Xionyoui kampa nesi tein kipia

Xionyoui kampa nesi tein kipia

 ¿KEYEJ AMO KUALI TINEMIJ?

Tein kichiua maj amo kuali tinemikan

Tein kichiua maj amo kuali tinemikan

Moijtoua ke maski axkan tikpiaj miak taman tein techpaleuia maj kuali tinemikan, no moajsi miak taman tein uelis kichiuas maj amo uejkaua tami nochi tein onkak itech taltikpak. (Tein moteixmatiltij itech xiuit 2018 itech Foro Económico Mundial.)

MIAKEJ AKIN KIMATIJ TEIN AXKAN MOCHIUJTOK KINTEKIPACHOUA TEIN KINPANOS SATEPAN UAN TEIN KIPANOS TALTIKPAK. MAJ TIKITAKAN SEKI TAMAN TEIN TECHTAJYOUILTIA.

  • TEIKAMAUILTILIS ITECH INTERNET: Ompa Australia, itech se periódico moijtoua ke axkan Internet okachi tamouilil porin semi kitekitiltiaj akin ininka mauiltiaj konemej, akin temojmoujtiaj, akin kitemouaj takuejmolchiuaskej uan akin kiichtekij tein ompa se kitalia. Itech nejon periódico no moijtoua ke noyampa taltikpak okachi moajsij akin tetachtekiaj itech Internet uan kampa okachi miakej kichiuaj tein amo kuali.

  • MIAKEJ KIPANOUAJ TATASOJTILIS: Akin pouij itech se nechikol kampa kinpaleuiaj akin kipanouaj tatasojtilis, kijtojkej ke chikueyin akin okachi tominpiaj itech nochi taltikpak kipiaj nochi tomin tein kipiaskiaj 3,600 millones akin ouij moixpanoltiaj. Yejuan no kijtouaj ke tel amo kuali kemej moxeloua tomin, porin tominpianij okachi kitanij tomin uan akin ouij moixpanoltiaj okachi kipanouaj tatasojtilis. Siuamej akin okachi kijyouiaj nejon. Sekin kintekipachoua maj tel miakej taixnamikikan porin panoua nejon.

  • KEMAN MOCHIUA NETEUILIS UAN MIAKEJ KINTAJYOUILTIAJ: Itech xiuit 2018, sekin akin pouij itech se nechikol tein moixmati kemej Naciones Unidas uan kinpaleuiaj akin motepalotiaj itech okse xolal, kijtojkej: “Axkan tikitaj ke okachi miakej cholouaj okse xolal”. Panoua 68 millones kisanij kampa nemij porin ompa mochiujtok neteuilis oso kintajyouiltiaj. Itech nejon nechikol no kijtojkej: “Itech ome segundos, aksa choloua okse xolal”.

  • TEIN KIJTAKOUA TALTIKPAK: Itech xiuit 2018, no moteixmatiltij ke okachi amo miakej xochimej, koujmej uan tapialmej onkakej. No moijtoj ke okachi amo chipauak ejekat uan at, uan ke nejon uelis kichiuas maj okachi tikokolispeuakan. Uan no, itech seki uejueyi altepemej okachi amo miakej okuiltsitsin onkakej. Tamatinij kijtouaj ke nejon okuiltsitsin tapaleuiaj maj xochimej kitemakakan tatet. Komo ixpoliuij nejon okuiltsitsin uelis poliuiskej koujmej uan tapialmej.

¿Uelis titapaleuiskej maj kuali tinemikan? Sekin kinemiliaj ke moneki timomachtiskej keniuj tikchiuaskej. Komo ijkon, ¿toni tamachtilis moneki tikseliskej? Tiknankiliskej nejin netajtanilmej itech okseki tamachtilismej.