksa kiluia mokoneuj keniuj okachi kuali kichiuas teisa, amo kichiua porin kineki kiyolxokolis, ta porin kineki kipaleuis maj kiyekchiua teisa.

Komo tikonpaleuia mokoneuj maj kichiua tein kiyolmajxitiaj, semi kipaleuis yejua uan tejuatsin. Se tepopaj akin monotsa John, kijtoua: “Komo nochipa tikonyektalia kuejmolmej tein kipia mokoneuj, amo keman kinyektalis iselti. Yejua kisentokas kipias okachi kuejmolmej, uan tejuatsin monekis tikonsentokas tikonyektalis. Nejon kichiuas amo xionyolpaki tejuatsin nion yejua”.

¿Keniuj uelis tikonpaleuis mokoneuj maj kichiua tein kiluiskej? Komo mokoneuj kiluiaj tamachtiloyan oso okseko keniuj okachi kuali kichiuas teisa, amo xikonilui ke amo monekia kiluiskej nejon. Okachi kuali, xikontajtani:

  • “¿Keyej tiknemilia ke mitsiluijkej nejon?”.

  • “¿Keniuj uelis tikchiuas?”.

  • “¿Toni uelis tikchiuas keman oksepa ijkon mitspanos?”.

Xikonelnamiki: komo mokoneuj kiluiaj keniuj okachi kuali kichiuas teisa, kipaleuis axkan uan no keman ueyias.

^ párr. 21 Xikonita tamachtilis “Ayude a su hijo a sobrellevar el dolor”, itech La Atalaya 1 de julio de 2008.